How To Access Wikipedia Offline - Kiwix

လွန်ခဲ့တဲ့ ၁၈ နှစ်ကျော် (ဇန်နဝါရီ ၁၅၊ ၂၀၀၁) က ဝီကီ (Wikipedia) ကို စပြီးအသက်ဝင်ခဲ့တယ် ဆိုပေမယ့် ၂၀၀၇ ခုနှစ်မှာမှ ထဲထဲဝင်ဝင် စဖတ်ဖြစ်ခဲ့တယ်။ အဲ့မတိုင်ခင်က ကွန်ပျူတာဆိုတာ ကောင်းကောင်းမသုံးတတ်သလို အင်တာနက် ဆိုတာလည်း လက်လှမ်းမမှီသေးဘူး။

လက်ရှိအချိန်ထိ ဝီကီမှာ မြန်မာဘာသာနဲ့ ရေးထားတဲ့ ဆောင်းပါးပေါင်း က ၅၀၀၀၀ မပြည့်သေးပေမယ့် အင်္ဂလိပ်လို ရေးထားတဲ့ ဆောင်းပါးပေါင်းက သန်းနဲ့ချီရှိနေပြီ။ ဆိုတော့ ကိုယ်သိချင်တဲ့ အကြောင်းအရာ တစ်ခုခုကို အချိန်တိုအတွင်း အဖြေရှာတွေ့ချင်ရင် ဝီကီကို အားကိုးတာ အသင့်တော်ဆုံးပဲ။ ဝီကီကို စဖတ်ဖြစ်ခဲ့တဲ့နောက်ပိုင်း ဒီဝီကီရဲ့ ဝက်ဘ်စာမျက်နှာတိုင်းကို ဒေါင်းလုပ်ချပြီး သိမ်းထားလို့ရရင် ဘယ်လောက်များ ကောင်းမလဲလို့ မကြာခဏတွေးမိတယ်။ Website Grabber တွေနဲ့ လက်တွေ့ဒေါင်းလုပ်ချကြည့်ဖို့လည်း ကြိုးစားဖူးတယ်။ ဒါပေမယ့် Database ပမာဏ အရမ်းများတဲ့ Website တစ်ခုကို ဒေါင်းလုပ်ချဖို့ဆိုတာ ကိုယ့်မှာရှိတဲ့ 500GB Hard Disk နဲ့ ဘယ်လိုလုပ်ဖြစ်နိုင်မှာလဲ။

ဒါပေမယ့် တကယ်လိုချင်နေတဲ့သူအတွက်တော့ အဖြေဆိုတာရှိတယ်။ Wikipedia ကို Offline Access နဲ့ ကြည့်လို့ရအောင် စီစဉ်ပေးထားတဲ့ Kiwix ဆိုတာရှိတယ်လေ။ သူ့ကိုရှာတွေ့တော့ စိတ်ချမ်းသာလိုက်တာ။ တစ်ခါတစ်လေ နယ်တွေဘာတွေ ခရီးသွားလို့ အင်တာနက်မရှိတဲ့နေရာကို ရောက်တဲ့အခါ တစ်ခုခုသိချင်တဲ့အချိန်တိုင်း ဝီကီမှာဆို ရှာလို့ရမှာလို့ အမြဲတွေးမိတယ်။ ကိုယ်နဲ့ ကံအကြောင်း တိုက်ဆိုင်လို့ကြုံရတဲ့ ကလေးတွေကိုလည်း မင်းတို့သိချင်တာရှိရင် ဒီမှာရှာလို့ရတယ်ဆိုတာ ပြောပြချင်တယ်။ ဒေါင်းလုပ်ချရမယ့် ပမာဏကလည်း သိပ်အများကြီး မဟုတ်ဘူး။ မြန်မာလိုရေးထားတဲ့ ဝီကီစာမျက်နှာတွေကို Offline ကြည့်နိုင်ဖို့ဆိုရင် ဒေါင်းလုပ်ချရမယ့် ပမာဏက 286MB (2019/5) ပဲရှိတယ်။ အင်္ဂလိပ်လို Wikipedia စာမျက်နှာ (ဓာတ်ပုံအပါ) အားလုံးလိုချင်တာဆိုရင်တော့ ဒေါင်းလုပ်ချရမယ့် ပမာဏက နည်းနည်းများသွားမယ်။ 79GB (2018/10) ရှိတယ်။ ဒါပေမယ့် Website Grabber တွေနဲ့ ဒေါင်းလုပ်ချတာထက်စာရင် ဒီနည်းက ပိုပြီးထိရောက်တယ်။ တစ်ခြား ကိုယ်ဖတ်နိုင်တဲ့ ဘာသာတွေနဲ့ ဒေါင်းလုပ်ချထားချင်တယ်ဆိုရင်လည်း ဒီနေရာမှာ အစုံရှိတယ်။ တစ်ခုရှိတာ ဒေါင်းလုပ်မချခင် အများသူငါ မေးလေ့ရှိတဲ့ မေးခွန်းတွေ ကိုတော့ ကြိုဖတ်ကြည့် ထားသင့်တယ်။

အခုဆိုရင် Wikipedia က ကိုယ့်လက်တစ်ကမ်းမှာရှိနေပြီ။ လေ့လာကြည့်ပါ ပြီးတော့ ကိုယ့်ရဲ့အတွေ့အကြုံ လေးတွေကိုလည်း မှတ်ချက်ပြုပေးပါ။

သုခီအတ္တာနံ ပရိဟရန္တု။
၂၆-၇-၂၀၁၉
၁၅၂၇

Creative Commons Licenses and Their Usages

Creative Commons အကြောင်းရေးဖို့ လွန်ခဲ့တဲ့ (၄)လလောက်က စိတ်ကူးစရတယ်။ စိတ်ကူးရမိခြင်းရဲ့ အကြောင်းက ဖတ်နေကျ Digital Inspiration မှာ Which Creative Commons License is Right for me?ဆိုတဲ့ ဆောင်းပါးကို ဖတ်မိခဲ့ရာကနေ စတယ်လို့ ဆိုရမယ်။ ဘယ်နေရာကြည့်ကြည့် CopyRight ဆိုတာတွေ တအားပေါများနေတဲ့ ခေတ်မှာ Creative Commons License ဆိုတာလေး ရှိနေသေးတာက စိတ်ထဲမှာ နည်းနည်းလေး အသက်ရှုချောင်သွားသလို ခံစားရတယ်။ 

ဘာလို့လည်းဆိုတော့ ကိုယ်ကိုယ်တိုင်က ခုချိန်ထိ Creative ဖြစ်တဲ့ အဆင့်ကို မတက်နိုင်သေးဘူး။ တက်ဖို့ ကြိုးစားနေတဲ့ အဆင့်မှာပဲ ရှိသေးတယ်။ ခုလိုချိန်ထိ စုတုပြုတွေ အများကြီး လုပ်နေရတုန်း။ အရင် ဘလော့စရေးချိန်ကဆိုရင် စုတုပြုတောင် မလုပ်နိုင်ဘူး။ ခိုးကူးရူး အဆင့်နဲ့ စခဲ့တာ။ အခုလည်း ဘလော့မှာရေးသမျှ အကြောင်းအရာတွေကို ပုံတူကူးတာ၊ ဘာသာပြန်ရေးတာမျိုး တတ်နိုင်သမျှ နည်းအောင်နဲ့ ကိုယ့်အတွေ့အကြုံနဲ့ ကိုယ်ရေးနိုင်တဲ့ အနေအထားရောက်အောင် ကြိုးစားနေတယ်။ 

ဒါပေမယ့် ခုချိန်ထိ ဘလော့မှာ သုံးထားတဲ့ နည်းပညာပိုင်းဆိုင်ရာ Screenshots တွေ၊ Screencasts တွေက အင်တာနက်ကနေ Creadit ပေးပြီး ယူသုံးနေရဆဲပဲ။ ဒီနေရာမှာ Creadit ပေးတယ်လို့ လွယ်လွယ်ပြောလိုက်ပေမယ့် Creadit ပေးတယ်ဆိုတဲ့ စကားကို ဘယ်လောက်ထိ နှိုက်နှိုက်ချွတ်ချွတ် နားလည်ထားသလဲလို့ မေးလာရင် ရိုးသားစွာနဲ့ "ဟင့်အင်း" လို့ပဲ ဖြေရလိမ့်ဦးမယ်။ ဒါကြောင့် ကိုယ့်အားနည်းချက်ကို ကိုယ့်ဘာသာကိုယ် ပြင်ဆင်နိုင်ဖို့ နဲ့ နောင်တစ်ချိန်မှာ ပြောင်းလဲလာတော့မယ့် နည်းပညာရေစီးကြောင်းမှာ အလိုက်သင့် မျောပါနိုင်ဖို့ Creative Commons License ရဲ့ သဘောတရားနဲ့ အသုံးပြုနည်းတွေကို လိုက်ရှာဖတ်ခဲ့တယ်။ 

ဖတ်ပြီးလို့ အတန်အသင့် နားလည်ခဲ့တဲ့နောက်မှာ နားလည်တဲ့အတိုင်း လက်ဆင့်ကမ်းနိုင်ဖို့ စိတ်ကူးထပ်ရတယ်။ ဒါပေမယ့် ဒီအကြောင်းကို စမရေးခင် ကိုယ့်အရင် အင်တာနက်ထဲ ဘယ်သူများ ရေးထားဖူးတာရှိမလဲဆိုပြီး ရှာကြည့်လိုက်တော့ ကံကောင်းထောက်မစွာနဲ့ ပန်ဒိုရာဘလော့မှာ ကိုပုထုဇဉ် တစ်ချိန်က ရေးခဲ့တဲ့ Creative Commons License အကြောင်း ဆောင်းပါးတွေ ဝေမျှထားတာ တွေ့ခဲ့ရတယ်။ မူရင်းစာရေးသူ ကိုပုထုဇဉ်ဘလော့ကတော့ မရှိတော့ဘူး။ ရှိမလားလို့လည်း Google မှာ နည်းမျိုးစုံနဲ့ ရှာကြည့်သေးတယ်။ မတွေ့ခဲ့ဘူး။ အဲ့တော့ သူ့နာမည်ကိုပဲ Credit ပေးနိုင်တော့တယ်။ ပြန်လည်ဝေမျှပေးတဲ့ ပန်ဒိုရာဘလော့ က စာရေးသူကိုလည်း အထူးကျေးဇူးတင်မိပါတယ်။ သူသာ တဆင့်ပြန်ပြီး မဝေမျှခဲ့ရင် အင်တာနက်ထဲမှာ ဒီလိုအဖိုးတန်တဲ့စာ ရှိခဲ့ပါလားဆိုတာတောင် သိခွင့်ရမှာ မဟုတ်ဘူး။ 

စာရေးသူ ကိုပုထုဇဉ်ဟာ Creative Commons License နဲ့ပတ်သတ်ပြီး စာဖတ်သူနားလည်အောင် သူတတ်နိုင်တဲ့အစွမ်းနဲ့ အချိန်အမြောက်အများပေးပြီး ကြိုးစားခဲ့တာ တွေ့ရတယ်။ တကယ်ကို အံ့သြဝမ်းသာမိပါတယ်။ သူ့ကြိုးစားမှုကြောင့် နားမလည်သေးတာတွေ အများကြီး နားလည်ခဲ့ရသလို ဒီအကြောင်းအရာကို လေ့လာချင်မယ့် သူတွေအတွက်လည်း မပျောက်မပျက်ရအောင် PDF စာအုပ် တစ်ခု အဖြစ် ဖန်တီးဖို့ ဆုံးဖြတ်ခဲ့ပါတယ်။

တစ်ခုရှိတာ ဒီစာအုပ်ထဲမှာပါတဲ့ အကြောင်းအရာတွေက ၂၀၀၈ ခုနှစ် ပတ်ဝန်းကျင်လောက်မှာ ရေးခဲ့တာဆိုတော့ သဘောတရားရေးရာ မပြောင်းလဲပေမယ့် အချက်အလက်ပိုင်းဆိုင်ရာ Update ဖြစ်ဖို့ မသေချာတော့ဘူး။ Creative Commons licenses နဲ့ပတ်သတ်ပြီး လက်ရှိ Update ဖြစ်တဲ့ အကြောင်းအရာကို လေ့လာချင်ရင်တော့ CC Poland က Comic poster ကို အောက်မှာ ဖော်ပြပေးထားပါတယ်။ 

 
စာအုပ်ကိုတော့ အများသူငါ ဖတ်ရလွယ်အောင်နဲ့ လိုအပ်ရင် ဒေါင်းလုပ်ချပြီး သိမ်းထားနိုင်အောင် Google Drive မှာ တင်ပေးထားတယ်။ အောက်မှာ ယူနိုင်ပါတယ်။

TechSectors.

10 URLs That Every Google User Should Know

တစ်ခုခုကို Google မှာ ရှာတိုင်း လိုအပ်တာနဲ့ အနီးစပ်ဆုံး ထပ်တူကျနိုင်တဲ့ ကြော်ငြာတွေ ဘယ်ကနေ ရောက်လာသလဲ ? အရင်ကရောက်ခဲ့တဲ့ နေရာကတွေကို ကိုယ်ကိုယ်တိုင်က မမှတ်မိပေမယ့် Google ကဘာလို့ အကုန်မှတ်မိနေရတာလဲ ? မတော်လို့များ Administrator Password မေ့သွားခဲ့သော် ဘယ်လိုဆက်လုပ်ရမလဲ ? ကိုယ်က ဘာစိတ်ဝင်စားတယ် ဆိုတာ Google က ဘယ်လိုဆုံးဖြတ်သလဲ ? နောင်တစ်ချိန်မှာ Google နဲ့ အဆက်ဖြတ်ဖို့ ဆုံးဖြတ်မိရင် Google Services မှာသိမ်းထားမိတဲ့ ကိုယ့် ​ဒေတာတွေကို ဘယ်လိုပြန်ယူရမလဲ ?

Google ကို အားကိုးအားထားပြုပြီး ရပ်တည်နေကြတဲ့ သူတိုင်း သိထားသင့်တဲ့ နေရာ (၁၀) ခုအကြောင်း မိတ်ဆက်ပေးပါရစေ။ 

၁။ ပုံမှန် Google Account သစ်တစ်ခု လုပ်မယ်ဆိုရင် @gmail.com နဲ့ ဆုံးတဲ့ address ပဲ ရမယ်ဆိုတာ အားလုံး သိကြတယ်။ တကယ်လို့ ကိုယ့်မှာ အရင်တည်းက သုံးနေတဲ့ Email Address တစ်ခုရှိနေပြီး အဲ့ဒီ့ Email နဲ့ပဲ Google Account တစ်ခု ဖန်တီးဖို့ မဖြစ်နိုင်ဘူးလား။ ဖြစ်နိုင်ပါတယ်။ အောက်မှာ ဖော်ပြထားတဲ့ Special URL ကနေသွားရင် ကိုယ်သုံးနေတဲ့ တစ်ခြား Email Address တစ်ခုကို Google Username အဖြစ်ဖန်တီး အသုံးပြုနိုင်ပါတယ်။

https://accounts.google.com/SignUpWithoutGmail

၂။ Google ကနေပြီး ကိုယ်နေ့စဉ် လည်ပတ်သွားလာခဲ့တဲ့ နေရာတွေ၊ Google+ Account မှာ ထည့်သွင်းထားတဲ့ ဒေတာတွေနဲ့ တစ်ခြား အချက်အလက်တွေပေါ် အခြေခံပြီး လူတစ်ယောက်ချင်းစီ အတွက် သီးသန့် Profile တွေ နောက်ကွယ်မှာ ဖန်တီးထားပါတယ်။ ရည်ရွယ်ချက်ကတော့ အသုံးပြုသူဟာ အသက်ဘယ်လောက်ရှိပြီလဲ၊ ကျားလား-မလား၊ ဘာတွေ စိတ်ဝင်စားတတ်လဲ ဆိုတာပေါ် အခြေခံပြီး ရှာဖွေသူရဲ့ လိုလားချက်နဲ့ ကိုက်ညီမယ့် ads တွေ ဖော်ပြပေးနိုင်ဖို့ ဖြစ်ပါတယ်။ အောက်မှာ ဖော်ပြထားတဲ့ URL ကိုသွားကြည့်ပါ။ အင်တာနက်မှာ ကိုယ့်အပေါ် သုံးသပ်ထားတဲ့ Google ရဲ့ အမြင်ကို တွေ့ရှိရပါလိမ့်မယ်။

https://www.google.com/ads/preferences/

၃။ Google ကို သုံးခဲ့တဲ့ အချိန် ကြာလာတာနဲ့အမျှ ကိုယ်နဲ့ သက်ဆိုင်တဲ့ ဒေတာတွေကလည်း အနည်းနဲ့ အများ Google ရဲ့ ​ Products အသီးသီးမှာ ပျံ့နှံ့ ကုန်ကြတယ်။ ဥပမာပြရရင် - Gmail Messages တွေ၊ ဓာတ်ပုံတွေ၊ Contacts တွေ နောက် Youtube Videos တွေ ...။ ဒါတွေအားလုံးကို နောင်တစ်ချိန်မှာ အသုံးချနိုင်ဖို့ Backup လုပ်ထားချင်ရင် ဘယ်နည်းလမ်းကို သုံးကြမလဲ။ အဲ့အတွက် တစ်ခုတည်းသော အဖြေက Google Takeout ပါ။ တစ်နေရာတည်းက ကိုယ့် အကောင့်နဲ့ ပတ်သတ်သမျှ ဒေတာ အားလုံး ဒေါင်းလုပ်ချနိုင်ပါတယ်။

https://www.google.com/takeout

၄။ ကိုယ်ဖန်တီးထားတဲ့ ကိုယ်ပိုင်အကြောင်းအရာတွေ၊ ကိုယ့် Products တွေကို ကိုယ့်ကိုယ်အသိမပေးပဲ တစ်ခြားတစ်နေရာမှာ သုံးနေတာတွေ့ရရင် DMCA ဥပဒေ (Digital Millennium Copyright Act) အရ Google မှာ ဖယ်ရှားပေးဖို့ တောင်းဆိုနိုင်သလို အဲ့ဒီ့ Websites ကို Google Search Results ကနေ ပျောက်သွားတဲ့အထိ အရေးယူပေးဖို့ အကူအညီ တောင်းခံနိုင်ပါတယ်။ 

https://support.google.com/legal

၅။ Android Device တစ်ခုခုကနေ အင်တာနက် သုံးဖြစ်နေတယ်ဆိုရင် အဲ့ဒီ့ Devices တွေက ကိုယ့်ရဲ့ လက်ရှိတည်နေရာ၊ တစ်နေရာကနေ တစ်နေရာကို သွားနေတယ်ဆိုရင်လည်း ဘယ်လောက် အမြန်နှုန်းနဲ့ သွားနေတယ် ဆိုတာတွေထိ Google Servers ဆီကို လှမ်းပြီး Report လုပ်ကြပါတယ်။ အဲ့တာကို လေ့လာချင်ရင် အောက်ဖော်ပြပါ URL ကနေသွားကြည်ပါ။ ကိုယ့်ရဲ့ Location History ကို ရက်အလိုက် လအလိုက် ပြန်တွေ့ရပါလိမ့်မယ်။ ဒီအချက်အလက်တွေကို KML files အနေနဲ့ Export လုပ်ထားနိုင်ပြီး Google Earth မှာ ပြန် အသုံးပြုနိုင်ပါတယ်။

https://maps.google.com/locationhistory

၆။ ကိုယ့်အကောင့်ထဲကို Login ဝင်ထားတဲ့အချိန် Search Boxes မှာ ရိုက်ပြီး ရှာခဲ့သမျှတွေ ကိုယ် Click ခဲ့သမျှ Google ad တွေကိုလည်း Google ကနေ Log တစ်ခုနဲ့ မှတ်ထားတတ်သေးတယ်။ Google ဘာတွေမှတ်ထားသလဲ ဆိုတာကို အောက်က Links တွေကနေ ကြည့်ကြည့်ပါ။

https://history.google.com
https://history.google.com/history/audio

၇။ Google Account တစ်ခု ဖန်တီးထားရင် အနည်းဆုံးတော့ ကိုးလမှာ တစ်ကြိမ် Login ဝင်ပေးဖို့ လိုပါတယ်။ အဲ့လိုမှမဟုတ်ရင် Google ရဲ့ Program Policies အရ အကောင့်ကို ဖျက်သိမ်းခွင့် ရှိပါတယ်။ အကောင့်တစ်ခုတည်းရှိပြီး အဲ့တာကိုပဲ အမြဲသုံးတဲ့သူတွေအတွက် ပြဿနာမဟုတ်ပေမယ့် ကိုယ့်မှာ တခြား Google Accounts တွေရှိပြီး ပုံမှန် ဝင်မကြည့်ဖြစ်ဘူးဆိုရင် ဖျက်သိမ်းခံရတာမျိုး မဖြစ်ရအောင် လက်ရှိ ကိုယ်အမြဲသုံးဖြစ်တဲ့ အကောင့်ကို Secondary Accounts ရဲ့ Trusted Content အနေနဲ့ ထားသင့်ပါတယ်။ အဲ့လိုဆိုရင် အချိန်ကာလတစ်ခုရောက်တိုင်း ဒုတိယအကောင့်ကို Login ဝင်ပေးဖို့ Google ကနေ အသိပေးပါလိမ့်မယ်။ 

https://www.google.com/settings/account/inactive

၈။ တစ်စုံတစ်ယောက်က ကိုယ့် Google Account ကို ဝင်သုံးမှာကိုများ စိတ်မပူမိကြဘူးလား။ ဒီခံစားချက်ကိုတော့ လူတိုင်း ခံစားဖူးကြမှာပါ။ အောက်မှာ ပေးထားတဲ့ Activity Report ကိုသွားကြည့်ပါ။ ကိုယ့် Google Account ကို ဘယ်နေရာကနေ ဘာ Devices သုံးပြီးဝင်ခဲ့တယ်ဆိုတာ ပြန်တွေ့ရပါလိမ့်မယ်။ ကိုယ်မဟုတ်တဲ့ သူတစ်ယောက် တစ်ခြားနေရာကနေ အသုံးပြုနေတာ တွေ့ရမယ်ဆိုရင် IP address နဲ့ ခန့်မှန်းတည်နေရာကိုပါ သိရှိနိုင်တာကြောင့် လိုအပ်ရင် Password ကို အမြန်ပြောင်းထားဖို့ လိုပါလိမ့်မယ်။ 

https://security.google.com/settings/security/activity

၉။ တစ်ခါတစ်လေမှာ အမှုမဲ့အမှတ်မဲ့နဲ့ Web apps တွေ Browser extensions တွေ Google Scripts တွေနဲ့ တခြား Mobile apps တွေကို ကိုယ့်ကိုယ်စား Read or Write access ပေးမိတာမျိုး ရှိတတ်တယ်။ Google User တစ်ယောက် ဖြစ်လာရင် ဒီအချက်ကို Control လုပ်နိုင်ဖို့ လိုပါတယ်။ အောက်မှာဖော်ပြထားတဲ့ နေရာမှာ စစ်ဆေးကြည့်ပါ။ ဘယ် အရာတွေကို ဘယ်လောက်ထိ Permission level ပေးထားမိတယ်ဆိုတာ ပြန်တွေ့ရပါလိမ့်မယ်။ ကိုယ့်အတွက် မလိုအပ်တာတွေကို Revoke Access လုပ်ထားဖို့ အကြံပြုပါရစေ။ 

https://security.google.com/settings/security/permissions

၁၀။ ဒီအောက်ဆုံး တစ်ခုကတော့ Google App Users များအတွက်ပါ။ အကြောင်းတစ်စုံတစ်ရာကြောင့် ကိုယ့် Google Account သူများလက်ထဲ ရောက်သွားတယ်ဆိုရင် အောက်မှာ ဖော်ပြထားတဲ့ Secret link ကနေတဆင့် ကိုယ့်ရဲ့ Admin password ကို Reset ပြန်လုပ်နိုင်ပါတယ်။ 

https://admin.google.com/domain.com/VerifyAdminAccountPasswordReset

domain.com ဆိုတဲ့ နေရာမှာ ကိုယ့် Web Domain အမည်ကို ထည့်သွင်းပေးရပါမယ်။

TechSectors.

How To Sync Any Folder To Dropbox Easily

Cloud Storage နဲ့ ပတ်သတ်ရင် ခုချိန်ထိ Dropbox ကိုပဲ စွဲစွဲမြဲမြဲ သုံးနေဖြစ်သေးတယ်။ ခုချိန်မှာ Dropbox ထက် Storage Space ပိုပေးနိုင်တဲ့ တခြား Services တွေ အများကြီး ရှိနေပြီ ဆိုပေမယ့် ခုချိန်ထိ Dropbox ကိုပဲ စွဲစွဲမြဲမြဲ သုံးဖြစ်နေရတဲ့ အကြောင်းက သုံးရလွယ်တယ်။ သစ္စာရှိတယ်။ အလကားသုံးနေတဲ့ User ပဲ ဆိုပြီး ဘယ်တော့မှ ပြစ်ပြစ်ခါခါ မလုပ်တတ်ဘူး။ လွန်ခဲ့တဲ့ ၅ နှစ်နီးပါးလောက်က Dropbox နဲ့ စရင်းနှီးခဲ့ပြီး အကောင့်တစ်ခု စလုပ်ခဲ့တယ်။ ပိုက်ဆံပေးမသုံးနိုင်တော့ အလကားရတဲ့ 2GB ပမာဏလေးကို ကိုယ့်အတွက် မဖြစ်မနေ အရေးကြီးပြီး ပျောက်ပျက်လို့ မရတဲ့ Data တွေ သိမ်းခဲ့တယ်။ ကိုယ့်နိုင်ငံကို ပြန်မယ်လုပ်တော့ အဲ့ဒေတာတွေ အားလုံး ပြန်ယူခဲ့ပေမယ့် အကောင့်ထဲ ကိုတော့ အရေးကြီးတဲ့ ဒေတာတွေကလွဲရင် ကျန်တာတွေ မဖျက်ခဲ့ဘူး။ 

ဖျက်ဖို့လည်း မလိုအပ်ဘူးလေ။ Cloud Storage Service ပေးတဲ့နေရာ အတော်များများက ပုံမှန်အားဖြင့် သူ့တို့ Service ကို Access မလုပ်တာ တစ်လနဲ့ အထက်ကြာပြီ ဆိုရင် အဲ့လို Active မဖြစ်တဲ့ အကောင့်တွေကို ဖျက်ပစ်တတ်ကြတယ်။ ဒါပေမယ့် ကျွန်တော် ထင်ခဲ့တာ ဒီတစ်ခါတော့ မှားတယ်။ Dropbox ကတော့ အဲ့လို မဟုတ်ဘူး။ ကျွန်တော့်အတွက် မလိုအပ်တော့တဲ့ အကောင့်တစ်ခုကို မသုံးခဲ့တာ ၃ နှစ်နီးပါး ကြာပေမယ့် လုံးဝမဖျက်ခဲ့သလို အထဲက ဒေတာတွေကလည်း နဂိုအတိုင်း အရာမယွင်း ကျန်နေခဲ့သေးတယ်။

ဒါ့ကြောင့်လည်း အတော်များများက Cloud Storage ဆို Box တို့ Google Drive တို့ SkyDrive တို့ ရှိပေမယ့် Dropbox ကိုပဲ အရင်ဆုံး ပြေးမြင်ကြတယ်။ ခုလို အားသာချက်တွေ Dropbox မှာ ရှိပေမယ့် တကယ်တမ်း Dropbox ကို သုံးကြတဲ့အခါ လူတိုင်းနီးပါး ဘဝင်မကျဖြစ်ရတဲ့ အချက်တစ်ချက်လည်း ရှိသေးတယ်။ အဲ့တာက ကိုယ့်စက်ထဲကနေ Cloud Storage ပေါ် တင်ချင်တဲ့ Files တိုင်း Folders တိုင်းကို Dropbox Sync folder ထဲ သွားသွားထည့်ရတဲ့ အချက်ပဲ။ Dropbox ကလည်း သူ့ဖိုဒါထဲကို လာထည့်တဲ့ ဖိုင်တွေ ဖိုဒါတွေကိုပဲ Synchronize လုပ်ပေးတယ်။ ဒီကြားထဲ ကိုယ်က စက်ထဲမှာရှိတဲ့ Directories အမျိုးမျိုးက ဖိုင်တွေ ဖိုဒါတွေကို Dropbox Account နဲ့ ချိတ်ပြီး Synchronize လုပ်ချင်ရင် ပိုပြီးအာရုံနောက်ရတယ်။ 

အဲ့တာတွေ အားလုံးကို ပြေလည်စေတဲ့ တစ်ခြားနည်းလမ်း ရှိတယ်ဆိုတာ အရင်က လုံးဝမသိခဲ့ဘူး။ ဒါပေမယ့် ခုချိန်မှာ အဲ့လောက်ထိ မခက်ခဲတော့ဘူး။ ဒီအခက်အခဲကို ပြေလည်စေမယ့် Third-party Windows application လေးတစ်ခု တွေ့ထားတာ ရှိတယ်။ Dropbox Folder Sync လို့ခေါ်တယ်။ သူက Symbolic Link လို့ခေါ်တဲ့ Reference File အမျိုးအစားကို သုံးထားတယ်။ ဘာနဲ့ အနီးစပ်ဆုံး တူသလဲဆို Windows တိုင်းမှာ အမြဲလိုလို တွေ့ရတဲ့ Shortcut files လိုမျိုးပဲ။ ဒီနေရာမှာ မြင်နေရတဲ့ ဖိုင်က နောက်တစ်နေရာမှာ ရှိတဲ့နေရာကို ပြန်ညွှန်းတယ်။ ဒီနည်းနဲ့ Directories တစ်ခုစီက ကိုယ် Synchronize လုပ်ချင်တဲ့ ဖိုင်တွေ ဖိုဒါတွေကို Dropbox folder နဲ့ ချိတ်ဆက်ပေးတယ်။

Dropbox Folder Sync ရဲ့ အလုပ်လုပ်ပုံ အသေးစိတ်ကို Features in detail ဆိုတဲ့ ခေါင်းစဉ်အောက်မှာ ဖတ်ကြည့်နိုင်တယ်။ သုံးပုံသုံးနည်းကလည်း တအားကို ရိုးရှင်းတယ်။ Dropbox Folder Sync ကို တင်ပြီး တစ်ခြား Directories အသီးသီးက ကိုယ် Synchronize လုပ်ချင်တဲ့ ဖိုင်တွေ ဖိုဒါတွေကို Right Click ကနေတဆင့် Dropbox Folder Sync > Sync with Dropbox ဆိုပြီး နှိပ်လိုက်ရင် ရပြီ။ 

တကယ်လို့ နောက်ပိုင်း Synchronize မလုပ်ချင်တော့ရင် နဂို Synchronize လုပ်ခဲ့တဲ့ Directory ကိုပြန်သွားပြီး Right Click ကနေတဆင့် Dropbox Folder Sync > Unsync with Dropbox ပြန်လုပ်လို့ ရတယ်။ အဲ့လို လုပ်လိုက်ရင် Symbolic Link ကိုဖျက်ပြီး မူလနေရာကို နဂိုအခြေအနေအတိုင်း ဖိုဒါ ပြန်ရောက်လာလိမ့်မယ်။ 

Dropbox Folder Sync ကို Windows XP, Vista, 7, 8 နဲ့ 8.1 တွေမှာ သုံးလို့ရတယ်။ ဒါပေမယ့် Network Drives တွေမှာတော့ သုံးလို့ မရဘူး။

TechSectors.

The Best Services for Large Files Sharing

အင်တာနက်ထဲမှာ အကြောင်းတစ်စုံတစ်ရာကြောင့် တစ်စုံတစ်ခုကို တစ်စုံတစ်ယောက် ဆီ အွန်လိုင်းကနေ ပို့ချင်တယ်ဆိုရင် ပုံမှန်ကျွန်တော်တို့ လုပ်ဆောင်နေကျ လုပ်ထုံးလုပ်နည်း (၂)မျိုးရှိပါတယ်။ အဲ့ဒါက - 

• ကိုယ်ပို့ချင်တဲ့ ဖိုင်ဟာ အရွယ်အစားသိပ်ကြီးကြီးမားမား မဟုတ်ဘူးဆိုရင် Email နဲ့အတူ တွဲပြီးပို့တယ်။ 
• တကယ်လို့ ကိုယ်ပို့ချင်တဲ့ဖိုင်က Email နဲ့ တွဲလို့ရလောက်တဲ့ ပမာဏထက် ကျော်နေမယ်ဆိုရင် File Hosting Service တစ်ခုခုမှာ Upload တင်ပြီး ရလာတဲ့ Link ကို လက်ခံမယ့်သူဆီ ပို့တယ်။ 

ဖော်ပြခဲ့တဲ့ နည်းလမ်း(၂)ခုက ပုံမှန်အားဖြင့် ကျွန်တော်တို့ လုပ်ဆောင်နေကျ နည်းတွေပါ။ ဒီနည်းတွေကို အွန်လိုင်းမှာ Sharing လုပ်ဖူးတဲ့ သူတော်တော်များများ အကျွမ်းတဝင် ရှိကြတယ်။ ပထမနည်းကို သုံးမယ်ဆိုရင် Email နဲ့အတူ ဖိုင်တွဲပြီး ပို့နိုင်ဖို့ Web Email Services တွေကနေ Attach လုပ်ဖို့ သတ်မှတ်ထားတဲ့ File Size Limit တွေကို သိထားဖို့ လိုလာတယ်။ ဥပမာ - Gmail နဲ့ Outlook က Email နဲ့ Files တွေ Attachment လုပ်မယ်ဆိုရင် ဖိုင်တစ်ခုကို အများဆုံး 25 MB အထိ ခွင့်ပြုထားတယ်။ (ဒါပေမယ့် အဲ့တာက နိုင်ငံရပ်ခြားမှာ နေတဲ့ သူတွေအတွက်လောက်ပဲ သေချာတာ။ မြန်မာနိုင်ငံမှာ ကျွန်တော်တို့လို ဖုန်းကလာတဲ့ အင်တာနက်နဲ့ စာရေးစာဖတ် လုပ်တဲ့သူတွေအတွက်က 5 MB လောက်တောင် Attach လုပ်ဖို့ မလွယ်ဘူး။) 

တကယ်လို့ ကိုယ်ပို့ချင်တဲ့ ဖိုင်က 25 MB ထက် ကျော်နေပြီ ဆိုပါစို့။ ဒီလိုဆို လုပ်လို့ရတဲ့ တစ်နည်းက HJ-Split လိုမျိုး File-Splitting Utility တစ်ခုခုသုံးပြီး အပိုင်းပိုင်းခွဲ၊ နောက်ပြီး ရလာတဲ့ အပိုင်းတွေကို Messages ပေါင်းများစွာ ဖန်တီး Attach လုပ်ပြီး လက်ခံမယ့်သူဆီပို့။ လက်ခံတဲ့သူက အဲ့ဖိုင်တွေကို တစ်ခုချင်းစီ ဒေါင်းလုပ်ချ။ နောက်ပြီး ပြန်ပေါင်း။ ဖတ်ရတာတောင် တော်တော် ခေါင်းရှုပ်စရာ ကောင်းတယ်။ အဲ့လိုအဆင့်များ အလုပ်ရှုပ်တဲ့ နည်းတွေ မသုံးချင်တော့ နောက်ပိုင်းမှာ Email နဲ့အတူ ဖိုင်ပို့ချင်တယ် ဆိုရင် ဒုတိယနည်း ဖြစ်တဲ့ Online Storage Services တွေ( ဥပမာ - Dropbox - Google Drive – OneDrive …) ကျွန်တော်တို့ သုံးလာကြတယ်။ 

သူတို့တွေကိုသုံးရင် ရလာမယ့် အားသာချက်က ဖိုင်တစ်ခု 25 MB ဆိုတဲ့ ကန့်သတ်ချက် ကျွန်တော်တို့ မေ့ထားလို့ရတယ်။ Microsoft OneDrive ဆိုရင် Limit အနေနဲ့ ဖိုင်တစ်ခုကို 2 GB အထိ Upload တင်ဖို့ ခွင့်ပြုတယ်။ သူနဲ့အပြိုင် Google Drive က ဖိုင်တစ်ခုကို 1 TB (1000 GB) ထိ ခွင့်ပြုတယ်။ အဲ့လောက်နဲ့မှ အဆင်မပြေပဲ ကိုယ် Upload တင်ချင်တဲ့ File Size က ပုံမှန်ထက်ကို ကြီးလွန်းနေတယ်ဆိုရင် File Size ကန့်သတ်ချက် လုံးဝမထားတဲ့ Dropbox ကို ကျွန်တော်တို့ သုံးလို့ရတယ်။

ဖော်ပြပြီးခဲ့တဲ့ Online Storage Services တွေက အလကားသုံးလို့ရတယ် ဆိုပေမယ့် သူတို့ကို သုံးချင်တယ်ဆိုရင် အနည်းဆုံးတော့ Register လုပ်ရတယ်။ အဲ့လိုမှမဟုတ်ဘဲ Register လုပ်စရာမလိုတဲ့ Online Storage Service ကိုမှ သုံးချင်တယ်ဆိုရင် ကျွန်တော်တို့တွေ WeTransfer လို့ခေါ်တဲ့ Freemium Web App ကို သုံးလို့ရတယ်။ WeTransfer ကိုသုံးမယ်ဆိုရင် ကိုယ်ပို့ချင်တဲ့ဖိုင်ကို Browser ကနေတဆင့် File Size 2 GB အထိ Upload တင်နိုင်တယ်။ Register လည်း လုပ်စရာမလိုဘူး။ လိုတာဆိုလို့ ပို့သူနဲ့ လက်ခံမယ့်သူရဲ့ Email လိပ်စာ ထည့်ပေးရတာပဲရှိတယ်။ တကယ်လို့ ကိုယ် Upload တင်ထားတဲ့ဖိုင်ကို လက်ခံမယ့်သူက ချက်ချင်း Download မချဖြစ်ရင်တောင် အချိန်ရတဲ့အခါ Download ယူနိုင်ဖို့ (၇) ရက်ကြာတဲ့ထိ Server ပေါ်မှာ သိမ်းထားပေးတယ်။ 

အခုပြောခဲ့တဲ့ နည်းတွေထဲက Dropbox - Google Drive – OneDrive - WeTransfer စတဲ့ ဘယ် Online Storage Services ကိုပဲ သုံးသုံး သေချာတာက ကိုယ်ပို့ချင်တဲ့သူဆီ ကိုယ်ပို့ချင်တဲ့ ဖိုင်ရောက်ဖို့ ကျွန်တော်တို့အားလုံး မဖြစ်မနေ Upload အရင်တင်တဲ့ အဆင့်ကို ဖြတ်သန်း ရမယ်။ အဲ့အဆင့်ပြီးတော့မှ ရလာတဲ့ Links ကို Share ပြန်လုပ်ပြီး တစ်ဖက်လူက ဒေါင်းလုပ် ပြန်ချရတယ်။ အဲ့တော့ အခက်ခဲဆုံး အဆင့်ဖြစ်တဲ့ Upload တင်တဲ့အဆင့်ကို Bypass လုပ်ပြီး ကိုယ်ပို့ချင်တဲ့ဖိုင်ကို တစ်ဖက်လူဆီရောက်အောင် လုပ်လို့ရတဲ့နည်း မရှိနိုင်ဘူးလား။ ရှိမယ် ဆိုရင် Upload တင်စရာမလိုတော့ ကျွန်တော်တို့အတွက် ပိုကောင်းတာပေါ့။ 

အဲ့အတွက် JustBeamIt ရှိတယ်။ သူက Peer-to-Peer App တစ်ခုပဲ။ တစ်ချိန်က ကျွန်တော်ရေးခဲ့ဖူးတဲ့ What is Torrent? ဆိုတဲ့ ခေါင်းစဉ်အောက်မှာ Peer-to-Peer နဲ့ ပတ်သတ်ပြီး ဖော်ပြခဲ့ဖူးတာရှိတယ်။ Peer-to-Peer ဆိုတာ အင်တာနက်ထဲမှာ ကိုယ်ပို့ချင်တဲ့ဖိုင်ကို ကိုယ်ပို့ချင်တဲ့သူဆီရောက်အောင် ဘယ်နေရာကိုမှ Upload တင်စရာ မလိုဘဲ ကွန်ပြူတာတစ်ခုနဲ့ တစ်ခုကြား တိုက်ရိုက်ပို့တဲ့နည်းကို ခေါ်တာပါ။ JustBeamIt ကိုသွားပြီး ကိုယ်ပို့ချင်တဲ့ဖိုင်ကို Drag and Drop ဆွဲထည့်လိုက်ရင် ချက်ချင်း Link တစ်ခု ရလာလိမ့်မယ်။ အဲ့ဒီ့ Link ကို Share လုပ်ပြီး တစ်ဖက်လူက Click ပေးလိုက်တာနဲ့ ကိုယ့်ကွန်ပြူတာထဲက ပို့ချင်တဲ့ဖိုင်ကို တစ်ဖက်ကွန်ပြူတာကနေ တိုက်ရိုက် Download ဆွဲလိမ့်မယ်။ 

နောက်ဆုံးတစ်ခုကတော့ Infinit - သူကတော့ JustBeamIt နဲ့ သဘောတရားချင်း ဆင်ပြီး Web App မဟုတ်တဲ့ Desktop Application တစ်ခုပါ။ သူလည်းပဲ Peer-to-Peer နည်းကို သုံးတယ်။ သူ့ကို သုံးမယ်ဆိုရင် ပို့ချင်တဲ့ဖိုင်ကို Infinit app ထဲ Drag ဆွဲထည့်၊ ကိုယ်ပို့ချင်တဲ့သူ ကို Contacts ထဲကနေ ရွေးပြီး တစ်ဖက်လူက Incoming File Request ကို လက်ခံတာနဲ့ File Transfer လုပ်ငန်းစတယ်။ Infinit ရဲ့ နောက်ထပ်ကောင်းတဲ့ အချက်တစ်ခုက Resumable Download ပေးထားတယ်။ ဆိုလိုတာ File Transfer လုပ်နေတုန်း Internet Connection ကျသွားတာမျိုး၊ မီးပျက်သွားတာမျိုး ဖြစ်ခဲ့ရင် တစ်ကနေပြန်စပြီး ပို့စရာမလိုပဲ ရောက်တဲ့ နေရာကနေ ဆက်ပို့နိုင်အောင် Application က လုပ်ပေးနိုင်တယ်။ နောက်ပြီး Network တူတဲ့သူ အချင်းချင်း ကွန်ပြူတာတစ်လုံးကနေ နောက်တစ်လုံးကို ဖိုင်ပို့ချင်တဲ့အခါ Infinit ကိုသုံးမယ်ဆိုရင် Local Area Network ကနေ သွားတာမို့လို့ File Transfer လုပ်တာ အရမ်းမြန်တယ်။ လိုအပ်တာတစ်ခုက Infinit ကိုသုံးပြီး Peer-to-Peer နည်းနဲ့ File Transfer လုပ်မယ်ဆိုရင် ပေးပို့သူနဲ့ လက်ခံမယ်သူနှစ်ဦးစလုံးရဲ့ စက်မှာ Infinit App သွင်းထားဖို့ လိုပါတယ်။ 

နောက်ဆုံးနည်းလမ်း တစ်ခုအနေနဲ့ ကျွန်တော်တို့ ရင်းနှီးပြီးသား Skype App သုံးပြီး Documents, Photos, Videos နဲ့ တစ်ခြား ပမာဏကြီးတဲ့ဖိုင်တွေကို Internet ကနေတဆင့် ပေးပို့နိုင်ပါတယ်။ သူလည်း Peer-to-Peer နည်း သုံးထားလို့ File Size Limit ကန့်သတ်ချက် မရှိပါဘူး။ အခုဖော်ပြခဲ့သလောက်ဆို အင်တာနက်ထဲမှာ အလွယ်တကူ ဖိုင်ပို့ချင်တဲ့သူတွေ အတွက် အတိုင်းအတာတစ်ခုထိ ဒီ Article က ကူညီပေးနိုင်လိမ့်မယ်လို့ မျှော်လင့်မိပါတယ်။ 

TechSectors.

Get High Resolution Bing Pictures From Official Bing Gallery

နေ့စဉ် အင်တာနက်ထဲဝင်တိုင်း ကျွန်တော်တို့ အမြဲရောက်ဖြစ်တဲ့ နေရာတစ်ခုစီတော့ ရှိကြမှာပါ။ Google တို့ Facebook တို့တော့ မဆိုလိုဘူးပေါ့။ နေ့တိုင်းနီးပါး ရောက်ဖြစ်တဲ့ နေရာတွေထဲကမှ ကျွန်တော်အမြဲတမ်း တကူးတကသွားဖြစ်တဲ့ နေရာတစ်ခုကို ပြောပါဆိုရင် Bing ရဲ့ Homepage လို့ပဲ ပြောရမယ်။

 

Search Engine နဲ့ ပတ်သတ်ရင် အရင်က Google ကို အသုံးများပေမယ့် ခုနောက်ပိုင်းမှာ Bing ကိုမကြာခဏ သုံးဖြစ်လာတယ်။ အကြောင်းက မနက်ဘက် အင်တာနက်သုံးဖို့ Browser ဖွင့်လိုက်တာနဲ့ အမြဲရိုးရိုးစင်းစင်းလှနေတတ်တဲ့ ပုံလေးတွေကို ကျွန်တော်မြင်ချင်လို့။ တစ်ခါတစ်လေ အကြောင်းတိုက်ဆိုင်ရင် ကိုယ့်မြန်မာနိုင်ငံက အထင်ကရနေရာတွေရဲ့ ဓာတ်ပုံတွေကို Bing ရဲ့ Homepage မှာ တွေ့ရတတ်သေးတယ်။

အရင်ကတော့ Bing ရဲ့ Homepage ကို နေ့တိုင်းသွားသွားကြည့်ပြီး သဘောကျတဲ့ပုံတွေ့ရင် နောက်ပိုင်း Wallpaper အနေနဲ့ ပြန်သုံးလို့ရအောင် Save လုပ်ထားဖြစ်တယ်။ ပုံမှန်အားဖြင့် Bing ရဲ့ Homepage မှာ တင်ထားတဲ့ ပုံကို သိမ်းချင်ရင် ပုံမှန်ကျွန်တော်တို့ လုပ်နေကျ Right Click ထောက်ပြီး Save as လုပ်တာမျိုးတော့ လုပ်လို့ မရနိုင်ဘူး။ ဒါပေမယ့် Firefox မှာတော့ Right Click ထောက်ပြီး View Background Image ကနေတစ်ဆင့် ဖွင့်လိုက်ရင် မူရင်းပုံကို Save Image As နဲ့ သိမ်းလို့ရတယ်။

အခုဆိုရင် Bing ရဲ့ Homepage မှာ တင်ထားတဲ့ ပုံတွေကို လူကြိုက်များလာတော့ အဲ့ဒီ့ပုံတွေကို အလိုလျောက် Download ချပေးမယ့် Free tool တွေ ပေါ်လာတာရှိသလို လူကြိုက်များတဲ့ ပုံတွေကိုချည်းစုပြီး Windows Themes အနေနဲ့ Microsoft က ပေးတာမျိုးလည်း ရှိလာတယ်။ အဲ့လိုမှမဟုတ်ပဲ ကိုယ်သဘောကျရာကို စိတ်ကြိုက်ရွေးပြီး Wallpapers အနေနဲ့ သိမ်းထားချင်တယ်ဆိုရင် Bing ရဲ့ Official Homepage Gallery မှာ တရားဝင်ဒေါင်းလုပ်ချလို့လည်း ရနိုင်တယ်။

Bing Homepage Gallery ရဲ့ အားသာချက်က နေ့တိုင်း Bing ကိုသွားကြည့်ပြီး Save Image As လုပ်နေစရာမလိုဘူး။ ပုံတိုင်းကို ဒေါင်းလုပ်ချနေစရာလည်း မလိုဘူး။ ပုံပေါင်းမြောက်များစွာထဲကနေမှ နေရာ၊ အရောင်၊ ဒေသ စသဖြင့် စိတ်ကြိုက်ရွေးပြီး လိုချင်တဲ့ပုံကို ရှာကြည့်နိုင်တယ်။

လိုချင်တဲ့ပုံတွေ့ပြီဆိုရင် Click ပေးလိုက်တဲ့အခါ ပုံသေးကနေ ပုံကြီး ပြောင်းသွားမယ်။ အဲ့မှာ ပုံရဲ့အကြောင်းအရာ အတိုချုပ်ကို ရှင်းပြထားတာ ရှိသလို တစ်ခါတည်း ဒေါင်းလုပ်ချချင်ပြီဆိုရင် ညာဘက်အောက်ထောင့်နားက Download Button ကိုနှိပ်ပြီး ယူလို့ရတယ်။

အဲ့မှာ တစ်ခါတစ်လေ ဒေါင်းလုပ်တန်းကျတာရှိသလို ရံဖန်ရံခါ ပုံပဲပွင့်လာပြီး Save as လုပ်ရတာလည်း ရှိတယ်။ တကယ်လို့ Bing ရဲ့ လက်ရှိ Homepage ကို Windows Desktop Background အဖြစ်သုံးချင်တယ်ဆိုရင် Bing Desktop client ကို Download ချပြီး သုံးနိုင်သေးတယ်။ စာဖတ်သူဟာ Windows သုံးသူဖြစ်ဖြစ် Mac User ပဲဖြစ်ဖြစ် Bing Homepage Gallery ကို တစ်ခေါက်လောက်တော့ သွားကြည့်ပါ။ စိတ်ချမ်းမြေ့စရာတစ်ခုခုတော့ ရနိုင်လိမ့်မယ်လို့ ယုံကြည်မိပါတယ်။

TechSectors.

How to analyze the performance of web page

အရင်ရက်တွေက အင်တာနက်ထဲ စာလိုက်ဖတ်ရင်း Google Labs ရဲ့ Page Speed Online ဆိုတဲ့ Web-based Tool တစ်ခုအကြောင်း ဖတ်ခဲ့ရတယ်။ အင်တာနက်နဲ့ အဆက်ပြတ်ခဲ့တဲ့နောက်ပိုင်း စာလည်းမရေးဖြစ်သလို တော်တော်များများကိုလည်း လိုက်မဖတ်နိုင်တော့ဘူး။ တစ်ခါတစ်လေ အချိန်ရလို့ ဖတ်ဖြစ်ရင်တောင် LifeHacker နဲ့ HowToGeek လောက်ပဲ ရောက်ဖြစ်တော့တယ်။

အရင်ကဖြစ်ချင်သလိုဖြစ် ပစ်ထားတဲ့ ဘလော့မှာ ခုနောက်ပိုင်း စာပြန်ရေးဖြစ်တော့ အတတ်နိုင်ဆုံး ကောင်းသထက်ကောင်းအောင် ပြင်ဖို့ကြိုးစားမိတယ်။ အထူးသဖြင့်တော့ Web pages တွေရဲ့ Performance တွေ တက်လာအောင်ရယ်၊ Devices မျိုးစုံကနေ ကြည့်လို့ အဆင်ပြေဖို့ရယ် အဲ့ဒီ နှစ်ချက်ကို အဓိက အသားပေးပြီး ပြင်ဖြစ်တယ်။ အဲ့လိုပြင်ဖို့ကြိုးစားတဲ့နေရာမှာ ကိုယ့် ဘလော့ရဲ့ Performance ကို စစ်ဖို့ Page Speed Online က ကူညီပေးနိုင်တာ တွေ့ရတယ်။ သူက ကိုယ့်ဘလော့ရဲ့ Page Speed ကို စစ်ပေးယုံတင်မက ပိုမြန်လာအောင် ပြင်ဖို့လိုတဲ့ အချက်တွေကိုလည်း Suggestions ပေးသေးတယ်။

Page Speed Online ကို အချိန်မရွေး ကြိုက်တဲ့ Browser နဲ့ ဖွင့်ပြီး သုံးနိုင်တယ်။ သူ့ကိုဖန်တီးရခြင်းရဲ့ အဓိကရည်ရွယ်ချက်က Website owners တွေအတွက် ကိုယ့် Website ရဲ့ Page Speed Performance ကိုသိနိုင်ဖို့နဲ့ အကယ်၍ Speed Performance နည်းနေတယ်ဆိုရင် ပိုမြန်လာအောင် လုပ်ဆောင်နိုင်မယ့် နည်းလမ်းတွေကို Suggestions ပေးနိုင်ဖို့ ဖန်တီးထားတာပါ။ နောက်ပြီး Page Speed Online နဲ့ Websites တွေရဲ့ Page Speed ကိုစစ်မယ်ဆိုရင် Desktop ကကြည့်တဲ့အချိန်မှာ ရနိုင်မယ့် Page Speed နဲ့ Smartphones ကနေကြည့်ရင်ရမယ့် Page Speed ကိုပါခွဲခြားဖော်ပြပေးပါတယ်။

ဒီဘက်ခေတ်မှာ အရင်လို Desktop, Laptop ဆိုတာထက် တန်ဖိုးအားဖြင့် သက်သာပြီး သယ်ရသုံးရ လွယ်တဲ့ Mobile Devices တွေက ပိုပြီးတွင်တွင်ကျယ်ကျယ် သုံးလာကြတာမို့လို့ ဘလော့ရေးသူတွေ အနေနဲ့လည်း ကိုယ့်ဘလော့ကို ပြင်ဆင်တဲ့နေရာမှာ Mobile Performance ကောင်းနိုင်အောင် ထည့်သွင်းစဉ်းစားထားဖို့ လိုပါတယ်။

ကိုယ့်ဘလော့ရဲ့ Speed တက်လာနိုင်ဖို့ Page Speed Online ကနေပေးတဲ့ အကြံပြုချက်တွေထဲက Should Fix: ခေါင်းစဉ်ခွဲအောက်မှာ ပါဝင်တဲ့ အချက်တွေကို အဓိကထား ပြင်ပေးဖို့လိုသလို ပြင်ဆင်ဖို့အတွက် စဉ်းစားသင့်တဲ့ အချက်တွေ သီးသန့်ဖော်ပြထားတဲ့ Consider Fixing: အောက်က အချက်တွေကိုလည်း အရေးပေး စဉ်းစားသင့်ပါတယ်။ အကယ်၍များ စာဖတ်သူဟာ ဘလော့ရေးသူတစ်ယောက် ဒါမှမဟုတ် Webmaster တစ်ယောက် ဖြစ်ခဲ့မယ်ဆိုရင် Page Speed Online ရဲ့ အကူအညီနဲ့ ကိုယ့်ဘလော့ရဲ့ စွမ်းဆောင်ရည်ကို အခုပဲ စစ်ဆေးကြည့်ပါ။

မြန်မာနိုင်ငံကနေ အင်တာနက်သုံးသူတွေအတွက်တော့ Proxy သုံးဖို့ လိုကောင်းလိုပါလိမ့်မယ်။

သုံးရလွယ်ပြီး Portable ဖြစ်တဲ့ UltraSurf သုံးနိုင်ပါတယ်။

TechSectors.

Test Your Blog from Various Conditions

Blogger.com ကို စပြီး အခြေချမိတာ ၂၀၀၇ ခုနှစ် နှစ်လယ်ပိုင်းလောက်က ဖြစ်လိမ့်မယ်။ Blogging Platform အမျိုးမျိုး မြည်းစမ်းခဲ့ဖူးပေမယ့် နောက်ဆုံးတော့ ဒီ Blogger ကို ပြန်ရောက်ခဲ့တာပဲ။ ကျွန်တော့်စိတ်ထဲ အရှိအတိုင်း ပြောရရင် Google ကပေးတဲ့ Blogger Service က ရိုးသားတယ်လို့ ထင်မိတယ်။ ဒီစိတ်ကလည်း Blogger ရေးတဲ့သက်တမ်း (၇)နှစ်ကျော်မှာ ခံစားမိတာမို့လို့ မှားနိုင်စရာမရှိဘူး။ စီးပွားရေးအတွက်ရည်ရွယ်ပြီး ရေးတဲ့ ဘလော့မဟုတ်လို့ ဒီဘလော့ကနေ ငွေကြေးအကျိုးအမြတ်တစ်စုံတစ်ရာ မရခဲ့ဖူးသလို ဘလော့အပြင်အဆင်ပိုင်းဆိုင်ရာနဲ့ Custom Doamin Name ဆိုတာတွေကိုလည်း စိတ်ရှိသလို မဖန်တီးနိုင်ခဲ့ဘူး။ Hosting ဝယ်ရေးဖို့ဆိုတာကတော့ အဝေးကြီးပါ။
 
ဒါပေမယ့် ကွန်ပြူတာနည်းပညာကို ငွေကုန်ကြေးကျသက်သာစွာနဲ့ ထဲထဲဝင်ဝင် လေ့လာလိုသူတွေအတွက် တစ်ဖက်တစ်လမ်းကနေ တတ်စွမ်းသရွေ့ အထောက်အကူပြုနိုင်အောင် ကျွန်တော့်ဘလော့ကို အကြိမ်ပေါင်းများစွာ ပြင်ဆင်ခဲ့ပါတယ်။

• Zawgyi နဲ့ ရေးတဲ့ ဘလော့အဆင့်ကနေ Unicode အဆင့်ဖြစ်အောင် ဖန်တီးတယ်။
• ယူနီကုတ်ဘလော့ ဖြစ်သွားတော့ Browsers တိုင်းကနေ စာဖတ်သူရဲ့ စက်ထဲမှာ Unicode မရှိရင်တောင် ဘလော့ကို ဖတ်ဖို့အဆင်ပြေနိုင်အောင် Font Embed လုပ်နိုင်ဖို့ ကြိုးစားခဲ့တယ်။
• Templates မျိုးစုံပြောင်းပြီး Screen sizes အမျိုးမျိုး၊ Resolutions အမျိုးမျိုး၊ Desktops, Tablets နဲ့ Mobile screens အမျိုးမျိုးက ကြည့်ဖို့ အဆင်ပြေအောင် ကြိုးစားခဲ့တယ်။

ပညာရှင်တစ်ယောက် မဟုတ်တဲ့အပြင်၊ ငွေကုန်ကြေးကျမခံနိုင်တဲ့ ဘလော့ဂါတစ်ယောက်အနေနဲ့ ဒီအခက်အခဲတွေ အားလုံးနီးပါး ပြေလည်အောင် နာရီပေါင်းများစွာ ရင်းနှီးခဲ့ရတယ်ဆိုတာ ကျွန်တော့်ဇနီးကလွဲပြီး ဘယ်သူမှ မသိနိုင်ပါဘူး။ တကယ်လို့ စာဖတ်သူဟာ Webmaster တစ်ယောက် ဒါမှမဟုတ် Blog/Website တစ်ခုကို ဖန်တီးရေးသားနေတဲ့ စာရေးသူတစ်ယောက် ဖြစ်ခဲ့မယ်ဆိုရင် ကျွန်တော် ဖြတ်သန်းခဲ့ရတဲ့ အခက်အခဲတွေကြားထဲက တတိယမြောက်အခက်အခဲကိုလည်း မလွဲမသွေ ဖြတ်သန်းခဲ့ကြဖူးမှာပါ။
 
ကိုယ့်မှာဘလော့တစ်ခုလည်း ရှိနေပြီ ပင်တိုင်စာဖတ်ပရိတ်သတ်လည်း အတိုင်းအတာတစ်ခုထိ ရလာပြီဆိုရင် စာရေးသူတစ်ယောက်အနေနဲ့ ကိုယ်သုံးထားတဲ့ Theme/Template က Screen sizes အမျိုးမျိုး၊ Resolutions အမျိုးမျိုး၊ Desktops, Tablets နဲ့ Mobile screens အမျိုးမျိုးနဲ့ ကြည့်ဖို့အဆင်ပြေရဲ့လားဆိုတာ မဖြစ်မနေ စမ်းသပ်ကြည့်ထားသင့်ပါတယ်။ အထူးသဖြင့် Templates ကို Responsive web design သုံးထားတဲ့သူတွေအနေနဲ့ ကိုယ့်ဘလော့က Resolutions မျိုးစုံမှာ မြင်ရမယ့်အနေအထား အဆင်ပြေမှုရှိ/မရှိ သိထားဖို့ ပိုအရေးကြီးပါတယ်။
 
ဒီဘက်ခေတ်မှာ လူဖတ်များ လူဝင်များတဲ့ ထိပ်တန်း websites တော်တော်များများ Responsive web design ကိုသုံးလာကြတယ်။ ဘာလို့လည်းဆိုတော့ Responsive web design က ကိုယ့်ဘလော့/ဝက်ဘ်ဆိုဒ်ကို ဘယ်လို Devices မျိုးနဲ့ပဲကြည့်ကြည့် လိုက်လျောညီထွေဖြစ်အောင် ဖန်တီးပေးနိုင်တယ်။ အားလုံးသိထားပြီးတဲ့အတိုင်း Screen resolution ဆိုတာ ပုံနဲ့စာတွေကို ဘယ်လောက်ထိ ကြည်ကြည်လင်လင် ပြတ်ပြတ်သားသား ဖော်ပြနိုင်လဲဆိုတာ ရည်ညွှန်းတာမို့လို့ ကိုယ့်စက်ရဲ့ Resolution က 1600 x 1200 pixels ထက်များတယ်ဆိုရင် Screen မှာပေါ်မယ့် စာနဲ့ ရုပ်ပုံတွေကို ထင်ထင်ရှားရှား မြင်ရမယ်။ တကယ်လို့ Screen resolution က 800 x 600 pixels ထပ်နည်းမယ် ဆိုရင်တော့ ကိုယ်သုံးထားတဲ့ Theme/Template က လိုက်လျောညီထွေ ဖန်တီးမပေးနိုင်ရင် Screen ပေါ်မှာ ဘာစာလုံးကိုမှ ပြတ်ပြတ်ထင်ထင် မမြင်ရတော့ဘူး။ ကိုယ်ဖတ်ချင်တာ မြင်ရဖို့ အချိန်တိုင်း Zoom ဆွဲပြီး ဖတ်ရလိမ့်မယ်။ Responsive web design က ဒီအခက်အခဲကို ပြေလည်အောင် ကူညီပေးနိုင်တယ်။ Screen sizes အမျိုးမျိုး၊ Resolutions အမျိုးမျိုး နဲ့ Devices အမျိုးမျိုးပေါ်မူတည်ပြီး Screen နဲ့ Fit ဖြစ်အောင် လုပ်ပေးနိုင်တဲ့အပြင် Articles တွေကိုလည်း စာဖတ်သူ ထင်ထင်ရှားရှား ကြည့်နိုင်အောင် စီစဉ်ပေးနိုင်တယ်။
 
Test Your Blog from Various Conditions
 
တကယ်တမ်းတော့ ကိုယ့်ဘလော့က Devices အမျိုးမျိုး အခြေအနေအမျိုးမျိုးမှာ ဘယ်လိုပုံပေါက်နေမယ်ဆိုတာ သိနိုင်ဖို့မလွယ်ဘူး။ တော်ယုံလူတစ်ယောက် အများဆုံး ဆောင်ထားနိုင်ရင် ဖုန်းတစ်လုံး၊ Laptop တစ်လုံးနဲ့ Tablet တစ်လုံးပေါ့။ အဲ့ဒီ့ သုံးမျိုးလောက်နဲ့ ဘလော့တစ်ခုရဲ့ ပုံပန်းသဏ္ဍန်ကို အတည်ပြုဖို့ဆိုတာ မဖြစ်နိုင်ဘူး။ အဲ့လိုအခက်အခဲ ဖြစ်လာရင် ကျွန်တော်တို့ ဘလော့တွေကို Screen sizes အမျိုးမျိုးနဲ့ Resolutions အမျိုးမျိုး မှာ ဘယ်လိုအနေအထား ဖြစ်နေမယ်ဆိုတာ စမ်းသပ်ကြည့်နိုင်တဲ့ Online Testers တွေကို အားကိုးကြည့်ပါ။ စိတ်ကျေနပ်လောက်စရာ အဖြေ တစ်ခု ရလာပါလိမ့်မယ်။
 
Quirktools.com/screenfly
 
သူကတော့ လူသုံးအများဆုံး Online resolution testers တွေထဲက တစ်ခုပါ။ Screenfly က Resolutions အမျိုးမျိုး ကို Support ပေးတဲ့အပြင် TV, Tablets, Mobile Phones, Notebooks နဲ့ Desktops အမျိုးမျိုးနဲ့လည်း ကိုယ့်ဘလော့ရဲ့ အနေအထားကို ကြည့်ရှုခွင့်ပေးပါတယ်။ အခြေအနေအမျိုးမျိုးမှာ ရှိနေနိုင်မယ့် TechSectors ရဲ့ သွင်ပြင်ပုံပန်းသဏ္ဍန်ကို ဒီနေရာကနေ လေ့လာကြည့်ပါ။
 

 
Screenfly နဲ့ ဘလော့တစ်ခုကို စမ်းသပ်ကြည့်ချင်မယ်ဆိုရင် URL ကို Copy ကူး - သူပေးထားတဲ့ နေရာမှာ ထည့်ပြီး စမ်းယုံပါပဲ။ စက္ကန့်ပိုင်းအတွင်း Devices အမျိုးမျိုးနဲ့ ပြောင်းလဲကြည့်ရှုခွင့် ရပါလိမ့်မယ်။
 

 
TestSize
 
TestSize ကတော့ ဘလော့တွေကို Resolutions အမျိုးမျိုးနဲ့ ကြည့်ရှုနိုင်တဲ့ သမားရိုးကျ Web app တစ်ခုပါပဲ။ သူ့ကိုသုံးမယ်ဆိုရင် Resolutions ကို Manually ချိန်ညှိပြီး ကြည့်နိုင်သလို Screen size အနေအထား အတိုးအလျော့လုပ်ပြီးလည်း ကြည့်နိုင်ပါတယ်။
 

 

Screen-Resolution.com
 
Screen-Resolution ကလည်း ဘလော့တွေကို Resolutions အမျိုးမျိုးနဲ့ စမ်းသပ်ကြည့်ဖို့ သင့်တော်တဲ့ Tool တစ်ခုပါ။ တစ်ခြား Testing Tools တွေနဲ့ မတူတာက သူ့မှာ Screen-Resolution ကို ချိန်ညှိနိုင်တဲ့ Resolution options တွေကို အောက်ဘက်မှာ ထင်သာမြင်သာ ဖော်ပြပေးထားတယ်။ Screen-Resolution က Internet Explorer တွဲသုံးမှ ပိုအဆင်ပြေပါတယ်။ တစ်ခြား Browsers တွေ ဥပမာ- Chrome, Firefox တို့နဲ့ တွဲသုံးရင် Pop up Windows နဲ့ တက်လာပါလိမ့်မယ်။ သူ့ကို စမ်းသုံးကြည့်မယ်ဆိုရင် အရင်ဆုံး Screen-Resolution ကို Internet Explorer နဲ့ ဖွင့်ပြီး ကိုယ်စမ်းချင်တဲ့ ဘလော့ကို URL နေရာမှာထည့်စမ်းနိုင်ပါတယ်။
 

 
စာရေးသူတစ်ယောက်အနေနဲ့ ကိုယ့်ဘလော့မှာလေ့လာနေတဲ့ စာဖတ်သူတွေ အခြေအနေအမျိုးမျိုးမှာ စိတ်ပျက်ငြီးငွေ့ မသွားအောင် ဖန်တီးပေးနိုင်ဖို့ အဓိကအရေးကြီးတာမို့လို့ စာဖတ်သူဟာ စာရေးသူတစ်ယောက် ဖြစ်နေခဲ့မယ်ဆိုရင် အပေါ်မှာဖော်ပြခဲ့တဲ့ Online Testers တွေနဲ့ စမ်းသပ်ပြီး ဘလော့ကို အကောင်းဆုံးဖြစ်အောင် တည်ဆောက်သွားကြဖို့ အကြံပြုတိုက်တွန်းလိုပါတယ်။
 
Maung Zin.

The easiest way to create PDF

PDF Format က ကွန်ပြူတာသုံးပြီး အလုပ်လုပ်နေကြရတဲ့ ရုံးသမားတွေ၊ ကျောင်းသူ/ကျောင်းသားတွေ၊ လုပ်ငန်းခွင်ဝင်နေတဲ့သူတွေအတွက် မသုံးမဖြစ်တဲ့ Format တစ်ခုလို့ဆိုရင် မှားမယ်မထင်ဘူး။ ဘာလို့လည်းဆိုတော့ ကျွန်တော်တို့အားလုံးရဲ့ ကွန်ပြူတာထဲမှာ ရှိနေတဲ့ Fonts တွေက စက်တစ်ခုနဲ့ တစ်ခု မတူကြဘူး။
 
ဆိုကြပါစို့ ... ကျွန်တော့်ကွန်ပြူတာထဲက Word နဲ့ဖန်တီးထားတဲ့ Document တစ်ခုကို USB ထဲထည့်ပြီး တစ်ခြား Print ထုတ်မယ့် စက်တစ်ခုမှာသွားတပ်ပြီးဖွင့်ရင် ကိုယ့် Document မှာ သုံးထားတဲ့ Fonts အတိုင်း တစ်ခြားစက်မှာပေါ်ဖို့ဆိုတာ မသေချာဘူး။ စက်တစ်ခုနဲ့တစ်ခုက သွင်းထားတဲ့ Fonts အမျိုးအစား ကွာခြားချက်ရှိတော့ ကိုယ်ရိုက်ထားတုန်းကအမှန်၊ သူ့စက်ရောက်တော့မှ လေးထောင့်ကွက်တွေ ဖြစ်ချင်ဖြစ်နိုင်သလို ကွိကွိကွကွစာတွေလည်း ဖြစ်ကောင်းဖြစ်သွားနိုင်တယ်။
 

 
အထူးသဖြင့် မြန်မာစာလုံးသုံးပြီး ရိုက်ထားတဲ့ Documents တွေမှာပိုပြီးတော့ အဖြစ်များတယ်။ အင်္ဂလိပ်စာလုံးတော်တော်များများက Font တစ်မျိုးမရှိလည်း တစ်ခြား Font တစ်မျိုးနဲ့ အစားထိုးဖော်ပြနိုင်ပေမယ့် Unicode တန်းမဝင်တဲ့ မြန်မာစာလုံးတွေမှာ မြန်မာစာလုံးချင်းတူတာတောင် တစ်ခုနဲ့တစ်ခု အစားထိုးပြီး ဖော်ပြမပေးနိုင်ကြဘူး။
အဲ့လိုပြဿနာမျိုးဖြစ်လာတဲ့အခါ ကိုယ့် Document မှာ သုံးထားတဲ့ Font အတိုင်း တစ်ခြားစက်မှာ ပေါ်နိုင်အောင် သူ့စက်ကို Fonts မျိုးစုံသွင်းဖို့ ကြိုးစားတာထက် ကိုယ့် Document ကို PDF format ပြောင်းထားပြီးမှ တစ်ခြားစက်မှာဖွင့်တာ ပိုအဆင်ပြေပါလိမ့်မယ်။ အဲ့တော့ ကိုယ်ဖန်တီးထားတဲ့ Document တစ်ခုကို PDF format ဖြစ်အောင် ပြောင်းလဲရမယ့် နည်းလမ်း ကျွန်တော်တို့ သိထားဖို့လိုလာတယ်။
 
Install a Virtual PDF Printer
 
ပထမနည်းအနေနဲ့ Virtual PDF Printer တစ်ခု ဖန်တီးပြီး Document တွေကို PDF အဖြစ် ပြောင်းလဲတဲ့နည်းလမ်းရှိပါတယ်။ PDF format ပြောင်းဖို့လေးတစ်ခုတည်းအတွက်နဲ့ ဘာကြောင့် Virtual PDF Printer တစ်ခုကို သီးသန့်ထပ်သွင်းရလဲဆို ကျွန်တော်တို့သုံးနေတဲ့ Windows မှာ PDF format ကိုပြောင်းပေးနိုင်တဲ့ ကောင်းကောင်းကန်းကန်း Built-in PDF Printer ဘာတစ်ခုမှ မပါဘူး။ Virtual PDF Printer အမျိုးမျိုးရှိတဲ့ထဲက လူသုံးများတာ CutePDF Writer ပါ။ အရင်တုန်းကတော့ ကျွန်တော် DoPDF တို့ PrimoPDF တို့သုံးတယ်။ နောက်တော့ NovaPDF သုံးတယ်။ သူတို့တွေလည်း Virtual PDF Printer တွေပဲ။ တစ်ခုချင်းစီမှာ အားသာချက်၊ အားနည်းချက်တွေတော့ ကိုယ်စီရှိတယ်။
 
တစ်ချို့ Virtual PDF Printer တွေက Freeware မဟုတ်ဘူး။ တစ်ချို့က ခုနောက်ပိုင်း တွင်ကျယ်လာတဲ့ Unicode စာလုံးတွေကို PDF ပြောင်းတဲ့အချိန်မှာ ပုံစံမှန်မှန်နဲ့ ဖော်ပြမပေးနိုင်ဘူး။ သူ့အတွက် သုံးနည်းကလည်း လွယ်တယ်။ Software ကို Install လုပ်ပြီး ကိုယ် PDF ပြောင်းချင်တဲ့ Document တစ်ခုကိုဖွင့်ထား၊ နောက်ပြီး Ctrl+P နှိပ်လိုက်တာနဲ့ အောက်မှာ ဖော်ပြထားသလို Box မျိုးတက်လာပြီး အဲ့ကနေမှတဆင့် Print ကိုနှိပ်လိုက်ရင် ကျွန်တော်တို့လိုချင်နေတဲ့ PDF ပြောင်းထားပြီးသား Document ကို ရတယ်။
 

 

Use an Application's Bilt-in PDF Support
 
နောက်တစ်နည်းက တစ်ချို့ Applications တွေမှာပါတဲ့ PDF Export Functions ကနေတဆင့်လည်း PDF အဖြစ် ပြောင်းယူလို့ရတယ်။ ဥပမာအနေနဲ့ပြောရရင် -
Google Chrome - Menu ကနေ Print ကိုနှိပ် Destination ရွေး Save as PDF ဆိုပြီး ပြောင်းလို့ရတယ်။
Microsoft Office - Office 2013 မှာ ဆိုရင် အောက်မှာ ဖော်ပြထားသလို File > Export ကနေတဆင့် Create PDF ဆိုပြီး ပြောင်းလို့ရတယ်။ Office 2010 မှာလည်း ထိုနည်း၎င်းပဲ။
 

 
ဒီနည်းကို အဓိကအားပြုသုံးမယ်ဆိုရင် အပေါ်မှာ ပြောထားတဲ့ Virtual PDF Printer ဆိုတာမျိုးတောင် Install လုပ်ဖို့မလိုဘူး။
 
Convert to PDF from XPS
 
တကယ်လို့ အကြောင်းအမျိုးမျိုးကြောင့် တစ်ခြားသူတစ်ယောက်ရဲ့ စက်ကို သုံးနေရတဲ့အချိန်မှာ Software သွင်းပိုင်ခွင့် Permission လည်း ကိုယ့်မှာ မရှိဘူးဆိုရင် PDF ပြောင်းဖို့ ပထမအဆင့်အနေနဲ့ Microsoft XPS Document Writer printer ကိုသုံးပြီး ကိုယ့် Document ကို XPS file အနေနဲ့ ပြောင်းယူလိုက်ပါ။ တစ်ခုရှိတာ Microsoft XPS Document Writer printer က Windows Vista, 7, 8 or 8.1 တွေမှာပဲ ပါတယ်။ ရလာတဲ့ XPS file ကိုမှ XPS2PDF ဆိုတဲ့ Online PDF Converter ကိုသုံးချင်သုံး ဒါမှမဟုတ် Virtual PDF Printer သွင်းထားတဲ့စက်ဆီ ယူသွားပြီး PDF အဖြစ်ပြောင်းယူ စတဲ့နည်းတွေနဲ့ PDF အဖြစ်ဖန်တီးနိုင်ပါတယ်။
 

 

Create PDFs from Websites
 
ကိုယ့်စက်မှာ Virtual PDF Printer လည်း မတင်ထားဘူး။ Webpage တစ်ခုကိုလည်း PDF အဖြစ်ပြောင်းပြီး သိမ်းထားချင်တယ်ဆိုရင် Web-based tool တစ်ခုဖြစ်တဲ့ Web2PDF သုံးပြီး ကိုယ်သိမ်းထားချင်တဲ့ Web စာမျက်နှာတွေကို PDF file အဖြစ် ဒေါင်းလုပ်ချပြီး သိမ်းထားနိုင်ပါတယ်။
 

 
ခုဖော်ပြခဲ့တဲ့နည်းတွေထဲက PDF ဖန်တီးဖို့ ကြိုက်နှစ်သက်ရာနည်းကိုသုံးပါ။ အားလုံးထဲမှာ Virtual PDF Printer သုံးပြီး PDF ဖန်တီးတာကတော့ အမြန်ဆုံးနဲ့ အလွယ်ဆုံးဖြစ်လိမ့်မယ်လို့ ကျွန်တော် ယူဆမိပါတယ်။
 
Maung Zin.

How To Make A Perfect Resume

ဒီဘက်ခေတ်မှာ လုပ်ငန်းခွင်ဝင်နေကြတဲ့ လူငယ်တိုင်း ကိုယ်ရေးအကျဉ်းဆိုတာနဲ့ ရင်းနှီးဖူးကြတယ်။ အလွယ်ပြောကြတာတော့ Resume ပေါ့။ ရင်းနှီးဖူးကြတယ်ဆိုပေမယ့် Resume ရဲ့ အရေးပါမှုကိုတော့ ဒီလောက်ကြီးထိ အသိအမှတ် မပြုကြသေးဘူး။ ဘာလို့လည်းဆိုတော့ အရင်တုန်းက ကျွန်တော်တို့နိုင်ငံမှာ Resume ထက် Background ကို ကြည့်ပြီး လက်ခံတာ ပိုများတယ်။ ပုဂ္ဂိုလ်ရေးအရ ရင်းနှီးကျွမ်းဝင်မှုရှိတာ၊ မကင်းရာမကင်းကြောင်း ပတ်သတ်နေတာ စသဖြင့် လုပ်ငန်းကျွမ်းကျင်မှုဆိုတာထက် Personal ပတ်သတ်မှုကို ပိုအရေးပေးပြီး အလုပ်ခန့်တတ်ကြတော့ Resume ဆိုတာ လုပ်ထုံးလုပ်နည်းအရ ထည့်ပေးရတဲ့သဘောမျိုး အနေနဲ့ပဲ ရှိခဲ့တယ်။
 

 
Photo >> http://www.careerigniter.com/

ဒါပေမယ့် ခုနောက်ပိုင်း ပွင့်လင်းမြင်သာတဲ့ ခေတ်ရောက်လာတော့ ရင်းနှီးကျွမ်းဝင်မှုကို အရင်ကလောက် ဦးစားမပေးတော့ဘူး။ အတွန်းအတိုက်များတဲ့ နည်းပညာခေတ်မှာ ပုဂ္ဂိုလ်ရေးရာ ရင်းနှီးကျွမ်းဝင်မှုက လုပ်ငန်းခွင် အရည်အသွေးနိမ့်ကျစေတတ်တာ ဘယ်သူမှ မငြင်းနိုင်တော့ဘူးလေ။ ကျွမ်းကျင်တာချင်းတူရင် မကင်းရာမကင်းကြောင်း ပတ်သတ်မှုကို ဦးစားပေးနိုင်တယ်ဆိုပေမယ့် အခြေခံအချက်က လုပ်ငန်းခွင် ကျွမ်းကျင်မှုဆိုတာကို ဦးစားပေးလာကြပြီ။ ဘယ်အလုပ်ပဲခေါ်ခေါ် Experience ဘယ်လောက်ရှိရမယ် ဆိုတာတွေတွေ့လာရပြီ။
 
လူတစ်ယောက် လုပ်ငန်းခွင်ကျွမ်းကျင်မှု ဘယ်လောက်ရှိတယ်၊ စီမံခန့်ခွဲနိုင်မှု ဘယ်လောက်ကောင်းတယ် ဆိုတာ တကယ်တော့ ချက်ချင်းဆုံးဖြတ်လို့ ရနိုင်တာမျိုး မဟုတ်ဘူး။ အဲ့တော့ အလုပ်လျှောက်လာသူတစ်ယောက်ရဲ့ အရည်အသွေးကို အမှန်ဆုံးမဟုတ်တောင် အနီးစပ်ဆုံး ခန့်မှန်းနိုင်ဖို့ လုပ်ငန်းရှင်တိုင်းက Resume ဆိုတာကို အလေးထားလာကြတယ်။ တစ်ဖက်မှာလည်း လုပ်ငန်းခွင်ဝင်မယ့် လူတစ်ယောက်အတွက် Resume တစ်ခုကို ကိုယ့်လုပ်ငန်းရှင် စိတ်ဝင်စားအောင်၊ ကိုယ့်ရဲ့ Ability ကို ထင်သာမြင်သာရှိအောင် တင်ပြတတ်ဖို့ လိုလာတယ်။
 
အဲ့တော့ လုပ်ငန်းခွင်ဝင်မယ့် လူငယ်တွေအတွက် လုပ်ငန်းရှင်တစ်ယောက်ရဲ့ အမြင်မှာ တင့်တယ်စေမယ့် Resume ကောင်းတစ်ခုဖြစ်အောင် ဘယ်လိုပြင်ဆင်ကြမလဲ။ လုပ်ငန်းကျွမ်းကျင်မှု အထိုက်လျောက်ပဲရှိပေမယ့် Impressive ဖြစ်စေမယ့် Resume ကောင်းတစ်ခု ဖန်တီးနိုင်ဖို့ ဘယ်ကနေစကြမလဲ။ 

Resume တစ်ခု ဖန်တီးတော့မယ်ဆိုရင် စိတ်ထဲရှိတာ အကြမ်းခြစ်ပြီး စာစီတာမျိုးထက် Resume တစ်ခုမှာပါသင့်တဲ့ အကြောင်းအရာတွေကို နဂိုတည်းက Format ချထားပြီးသား Resume Templates မျိုးတွေ သုံးစေချင်တယ်။ Resume Templates ကိုသုံးခြင်းအားဖြင့် အားသာချက်အနေနဲ့ Resume တစ်ခုစရေးဖို့ ဘယ်အချက်တွေကို အခြေခံရမလဲဆိုတာ ရှည်ရှည်ဝေးဝေး တွေးနေဖို့ မလိုတော့ဘူး။ ကိုယ့်ရဲ့ အရည်အသွေးကို တစ်ဖက်လူမြင်သာအောင် ဘယ်လိုရေးမလဲဆိုတဲ့ အချက်တစ်ခုတည်းကို အာရုံစိုက်ထားလို့ ရတယ်။
 

 
Resume လို့ ပြောလိုက်ရင် စာစီဖို့အတွက် Microsoft Word ကို အရင်ဆုံး ပြေးမြင်မိလိမ့်မယ်။ ပုံမှန် Computer သုံးတဲ့သူတစ်ယောက်အနေနဲ့ Professional-looking Resume ဖြစ်ဖို့ဆို Format ချနေတာနဲ့တင် အချိန်ကုန်နိုင်တယ်။ Office Web Apps မှာဆိုလည်း Resume Templates ပေးထားတယ်ဆိုပေမယ့် များများစားစား မရှိဘူး။ အဲ့တော့ Resume Templates ကို သုံးဖို့ဆိုရင် Microsoft Office ထက် Google Docs ကို သုံးစေချင်တယ်။ Google Docs Template Gallery မှာ အသင့်သုံးနိုင်တဲ့ Resume Templates တော်တော်များများ ရှိသလို Google Account တစ်ခုရှိယုံနဲ့ Search box မှာ Resume လို့ ရိုက်ပြီး အသင့်သုံး Resume Templates တွေတန်းသုံးနိုင်တယ်။
 

 
Resume Templates တွေများလို့ ရွေးရခက်နေရင် မသုံးသေးခင် Preview ကြည့်လို့ရတယ်။ Preview ကြည့်ခြင်းအားဖြင့် ကိုယ်လိုချင်တဲ့ အချက်တွေပါမပါ၊ ကိုယ်ရေးချင်တဲ့ Design မျိုးဟုတ်မဟုတ် တစ်ခါတည်း တန်းသိနိုင်တယ်။
 

 
စာသားတွေ ပြင်ချင်တာ၊ Font Size တွေ ပြောင်းချင်တာ၊ တစ်ခြားအကြောင်းအရာတွေ ဖြည့်ချင်တာ အားလုံးအတွက် Google Docs မှာ အကုန်အသင့်ရှိတယ်။
 

 
အကြောင်းအမျိုးမျိုးကြောင့် ချက်ချင်း မရေးချင်သေးဘူးဆိုရင် Resume Templates ကို ကိုယ့်စက်ထဲ Download ချထားပြီး နောက်မှ ရေးလို့ရတယ်။
 

 
နောက်ဆုံးတစ်ချက်ကတော့ Resume Templates ကို အသုံးချင်တဲ့ သူတွေအတွက် Internet ထဲမှာ Resume Builder ဆိုတာတွေလည်း ရှိသေးတယ်။ သူတို့တွေက Online Resume Builder တွေမို့လို့ တစ်ခြား ဘာမှမလိုဘူး။ ကိုယ့်ရဲ့ ကိုယ်ရေးအကျဉ်းကို သူပေးထားတဲ့ Templates တွေထဲက ကြိုက်ရာကိုရွေးပြီး သူမေးတဲ့ အချက်အလက်တွေ ဖြည့်လိုက်တာနဲ့ နောက်ဆုံးမှာ Resume တစ်ခါတည်း တန်းထုတ်ပေးတယ်။ စမ်းကြည့်ချင်ရင် အောက်မှာ Online Resume Builder ဖန်တီးပေးတဲ့ နေရာတစ်ချို့ ဖော်ပြထားပါတယ်-

• http://www.livecareer.com/
• https://www.resume.com/
• https://cvmkr.com/

ခုလောက်ဆိုရင် လုပ်ငန်းခွင်ဝင်မယ့် လူငယ်တွေအတွက် Resume တစ်ခုဖန်တီးဖို့ လိုအပ်မယ့် အခြေခံအချက်တွေ၊ အသုံးပြုနိုင်မယ့်နည်းလမ်းတွေ အတိုင်းအတာတစ်ခုထိ သိရှိနိုင်လိမ့်မယ်လို့ မျှော်လင့်မိပါတယ်။ ကျွမ်းကျင်ရာ အသက်မွေးဝမ်းကျောင်းမှုမှာ ပျော်ရွှင်စွာ ရပ်တည်နိုင်ကြပါစေ။
 
Maung Zin.

How To Use WeChat and Viber in Windows 7

wechat.exe and viber.exe လိုချင်လို့ပါ။ computer win7 မှာသုံးချင်လို့ပါ။ ကူညီပေးပါနော်။ email နဲပို့ပေးမယ် ဆိုရင်လည်း ရပါတယ်။

မေးခွန်းကို သေချာမဖတ်ပဲ ဖြေချင်ဇောနဲ့ wechat.exe and viber.exe တိုက်ရိုက်ဒေါင်းလုပ်ချလို့ရမယ့် နေရာတွေ ညွှန်လိုက်မိသေးတယ်။ တကယ်ပါပဲ။ ဒါပေမယ့် စေတနာနဲ့ မှားတဲ့ အမှားမို့လို့ နားလည်ပေးနိုင်ကြမှာပါ။ သိထားတဲ့ နည်းလမ်းတွေထဲက အကောင်းဆုံးဖြစ်နိုင်လောက်မယ့် နည်းတွေကို စုဝေးပြီး အကြံပေးဖြစ်ခဲ့ပါတယ်။

ဟုတ်တယ် ကျွန်တော် နည်းနည်းလောသွားလို့ .. ဆိုဒ်ကို သွားကြည့်တော့ Windows Logo လေး တွေ့တာနဲ့ PC အတွက်ပါတယ် ထင်ပြီး လင့်ကို တိုက်ရိုက်ပေးလိုက်တာ အဲ့တာတွေက ဖုန်းအမျိုးမျိုးအတွက်ပဲ ပေးထားတာဆိုတော့ PC မှာ သုံးချင်တာဆိုရင် Windroy တို့ BlueStacks တို့ကို တဆင့်ခံပြီး apk file တွေကို PC မှာ သုံးလို့ရပါတယ်။

Bluestacks ကတော့ အလွယ်ပြောရရင် Android Emulator ပါ။ သူ့ကိုသုံးပြီး Android ဖုန်းမှာ သုံးနေတဲ့ apk files တွေ such as - Android game, Application တွေကိ်ု ကိုယ့်ရဲ့ Computer မှာ Run ပြီးသုံးလို့ ရတယ်။ Windows 7 တင်မက Windows 8, Windows Vista, Windows XP, Mac OS X အားလုံးသုံးလို့ ရပါတယ်။ 

Windroy ကလည်း ထိုနည်းလည်းကောင်းပဲ။ Windroy ကိုသုံးရင် Android ကို Windows kernel ကနေ Run နေသလိုပဲ။ such as VirtualBox ပေါ့။ Android apps တွေတင်မက 3D games တွေထိပါ ဆော့လို့ရတယ်။ 

တကယ်လို့ အဲ့လို ရှုပ်ရှုပ်ယှက်ယှက်တွေ တစ်ခုမှ မကြိုက်ရင် WebWeChat ဆိုတာ ရှိတယ်။ သူကတော့ WeChat ကို Browser ကနေ တဆင့်ခံသုံးတာ။ ကိုယ့် Smartphone ထဲမှာ ရှိတဲ့ WeChat app နဲ့ QR Code ကို Scan လုပ်ပြီး သုံးတာ။ 

KznT.