Things to do after installing Ubuntu

Ubuntu အကြောင်းနားထားတာ တော်တော်လေးတောင် ကြာသွားပါပြီ - ကျွန်တော်လည်း ဖိုရမ်က တစ်ခြား ကိစ္စလေးတွေ ဘက် လှည့်နေမိတာရယ် - စိတ်ထဲပေါ်လာတဲ့ လုပ်ချင်စိတ် ရှိတာလေးတွေရယ်နောက်ကို လိုက်လုပ်နေမိတာရယ်ကြောင့် ဒီဘက်ကို ပြန်မလှည့်ဖြစ်ခဲ့တာပါ။ ခု ကျွန်တော် ပြန်လှည့်ပါတော့မယ်။ အရင် အခန်းဆက်ဝတ္ထုရှည်လို ရေးခဲ့တဲ့ အားလုံးအတွက် Ubuntu ( Linux ) ပြီးခဲ့တဲ့ နောက်မှာ အခု နောက်ထပ် အခန်းဆက် Ubuntu ဝတ္ထုရှည် တစ်ပုဒ် ဆက်ပါဦးမယ်။

တကယ်တမ်း ဒီအကြောင်းအရာက ရေးတာ တော်တော်လေး နောက်ကျနေပြီလို့တောင် ပြောလို့ ရပါတယ်။ ဘာကြောင့်လည်း ဆို နောက် ( 4 ) လပိုင်းဆိုရင် Ubuntu version က အသစ်ထွက်တော့မှာပါ တကယ်တော့ Ubuntu 11.04 ထွက်လာလည်း ဒီနည်းတွေ ဒီ Software တွေ ဒီ install လုပ်ဆောင်နည်းတွေ နဲ့ပဲ လုပ်ဆောင်နေရဦးမှာပါ။ ဒါ့ကြောင့် ကျွန်တော် ပြောချင်တာ အကြောင်းအရာရပ်တစ်ခုကို နားလည်မှုနဲ့ ဆက်စပ်တွေးခေါ် နိုင်မှုကိုပဲ ဦးစားပေးပါ။ ခေါင်းစဉ်ကိုကြည့်ပြီး သုံးလို့ မရတော့ဘူးလို့ မတွေးပါနဲ့ - အသစ်တစ်ခု ပေါ်လာလို့ ဒီ အကြောင်းအရာ က အဟောင်းဖြစ်ကောင်း ဖြစ်သွားနိုင်ပေမယ့် အဲ့ဒီ့ အကြောင်းအရာသစ်ဟာ ဒီအကြောင်းအရာ ဟောင်းပေါ်မှာ အခြေခံပြီး ဆင့်ပွားတိုးတက်သွားတာပဲ ဖြစ်ပါတယ်။ ဒါ့ကြောင့် Version တစ်ခုမက ကွာသွားခဲ့မယ်ဆိုရင်တောင် ဒီစာတွေက အများကြီး ကွာခြားသွားမှာ မဟုတ်ဘူးဆိုတာ ဦးစွာ အသိပေးပြောကြားလိုပါတယ်။

အရင် အားလုံးအတွက် Ubuntu Linux မှာ Ubuntu 10.04, Lucid Lynx ကို ဘယ်လို install လုပ်ရတယ်ဆိုတာ ဖော်ပြပေးပြီး ဖြစ်လို့ ခု အခြေအနေမှာ ကျွန်တော့် အနေနဲ့ Ubuntu 10.04, Lucid Lynx ကို စာဖတ်သူရဲ့ စက်မှာ installed လုပ်ဆောင်ပြီးသွားပြီလို့ ယူဆလိုက်ပါ့မယ်။ ကျွန်တော့် အနေနဲ့ ဒီ guide ကနေပြီး Ubuntu installed လုပ်ဆောင်ပြီးသွားတဲ့ နောက်မှာ beginners တွေအတွက် မသိမဖြစ်လေ့လာထားသင့်တဲ့ concepts အသစ်တွေ အကြောင်းနဲ့ Ubuntu ကို အသုံးပြုသူတိုင်း အတွက် ရွေးချယ်ဖို့ အသင့်တော်ဆုံး software တွေအကြောင်းကို ဖော်ပြပေးသွားပါ့မယ်။ စိတ်ကြိုက် ရွေးချယ်ပြီး စမ်းသပ်သုံးစွဲကြည့်ပါ။

ဒီအကြောင်းအရာကို မဖတ်ခင်မှာ တွဲစပ်ပြီး လေ့လာစေချင်တဲ့ ခေါင်းစဉ် ငါးခု ရှိပါတယ်။ အဲ့ ခေါင်းစဉ် ငါးခုကတော့ -

အားလုံးအတွက် Ubuntu ( Linux )
Ubuntu 9.10 အသုံးပြုနည်း လမ်းညွှန်
Software installation in Ubuntu 10.04 LTS

ပြောင်းလဲနိုင်သော Ubuntu applications များ
Windows ပေါ်မှာ Ubuntulinux ကို ဘယ်လို Install လုပ်ပြီး run မလဲ။ နဲ့
အသင့်တော်ဆုံး Linux OS အား ရွေးချယ်ခြင်း ဆိုတဲ့

ခေါင်းစဉ်တွေပဲ ဖြစ်တယ်။ အဲ့ဒီ့ ဖော်ပြခဲ့ပြီးတဲ့ အကြောင်းအရာ ( ၃ ) ခုနဲ့ ဒီအကြောင်းအရာနဲ့က ဆက်စပ်နေပြီး ဒီခေါင်းစဉ်အောက်မှာတော့ အားလုံးကို အသေးစိတ် ပြန်ချုံပြီး ဖော်ပြပေးသွားပါ့မယ်။ အကြောင်းအရာ အားလုံးနဲ့ ဆက်စပ်နေတဲ့ မေးခွန်း အတိုအထွာတွေ - မေးမြန်းချင်စိတ် ပေါ်လာတဲ့ အကြောင်းအရာတွေကို အမေးအဖြေများနှင့် Ubuntu ဆိုတဲ့ ခေါင်းစဉ်အောက်မှာ မေးမြန်းပေးကြဖို့ တစ်လက်စတည်း အကြံပြုလိုပါတယ်။

အရင် အကြောင်းအရာတွေမှာ ဖော်ပြနေကျပုံစံအတိုင်း အကြောင်းအရာတစ်ခု ရေးသားပြီးတိုင်းမှာ ဒီနေရာကနေ သက်ဆိုင်ရာ ခေါင်းစဉ်ခွဲတိုင်းကို Links များချိတ်ဆက် ဖော်ပြပေးသွားပါ့မယ်။

အနှစ်ချုပ်

( ၁ ) Applications များ စီမံခန့်ခွဲခြင်း
( ၂ ) အခြေခံ အကြောင်းအရာများ ( ၁ )
( ၃ ) အခြေခံ အကြောင်းအရာများ ( ၂ )
( ၄ ) မျက်စိအလှ ပသာဒ
( ၅ ) Desktop တန်ဖိုးမြှင့်တင်ခြင်း
( ၆ ) ဖျော်ဖြေရေး - မျှဝေရေး - ပြင်ဆင်ရေးနှင့် လုံခြုံရေး ကဏ္ဍများ

Applications များ စီမံခန့်ခွဲခြင်း

Repositories

Ubuntu မှာ Software တွေ ရယူသုံးစွဲနိုင်မယ့် directories တွေကို Repositories ( repos ) လို့ ခေါ်ပြီး အဲ့ဒီ့ Repositories ကနေတစ်ဆင့် ကိုယ့်ရဲ့ System တစ်ခုလုံးမှာ ရှိနေတဲ့ Software အားလုံးကို အမြဲတမ်း up-to-date ဖြစ်နေအောင် စစ်ဆေးပေးနေပါတယ်။  ဒါတင်မက ကိုယ်အသုံးချဖို့ လိုအပ်လာတဲ့ applications အသီးသီးကိုလည်း သက်ဆိုင်ရာ catalog အမျိုးမျိုးကနေ အလွယ်တကူ install လုပ်လို့ ရနိုင်အောင် Security အကောင်းဆုံးနဲ့ ဖြန့်ဝေပေးနေပါသေးတယ်။ နေ့စဉ်နေ့တိုင်း အင်တာနက်ထဲဝင်ပြီး ကိုယ့် System up-to-date ဖြစ်ဖို့ latest versions တွေ ရှာနေရတာထက် စာရင်  Repositories ရှိနေတာ ကျွန်တော်တို့အတွက် တော်တော်လေး သက်သာတယ်လို့ ဆိုလို့ ရပါတယ်။  Ubuntu မှာ ပုံမှန်အားဖြင့် default repos အနည်းငယ်ရှိပြီး တကယ်လို့ ကိုယ်က အကြောင်းပြချက်နှစ်မျိုးနဲ့ တစ်ခြား repos တွေကို add ချင်တယ်ဆိုရင်လည်း ဖြစ်ပါတယ်။ ဘာအကြောင်းပြချက်များလဲ ?? တကယ်လို့ ကိုယ်အသုံးပြုနေတဲ့ Software ဟာ Ubuntu ရဲ့ repos ထဲမှာ Default အနေနဲ့ မပါရှိခဲ့ဘူး ဆိုရင် ဒါမှမဟုတ် Ubuntu version အသစ်ထွက်မှ ပါဝင်လာမယ့် software တွေရဲ့ Versions အသစ်တွေကို Ubuntu version အသစ်မထွက်ခင် အသုံးပြုချင်တဲ့ အခါမှာ ဖြစ်စေ ကျွန်တော်တို့ တစ်ခြား repos တွေကို လက်ရှိရယူအသုံးပြုနေတဲ့ Ubuntu ရဲ့ Software Sources ထဲမှာ ထပ် add ပြီး အသုံးပြုလို့ ရပါတယ်။

Repositories တွေကို Software Sources ထဲမှာ add ချင်တယ် ဆိုရင် ( System  > Administration > Software Sources ) ကိုသွားပြီး "Other Software" tab ထဲမှာရှိနေတဲ့ "Add..." button ကနေတစ်ဆင့် သက်ဆိုင်ရာ APT line ကို ထည့်သွင်းပေးရမှာ ဖြစ်ပါတယ်။ ဒီအောက်မှာ ဖော်ပြသွားမယ့် Software တွေမှာ သက်ဆိုင်ရာ Personal Package Archives (PPA) တွေကို ရည်ညွှန်းတဲ့ APT lines တွေကို repositories အတွက် လိုအပ်မယ်ဆို ဖော်ပြပေးသွားပါ့မယ်။

Ubuntu Software Center

ကျွန်တော်တို့ရဲ့ system ထဲမှာ installed လုပ်ထားတဲ့ apps တွေကို စီမံခန့်ခွဲဖို့ပဲ ဖြစ်ဖြစ် - apps တွေ ထပ်ထည့်ချင်တာပဲ ဖြစ်ဖြစ် - ထည့်ထားပြီးသား apps တွေ ပြန်ဖြုတ်ချင်တာပဲ ဖြစ်ဖြစ် အားလုံးကို တစ်နေရာတည်းကနေ လုပ်ဆောင်နိုင်တာ Ubuntu Software Center (Applications > Ubuntu Software Center) ပါ။ Ubuntu Software Center ကနေ ကိုယ်လိုနေတဲ့ Software ကို ရှာရတာ အလွန်လွယ်ကူတဲ့ အပြင် Download လုပ် install လုပ်ဆောင်ရတာကလည်း click တစ်ချက်ပေးယုံနဲ့ ပြီးပြည့်စုံစေပါတယ်။

ကိုယ်လိုအပ်တဲ့ Software တွေကို ရှာဖွေတဲ့ နေရာမှာ နောက်တစ်နည်း အနေနဲ့ ညာဘက်အပေါ်ထောင့်က Search bar မှာ ကိုယ်လိုချင်တဲ့ Software နာမည်ကို ရိုက်ထည့်ပြီး အလွယ်တကူ ရှာဖွေနိုင်ပါသေးတယ်။ တကယ်လို့ ကိုယ် install လုပ်မယ့် Software ရဲ့ အသေးစိတ် အချက်အလက်ကို install မလုပ်ဆောင်ခင် သိချင်သေးတယ် ဆိုရင် result ပေါ်မှာ double click ပေးပြီးတော့ ဖြစ်စေ "More Info" button ကို click ပေးပြီးတော့ ဖြစ်စေ application ရဲ့ အသေးစိတ် ဖော်ပြချက်ကို ဖတ်ရှုလေ့လာနိုင်ပါတယ်။

Install button ကို နှိပ်လိုက်ရင် ကိုယ်လိုချင်တဲ့ Software ကို အလိုလျောက် install လုပ်ဆောင်သွားပါလိမ့်မယ်။

Software တစ်ခုခုကို အထက်ဖော်ပြပါအတိုင်း installed လုပ်ဆောင်ပြီးသွားပြီ ဆိုရင် သက်ဆိုင်ရာ Program တော်တော်များများကို Menu bar က Applications ရဲ့ အောက်မှာ အသင့်ခေါ်ယူသုံးစွဲနိုင်ပြီး တစ်ချို့ Applications တွေကတော့ (System > Preferences) အောက်မှာဖြစ်စေ သို့တည်းမဟုတ် (System > Administration) အောက်မှာ ဖြစ်စေ ရောက်ရှိသွားတတ်ပါတယ်။

ဒီနည်းနဲ့မှ မဟုတ်ပဲ package တွေကို နောက်နည်းအနေနဲ့  Synaptic Package Manager (System > Administration > Synaptic Package Manager) ကနေ install လုပ်ဆောင်လို့ ရသလို အဲလိုမှ မဟုတ်ရင်လည်း Terminal ထဲက (Applications > Accessories > Terminal) ထဲကနေ သာမန် command လောက်နဲ့ install လုပ်ဆောင်လို့ ရပါတယ်။

sudo apt-get install example-package

သက်ဆိုရင် Software တိုင်းအတွက် APT links နဲ့ package names တွေကို ဒီ ပို့စ်မှာ ဖြည်းဖြည်းချင်း ဖော်ပြပေးသွားပါ့မယ်။

အခြေခံ အကြောင်းအရာများ ( ၁ )

Mirror နှင့် Updates လုပ်ဆောင်မှုများ အကြောင်း

စိတ်ကူးတည့်ရာလေးတွေ ရေးနေတာ ဒီအကြောင်းအရာကို ဆက်ဖို့ မေ့နေခဲ့ပါတယ်။ ဒီနေ့တော့ အကြောင်းအရာသစ်လေး ဆက်ပါဦးမယ်။

Ubuntu က တင်ဆက်လိုက်တဲ့ ( Beta, Release Candidate, နောက် အထူးသဖြင့် Final ) Release တွေထွက်ရှိလာပြီးတဲ့ နောက်မှာ Ubuntu ရဲ့ official servers တွေက အလိုလိုနေရင်း နှေးကွေးလေးလံ သွားတတ်ပါတယ်။  ဒါ့ကြောင့် Updates ပေးဖို့ Download ချဖို့နဲ့ ပတ်သတ်ရင် သုံးသင့်တာ Official servers အစား တစ်ခြား server တစ်ခုကို ရွေးချယ် အသုံးပြုလို့ ရပါတယ်။ အဲလို တစ်ခြား Server တစ်ခုကို ပြောင်းလဲ အသုံးပြုနိုင်ဖို့ အတွက် ဆိုရင် Software Sources တည်ရှိရာ ( System > Administration > Software Sources ) ကို သွားပြီး Download from:" ရဲ့ဘေးက Drop-down menu ကနေ "Other..." ကိုရွေးပေးပါ။

အဲလို လုပ်လိုက်တဲ့ အချိန်မှာ သူကနေပြီး "Choose a Download Server" window ဆိုတဲ့ pop up window တစ်ခု တက်လာပါလိမ့်မယ်။ တကယ်လို့ ကိုယ်က ကိုယ်နဲ့ အနီးစပ်ဆုံး local server ထဲက မြန်ဆန်သွက်လက်တဲ့ Server ကို သိထားတယ်ဆိုရင် သူပြထားတဲ့ list ထဲကနေ ရွေးပေးလိုက်ယုံပါပဲ။ တကယ်လို့ ဘယ် server က ကောင်းမှန်း တိတိကျကျ မသိဘူး မရွေးပေးတတ်ဘူးဆိုရင် ညာဘက်ခြမ်းက "Select Best Server" button ကို click ပေးလိုက်ပါ။

သူ့ကို click ပေးလိုက်ရင် Servers တွေထဲက ဘယ် Server က အမြန်ဆုံး connection ရှိမလဲ ဆိုတာ စမ်းသပ်စစ်ဆေးပေးမယ့် tool တစ်ခု ပေါ်လာပြီး Download test တွေသူ လုပ်ပါလိမ့်မယ်။ အားလုံး ပြီးသွားရင်တော့ သူဖော်ပြထားတဲ့ အမြန်ဆုံး Server ကို "Choose server" button ကနေ ရွေးပေးလိုက်ယုံပါပဲ။

ဒီလုပ်ငန်းစဉ်ကိုပဲ နောက်ထပ် "Updates" tab ကနေ လုပ်ဆောင်လို့ ရပါသေးတယ်။  တကယ်လို့ ကျွန်တော်တို့က Ubuntu က ထုတ်တဲ့ နောက်ဆုံး version နဲ့  third-party repos တွေကို စက်မှာ run သုံးနေတဲ့ သူတွေ ဆိုရင် ကျွန်တော်တို့ အတွက် ဖြစ်သင့်တာက "Updates" tab အောက်မှာ ဘာမှ မပြင်ဆင်ပဲ သူ ပေးထားတဲ့ defaults အတိုင်းလေးပဲ ထားတာ ကောင်းပါတယ်။ အဲမှာ မြင်နေရတဲ့ "Unsupported Updates (lucid-backports)" ဆိုတာကကျတော့ အသစ်တော့ အသစ်- ဒါပေမယ့် unsupported versions packages တွေကို ကျွန်တော်တို့ လိုအပ်ရင် အသုံးပြုနိုင်အောင် အကြံပေးခိုင်းစေတဲ့ options တစ်ခုပါ။ တကယ်လို့ ကိုယ်က စမ်းသပ်ရတာ ဝါသနာပါတယ်။ ဒီ Options ကို ရွေးချယ်ထားခြင်းအားဖြင့် Repository ထဲကို ထည့်သွင်းဖို့ ပြည့်ပြည့်ဝဝ မစမ်းသပ်ရသေးတဲ့ new features တွေ new interfaces တွေပါဝင်တဲ့ packages အသစ်အသစ်တွေကို ကျွန်တော်တို့ စမ်းသပ်အသုံးပြုနိုင်မှာ ဖြစ်ပါတယ်။ "Pre-released Updates (lucid-proposed)" ဆိုတာကတော့ Updates တွေကို စမ်းသပ်တဲ့ ဖို့ Options ပါ။ ဘယ်လို လူမျိုးတွေ အတွက်လည်း ဆိုရင် Ubuntu က ထုတ်လိုက်တဲ့ Updates တွေကို စမ်းသပ်သုံးစွဲကြည့်ဖို့လည်း ဝါသနာပါပြီး ကောင်းကျိုးဆိုးကျိုး တွေ့ရှိရတဲ့ အပြစ် အနာအဆာတွေကို ဝေဖန်ထောက်ပြ ပေးချင်တဲ့ သူများ စမ်းသပ်သုံးစွဲနိုင်ဖို့ ထည့်သွင်းပေးထားတာ ဖြစ်ပါတယ်။ သူ့ကို ကျွန်တော်တို့ Check ပေးထားမယ် ဆိုရင် Ubuntu ကနေ ထွက်လာသမျှ Updates အားလုံးကို နောက်ကွယ်ကနေ အလိုလျောက် Updates လုပ်ပေးသွားမှာ ဖြစ်ပါတယ်။  နောက်ထပ် ကျွန်တော်တို့ ပြောင်းထားသင့်တာက "Show new distribution releases" မှာ နောက်ထပ် Ubuntu version အသစ်ထွက်ပြီ ဆိုတာနဲ့ သိနိုင်အောင် Long Term Support (LTS) release အစား "Normal releases" ကို ပြောင်းထား သင့်ပါတယ်။

အဲလို ပြောင်းထားခြင်း အားဖြင့် နောက်ထပ် LTS release ထွက်တဲ့ အချိန်ထိ စောင့်ဖို့ မလိုတော့ပဲ Ubuntu version အသစ်ထွက်ပြီ ဆိုတာနဲ့ ကျွန်တော်တို့ ချက်ချင်း သိရှိနိုင်မှာ ဖြစ်ပါတယ်။

နောက်ထပ် လုပ်ဆောင်ထားသင့်တာလေး တစ်ခုလည်း အကြံပြုချင်ပါသေးတယ်။ တစ်ခြား ဘာမှ မလုပ်ဆောင်သေးခင် အောက်မှာ မြင်နေရတဲ့ အတိုင်း "Statistics" tab ကို သွားပြီး Check box မှာ Check ပေးထားသင့်ပါတယ်။ ဒီလို လုပ်ဆောင်ထားခြင်း အားဖြင့် ကိုယ့်ရဲ့ စက်မှာ installed လုပ်ထားတဲ့ Software တွေထဲက ဘယ် Software ကိုတော့ဖြင့်  ကိုယ် အမှန်တကယ်သုံးသလဲ - ဘယ်လောက်ကြာမှာ တစ်ခါ အသုံးပြုလေ့ ရှိသလဲ ဆိုတာ သူက စစ်တမ်းကောက်ယူပြီး နောက်ကွယ်ကနေ Ubuntu Project ကို အနည်းဆုံး တစ်ပတ်တစ်ခါလောက် သတင်းပို့လွှတ်ပေးမှာ ဖြစ်ပါတယ်။ ဒီလိုလုပ်ဆောင်ထားခြင်း အားဖြင့် Ubuntu Project က ဘယ် Software ကို Users တွေပိုပြီး အသုံးများကြလဲ ဆိုတာ သတိထားနိုင်ပြီး အဲ့ကောင်ကို ကောင်းသထက် ကောင်းအောင် ပြင်ဆင်ပေးသွားနိုင်မှာ ဖြစ်ပါတယ်။

အဲ့ဒီကနေ ကျွန်တော်တို့ Close ကို click လိုက်တဲ့ အချိန်မှာ ကျွန်တော်တို့ ရွေးချယ်ပြင်ဆင်ထားခဲ့တဲ့ အတိုင်း Software တွေ Updates တွေ ရယူနိုင်ဖို့ Reload လုပ်ခိုင်းပါလိမ့်မယ်။ Reload ကို click လိုက်ပါ။

Reloading ပြီးလို့ Available updates တွေ သူဖော်ပြပြီ ဆိုရင် ညွှန်ကြားချက်အတိုင်း လိုက်လုပ်ပြီး install လုပ်ဆောင်သွား ယုံပါပဲ။

အဲလိုမှ မလုပ်ချင်လည်း Updates တွေကို နောက်တော့မှ Update Manager ကနေတစ်ဆင့် ( System > Administration > Update Manager ) သွားပြီး Check လုပ်ခိုင်းလို့ ရပါတယ်။ ကိုယ့်  Computer ကို up-to-date ဖြစ်အောင် လုပ်ထားဖို့ ကျွန်တော်ကတော့ အကြံပေးချင်ပါတယ်။

အခြေခံ အကြောင်းအရာများ ( ၂ ) 

Folder နှင့် Printer များ Sharing လုပ်ဆောင်ခြင်း

ကျွန်တော် မဆက်တာ ကြာနေတဲ့ အကြောင်းအရာလေး ပြန်ဆက်လိုက်ပါဦးမယ်။ ဒီတစ်ခါ ဆက်သွားမှာ Ubuntu မှာ Windows လိုမျိုး Folder တွေ Printer တွေ Share လုပ်ဆောင်ဖို့ အတွက် လိုအပ်မယ့် ပြင်ဆင်မှုလေးတွေ လုပ်ဆောင်ဖို့ နည်းလမ်းတွေ အကြောင်းပါ။ တကယ်လို့ ကျွန်တော်တို့တွေဟာ Ubuntu ကို Windows machines တွေနဲ့ files တွေ folders တွေ share လုပ်ချင်ပြီ ဆိုရင် Samba ရှိနေဖို့ လိုပါတယ်။

Samba ကို install လုပ်ဆောင်ဖို့ အတွက် ပုံမှာ မြင်ရတဲ့ အတိုင်း ကြိုက်နှစ်သက်ရာ folder တစ်ခုခုမှာ  right click ထောက်ပြီး  "Properties" ကနေ တစ်ဆင့် "Share" tab ကို သွားပါမယ်။

ဖော်ပြပါ အတိုင်း "Share this folder" မှာ Check ပေးလိုက်ရင် Windows networks sharing service ကို install လုပ်ဖို့ ကျွန်တော်တို့ကို အသိပေးပါလိမ့်မယ်။ အဲတာကို installed လုပ်ဆောင်ပြီးသွားတာနဲ့ Restart ပေးပြီး ကိုယ် Share ပေးချင်တဲ့ folders တွေ files တွေကို Network ပေါ်မှာ Share ပေးလို့ရပါပြီ။

Samba ကို ဒီနေရာကနေ လည်း Install လုပ်ဆောင်လို့ ရပါတယ်။

Time Synchronization

ကျွန်တော်တို့  သုံးနေတဲ့ Ubuntu မှာ ကွန်ပြူတာမှာ ရှိနေတဲ့ အချိန်ကို servers တွေမှာ ရှိနေတဲ့ atomic clocks တွေအတိုင်း တပြေးညီ ချိန်ညှိပေးထားနိုင်အောင် Time Synchronization လုပ်ဆောင်ထားလို့ ရပါတယ်။ 

သူ့ကို ကျွန်တော်တို့က Network Time Protocol (NTP) လို့လည်း ခေါ်ပါတယ်။ NTP time ကို set up လုပ်ဆောင်ဖို့ အတွက် System > Administration > Time & Date ကနေ Time & Date ကို အရင်ဖွင့်လိုက်ပါ။ Settings ကို ဖွင့်ဖို့ အတွက် keys ပုံစံလေးကို click ပေးပါ။ အဲဒီကနေ ကိုယ့်ရဲ့ time zone ကိုရွေးပေးပြီး ပုံမှာ ပြထားတဲ့ အတိုင်း "Keep synchronized with Internet servers" ကို ထားပေးလိုက်ပါ။ အဲလို ထားပေးလိုက်တာနဲ့ NTP ကို install လုပ်ဖို့ သူ အသိပေးပါလိမ့်မယ်။ အဲဒီ့ကနေ install လုပ်ဆောင်သွားပါ။

NTP ကို ဒီနေရာကနေ လည်း Install လုပ်ဆောင်လို့ ရပါတယ်။

အဲတာ ပြီးသွားရင် "Select Servers" ကို click  ပေးပြီး country zone ကို ရွေးချယ်ဖို့ အတွက် ဒီနေရာကို သွားပါ။ အဲ့နေရာကနေ ကိုယ့် country zone ရဲ့ address ကို ရွေးချယ်ပေးပြီး အောက်ဖော်ပြပါအတိုင်း လွတ်နေတဲ့ ကွက်လပ်မှာ  "Add" button ကို နှိပ်ပါ။ နောက် သူ့ကို check ပေးပြီး close နိုင်ပါပြီ။

မျက်စိအလှ ပသာဒ

GNOME Shell

GNOME desktop ရဲ့ နောက်ထွက် version ဖြစ်တဲ့ GNOME desktop environment version 3.0 မှာ GNOME Shell ကို သုံးထားပါတယ်။ သူက အရင် Desktop တွေနဲ့ မတူတဲ့ new interface ပါ။ ဒါ့ကြောင့် စမ်းသပ်ကြည့်ချင်မယ် ဆိုရင် Ubuntu repos ထဲမှာ version တစ်ခု ရှိပါတယ်။ လုပ်ဆောင်ပုံကတော့ Alt+F2 ကနေပြီး "Run Applicatoin" ကို ဖွင့်လိုက်ပါ။  နောက် ပုံမှာ ဖော်ပြထားတ့ဲအတိုင်း "gnome-shell --replace" ကို ထည့်ပေးပြီး Run ကို နှိပ်ပါ။ တကယ်လို့ အရင်လို ပြန်ပြောင်းချင်တယ်ဆိုရင် ဒီနည်းအတိုင်းကိုပဲ  စာသား ပြန်ပြောင်းထည့်ပေးရပါမယ်။ ထည့်ရမယ့် စာသားက "metacity --replace" ပါ။

gnome-shell ကို ဒီနေရာကနေ လည်း Install လုပ်ဆောင်လို့ ရပါတယ်။

ပုံမှန် အလှဆင်ခြင်း

ကျွန်တော် compizconfig-settings-manager အကြောင်းကို ဒီနေရာမှာ ရေးခဲ့ဖူးပါတယ်။ ဒါပေမယ့် compizconfig-settings-manager ဆိုတာ တော်တော်ကြီးကို features တွေ effects တွေများပြီး ကြီးကျယ်တဲ့ software ပါ။ တစ်ချို့လူတွေက အရမ်း visual effects များတာကို ကြိုက်ပေမယ့် တစ်ချို့လူတွေ အတွက်ကျတော့လည်း အဲလောက်ကြီးထိ visual effects များတာကို သဘောမကျပါဘူး - ဒါတင်မက visual effects ကောင်းကောင်း သုံးနိုင်ဖို့ ဆိုရင် Compiz လိုဟာမျိုးက accelerated graphics ဖြစ်ဖို့လည်း လိုပါသေးတယ်။ ဒါ့ကြောင့် နဂိုရှိပြီးသား Hardware အခြေခံလေးနဲ့ပဲ လှလှပပလေး သုံးချင်တယ် - ဒါမှမဟုတ် ကိုယ့်စက်မှာ accelerated graphics ရှိပေမယ့် system resources တွေကို အများကြီး မသုံးချင်ပဲ ပုံမှန်လေး အတိုင်း အလှဆင်ချင်တယ် ဆိုတဲ့ အခါမျိုးမှာ  GNOME အတွက် default window manager ဖြစ်တဲ့ Metacity သုံးဖို့ အသင့်တော်ဆုံးပါပဲ။ သူ့ကို graphically enable ပေးလို့ ရသလို command နဲ့လည်း လုပ်ဆောင်လို့ ရပါတယ်။ သိထားဖို့ တစ်ခုက Metacity ကို သုံးမယ်ဆိုရင် Compiz installed လုပ်ထားသူ တစ်ယောက် အတွက် Compiz effects ကို disable ပေးထားဖို့လိုပါတယ်။

Graphically enable ပေးဖို့အတွက် Alt+F2 ကိုနှိပ်ပြီး "Run Applicatoin" dialog မှာ "gconf-editor" ဆိုတာကို ရိုက်ထည့်ပါ။ အဲလိုဆိုရင် GNOME Configuration Editor ပေါ်လာပါလိမ့်မယ်။ အဲကနေ ဘယ်ဘက် sidebar ကိုကြည့်ပြီး  Apps > metacity > general ကိုသွားပါ။ တွေ့ပြီဆိုရင် ညာဘက်က main box ထဲမှာရှိတဲ့ "compositing_manager" ကို check လုပ်ပါ။ အဲလို လုပ်လိုက်တာနဲ့ သူနဲ့ သက်ဆိုင်တဲ့ effect တွေ ချက်ချင်းရလာပါလိမ့်မယ်။ တကယ်လို့ Terminal နဲ့ လုပ်ဆောင်ချင်သူ တွေ အတွက် အောက်ဖော်ပြပါ command နဲ့လုပ်ဆောင်နိုင်ပါတယ်။

gconftool-2 -s '/apps/metacity/general/compositing_manager' --type bool true

Desktop အဆင့်မြင့် အလှဆင်ခြင်း

တကယ်လို့ Appearance ထဲမှာ (System > Preferences > Appearance) ရှိတဲ့ Visual Effects settings ထဲမှာ Custom option ကိုလုပ်ဆောင်ချင်တယ် ဆိုရင်တော့ CompizConfig Settings Manager နဲ့ extra Compiz-Fusion plugins တွေလိုပါလိမ့်မယ်။ ဒီ CompizConfig Settings Manager နဲ့ ပတ်သတ်ပြီး ဒီနေရာမှာ အကျယ်ရေးထားခဲ့ပြီးပြီမို့လို့ ထပ်ပြီး မဖော်ပြတော့ပါဘူး။

APT Line: ppa:compiz/ppa
compiz-fusion-plugins-extra ကို ဒီနေရာကနေ install လုပ်ဆောင်ပါ။
simple-ccsm ကို ဒီနေရာကနေ install လုပ်ဆောင်ပါ။
compizconfig-settings-manager ကို ဒီနေရာကနေ install လုပ်ဆောင်ပါ။

Themes အလှအပများ

အလှအပကတော့ ဘယ်သူမဆို ကြိုက်တယ် - ကျွန်တော်လည်း ကြိုက်ပါတယ် - ကိုယ့်ကွန်ပြူတာအတွက် Themes အလန်း လေးတွေ ဆိုရင် ဘယ်သူမဆို လိုချင်ကြပါတယ်။ အဲ့အတွက်လှတပတ themes တွေလိုချင်သူများ themes packages တွေ အများအပြားရှိတဲ့ နေရာတွေကို ကျွန်တော်လမ်းညွှန်ပေးပါ့မယ်။ အဲ့ဒီ့ themes တွေကတော့ Bisigi Project themes တွေပါ။ Linux distribution အလိုက် ဘယ် distribution မှာဆိုရင်တော့ ဘယ်လို Install လုပ် ဆိုတာ install ဆိုတဲ့ Menu အောက်မှာ ရှာတွေ့နိုင်ပါတယ်။ တစ်ခြား themes တွေကိုလည်း GNOME-Look မှာ ရှာဖွေနိုင်ပါသေးတယ်။

APT Line: ppa:bisigi/ppa
bisigi-themes community-themes gnome-backgrounds gnome-colors gnome-themes gnome-themes-extras gnome-themes-more metacity-themes shiki-colors များကို ဒီနေရာကနေ လည်း install လုပ်ဆောင်နိုင်ပါတယ်။

Fractal Screensaver

Electric Sheep ဆိုတာ screensaver ကို geometric shapes လို့ ပြောလို့ ရတဲ့ စိတ်ဝင်စားစရာ contour lines တွေနဲ့ ဖော်ပြပေးပါတယ်။ Electric Sheep (version 2.7) ကို ဒီနေရာမှာ ဒေါင်းလုပ်ချလို့ ရပြီး install လုပ်ဆောင်နည်းကတော့ Linux မှာ ဆိုရင် ~/.electricsheep ကို extract လုပ်လိုက်ယုံပါပဲ - အသေးစိတ် ညွှန်ကြားချက်ကို ဒီနေရာမှာ ကြည့်လို့ ရပါတယ်။

electricsheep ကို ဒီနေရာကနေ လည်း install လုပ်ဆောင်လို့ ရပါတယ်။

Desktop တန်ဖိုးမြှင့်တင်ခြင်း

မရေးဖြစ်တာတောင် တော်တော်ကြာသွားပြီ - မရေးဖြစ်ဆို စိတ်ဝင်စားတဲ့သူနည်းတော့ ကျွန်တော်လည်း တစ်ခါရေးပြီးရင် သိပ်ပြန်မစဖြစ်ဘူး - ဒါပေမယ့်လည်း Ubuntu 10.10 Maverick Meerkat က October 10, 2010 ဆို ထွက်တော့မယ်။ ကိုယ်တွေက Ubuntu 10.04 မှာ ရပ်နေလို့ မဖြစ်တော့ဘူး - ဒီအကြောင်းကို တော်တော်လည်း အဆုံးသတ်ချင်နေပြီ။ နောက်ထပ် ရေးချင်တဲ့ အကြောင်းအရာ သစ်လေးလည်း ရှိနေတယ်။ ကျွန်တော့် အထင် နောက်ထပ် ၂ ခါလောက် ရေးပြီးရင်တော့ ဒီ Ubuntu 10.04 အတွက် လမ်းညွှန်လေး အဆုံးသတ်လို့ ရလောက်ပါပြီ။ အဲတာကြောင့် ဒီနေ့ မဆိုစလောက်လေး အားနေတာနဲ့ ရေးလက်စလေး ဆက်လိုက်ပါတယ်။ ဒီတစ်ခါကတော့ Ubuntu မှာ တောက်တိုမယ်ရ အသေးသုံး Applications လို့ ပြောရမယ့် Applications ခပ်သေးသေးတစ်ချို့ အကြောင်း ပြောပြချင်ပါတယ်။ အသေးသုံး Applications လို့သာ ပြောတာ တကယ်တော့ ကျွန်တော်တို့ Windows မှာပဲ ကြည့် ကြည့် တစ်ခြား ဘယ် OS မှာပဲ ကြည့်ကြည့် ဒီ အသေးသုံး Applications လေးတွေ မရှိပြန်ရင်လည်း ကိုယ့် ကွန်ပြူတာက သုံးရ အဆင်မပြေပြန်ဘူး - ဥပမာ ပြောရရင် ကျွန်တော်တို့ Window မှာဆို Ccleaner တို့ Defragler တို့ စသဖြင့် ဒါမျိုးလေးတွေပေါ့ - မသုံးပဲ နေတော့ မရဘူးလား မဟုတ်ဘူး ရတယ်။ ဒါပေမယ့် သူတို့ကို မသုံးပြန်ရင်ကျတော့လည်း ဖြတ်လမ်းက သွားလို့ ရတာကို လမ်းရိုးကြီးအတိုင်း တစ်ကွေ့ တစ်ပတ်ကြီး သွားနေရသလိုပေါ့ - ရောက်မယ့် နေရာကတော့ ဒီနေရာပဲ - ဒါ့ကြောင့် အသေးသုံး Applications လေးတွေဟာ မသုံးလည်း ဖြစ်ပေမယ့် သုံးလိုက်ရင်ကျတော့ ကိုယ့် Computer လေးကို ပိုပြီး အသုံးတည့်သွားစေပါတယ်။ အသုံးပြုရလည်း လွယ်ကူသွားစေပါတယ်။

Dock

ဒီ အကြောင်းက ကျွန်တော် ရေးထားပြီးသား ဖော်လည်း ဖော်ပြထားပြီးသား - ဒါပေမယ့် လမ်းကြုံနေတာနဲ့ တစ်ခါတည်း ပြန်ဆွဲခေါ်လိုက်ပါတယ်။

ခုနောက်ပိုင်းမှာ တော်တော်များများ လူကြိုက်များလာတာ Mac OS X သူ့ အပြင်အဆင်လေးတွေ - Windows နဲ့ မတူတဲ့ အသုံးချပုံလေးတွေက စိတ်ဝင်စားဖို့လည်း ကောင်းသလို - အသစ်အဆန်းလို ဖြစ်နေတော့ လူတိုင်းလည်း စိတ်ဝင်စားကြပါတယ်။ အထဲထဲက အပြင်အဆင်တွေ ဘယ်နေရာမှာ ဘယ်လိုကောင်းတယ် - ဘယ်ကောင်ကတော့ Windows ထက် ပိုသာတယ် - ဘယ်ဟာကတော့ နဲနဲလေး သုံးရတာ ကသိကအောက် ဖြစ်တယ် ဆိုတာ လူတော်တော်များများ သတိမထားမိကြပေမယ့် Mac OS X ရဲ့ အပေါ်ယံ ကြည့်တာနဲ့ စွဲမက် ချင်စရာကောင်းတာလေး တစ်ချက်က သူ့မှာ ပါတဲ့ Dock ပါ။

ဒါကို လူတော်တော်များများလည်း သဘောကျကြသလို ကျွန်တော်လည်း သဘောကျတယ်။ ဒီလို Dock မျိုး ပုံစံတူ သုံးစွဲ ချင်သူတွေအတွက် Avant Window Navigator ( AWN ) ကို သုံးစွဲ ကြည့်နိုင်ပါတယ်။

awn-settings ကို ဒီနေရာကနေ လည်း Install လုပ်ဆောင်လို့ ရပါတယ်။

Application Launcher

Application Launcher ဆိုတဲ့ သဘောကို နားလည်လွယ်အောင် ပြောရရင် application တွေ document တွေကို သက်ဆိုင်ရာ Files တွေ Applications တွေရဲ့ name ရှေ့စာလုံး အနည်းငယ် ရိုက်ယုံနဲ့ အလွယ်တကူ ခေါ်ယူအသုံးပြုလို့ ရစေမယ့် program မျိုးကို ခေါ်ပါတယ်။ Kupfer - ဆိုတာအဲလို အရည်အချင်းတွေနဲ့ ပြည့်စုံပြီး စွမ်းဆောင်ရည် ပြည့်ဝတဲ့ Application Launcher တစ်ခုပါပဲ။

APT Line: ppa:kupfer-team/ppa
kupfer ကို ဒီနေရာကနေ လည်း Install လုပ်ဆောင်လို့ ရပါတယ်။

တကယ်လို့ Kupfer ကို မသုံးချင်ရင် သူ့ထက် နဲနဲလေး ပိုလှတဲ့ GNOME+Do ကို အသုံးပြုနိုင်ပါတယ်။

APT Line: ppa:do-core/ppa
gnome-do ကို ဒီနေရာကနေ လည်း Install လုပ်ဆောင်လို့ ရပါတယ်။

Clipboard Manager

Paste မလုပ်ခင်မှာ Copy လုပ်ထားတဲ့ Source ကို ပိတ်လိုက်ရင် Copy/Paste လုပ်လို့ မရတဲ့ ပြဿနာ တစ်ခု 2004 ခုနှစ် ကုန်ပိုင်းလောက်က ရှိခဲ့ဖူးပါတယ်။ Parcellite ဆိုတာ အဲလို ပြဿနာတွေရဲ့ ကြားထဲမှာ Features ပြည့်ပြည့်စုံစုံနဲ့ အသုံးပြုလို့ ကောင်းတဲ့ clipboard manager တစ်ခုပါပဲ။

parcellite ကို ဒီနေရာကနေ လည်း Install လုပ်ဆောင်လို့ ရပါတယ်။

Universal Applets

Universal Applets ဆိုတာ ကျွန်တော်တို့ Windows တွေမှာ ပါတဲ့ Widgets လေးတွေ သုံးနိုင်အောင်ပါ။ သူ့ကိုတော့ ကျွန်တော်တို့ "widgets" for Linux" လို့ ခေါ်ရမှာပေါ့ - Screenlets တို့ gDesklets တို့ နောက်ထပ် Release တွေ မထွက်တော့တဲ့ နောက်မှာ Universal Applets က ပေါ်ထွက်လာတာပါ။ ဒါပေမယ့် Universal Applets အတွက် main developer က လတ်တလော အခြေအနေမှာ ဒီ project ကို ဆက်လက် လုပ်ဆောင်နိုင်ဖို့ မအားမလပ် ဖြစ်နေတာကြောင့် နောက်ထပ် သူ့နေ့ရာမှာ အစားထိုး လုပ်ဆောင်ပေးနိုင်မယ့် သူတစ်ယောက်ယောက်ကို ရှာဖွေနေတယ်လို့ သိရပါတယ်။ တကယ်လို့ သုံးချင်တယ် ဆိုရင်တော့ အရင်တုန်းက ထွက်ခဲ့တဲ့ version ကို အသုံးပြုနိုင်ပါတယ်။

APT line: deb http://download.opensuse.org/reposit.../xUbuntu_9.10/ ./
universal-applets ကို ဒီနေရာကနေ လည်း Install လုပ်ဆောင်လို့ ရပါတယ်။

ဖျော်ဖြေရေး - မျှဝေရေး - ပြင်ဆင်ရေး နှင့် လုံခြုံရေး ကဏ္ဍများ

ဖျော်ဖြေရေး ကဏ္ဍ

Audio Recording & Editing

Audio Recording လုပ်ဖို့နဲ့ လုပ်ထားပြီးသားတွေကို Edit လုပ်ဖို့များ ဝါသနာ ပါကြမလား မသိဘူး - ဒီလိုဆိုရင် Jokosher ကောင်းပါတယ် - ဘယ်လိုကောင်းတယ် ဆိုတာတော့ စမ်းသုံးကြည့်မှပဲ ပြောလို့ရမှာပါ - တစ်ယောက်နဲ့ တစ်ယောက် အကြိုက်ချင်း မတူတော့အရမ်းကြီး စွတ်မြှောက်လို့လည်း မရပြန်ဘူး

Jokosher ကို ဒီနေရာကနေ လည်း Install လုပ်ဆောင်လို့ ရပါတယ်။

Video Editing

PiTiVi အကြောင်းက အရင်က ရေးခဲ့ဖူးတဲ့ စာတွေမှာလည်း ဖော်ပြခဲ့ဖူးပါပြီ - သူက အသုံးပြုရလွယ်တယ် - နောက်ပြီး feature စုံတဲ့ movie editor လို့ ပြောလို့ ရပါတယ် - PiTiVi က အခု Ubuntu ထဲမှာ default အနေနဲ့ ပါလာပြီးသားပါ - ဒါပေမယ့် Update ကျကျ သုံးချင်တယ် ဆိုရင်တော့ repository ထဲမှာ ထည့်ထားဖို့ လိုပါတယ်။

APT Line: ppa:gstreamer-developers/ppa

Video Screen Capture

တစ်ခါတစ်လေကျရင် တစ်ယောက်ယောက်က ဘယ်လိုလုပ်ရတယ် ဆိုတာ နားမလည်လို့ ရှင်းပြရတဲ့ အခါ စာနဲ့ ရှင်းရင် အရမ်းရှည်လျား ထြွေပားနေမယ့် အကြောင်းအရာမျိုးက ကိုယ့် Desktop ကို records လုပ်ပြီး ပြလိုက်ရင် ပိုလွယ်ပြီး မြန်ပါတယ်။ အဲ့အတွက်တော့ Istanbul ရှိပါတယ် -

Istanbul ကို ဒီနေရာကနေ လည်း Install လုပ်ဆောင်လို့ ရပါတယ်။

Player

Player တွေကတော့ တော်တော်ပေါပါတယ် - ဒါပေမယ့် ကျွန်တော်တော့ vlc ပဲ သဘောကျတယ် - သူ့မှာ plug-ins တွေလည်း မနည်းမနောပါသလို တစ်ခြား functions တွေလည်း တော်တော်များများပါပါတယ် - vlc ကို Ubuntu Software Center ကနေ install လုပ်ဆောင်လို့ ရသလို အောက်မှာ ဖော်ပြထားတဲ့ နေရာကနေလည်း install လုပ်လို့ ရပါတယ်။

vlc ကို ကို ဒီနေရာကနေ install လုပ်ဆောင်လို့ ရပါတယ်။

Webcam

ကိုယ့်မှာ webcam ရှိတယ် - ဒီလိုဆိုရင်တော့ ကိုယ့် webcam သုံးပြီး တစ်ခြားသူ တစ်ယောက်ကို ပြဖို့ဆို Cheese ရှိထားဖို့ လိုပါလိမ့်မယ် - သူ့ကို သုံးပြီး ဓာတ်ပုံတွေ - ဗွီဒီယိုတွေ webacm ကနေ အားလုံး ရိုက်လို့ ရပါတယ်။

Cheese ကို ဒီနေရာကနေ လည်း Install လုပ်ဆောင်လို့ ရပါတယ်။

Alarm Clock

တစ်ယောက်နဲ့ တစ်ယောက် မတူဘူး - တစ်ချို့က ကိစ္စတစ်ခုခု ရှိရင် Alarm မလိုပဲ ကိုယ့်ဘာသာ အချိန်ညှိပြီး လုပ်တတ်တယ် - တစ်ချို့ကတော့ Alarm လေးနဲ့မှ လုပ်ရမယ့် အလုပ်ကို ချိန်ကိုက်ပြီး လုပ်တတ်တယ် - အဲလို Alarm လိုသူတွေ အတွက် ကိုယ့် ကွန်ပြူတာကိုလည်း အမြဲ ဖွင့်ထားနိုင်မယ် ဆိုရင် alarm clock ရှိပါတယ် -

Alarm-clock ကို ဒီနေရာကနေ လည်း Install လုပ်ဆောင်လို့ ရပါတယ်။

Desktop Publishing

Scribus က desktop publishing (DTP) application မို့လို့ စာစီစာရိုက် သမားတွေ နောက်ပြီး ဘောက်ချာ - စာ - သတင်းစာ - ပိုစတာ - စာအုပ် စသဖြင့် ပုံစံလှလှ professional ကျကျ ထုတ်ဝေလိုသူတွေ အတွက် အသုံးတည့်ပါတယ် -

APT Line: ppa:scribus/ppa
Scribus ကို ဒီနေရာကနေ လည်း Install လုပ်ဆောင်လို့ ရပါတယ်။

Games

PlayDeb

Games အကြောင်းကလည်း မပါလို့ မဖြစ်ဘူး - ဒါပေမယ့် ကျွန်တော်က ဂိမ်းနဲ့ ပတ်သတ်ပြီး သိပ်မကျွမ်းကျင်သလို အမြဲလည်း ဆော့လေ့ မရှိတာ မို့လို့ ဘယ် ဂိမ်းတွေ ကောင်းတယ် ဆိုတာ အများကြီး သိပ်မသိပါဘူး - ဒါပေမယ့် ဆော့ချင်ရင် ဘယ်လို လုပ်ရမယ် ဆိုတာတော့ လေ့လာထားပါတယ် - ကျွန်တော်က ဂိမ်းသေးသေးလေးတွေ ( ကလေးဂိမ်း ) လောက်ပဲ ဆော့ဖြစ်တယ်။ ဘာပဲဆော့ဆော့ PlayDeb ဆိုတာ Games တွေရဲ့ repository ပါ - သူက Ubuntu repos ထဲမှာတောင် မပါတဲ့ နောက်ဆုံးထွက် ဂိမ်းတွေ ဆော့လို့ ရပါတယ်။ PlayDeb.net မှာ တစ်ခုချင်းစီ လိုက်ရှာပြီး install လုပ်နေရတာထက်တော့ PlayDeb package က အများကြီး အဆင်ပြေပါတယ်။ ဒီကောင်လေးကို >> PlayDeb package install လုပ်ပါ။

PlayOnLinux

တစ်ချို့က Windows Gamers တွေ - Linux ဂိမ်းတွေဆို သိပ်လည်း မရင်းနှီးကြသလို သိပ်လည်း မဆော့ချင်ကြဘူး - ဒီလိုဆိုရင် Windows Games တွေကို Linux မှာ ဆော့နိုင်ဖို့ PlayOnLinux ရှိပါတယ်။ ကျွန်တော်က Gamer မဟုတ်တော့ CallofDuty - Prince of Persia - Civilization - စသဖြင့် ဆော့လို့ ရတယ် ဆိုတာပဲ သိတယ် - အသေးစိတ် လုပ်ဆောင်ပုံကိုတော့ မလေ့လာထားဘူး - ဒါပေမယ့် ခက်ခက်ခဲခဲ မရှိပါဘူး - Just Google it! ပါပဲ -

Playonlinux ကို ဒီနေရာကနေ လည်း Install လုပ်ဆောင်လို့ ရပါတယ်။

မျှဝေရေးကဏ္ဍ

BitTorrent

Filesharing နဲ့ ပတ်သတ်ပြီး ပြောစရာ တော်တော်များများတော့ ရှိပါတယ် - ဒါပေမယ့် လူသုံးများတဲ့ လိုအပ်တာလေးပဲ ထည့်လိုက်ပါတယ်။ အဲဒါကတော့ အရင်တည်းက စပြီး ခုချိန်ထိ Filesharing လုပ်ဆောင်ရာမှာ လူသုံးများနေတဲ့ Torrent လမ်းကြောင်းပါ - ကျန်တဲ့ Filesharing လမ်းကြောင်းတွေက ပိုက်ဆံပေးရတာတွေလည်း ရှိသလို အလကား သုံးမယ် ဆိုရင်လည်း အလုပ်တော်တော်ရှုပ်ပါတယ် - Transmission က အခု Ubuntu ထဲမှာ default အနေနဲ့ ပါလာပြီးသားပါ - ဒါပေမယ့် Update ကျကျ သုံးချင်တယ် ဆိုရင်တော့ repository ထဲမှာ ထည့်ထားဖို့ လိုပါတယ်။

APT Line: ppa:transmissionbt/ppa

ပြင်ဆင်ရေးကဏ္ဍ

Backup

သူကတော့ မရှိမဖြစ် အရေးကြီးပါတယ် - Backup ရဲ့ အရေးပါပုံ တော်တော်များများကို ဖိုရမ်မှာလည်း ခေါင်းစဉ် အမျိုးမျိုးနဲ့ ရေးခဲ့ပြီးသားမို့ ထပ်ပြီး မဖော်ပြတော့ပါဘူး - ထပ်မံလေ့လာလိုသူများ ကျွန်တော် ရေးခဲ့ဖူးတဲ့ စာတွေထဲမှာ ရှာဖွေနိုင်ပါတယ် - သူ့ရဲ့ ကောင်းကျိုးကို အတိုချုပ်ရရင်တော့ Backup လုပ်ထားခြင်းအားဖြင့် အရေးကြီးတဲ့ Data တွေ မျှော်လင့် မထားတဲ့ အခြေအနေ တစ်ခုကြောင့် မဆုံးရံှုးရတော့ဘူးပေါ့ -

Backintime-gnome ကို ဒီနေရာကနေ လည်း Install လုပ်ဆောင်လို့ ရပါတယ်။

Partition Editor

ကျွန်တော်တို့ Windows မှာ သုံးတဲ့ Paragon တို့ - Partition Magic တို့လိုပေါ့ - ကွာခြားတာက Windows မှာဆိုရင် Apps တစ်ခုခု သုံးလို့ ကောင်းရင် ပိုက်ဆံနဲ့ ပေးဝယ်ရတယ် - ဒီ Gparted ကတော့ ပိုက်ဆံနဲ့ ပေးဝယ်စရာလည်း မလိုဘူး - key - crack သုံးဖို့လည်း မလိုဘူး - Always free -

Gparted ကို ဒီနေရာကနေ လည်း Install လုပ်ဆောင်လို့ ရပါတယ်။

Virtual Machine

Virtual machine ဆိုတာ သာမန် ကွန်ပြူတာကို ဖျော်ဖြေရေးလောက် သုံးသူတွေ သုံးလေ့ မရှိပါဘူး - သူ့အကြောင်းကို ဖိုရမ်မှာ ဆွေးနွေးထားတဲ့ နေရာတော်တော်များများ ရှိပါတယ် - နားလည်လွယ်အောင် ဥပမာ ပေးရရင် ကျွန်တော်တို့က လတ်တလော Windows Vista သုံးနေတယ်ထား - သူများတကာတွေက Windows 7 - Windows 7 နဲ့ တတွတ်တွတ် ပြောနေကြလို့ ကိုယ်လည်း Windows 7 စမ်းကြည့်ချင်ပါပြီ တဲ့ - ဒီလိုဆို ပုံမှန်တွေးကြည့်ရင် လုပ်ဆောင်စရာ နှစ်လမ်းပဲ ရှိတယ် - HD မှာ Partition နောက်တစ်ခု ထပ်ခွဲပြီး Windows 7 တင်ချင်ရင်တင် - ဒါမှမဟုတ် လက်ရှိ Windows ကြီး ဖြုတ်ချပြီး Windows 7 တင်ရင်တင် - ဒီလိုနည်းတွေ ရွေးရပါလိမ့်မယ် - ခု ပုံမှန် မတွေးတော့ဘူး - အဲ့လိုဆို နောက်ထပ် ရွေးချယ်စရာ တတိယနည်းလမ်းရှိလာပါပြီ - အဲတာက Virtual machine ကို သုံးတဲ့နည်းလမ်းပါ - သူ့ကို သုံးရင် OS တွေ တစ်ခုကနေ တစ်ခု စမ်းသပ်ကြည့်တ့ဲ နေရာမှာ နဂိုရှိရင်းစွဲ Windows ကို ဘာမှ မထိခိုက်ပဲ နောက် OS တစ်ခုကို စမ်းသပ်နိုင်ပါတယ်။ Virtualbox ကို Ubuntu Software Center ကနေ install လုပ်ဆောင်လို့ရပါတယ်။

လုံခြုံရေးကဏ္ဍ

Firewall

တစ်ချို့ကို လုံလုံခြုံခြုံလေး နေချင်ကြတယ် - ဒီလိုဆို Firewall ရှိဖို့လိုပါတယ် - Windows လိုမျိုး သိပ်ရှုပ်ရှုပ်ထွေးထွေး မရှိသလို တော်ယုံလည်း သိပ်သုံးလေ့ မရှိကြပါဘူး - သုံးချင်ရင်တော့ အောက်မှာ ဖော်ပြထားတဲ့ နေရာကနေသာ install လုပ်ဆောင်လိုက်ပါ -

Gufw ကို ဒီနေရာကနေ လည်း Install လုပ်ဆောင်လို့ ရပါတယ်။

Antivirus

Linux မှာ antivirus က ပုံမှန်အားဖြင့် သုံးဖို့ မလိုပါဘူး - ဒါပေမယ့် Windows မှာသုံးလာတာကို စိတ်စွဲနေသူတွေ အတွက် စိတ်အဆာပြေ Antivirus တွေတော့ ရှိပါတယ်။ တစ်ခုတည်းပဲ ဖော်ပြလိုက်ပါတယ်။ သူကတော့ ClamTK Virus Scanner ပါ။

Clamtk ကို ဒီနေရာကနေ လည်း Install လုပ်ဆောင်လို့ ရပါတယ်။

ကျွန်တော် ဒီအကြောင်းကို ရေးခဲ့တာ လနဲ့ချီနေပါပြီ - ဒီနေ့တော့ ဒီလောက်နဲ့ပဲ အဆုံးသတ်လိုက်ပါတယ် - ဒီအကြောင်း အရာတွေက Ubuntu နဲ့ လုံးဝစိမ်းနေသူ တစ်ယောက်အတွက် စတင်အသုံးပြုရာမှာ အထောက် အပံ့ဖြစ်အောင် ရေးထားတာမျိုးပါ - ဒါ့ကြောင့် အရမ်းအပြည့်အစုံကြီး မဟုတ်ပါဘူး - သူ့ထက် သူ့ထက် ကောင်းတဲ့ Apps တွေလည်း ရှိသေးသလို - ဖော်ပြပါ နည်းတွေနဲ့တင် မဟုတ်ပဲ တစ်ခြား နည်းလမ်းတွေနဲ့ ရယူလို့ ရတာတွေလည်း ကျန်ပါသေးတယ် - အဲတာကိုတော့ Ubuntu ကို လက်တွေ့ စမ်းသပ်ကြည့်ရင်း လေ့လာယူကြဖို့ အကြံပြုလိုပါတယ်။

KznT.

Make Ubuntu Look Like Mac OSX

ကျွန်တော် ခုနောက်ပိုင်း Ubuntu ထဲပဲ အနေများနေမိတယ် - ဟိုတစ်နေ့က Ubuntu သုံးရင်း Macbuntu ဆိုတဲ့ Mac OS X Transformation Pack ဆိုတာတွေ့လို့ သုံးရက်လောက် သုံးဖြစ်ခဲ့သေးတယ် - ကျွန်တော့် အထင်တော့ Macbuntu က တော်တော်လေး မဆိုးဘူး - Ubuntu Mac style ပေါ့ - icons တွေကစလို့ folders တွေ - menus တွေအပါအဝင် login screen အဆုံး Mac OS X ပုံစံ ဖန်ဆင်းထားတာမို့လို့ Mac OS ကို ခံစားကြည့်ချင်သူတွေ အတွက် ကျွန်တော် စမ်းကြည့်ကြဖို့ ညွှန်းလိုပါတယ် -

လတ်တလောမှာ မိသားစုဝင်တွေက Ubuntu 10.04 Lucid Lynx သုံးနေတဲ့ သူတွေဆိုရင် အောက်မှာ ဖော်ပြထားတဲ့ Command Lines လေးကြောင်းကို Terminal window မှာ Copy / Paste လုပ်ပြီး တစ်ကြောင်းတစ်ခါ Enter ခေါက်ပါ -

$ wget https://downloads.sourceforge.net/project/macbuntu/macbuntu-10.04/v2.3/Macbuntu-10.04.tar.gz -O /tmp/Macbuntu-10.04.tar.gz
$ tar xzvf /tmp/Macbuntu-10.04.tar.gz -C /tmp
$ cd /tmp/Macbuntu-10.04/
$ ./install.sh

တကယ်လို့ မိသားစုဝင်တွေက Ubuntu 10.10 Maverick Meerkat သုံးနေတဲ့ သူတွေဆိုရင် အောက်မှာ ဖော်ပြထားတဲ့ Command Lines လေးကြောင်းကို Terminal window မှာ Copy / Paste လုပ်ပြီး တစ်ကြောင်းတစ်ခါ Enter ခေါက်ပါ - ( တစ်ခု သိထားဖို့လိုတာ 10.10 Macbuntu က လောလောဆယ် အခြေအနေမှာ Alpha အဆင့်ပဲ ရှိပါသေးတယ် )

$ wget https://downloads.sourceforge.net/project/macbuntu/macbuntu-10.10/v2.3/Macbuntu-10.10.tar.gz -O /tmp/Macbuntu-10.10.tar.gz
$ tar xzvf /tmp/Macbuntu-10.10.tar.gz -C /tmp
$ cd /tmp/Macbuntu-10.10/
$ ./install.sh

ဒါပေမယ့်လည်း ကျွန်တော်က Mac fun မဟုတ်လို့ သုံးရင်းနဲ့ နဂို Ubuntu ကို ပြန်သတိရပြီး သုံးနေရင်း သုံးလေးရက် နေတော့ နဂို Ubuntu ဆီပဲ ပြန်ပြောင်းခဲ့တယ်။ ကျွန်တော့် အထင်တော့ အတုအယောင် ဆိုတာ ဘယ်လောက်ပဲ လှလှ နဂို မူရင်း အလှလောက် စွဲဆောင်မှု မရှိဘူး -

Macbuntu ရဲ့ စွမ်းဆောင်ရည်ကိုတော့ တကယ် အသိအမှတ်ပြုပါတယ် - ဒါမယ့် သုံးနေရင်း သဘောမကျလို့ အရင်ပုံစံ ပြန်ပြောင်းချင် တယ် ဆိုရင်တော့ Macbuntu ကို Remove လုပ်ဆောင်နိုင်ဖို့ အောက်ဖော်ပြပါ အဆင့်တွေ အတိုင်း Terminal ထဲမှာ လုပ်ဆောင်ပါ -

Macbuntu-10.04/v2.3 အတွက်ဆိုရင် -

$ cd ~/.macbuntu/10.04-2.3/
$ ./uninstall.sh

Macbuntu-10.10/v2.3 အတွက်ဆိုရင် -

$ cd ~/.macbuntu/10.10-2.3/
$ ./uninstall.sh

အသေးစိတ် အချက်အလက်တွေကို လေ့လာလိုသူတွေ အတွက် ဒီနေရာ နဲ့ ဒီနေရာ တွေမှာ လေ့လာနိုင်ပါသေးတယ် -

KznT.

Inception ( 2010 )

ဒီကားကို စကြည့်တုန်းက သူ့ဘာပြောချင်တာလည်း ဆိုတာ ချက်ချင်း သဘောမပေါက်ဘူး - မပေါက်ဆို ကိုယ်တွေ နေ့စဉ် ဖြတ်သန်းတွေ့ထိနေတဲ့ အတွေးအခေါ်တွေနဲ့ လုံးလုံးကို တူမှ မတူတာ - နောက်ပိုင်းကို ရောက်သွားတော့မှ တဖြေးဖြေး သဘောပေါက်လာတယ် - ခုဆို ပြန်ကြည့်တာ လေးခေါက်မြောက်သွားပြီ - ဘာရယ်တော့ မဟုတ်ဘူး - သူတို့ရဲ့ အတွေးနဲ့ ဖန်တီးနိုင်စွမ်းကို သဘောကျမိလို့ပါ - ကိုယ်မတွေးမိတဲ့ အတွေးကို သူတို့တွေးမိတယ် - မဖြစ်နိုင်ဘူးလို့ လူတိုင်း သိထားတဲ့ စိတ်ကူးတစ်ခုကို တစ်ခြားသူတစ်ယောက်ဆီ လက်ဆင့်ကမ်းတဲ့ အချိန်မှာ အဲ့ဒီလူ မှင်သတ်လက်ခံနိုင်အောင် ပုံဖော်ပြတဲ့ ရိုက်ချက်တွေက အကွက်စေ့လွန်းတယ် -

လူတစ်ယောက်ရဲ့ စိတ်ကူးထဲမှာ ရှိနေတဲ့ Idea ကို အိပ်မက်ဖြစ်ရပ် တစ်ခုအဖြစ် ဖန်တီးပြီး ခိုးဝင်တူးဖော်ကြသတဲ့ - အဲ့ထက် ပိုအံ့သြဖို့ ကောင်းတာက အိပ်မက် ဖြစ်ရပ် တစ်ခုထဲမှာပဲ နောက် အိပ်မက် တစ်ခုရှိရာ - ( Dream state တစ်ခုကနေ နောက် Dream state တစ်ခုဆီ ) ဆက်ကူးသွားကြတာ -  Dream state တစ်ခုကနေ နောက် Dream state တစ်ခုဆီ ကူးတယ်ဆိုတာ မြန်မာလို နားလည်လွယ်အောင် ပြောရရင် အိပ်မက်တစ်ခုထဲမှာပဲ နောက်အိပ်မက်တစ်ခု ဆက်မက်ကြတာမျိုးပေါ့ - Dream state တစ်ခုကနေ နောက် Dream state တစ်ခုဆီ ကူးတဲ့ အချိန်မှာလည်း နောက် Dream state တစ်ခုဆီ ကူးသွားတဲ့ လူတွေကို လက်ရှိ Dream state ရှိရာဆီ ပြန်ခေါ်ဖို့ လူတစ်ယောက်ဆီ ချန်ခဲ့ရတယ် - လက်ရှိ Dream state မှာ ထိန်းမထားနိုင်တဲ့ အခြေအနေ တစ်ခုခု ရှိလာရင် နောက် Dream state တစ်ခုမှာ ရောက်နေတဲ့ သူတွေကို လက်ရှိ Dream state ရှိရာဆီ ပြန်ရောက်လာဖို့ ကျန်ခဲ့တဲ့ သူက အားလုံးကို kick လုပ်ရတယ် - ( kick လုပ်တယ် ဆို နောက် Dream state တစ်ခုဆီ ဆင်းသွားတဲ့ သူတွေကို လက်ရှိ Dream state ကို ပြန်ခေါ်တော့မယ်လို့ အသိပေးတာမျိုးပေါ့ ) နောက်ပြီး အဲလို kick လုပ်တော့မယ် ဆိုတာကိုလည်း နောက် Dream state တစ်ခုမှာ ရောက်နေတဲ့ သူတွေကို လက်ရှိ Dream state မှာ ကျန်ရစ်ခဲ့တဲ့ သူက Music ဖွင့်ပြီး အသိပေးရတယ် - အဲမှာ ချွင်းချက် ရှိသွားတာက Dream state သုံးဆင့် ရှိတယ် ဆိုရင် ပထမဆုံး Dream state မှာ ကျန်ခဲ့တဲ့ သူက kick လုပ်လို့ မရဘူး - အဆင့်တစ်ဆင့်ချင်းမှာ ပြန်ခေါ်ဖို့ ကျန်ခဲ့တဲ့ သူတွေက နောက်ဆုံး အဆင့်မှာ ရောက်နေတဲ့ သူတွေအားလုံးကို သက်ဆိုင်ရာ Dream state ဆီ ပြန်ရောက်လာအောင် ခေါ်ပြီးမှ kick ရတယ် -

ကားထဲမှာ လီယိုနာဒို က Dream state တစ်ခုကို ဖွဲ့စည်းတဲ့ အဖွဲ့ရဲ့ ခေါင်းဆောင်ပေါ့ - သူက အိပ်မက်ကို ဖန်တီးတယ် - အိပ်မက်ထဲက ဇာတ်ကောင်တွေကို ဖန်တီးတယ် - ဒါပေမယ့် အဲ့ဒီ့ အိပ်မက်ကို အကွက်ချဖို့ကိုကျတော့ Architect တစ်ယောက် သပ်သပ်ထပ်ပါတယ် - သူ့လောက်နီးပါးတော်တဲ့ ကောင်မလေးတစ်ယောက်ပေါ့ - ဇာတ်ကားထဲက ဒီအောက်က နေရာမှာ လီယိုနာဒိုက Dream state တစ်ခု ဖွဲ့စည်းတဲ့သဘောတရားကို ရှင်းပြနေတာ -

လီယိုနာဒို က ဒီ Dream state တစ်ခု ဖွဲ့စည်းတဲ့သဘောတရားကို သူ့ ဇနီးကိုရင်းပြီး လေ့လာခဲ့တာ - ရလာဒ်ကတော့ ဆိုးသွားတယ် - သူ့မိန်းမက Dream state နဲ့ Reality ကို ကွဲကွဲခြားခြား မသိတော့ဘူး - Dream state နဲ့ Reality ကို ခွဲခြားနိုင်တဲ့ totem ဆိုတာလေးကို သူ့မိန်းမကို လီယိုနာဒို က ပေးထားပေမယ့် သူ့ဇနီးက အဲတာလေးကို သော့ခေတ် သိမ်းထားလိုက်ပြီး Dream state နဲ့ Reality ရဲ့ ကွာခြားချက်ကို မစမ်းဖြစ်ခဲ့ဘူး - အဲ့မှာ သူတို့ နှစ်ယောက်လုံး Dream state ကို Reality နဲ့ အထင်မှားသွားတယ် - ( totem ဆိုတာလေးက သူ့ကို လှည့်လိုက်ရင် Dream state ထဲမှာဆို Gravity မရှိလို့ ဘယ်တော့မှ လဲ မသွားဘူး - လက်တွေ့ဘဝမှာ လှည့်လိုက်ရင် လဲတယ် - အဲတာလေးကိုလှည့်ပြီး သူတို့က ငါတို့ Dream state မှာလား Reality မှာလား ဆိုတာ ခဲြွခားကြတာ ) သူ့မိန်းမက Dream state ကိုပဲ Reality ထင်နေတာ - ဒါကို နောက်ပိုင်း လီယိုနာဒို က totem လေးလိုက်ရှာ ပြန်စစ်ကြည့်ပြီး သိသွားတော့ ငါတို့ ရောက်နေတာ Dream state ဆိုပြီး သူ့မိန်းမကို ပြောပြ - လက်တွေ့ဘဝကို ပြန်ခေါ်တော့မှ သူတို့နှစ်ယောက်လုံး Dream state ကနေ ပြန်ထွက်လာကြတယ် - ဒါပေမယ့် ခက်သွားတာ လီယိုနာဒို က Dream state နဲ့ Reality ကို ခွဲခြား သိပေမယ့် သူ့ဇနီးက လက်တွေ့ဘဝကို ရောက်နေတာတောင် သူ့ကိုယ်ကိုယ်သူ Dream state ဘဝမှာပဲ ရှိနေသေးတယ် ထင်ပြီး သူ့ကလေးတွေဆီ ပြန်ချင်တဲ့ ဇောနဲ့ လက်တွေ့ဘဝကို ပြန်မယ် ဆိုပြီး တိုက်ပေါ်က ခုန်ချပြီး သေသွားတယ် -

ဒီကားက ပထမစကြည့်ရင် တော်တော်ရှုပ်မယ် - ဘာလို့လည်း ဆို ကိုယ်နေ့တိုင်း ဖြတ်သန်းကြုံတွေ့နေရတဲ့ အတွေးအခေါ် မျိုးနဲ့ ဖွဲ့စည်းထားတာ မဟုတ်လို့ - ဒါပေမယ့် သူဖော်ပြချင်တဲ့ သဘောတရားကို သိရင် တော်တော်ကြိုက်သွား လိမ့်မယ်။ သြော် နောက်တစ်ချက် ရှိသေးတယ် - အဲတာကတော့ ကားထဲမှာ လီယိုနာဒို ပြောသွားတဲ့ စကား -

" In a dream your mind functions more quickly, therefore time seems to feel more slow. "

ဆိုလိုတာက ကျွန်တော်တို့တွေ အိပ်မက် မက်ကြတဲ့ အခြေအနေ တစ်ခုမှာ စိတ်ရဲ့ လှုပ်ရှားမှုက ပိုပြီး မြန်ဆန်တယ် - ဥပမာ ရန်ကုန်ကနေ ကျိုင်းတုံ သွားမယ် - အပြင်မှာဆို လေယာဉ်နဲ့ သွားရင်တောင် တစ်နာရီခွဲလောက် အချိန်ပေးရင် ပေးရမယ် - အိပ်မက်ထဲမှာကျတော့ seconds ပိုင်းအတွင်း ရောက်နိုင်တယ် - ဒါကြောင့်မို့ In a dream your mind functions more quickly လို့ သူက ပြောတာ - အဲလို mind functions က ပိုမြန်သွားတော့ ဘာထူးခြား သွားလဲ ဆိုရင် real world မှာ ၅ မိနစ်ရတဲ့ အချိန် တစ်ခုက dream state ထဲကို ရောက်သွားရင် တစ်နာရီလောက် ပို အချိန်ရသွားတာနဲ့တူသွားတယ် - ဒါကိုပဲ Five minutes in the real world gives you an hour in the dream. ဆိုပြီး ပြောသွားတာ - ဒီ သဘောတရားကို ဒီဇာတ်ကားက အပြည့်အဝ အသုံးချသွားတယ် - ဒါကို မချိတ်ဆက်မိရင်ပဲ ဖြစ်ဖြစ် အပေါ်မှာ ဖော်ပြခဲ့တာတွေကို နားမလည်ခဲ့ရင် ဖြစ်ဖြစ် ဒီဇာတ်ကားရဲ့ အနှစ်သာရကို ဘယ်လိုမှ သဘောမပေါက်နိုင်ဘူး -

နောက်ဆုံး ပြောချင်တာကတော့ Inception ဇာတ်ကားဟာ တော်တော်ကောင်းပါတယ် - IMDb မှာ Rating 9.0 ရတယ် - ကြည့်စေချင်ပါတယ် - သာမန်နဲ့ မတူတဲ့ အတွေးအခေါ်သစ်ထဲ ကို ဆွဲခေါ်သွားမယ့် ဇာတ်ကားကောင်း တစ်ခုကို ခံစားကြည့်ကြပါဦး -

မောင်ဇင်။

Google intros Instant Preview in search

ဒီနေ့တော့ သတင်းထူး တယ် - အကြောင်းကတော့ Google ပေါ့ - ကျွန်တော်ကလည်း Google fun ဖြစ်နေတော့ တစ်နေ့နဲ့ တစ်နေ့ Google က ဘာတွေ improve လုပ်လိုက်တယ် ဆိုတဲ့ သတင်းများ ထွက်လာမလဲ ဆိုပြီး စောင့်နေမိတယ် -

Google က ဟိုတစ်လောကတင် Google instant ဆိုပြီး feature ထုတ်လိုက်တယ် အဲ့အကြောင်းကိုလည်း ဒီနေရာမှာ ရေးထားခဲ့ ဖူးပါပြီ - အဲ့တုန်းက Google instant ဆိုပြီး ထွက်လာတော့ တော်တော်ကျေနပ်သွားတယ် - ပြောလို့ ပြောတာ မဟုတ်ဘူး - အရင်ကဆို တစ်ခုခု ရှာချင်ရင် ရှာချင်တဲ့ စာလုံးရိုက်ပြီး Enter ခေါက်နေရတာ - Google instant ပေါ်လာတော့ Enter တောင် ခေါက်ဖို့ မလိုတော့ဘူး - ရှာချင်တဲ့ စာလုံးကို အပြောင်းအလဲလေး လုပ်လိုက်တာနဲ့ Search Result ကလည်း တမဟုတ်ချင်း လိုက်ပြောင်းသွားတယ် - အဲ့တုန်းက Google instant ကို တော်တော်သဘောကျခဲ့တာ - ခုနောက်ထပ် Google ကနေ improve လုပ်လိုက်ပြန်ပြီ - သူ့ကိုကျတော့ Google Instant Previews လို့ ခေါ်သတဲ့ -

Photo from Mashable.com

Google Instant Previews က ဒီနေ့ပဲ ထွက်လာတာပါ - သူက ဘာကောင်းလဲ ဆိုရင် အရင်က တစ်ခုခု ကို Search box မှာ ရိုက်ရှာလိုက်တယ် - ဒီလိုဆို Search results မှာ ကိုယ်ရှာတာနဲ့ ပတ်သတ်နိုင်တဲ့ Website တွေရဲ့ Links တွေပေါ်လာတယ် - Google instant က  မြန်တာတော့ တော်တော်မြန်တယ် - ဒါပေမယ့် လိုနေတာလေး တစ်ခုက ကိုယ်ရှာလိုချင်တဲ့ Search terms ဟာ ကိုယ့်ကိုပြထားတဲ့ Search results မှာ တကယ်ပါတယ် မပါဘူးဆိုတာ ခန့်မှန်းဖို့ မလွယ်ဘူး - ဆိုလိုတာ Search results တွေကို သူပြထားပေမယ့် ကိုယ်ရှာချင်တဲ့ အကြောင်းအရာပါတဲ့ Websites ဟုတ်မဟုတ် သေသေချာချာ ဆန်းစစ်နိုင်ဖို့ ဆိုရင် သူပြထားတဲ့ Links တွေကို တစ်ခုချင်း ထပ်လိုက်ဖွင့်ကြည့်ရတယ် - ဒါကို အားလုံးလည်း သိပြီးသား ဖြစ်မှာပါ - ခု Google Instant Previews ဆိုပြီး ထွက်လာတော့ အဲ့ဒီ့ လိုအပ်ချက်ကို ရာခိုင်နှုန်းတော်တော်များများ ဖြည့်နိုင်သွားပါတယ် - ခုဆို ကျွန်တော်တို့တွေ Google Instant Previews ကို သုံးပြီး Search results မှာ ပြထားတဲ့ Website links တွေထဲက ဘယ်အထဲမှာ ကိုယ်လိုချင်တဲ့ အကြောင်းအရာ ပိုပါနိုင်မလဲ ဆိုတာ Previews ကြည့်ပြီး ကြိုတင် ခန့်မှန်းနိုင်ပါပြီ -

ဒီ Google Instant Previews ကို ဖော်ဆောင်နိုင်ဖို့ Google က အင်တာနက်ထဲမှာ ရှိနေတဲ့ Webpages အားလုံးကို အညွန်းနဲ့ တကွ screenshot လုပ်ထားပြီး Users တစ်ယောက်ယောက်က Search terms တစ်ခုခုနဲ့ ရှာဖွေတဲ့ အချိန်မှာ ရှာဖွေသူလိုချင်တဲ့ အကြောင်းအရာနဲ့ ပတ်သတ်ဆက်နွယ်သမျှ Websites အားလုံးကို Previews အနေနဲ့ ကြည့်နိုင်အောင် အရင် ဖော်ပြနေကျ Search Results နေရာမှာရှိနေတဲ့ Website links တွေရဲ့ ညာဘက်ဘေးမှာ Magnifying glass icon တစ်ခု ထပ်ဖြည့်သွင်းပြီး ဖော်ပြပေးသွားမှာ ဖြစ်ပါတယ်။ စာနဲ့ ပြောတာ မရှင်းရင် အောက်က ဖော်ပြပါ ပုံကိုကြည့်ပါ။

Website links တွေရဲ့ ညာဘက်ဘေးမှာ ရှိနေတဲ့ Magnifying glass icon ကို clicks ပေးရင်ပဲ ဖြစ်ဖြစ် - သူ့ပေါ်မှာ တို့ထိ ဖြတ်သန်းသွားရင်ပဲ ဖြစ်ဖြစ် သက်ဆိုင်ရာ Screenshot လုပ်ထားတဲ့ Webpage ရဲ့ Previews ကို Search results ရဲ့ ညာဘက်ဘေးမှာ သူက ဖော်ပြပေးသွားမှာ ဖြစ်ပါတယ်။ ဒီလို Google Instant Previews ကနေ ဖော်ပြပေးတဲ့ Previews ကို ကြည့်ပြီး ဒီ Website ကို ကိုယ်တကယ် သွားဖို့လိုသလား - မလိုဘူးလား ဆိုတာ အကြမ်းဖျဉ်း ဆုံးဖြတ်နိုင်ပါတယ် - ဒီ Google Instant Previews ကို ထပ်မံ ဖြည့်သွင်းရခြင်းရဲ့ အဓိက ရည်ရွယ်ချက်က User တစ်ယောက်ရှာလိုက်တဲ့ Search term ကို အလျင်အမြန် ဖော်ပြနိုင်ဖို့ ရည်ရွယ်တာ မဟုတ်ပါဘူး - ဖော်ပြလိုက်တဲ့ Search results တွေထဲကမှ မိမိအတွက် အလိုအပ်ဆုံး Results ကို Screenshot ကနေ တစ်ဆင့်ကြည့်ပြီး Users တွေ အနီးစပ် အမှန်ကန်ဆုံး ရွေးချယ်နိုင်အောင် ပံ့ပိုးချင်လို့ ဖြစ်ပါတယ်။ ဒီထူးခြားချက်ကြောင့်မို့လို့ အရင်လို အကြောင်းအရာတစ်ခုခု ရှာတဲ့ နေရာမှာပဲ ဖြစ်ဖြစ် - လူတစ်ယောက်ယောက်ကို ရှာတာမျိုးပဲ ဖြစ်ဖြစ် - charts တွေ graphs တွေ pictures တွေ ရှာတဲ့ နေရာမှာ ဖြစ်ဖြစ် တစ်ခုသိချင်တာနဲ့ အရင်လို Search results တစ်မျက်နှာလုံးကို ပိုက်စိတ်တိုက် ရှာနေရတာမျိုး မလိုတော့ပဲ အထက်အောက် Scroll လေးလှိမ့် သူပြတဲ့ Instant Previews လေးတြွေကည့်ပြီး ကိုယ်ရှာချင်တာ ပါမပါ အကြမ်းဖျဉ်း ရွေးချယ်ဆုံးဖြတ်နိုင်ပါပြီ

Google Instant Previews နောက်လာမယ့် အပတ်မှာ Users အားလုံး အသုံးပြုနိုင်အောင် အတည်ပြုပေးမှာ ဖြစ်ပါတယ် - ဒါပေမယ့် အခုလတ်တလော စမ်းသပ်ချင်သူများ အတွက်လည်း ဒီနေရာမှာ ဒီနေ့ပဲ စမ်းသပ် နိုင်ပါပြီ။

KznT.

5 Simple Ways to Keep Your Eyes

အင်တာနက် ဆိုတာ လူတစ်ယောက်အတွက် အပန်းဖြေရာ - အားကိုးရာ - တိုင်ပင်နွေးထွေးရာ နေရာကောင်း တစ်ခုလို့ ဆိုရင် မှားမယ် မထင်ပါဘူး - တစ်နေ့ နဲ့ တစ်နေ့ ကျွန်တော်တို့တွေ အင်တာနက်ထဲမှာ သီချင်းနားထောင်တယ် - ရုပ်ရှင်တွေ ကြည့်တယ် - စာတွေရေးတယ် - Blog တွေ လိုက်ဖတ်တယ် - ကျွန်တော်ဆို တစ်နေ့မှာ နာရီပေါင်း ၁၅ နာရီလောက် ကွန်ပြူတာ  - အင်တာနက် နဲ့ ထိတွေ့နေရတယ်။ အထူးသဖြင့်တော့ ကျွန်တော် စာဖတ်ဖြစ်တာပါ - အဲ့မှာ ဘာကိုသွား သတိထားမိလဲ ဆိုတော့ ကွန်ပြူတာ - အင်တာနက်နဲ့ အမြင်အာရုံဆိုတာတွေရဲ့ ဆက်စပ်မှုကို သတိထားမိလာတယ်။

ကျွန်တော် အရင်က မျက်စိအားကောင်းတယ် - တစ်နေကုန် စာထိုင်ဖတ်ရလို့ မျက်လုံးညောင်းတယ် ဆိုတာမျိုး မရှိဘူး - ခု ကွန်ပြူတာနဲ့ ဖတ်တာ များလာတော့ တစ်နေ့ကို စာတစ်အုပ် ပြီးအောင် မဖတ်နိုင်တော့ဘူး - Screen ( ၃ ) မျက်နှာစာလောက် ဆက်တိုက် ဖတ်လိုက်ရင် မျက်စိကပူလာသလိုလို မျက်ရည်ကျချင်သလိုလို ဖြစ်လာတယ်။ ဆိုလိုတာ စိတ်က လိုက်နိုင်ပေမယ့် လူက မလိုက်နိုင်တဲ့ လက္ခဏာ ရပ်တွေကို ပြလာတာပေါ့ -

မျက်လုံး အားမကောင်းတဲ့ ကြားထဲမှာ တစ်ချို့ Websites တွေက စာရေးတာ နည်းနည်း ကြော်ငြာထည့်တာ များများ ဖြစ်လာတယ်။ ပြင်ဆင်ပုံတွေက Ads တွေ များတော့ လိုရင်းစာကို ဖတ်နိုင်ဖို့ ဟိုကျော်ဒီခွနဲ့ လိုက်ဖတ်လာရတယ်။ ကြော်ငြာထည့်ထားတာမျိုး မရှိရင်တောင် တစ်ချို့ Website တွေက စာလုံးသေးတာ - Templates ပုံစံမကျတာ - အကြောင်းအရာ အဓိက ဖော်ပြဖို့ထက် အလှအပကို ဦးစားပေးနေတာ စသဖြင့် မလိုအပ်တာတွေ ပုံကြီးချဲ့လာတော့ Browser ထဲမှာ စာဖတ်တဲ့ အခါ သက်တောင့်သက်သာ မရှိတော့ပဲ စိတ်ထဲ တော်တော်ကို စနိုးစနောင့် ဖြစ်လာရပါ တယ်။ တကယ်လို့များ ခုအထက်မှာ ဖော်ပြခဲ့တဲ့ အခြေအနေမျိုး ကြုံနေရတာ သေချာပြီ ဆိုရင်တော့ ဒီအောက်က အကြောင်းအရာကို ဆုံးအောင် ဆက်ဖတ်ကြည့်လိုက်ပါ။ အဆုံးသတ်မှာ သက်တောင့် သက်သာ ဖြစ်မယ့် အနေအထားတစ်ခုကို ဘယ်လိုဖန်တီး ရယူနိုင်မယ် ဆိုတာ တွေ့ရှိပါလိမ့်မယ်။ 

နည်းလမ်း ( ၁ ) - စာသားများအား ချုံ့ချဲ့ခြင်း

Web pages ပေါ်မှာ စာဖတ်တဲ့အခါ မျက်လုံး အားနည်းလို့ ဖြစ်စေ - အမြင်အာရုံ သိပ်မစူးစိုက် ကြရအောင် ဖြစ်စေ - ဖော်ပြထားတဲ့ စာသားကို အလွယ်တကူနဲ့ ဖတ်ရှုနိုင်အောင် ဖြစ်စေ အများဆုံး အသုံးပြုကြတာ Web pages ပေါ်က စာသားတွေကို ကွန်ပြူတာကနေ Ctrl + Mouse wheel သုံးပြီး ချဲ့ကြည့်တဲ့ နည်းလမ်းပါ - ဒီနည်းကို သုံးရင် ဘယ် Web စာမျက်နှာပေါ်က ဘယ်လောက် သေးတဲ့စာလုံး ဖြစ်စေ ဖော်ပြပါ အတိုင်း လုပ်ဆောင်လိုက်တာနဲ့ ချဲ့ကြည့်လို့ ရလာပါလိမ့်မယ်။ ဒါပေမယ့် အဲ့ဒီ့ နည်းလမ်းက  ကိုယ်ရောက်တဲ့ နေရာတိုင်း ကိုယ်စာလုံးကြီးချင်တိုင်းမှာ အမြဲ လုပ်ဆောင်နေရမှာမျိုးပါ - ဒီနည်းလမ်းကို မသုံးချင်ရင် နောက်ထပ် နည်းလမ်းတစ်ခု ရှိပါသေးတယ်။ အဲတာကတော့  Browser extension တစ်ခု ဖြစ်တဲ့ Firefox အတွက် No Squint နဲ့ Chrome အတွက် Zoomy ဆိုတဲ့ tools တွေပဲ ဖြစ်ပါတယ်။

သူတို့တွေက ဆိုဒ်တစ်ခု ကို ရောက်လို့ ကိုယ်စာဖတ်ဖို့ စိတ်ကြိုက် Zoom တွေ Background colour တွေချိန်ညှိပြီး သွားပြီ ဆိုရင် သူ့ဘာသာ Settings ကို automatically မှတ်ထားပေးပြီး နောက်တစ်ခေါက် အဲ့ ဆိုဒ်ကို ထပ်လည်ပတ်တဲ့ အချိန်မှာ ပြန်ချိန်ညှိနေစရာ မလိုတော့ အရင် ကိုယ်ပြင်ဆင်ထားတဲ့ အတိုင်း ပြန်လည် ဖော်ပြပေးပါတယ်။ အဲ့တော့ အဓိက လိုအပ်တာကို ပြန်ထုတ်မှတ်ရင် Web စာမျက်နှာ ပေါ်က စာသားတွေ ချုံ့ဖို့ ချဲ့ဖို့ အတွက် နည်းလမ်းတွေက -

• Keyboard နဲ့ Mousewheel
• No Squint (Firefox)
• Zoomy (Chrome)

နည်းလမ်း ( ၂ ) - Bookmarklet ဖြင့် စာမျက်နှာအား Format ချခြင်း

Bookmarklet ဆိုတာ bookmark သဘောပါပဲ - Bookmark ဆိုတာရဲ့ သဘောက သူ့ကို Click ပေးလိုက်တဲ့ အချိန်မှာ ကိုယ် မှတ်ထားတဲ့ Website ကို Loading လုပ်ပေးပြီး Bookmarklet ဆိုတာကတော့ Website ကို Loading လုပ်တာမျိုး မဟုတ်ပဲ Javascript တစ်ချို့ကို runs ပေးတာ ဖြစ်ပါတယ်။ Bookmarklet အမျိုးမျိုး ရှိပြီး အဲဒီ့ အမျိုးမျိုးထဲမှာမှ Services တစ်ချို့က ပေးတဲ့ Bookmarklet တွေဟာ ကိုယ်ဖတ်မယ့် Web စာမျက်နှာတစ်ခုကို ဖတ်ရှုဖို့ သင့်တော်မယ့် အနေအထား ရောက်အောင် သူ့ကို နှိပ်လိုက်တာနဲ့ အလိုလျောက် reformat လုပ်ပေးပါတယ်။ အဲလို စွမ်းဆောင်ရည် ရှိတဲ့  Bookmarklet တစ်ခုကို ကိုယ့် Bookmarks bar မှာ ဆွဲတင်ထားပြီး ကိုယ် Reformat လုပ်ချင်တဲ့ စာမျက်နှာကို ရောက်ရင် သူ့ကို click ပေးလိုက်တာနဲ့ Web စာမျက်နှာပေါ်က မလိုအပ်တဲ့ Ads တွေ မလိုလားအပ်တဲ့ စာသားတွေကို အလိုလျောက် ရှင်းထုတ်ပြီး အဓိကကျတဲ့ စာသားက အောက်ဖော်ပြပါအတိုင်း ကြွတက်လာမှာ ဖြစ်ပါတယ်။

အားလုံးထဲမှာ လူသုံးများတာကတော့ Readability ပါ - ဘာလို့လည်းဆို သူက စာဖတ်ရင်း အဲ့စာလေး သဘောကျလို့ တစ်ယောက်ယောက်ကို ဝေမျှချင်ပြီ ဆိုရင် နေရာကနေ နောက်ပြန်လှည့်စရာ မလိုပဲ တိုက်ရိုက် ဝေမျှ သိမ်းထားလို့ ရတဲ့ Email button - Print button လေးတွေ ပိုပါပါတယ်။ ဒါပေမယ့် ကျွန်တော်ကတော့ စိတ်စွဲတယ်ပဲ ပြောရမလား Readable ကို ပိုသဘောကျပါတယ်။

သူတို့ နှစ်မျိုး အပြင် နောက်ထပ် ရွေးချယ်လို့ရမယ့် နည်းလမ်းတွေ ရှိပါသေးတယ်။  ရေးထားတာလေး ဖတ်ပြီးကျော်သွား တာမျိုးမလုပ်ပဲ အောက်မှာ ဖော်ပြထားတဲ့ နေရာတွေကနေ သွားရောက် စမ်းသပ်ကြည့်ကြပါဦး - အနှစ်ချုပ်အားဖြင့် နည်းလမ်း သုံးမျိုးရှိပါတယ် -

• Readability
• Readable
• TidyRead

နည်းလမ်း ( ၃ ) - Browser Extension ဖြင့် စာမျက်နှာအား Reformat လုပ်ခြင်း

ချုံ့ချဲ့လည်း မလုပ်ချင်ဘူး - javascript bookmarklet ကိုလည်း မသုံးချင်ဘူး ဖြစ်နေပါသလား ? ဒီလိုဆို ကျွန်တော်တို့ မှာ နောက်ထပ် ရွေးချယ်စရာ နည်းလမ်းတွေ ရှိပါသေးတယ်။ အဲတာကတော့ အောက်မှာ ဖော်ပြသွားမယ့် Browser extensions တွေထဲက တစ်ခု မဟုတ် တစ်ခု သုံးဖို့ပါ - အဲလို သွင်းရတဲ့ Browser extensions တွေထဲက ကျွန်တော် သဘောအကျမိဆုံးကတော့ iReader - Firefox အတွက် extension ကို ဒီနေရာကနေ ယူနိုင်ပြီး Chrome အတွက် extension ကိုတော့ ဒီနေရာကနေ ယူနိုင်ပါတယ်။ iReader ကို installs လုပ်ဆောင် ပြီးသွားတာနဲ့ button လေးတစ်ခုက browser ရဲ့ address bar မှာ ပေါ်လာပြီး ကိုယ် ကြည့်တဲ့ Website ရဲ့ စာမျက်နှာပေါ်က အကြောင်းအရာအလိုက် ပြုပြင်ပြောင်းလဲလို့ ရတယ်ဆိုရင် အောက်ဖော်ပြပါ အတိုင်း Active ဖြစ်လာမှာ ဖြစ်ပါတယ်။

အဲ့ဒီ့ button လေးကို click ပေးလိုက်တာနဲ့ iReader ကနေ web စာမျက်နှာပေါ်က မလိုလားအပ်တဲ့ ads တွေ - နောက် ကြည့်ရှုရခက်နေတဲ့ စာမျက်နှာ အပြင်အဆင်အားလုံးကို နောက်မှာ ချန်ထားပြီး အောက်ဖော်ပြပါ အတိုင်း ပြင်ဆင်ဖွဲ့စည်းပေး သွားမှာ ဖြစ်ပါတယ်။ iReader မှာ ပါတဲ့ တစ်ခြား အားသာချက်တွေက ကိုယ်ဖတ်နေတဲ့ စာမျက်နှာကို သဘောကျလို့ Tweet လုပ်ချင်တာ ဖြစ်စေ - Facebook မှာ တစ်ခြားသူ သိရအောင် ပြန်လည် ဖော်ပြချင်တာ ဖြစ်စေ - Mail နဲ့ ပို့ချင်တာ - Print ထုတ်ချင်တာ စသဖြင့် Options တော်တော်များများကို စိတ်ကြိုက်ရွေးချယ် လုပ်ဆောင်နိုင်ပါတယ်။ အနှစ်ချုပ်အားဖြင့် နည်းလမ်း ( ၄ ) ခု ရှိပါတယ် -

• iReader (Chrome or Firefox)
• Readability (Firefox)
• Readability Redux (Chrome)
• TidyRead (Chrome or Firefox)

နည်းလမ်း ( ၄ ) - မလိုအပ်သည်များ စိတ်ကြိုက်ရွေးချယ် ဖယ်ရှားခြင်း

တစ်ခါတစ်လေ ကျွန်တော်တို့မှာ အခြေအနေ တစ်ခုရှိတယ်။ အဲတာက အပေါ်မှာ ဖော်ပြခဲ့တာတွေကို စာမျက်နှာတစ်ခုလုံး Reformat လုပ်ချင်တာမျိုး မဟုတ်ဘူး - အဲ့ဒီ့ ကိုယ်ဖတ်မယ့် စာမျက်နှာပေါ်က အကြောင်းအရာ ကိုယ့်ကို စိတ်အနှောင့် အယှက်ပေးနေတဲ့ အကြောင်းအရာ နည်းနည်းလေးလောက်ကိုပဲ ပျောက်သွားစေချင်တာ - ဒီလိုမျိုး ဖြစ်ချင်နေပြီ ဆိုရင် Firefox add-on တစ်ခု ဖြစ်တဲ့ Nuke Everything Enhanced ကို အသုံးပြုဖို့ အကြံပြုလိုပါတယ်။

သူ့ရဲ့ စွမ်းဆောင်ရည်ကတော့ Web စာမျက်နှာပေါ်က စာသားတွေကိုပဲ ဖြစ်စေ - Object တွေကိုပဲ ဖြစ်စေ မမြင်ချင်တာကို စိတ်ကြိုက်ရွေးချယ်ပြီး Hide ထားလိုက်လို့ ရသလို - ကိုယ်လိုချင်တာလေးပဲ ရွေးထုတ်ပြီး “Remove everything else” ကို အထက် ဖာ်ပြပါ အတိုင်း ရွေးချယ်ပေးခြင်း အားဖြင့်လည်း စာမျက်နှာပေါ်က ကိုယ်ရွေးချယ်ထားတာလေးပဲ ချန်ပြီး ကျန်တာတွေ အားလုံး ပျောက်သွားအောင် လုပ်ဆောင်လို့ ရပါတယ်။ ဒီနည်းလမ်း စာမျက်နှာ တစ်ခုပေါ်က ကိုယ်စိတ်ဝင်စားတဲ့ အစိတ်အပိုင်း တစ်ခုတည်းကိုပဲ Print ထုတ်ချင်တဲ့ အခါမျိုးမှာ အရမ်းအသုံးဝင်ပါတယ်။ အနှစ်ချုပ်အားဖြင့် နည်းလမ်း တစ်မျိုး ရှိပါတယ် -

• Nuke Everything Enhanced

နည်းလမ်း ( ၅ ) - Safari Reader အား အသုံးပြုခြင်း

တစ်ချို့က Browser တွေ အားလုံးရဲ့ ကြားမှာ Apple ရဲ့ web browser Safari ကို သဘောကျကြတယ် - တကယ်လို့များ ကိုယ်လည်း Safari ကို သဘောကျပြီ - လတ်တလောလည်း သုံးနေပြီ ဆိုရင် အထက်မှာ ပြောခဲ့တာတွေ ဘာတစ်ခုမှ သုံးဖို့ကို မလိုတော့ပါဘူး - ဘာကြောင့်လည်း ဆိုရင် Safari 5 မှာ အထက်မှာ ဖော်ပြခဲ့တာတွေထက် ပိုပြီးကောင်းတဲ့ Readable built-in ability ပါဝင်လာပါတယ်။

သူ့ရဲ့ လုပ်ဆောင်ချက်နဲ့ ဆင်တူတာကို ပြရမယ် ဆိုရင် Readability tool ရဲ့ လုပ်ဆောင်ချက်နဲ့ သိပ်မကွာပါဘူး - Webpage loading ပြီး သွားတာနဲ့ address bar မှာ “Reader” button ပေါ်လာပြီး သူ့ကို click ပေးလိုက်ရင် စာမျက်နှာကို format လုပ်ပေးသွားမှာမျိုး ဖြစ်ပါတယ်။ အနှစ်ချုပ်အားဖြင့် နည်းလမ်း တစ်မျိုး ရှိပါတယ် -

• Safari browser

ကျွန်တော် ခု ဖော်ပြခဲ့တာ အားလုံးကို ပြန်လည် ရေတွက်ကြည့်ရင် နည်းလမ်း ( ၅ ) မျိုးနဲ့ Tools ( ၁၂ ) မျိုး ရိှပါတယ်။ မိမိနှစ်သက်ရာ နည်းလမ်း - သဘောကျရာ Tools ကို သုံးပြီး အမြင်အာရုံ ကြံ့ခိုင်စေရေး ဂရုစိုက် ပြင်ဆင်ကြရအောင်ပါ။

KznT.

Gmail Gets 5 New Themes

Gmail ထဲမှာ Themes ပြောင်းလို့ ရတယ် ဆိုတာတော့ မိသားစုဝင်အားလုံး သိထားပြီးခဲ့လောက်ပါပြီ - ခု သတင်းကတော့ Gmail Themes ပြောင်းနည်းကို ပြောမလို့ မဟုတ်ပါဘူး - အရင် အဲ့ဒီ့ Themes တွေ ရှိတည်းက တစ်ခုမှ သဘောမကျနိုင်ခဲ့တဲ့ ကျွန်တော် - ဒီနေ့ Gmail Team ကနေ Gmail ထဲမှာ နောက်ထပ် Themes အသစ် ငါးခု ထပ်ထည့်ထားတယ် ဆိုပြီး သတင်း ထွက်လာတော့ အပြေးအလွှား ပြေးကြည့်မိပြီး တော်တော်လေး ပျော်ခဲ့ရပါတယ်။ ဘာကြောင့်လဲ ဆို အဲ့ဒီ့ Themes အသစ် ငါးခုထဲမှာ ကျွန်တော် အရမ်းသဘောကျတဲ့ Theme လေးတစ်ခု ပါလာလို့ပါ။ မိသားစုဝင်များလည်း သဘောကျကြမလား မသိဘူး - Gmail > Settings > Themes အောက်မှာ သွားကြည့်ကြည့်ကြပါဦး -

• Basic Black: ပထမဆုံး တစ်ခုကတော့ အောက်မှာ မြင်ရတဲ့ အတိုင်း Basic Black ပါ။ ကျွန်တော်တော့ တော်တော်လေး မည်းသလိုပဲ :D 

• Basic White: သူကကျတော့ Basic Black နဲ့ ပြောင်းပြန် တော်တော်ကြီး ဖြူနေပြန်တယ်။

• Android: သူကတော့ ကျွန်တော် အချစ်ဆုံး Theme လေးပါ - ကျွန်တော်က အစိမ်းရောင် ခပ်ဖျော့ဖျော့ဆို သဘောကျတယ် - အဖြူရောင်လေးလည်း ပါတယ် - မျက်စိထဲ ယဉ်နေသလိုပဲ - တကယ်လို့ Google Chrome သမားတွေ Android Theme သုံးချင်ရင် ဒီနေရာကနေ သွားဝတ်နိုင်ပါတယ်။ 
  

• Tree Tops: ဒီ Theme လေးလည်း ကျွန်တော် သဘောကျပါတယ်။ ဒါပေမယ့် အစိမ်းနဲနဲ များလို့ မျက်စိထဲ သိပ် ဘဝင်မကျမိပါဘူး။

• Marker: ဒီ Theme လေးကတော့ ပန်းချီဆန်ပါတယ်။ ကလေး ပန်းချီလိုမျိုးပဲ - ချစ်ဖို့ ကောင်းပါတယ်။ 

အခုဖော်ပြထားတဲ့ Themes တွေအားလုံး Gmail နဲ့ Google Apps users တွေ သုံးနိုင်ပါပြီ။ စမ်းသပ်ကြည့်ကြပါ။


KznT.

Which of these is not a web browser ??

ဒီလို မေးခွန်းများ အမေးခံရရင် ဘယ်လိုများ မိသားစုဝင်များ ဖြေကြမယ် မသိ ??

UK မှာ နာမည်ကြီးတဲ့ Who Wants to be a Millionaire ? ကို Indian version ‘Kaun Banega Crorepati’ ဆိုတဲ့ အမည် ပြောင်းထားပြီး Indian television ကနေ စီစဉ် တင်ဆက်တဲ့ ဒီ popular quiz-based reality show မှာ ကျွန်တော် အပေါ်မှာ ဖော်ပြထားတဲ့ အတိုင်း -

Which of these is not a web browser ??

ဆိုမေးပြီး အောက်က အဖြေ လေးမျိုးထဲကနေ တစ်မျိုး ရွေးခိုင်း သွားပါတယ်။ ဖြေတာ မှန်ရင် ဆုအဖြစ် ချီးမြှင့်ငွေ ရမယ်ပေါ့။ သိထားပြီးသား သူ တစ်ယောက် အတွက်တော့ လွယ်လှချည်လားလို့ ထင်စရာ ရှိပါတယ် - ဒါပေမယ့် သေသေချာချာ ပြန်တွေးကြည့်ရင် ကျွန်တော်တို့တွေ လည်း တစ်ချိန်ကသာ ဒီလို မေးခွန်းမျိုးကို ဖြေခိုင်းရင် အူကြောင်ကြောင်နဲ့ ခေါင်းကုတ် နေမိဦးမလားပဲ -

Internet users တွေ တော်တော်များများက တစ်နေ့ နဲ့ တစ်နေ့ Browser ထဲမှာ နေပြီး Site တစ်ခုကနေ တစ်ခုသာ ကူးနေတာ Browser ဆိုတာ ဘာမှန်း ဆိုတာကိုတောင် တော်တော်များများက မသိကြပါဘူး - နဲနဲ စူးစူးစမ်းစမ်း ရှိပြီး ဟိုစပ်စပ် ဒီစပ်စပ် သိချင်သူတွေနဲ့ လေ့လာသူ အနည်းငယ် လောက်ပဲ Browser ဆိုတာ ဘာမှန်း တိတိကျကျ ဖြေနိုင်ကြပါတယ်။ ဒီလို ပြောတော့ ပိုမယ် ဖြစ်မယ် - ကျွန်တော်တို့ မြန်မာနိုင်ငံလို နည်းပညာ ဖွံ့ဖြိုးဆဲ - အင်တာနက် အရှိန်ယူဆဲ နိုင်ငံ တစ်ခု မပြောနဲ့ - နည်းပညာဖွံ့ဖြိုးပြီး - အင်တာနက် မြန်ဆန်ပြီး နိုင်ငံတွေမှာ နေကြတဲ့ သူတွေတောင် Browser ဆိုတာ ဘာမှန်း တိတိကျကျ မဖြေနိုင် ကြသေးပါဘူး - အောက်က ဗွီဒီယိုကိုသာ ကြည့်ကြည့်ပါ။

New York က အလုပ်များ လူရှုပ်တဲ့ နေရာတစ်ခုမှာ Google ကနေပြီး လမ်းပေါ်က ဖြတ်သွား ဖြတ်လာ လူတွေကို Random မေးခွန်းတစ်ချို့နဲ့ အထက်မှာ ဖော်ပြထားတဲ့ ဗီွဒီယိုကို ရိုက်ကူးခဲ့ပါတယ်။ မေးခွန်းတွေဟာ သိတဲ့ သူ တစ်ယောက် အတွက်တော့ လွယ်တာပေါ့ - ဒါပေမယ့် စိတ်မဝင်စားတဲ့ သူ သွားမေးတော့ကျ ဘယ်သူက ဘာသိမှာလဲ - ကြည့်ရင်းနဲ့ ကျွန်တော် ပြုံးမိတယ် - အဲတာလေး ကြည့်ပြီး ကျွန်တော် ဘာကို တွေးမိလည်း ဆိုတော့ ဒီလိုဗွီဒီယိုမျိုးကိုသာ မြန်မာနိုင်ငံ ရန်ကုန်မြို့လို နေရာမျိုးက လမ်းမတစ်ခုပေါ်မှာ Google ကလာရိုက်လို့ မြန်မာတွေ မဖြေနိုင်ရင် မြန်မာတွေ တုံးလိုက်တာ ဆိုပြီး မြန်မာချင်း အားမနာတမ်း  ပြောမယ့်သူတွေ - နိုင်ငံတကာက လက်ညိှုးဝိုင်းထိုးကြမယ့် သူတွေ ဘယ်လောက်တောင် ရှိမလဲ ဆိုပြီး စဉ်းစားမိတယ်။ တုံးတယ် တုံးတယ် နဲ့ ခု New York က သူတို့တွေလည်း ဘာထူးလဲ - တကယ်တော့ လူတစ်ယောက်ရဲ့ အသိပညာ တိုးတက်မှု ဆိုတာ ပံ့ပိုးပေးနိုင်မှုနဲ့ သိပ်အများကြီး မပတ်သတ်လှပါဘူး - ကိုယ်ကိုယ်တိုင်က ဘယ်လောက်လိုချင်လဲ ဆိုတာပေါ်ပဲ ပိုပြီး မူတည်ပါတယ် - 

အခုလည်း Which of these is not a web browser ?? ဆိုတဲ့ မေးခွန်းကို Bollywood actor Amitabh Bachchan က Who Wants to be a Millionaire ? show မှာ မေးလိုက်တယ်။ ကောင်မလေး ကြည့်ရတာ တော်တော်လေး စဉ်းစား နေရပုံပဲ - ပေးထားတာတဲ့ လေးခုက Firefox, Opera, Facebook နဲ့ Google Chrome - မိသားစုဝင်များ စမ်းဖြေကြည့်ပါဦး - ဘယ်ကောင် အဖြေမှန်ဖြစ်မလဲ ?? မြန်မာမိသားစု အတွက်တော့ လွယ်ကောင်း လွယ်ပါလိမ့်မယ်။ ဒါပေမယ့် ပရိတ်သတ်ဆီက ဆန္ဒမဲ မေးကြည့် ပြီးမှ Facebook ဆိုတဲ့ အဖြေမှန်ကို ဒေါက်တာမလေး ဖြေနိုင်ခဲ့တာပါ။

သူက စစချင်း Facebook နဲ့ Chrome ကို ရောနေပါသေးတယ်။ Chrome ကို Web Browser မှန်း သူ ကောင်းကောင်း မသိပါဘူး - နောက်အဖြေမှန်သွားတော့ ရူပီး ၁၀၀၀၀ ကောင်မလေး ရသွားတယ်။ Amitabh Bachchan က အဲ့နောက်မှာ Facebook is a social networking website, not a browser. Good Answer. ဆိုပြီး ဆက်ရှင်းပြသွားပါတယ်။ ဒီအောက်က ကောင်မလေး ဖြေတာကို Record လုပ်ထားတာပါ။ အကုန် အကြည့်ချင်ရင် ( 5:20 ) ကို ကျော်ကြည့်နိုင်ပါတယ်။

ခုဟာလေးနဲ့ ပတ်သတ်ပြီး ဆက်စပ်နေလို့ ဇာတ်ကားလေး တစ်ကားလည်း မကြည့်ဖူးသေးရင် ကြည့်စေချင်ပါသေးတယ်။ အဲ့ ဇာတ်ကားလေးက ခု ဒီပို့စ်မှာ အဓိက ပြောခဲ့တဲ့ India က Who Wants to be a Millionaire ? show ကို အခြေတည်ပြီး Slumdog Millionaire ဆိုတဲ့ နာမည်နဲ့ ၂၀၀၈ ခုနှစ်က ရိုက်ထားတဲ့ ကားပါ။ မကြည့်ရသေးလို့ ကြည့်ချင်ရင် ဖိုရမ်က ဒီနေရာမှာ တင်ပေးထားတာ ရှိပါတယ်။ မကြည့်ဖူးသေးရင် ကြည့်စေချင်ပါတယ်။ 

ဒီအကြောင်းကို ရေးဖြစ်သွားတာက ဖိုရမ်မှာ Google ၏ ပြောင်းလဲမှုများ အကြောင်း ဆိုပြီး ကျွန်တော် ရေးနေတာလေး ရှိသလို နောက်ပိုင်း Browser လောကမှာ လူကြိုက်များသထက်များလာမယ့် Google Chrome အကြောင်းကိုပါ နောက်ပိုင်း အားတဲ့ အချိန်တွေရှိရင် သူ့ရဲ့ အသုံးဝင်ပုံတွေကို မိတ်ဆက်ပေးနိုင်အောင် အခုကတည်းက အစပျိုးထားလိုက်တာပါ။

Amitabh Bachchan ကတော့

“Chrome is a new browser, extremely beautiful and it runs very fast.”

ဆိုပြီး ပြောခဲ့ပါတယ်။ တကယ်ရော သူပြောသလို ဟုတ်ရဲ့လား - Google Chrome က ဘာတွေများ စွမ်းဆောင်ရည် ကောင်းသလဲ - သူ့က အချိန်တိုတွင်း Browser လောကကို ဘာလို့ ထိုးဖောက်နိုင်လာသလဲ - သူ့မှာ ဘယ်လို အားထားစရာ Add-ons တွေရှိသလဲ - ဒါတွေကို နောက်ပိုင်း အလျဉ်းသင့်သလို ဖော်ပြပေးသွားပါ့မယ်။

KznT.