KIS/KAV 2010 Step by Step Offline Updates Guide

ကို KznTရေ ဦးဇင်းအတွက်တော့ တစ်ခု သိရင် လုံလောက်ပေမယ့် ဦးဇင်းရဲ့ မြို့လေးမှာ နက်ဆိုတာ မရှိသလောက်ရှားတယ်၊ ဦးဇင်းက သူတို့ကို Offline Updateတွေ မျှဝေပေးချင်တာ အဲဒါကြောင့် မေးတာပါ၊ ဦးဇင်းစက်မှာတော့ onfine Updateလုပ်တာပါ၊ တခြားသူတွေက နက်မချိတ်ထားတော့ သူတို့ကို ဦးဇင်းအနေနဲ့ တတ်နိုင်သလောက်ကူညီချင်လို့ပါ၊ အခုမေးချင်တာကတော့ ပထမနည်းထဲမှာပါတဲ့* ပြီးသွားရင် anti-virus databases ကို Run ပါ။ဆိုတာ ဘယ်နားက Runရမလဲဆိုတာမသိလို့ပါ၊ ပြောပြပါဦး၊

တင်ပါ့ဘုရား -

တပည့်တော် ဒီ အကြောင်းအရာကို Kaspersky Offline Update လုပ်ဆောင်နည်းများ ဆိုတဲ့ ခေါင်းစဉ်အောက်က ထိပ်ဆုံး အမှတ်စဉ် ( ၁ ) ပို့စ်အောက်က * ဒုတိယအဆင့် - ခွဲဝေပြီးသော Update distribution အားအသုံးပြု၍ Internet connection မရှိသော အခြားစက်များတွင် update ပြုလုပ်ခြင်း။ ဆိုတဲ့ ခေါင်းစဉ်အောက်မှာ ရေးသားခဲ့ပြီး ဖြစ်ပါတယ် ဘုရား။  အရှင်ဘုရား မေးမြန်းချက်ကို တပည့်တော် ဆက်စပ်စဉ်းစားမိတော့ အရှင်ဘုရား ဖတ်ရှုမေးမြန်းတဲ့ အကြောင်းအရာဟာ အထက်မှာ ဖော်ပြခဲ့တဲ့ ခေါင်းစဉ်မဟုတ်ပဲ * ပထမအဆင့် - Kaspersky lab sever မှ anti-virus databases ပုံမှန်ရရှိနေသော ကွန်ပြူတာမှနေ၍ Updates များအား ခွဲဝေယူခြင်း။ ဆိုတဲ့ ခေါင်းစဉ်ဖြစ်တဲ့ အတွက်ကြောင့် ခေါင်းစဉ်လွဲမှား ဖတ်ရှုပြီး အဖြေရှာမတွေ့ခြင်း ဖြစ်မယ်လို့ သုံးသပ်မိပါတယ်။ တပည့်တော် ဒီ အကြောင်းအရာကို ရေးသားခဲ့စဉ်တုန်းက အသေးစိတ် ရေးမယ်ဆိုရင် ဖော်ပြချက် အရမ်းရှည်လျားပြီး စာဖတ်သူ အတွက် ရှုပ်ထွေးနေမှာ စိုးရိမ်မိလို့ အကြောင်းအရာ ခေါင်းစဉ်အလိုက် အသေးစိတ်ကို အတိအကျ တဆင့်ခြင်း မရေးသားဖြစ်ပဲ Animation ပုံနဲ့ ဘယ်လို လုပ်ဆောင်တယ် ဆိုတာကိုပဲ တပည့်တော် ပြသမိခဲ့ပါတယ် ဘုရား။

ယခု အရှင်ဘုရားရဲ့ မေးမြန်းချက် အရ တပည့်တော် တဆင့်ချင်း ပုံနဲ့ ပြန်လည် ရှင်းလင်းပေးသွားပါ့မယ်။ တပည့်တော် တို့ အနေနဲ့ လက်ရှိမှာ ဒီအောက်ဖော်ပြပါ အဆင့်တွေ မလုပ်ဆောင်ခင် - လက်ရှိ တပည့်တော်တို့ စက်ထဲက Partition တစ်ခုခု ( ဥပမာ - C:, D:, E:, F:, .... ) Updates Distribution ( သို့တည်းမဟုတ် ) Offline updates တွေ အားလုံး download ချပြီး ဖြစ်မယ်လို့ ယူဆလိုက်ပါ့မယ်။ 

အဆင့် - ( ၁ ) Kaspersky applications ၏ windows ကိုဖွင့်၍ ညာဘက် အပေါ်ဆုံးထောင့်ရှိ Settings ကို click ပေးပါ။

အဆင့် ( ၂ ) နောက်ထပ် ပေါ်လာသော box ၏ ဘယ်ဘက်ခြမ်းတွင် ရှိနေသော Side bar မှ My Update Center အား အောက်ဖော်ပြပါအတိုင်း click ပေးပါ။ ထိုသို့ ကလစ်ပေးလိုက်ချိန်တွင် ညာဘက်ခြမ်းရှိ ဖော်ပြချက်များ အခြားပုံစံ တစ်မျိုးသို့ ပြောင်းလဲ သွားပါလိမ့်မည်။

အဆင့် ( ၃ ) ညာဘက်ခြမ်းရှိ Update source အောက်ရှိ Settings အား ကလစ်ပေးပါ။ နောက် box တစ်ခု ပေါ်လာပါမည်။

အဆင့် ( ၄ ) Update settings box ၏ Source tab အောက်တွင်ရှိနေသော Add အား click ပေးပါ။ နောက် box တစ်ခု တက်လာပါလိမ့်မည်။

အဆင့် ( ၅ ) ယခုကဲ့သို့ box တက်လာချိန်တွင် မိမိ၏ Updates Distribution folder တည်ရှိရာ ( တစ်နည်းအားဖြင့် Download ချထားသော Offline Updates ဖိုဒါ တည်ရှိရာ ) နေရာအား အတိအကျ ညွှန်ပြပေးရပါမည်။ ဆိုလိုသည်မှာ မိမိ၏ Download ချထားသော Offline Updates ဖိုဒါသည် Local disk ( C: ) အောက်တွင် တည်ရှိနေသည် ဆိုလျှင် Local disk ( C: ) ဘယ်ဘက်ဘေးရှိ အပေါင်းလက္ခဏာအား တဆင့်ချင်း ဖြန့်ချ၍ မိမိ၏ Offline Updates ဖိုဒါ ရှိရာထိ သွားရောက်ညွှန်ပြပေးပါ။ အကယ်၍ Local disk ( D: ) ( E: ) ( F: ) ... စသဖြင့် အောက်တွင် ရှိနေသည် ဆိုလျှင်လည်း ထိုနည်းလည်းကောင်းပင် ဖြစ်ပါသည်။

အဆင့် ( ၆ ) သက်ဆိုင်ရာ Local Disk .... ဘေးရှိ + လက္ခဏာမှ တဆင့် ဖြန့်ချ၍ ရှာဖွေလျှင် နောက်ဆုံး မိမိ download ချထားသော Offline Updates ဖိုဒါ တည်ရှိရာ နေရာအား ယခုကဲ့သို့ တွေ့ရပါမည်။ ( ဤအောက်ဖော်ပြပါပုံသည် ဥပမာ ဖော်ပြထားခြင်းသာ ဖြစ်ပါသည်။ မိမိစက်၏ Offline Updates ဖိုဒါ တည်ရှိရာ နေရာကိုလိုက်၍ အသွင်အပြင် တည်နေရာများ ကွဲပြားနိုင်ပါသည်။ )

မှတ်ချက် - ဖော်ပြပါ Box တွင် မိမိ Offline Updates ဖိုဒါ တည်နေရာအား အလွယ်တကူ ရွေးချယ်ပေးနိုင်ရန် အောက်ဖော်ပြပါ အတိုင်း ၄င်း၏ တည်နေရာအား အလွယ်တကူ စာရွက် တစ်ရွက်ပေါ်တွင် မှတ်သားထားနိုင်ပါသည်။

• My Computer အားဖွင့်ပါ။
  
• မိမိ download ချထားသော Offline Updates ဖိုဒါ တည်ရှိရာ နေရာထိ သွားပါ။ အောက်ဖော်ပြပါ အတိုင်း မြင်ရပြီ ဆိုလျှင် ၄င်း၏ Address bar နေရာအား note pad တစ်ခုပေါ်တွင် Copy>Paste လုပ်၍ ဖြစ်စေ ၊ မှတ်ဉာဏ်တွင်းတွင် မှတ်သား၍ ဖြစ်စေ တည်နေရာအား မှတ်သားထားပါ။ ( မိမိ Offline Updates ဖိုဒါ ထားရှိရာ နေရာကို လိုက်၍ စက်တစ်ခုနှင့် တစ်ခု Directory များ ကွဲပြားနိုင်ပါသည်။ အောက်ဖော်ပြပါ အတိုင်း တရားသေ မဟုတ်ပါ။ ဥပမာအားဖြင့် ဖော်ပြထားခြင်းသာ ဖြစ်ပါသည်။ )
  

• ထိုတည်နေရာအတိုင်း သက်ဆိုင်ရာ Local folders ဘေးရှိ + လက္ခဏာ အား ဖြန့်ချ၍ ရှာဖွေရန် ဖြစ်ပါသည်။

အဆင့် ( ရ ) အထက်ဖော်ပြပါအတိုင်း မိမိ Offline Updates ဖိုဒါ တည်ရှိရာ နေရာအား တိကျစွာ ညွှန်းဆိုပြီးပြီ ဆိုလျှင် အောက်ဖော်ပြပါအတိုင်း OK ကို click ပေးပါ။

အဆင့် ( ၈ ) Update settings box ရှိ Source tab အောက်တွင် ရှိနေသော Kaspersky Lab's update severs ဘေးရှိ check box အား အောက်ဖော်ပြပါအတိုင်း click ဖြုတ်ပါ။ မည်သည့် အတွက်ကြောင့်နည်း ?? အဘယ်ကြောင့် ဆိုသော် Kaspersky Lab's update severs အား check ပေးမည် ဆိုလျှင် ဖော်ပြပါ စက်ရှိ Kaspersky antivirus သို့တည်းမဟုတ် Kaspersky internet security အတွက် Updates အား Online တွင် ရှိနေသော Kaspersky Lab ၏ update severs မှ တိုက်ရိုက် Updates ရယူမည် ဆိုသည့် သဘောဖြစ်ပြီး လက်ရှိမိမိ တို့ လုပ်ဆောင်နေသည်မှာ Offline updates လုပ်ဆောင်နေခြင်း ဖြစ်သောကြောင့် Kaspersky Lab's update severs အား click ဖြုတ်၍  ၄င်း စာကြောင်း အောက်တွင် တည်ရှိနေသော မိမိတို့ ရွေးချယ်ပေး ခဲ့သည့် Offline updates ဖိုဒါ တည်ရှိရာ နေရာကိုသာ check လုပ်ထားခဲ့ခြင်း ဖြစ်ပါသည်။ နောက်တစ်ချိန်တွင် ဖော်ပြပါ ကွန်ပြူတာသည် Online နှင့် တိုက်ရိုက် ချိတ်ဆက်၍ Online updates လုပ်ဆောင်မည် ဆိုပါက ယခု ကလစ်ဖြုတ်ထားခဲ့သော နေရာတွင် ကလစ်ပြန်ပေး၍ သူ့အောက်ရှိ မိမိတို့ ရွေးချယ်ပေးထားခဲ့ရာ Offline updates ဖိုဒါ တည်ရှိရာ နေရာအား ကလစ် ပြန်ဖြုတ်ရမည် ဖြစ်ပါသည်။ ပြောင်းပြန် ဖြစ်ပါသည်။

အဆင့် ( ၉ ) အထက်ဖော်ပြပါ အတိုင်း လုပ်ဆောင်ပြီးပြီ ဆိုလျှင် OK ပေးပါ။

အဆင့် ( ၁၀ ) အောက်ဖော်ပြပါ box တွင်လည်း OK သာလျှင် ထပ်ပေးပါ။

အဆင့် ( ၁၁ ) အထက်ဖော်ပြပါ အတိုင်း အားလုံး လုပ်ဆောင်ပြီးလျှင် မူလ Kaspersky applications windows သို့  အောက်ဖော်ပြပါအတိုင်း ပြန်လည် ရောက်ရှိပါမည်။

အဆင့် ( ၁၂ ) ထိုနေရာမှ နေ၍ အောက်ဖော်ပြပါ အတိုင်း My Update Center အား click ပေးပါ။ ထို့နောက် တဆက်တစပ်တည်း ညာဘက်ခြမ်းတွင် တည်ရှိနေသည့် Start Update အား click ဆက်ပေး၍ Updates လုပ်ငန်း စတင်နိုင်ပါမည်။ ဤ Updates လုပ်ငန်းစဉ်သည် Kaspersky Lab ၏ update severs မှ တိုက်ရိုက် Updates ရယူ လုပ်ဆောင်နေခြင်း မဟုတ်ပဲ မိမိ Download ရယူခဲ့သော Offline updates ဖိုဒါ တည်ရှိရာ နေရာမှ တဆင့် Updates လုပ်ဆောင်နေခြင်း ဖြစ်ပါသည်။

အဆင့် ( ၁၃ ) Updates လုပ်ငန်း စတင်ချိန်တွင် 0% နှင့် စတင်ပြီး 100% တွင် updates လုပ်ငန်းစဉ် ပြီးဆုံး၍ မိမိ Databases status သည် မိမိ update လုပ်ဆောင်ခဲ့သော နေ့စွဲနှင့် up to date ဖြစ်နေမည် ဖြစ်ပါသည်။

အရှင်ဘုရား ..

တပည့်တော် ရှင်းလင်းချက် အနေနဲ့ ဒီလောက်ပါပဲ ဘုရား။ အရှင်ဘုရား မရှင်းလင်းတာ ရှိခဲ့ဦးမယ် ၊ ဒိွဟ ဖြစ်စရာ ရှိခဲ့မယ် ဆိုရင် တပည့်တော်ရေးခဲ့တဲ့ မရှင်းလင်းတဲ့ Posts တွေမှာ မေးမြန်းနိုင်ပါတယ် ဘုရား။ အားလပ်ချိန်မှာ အမြန်ဆုံး ပြန်ကြားနိုင်အောင် ဘုရားတပည့်တော် ကြိုးစားသွားပါ့မယ်။

KznT.

Extra! Extra! Google News

Search Engine ဆိုရင် စာဖတ်သူတို့ ဘယ် Search engine ကိုများ အများဆုံး အသုံးပြုဖြစ်ကြပါသလဲ။ ကျွန်တော်လည်း Search Engine တစ်ခုရဲ့ အရေးပါပုံကို သဘောပေါက်လို့ Google မှရယ် မဟုတ်ဘူး - လက်လှမ်းမှီသမျှ Search engine တိုင်းကို တစ်ခုပြီး တစ်ခု ပြောင်းလဲ မြည်းစမ်းကြည့်ခဲ့ဖူးပါတယ်။ လူတိုင်းမှာ သူ့အစွဲနဲ့ သူရှိတယ်လို့များ ပြောရမလား - ကျွန်တော် တစ်ခုပြီး တစ်ခု ပြောင်းသုံးခဲ့ပေမယ့် နောက်ဆုံးတော့ Google ရှိရာဆီပဲ ပြန်လှည့်လာခဲ့ဖြစ်တာပါပဲ။ Google အစား နောက်တစ်ခု ပြောင်းသုံးရမယ် ဆိုရင်တော့ ကျွန်တော် Bing ကို သဘောကျပါတယ်။

အတော်ကြာကြာ စမ်းသပ်ပြင်ဆင်မှုတွေ ပြုလုပ်ပြီးခဲ့တဲ့နောက်မှာ Google ကနေပြီး Google search အတွက် Users တွေအသုံးပြုရ ပိုပြီး လွယ်ကူစေမယ့် Google search - Next edition ကို  လွန်ခဲ့တဲ့ 5/06/2010 ကနေ စပြီး တရားဝင် ထုတ်လွင့်ခဲ့ပါတယ်။ ဘာတွေများ ပြုပြင်ပြောင်းလဲပြီး ဘာတွေ အရင်ကထက် အသုံးပြုရလွယ်ကူ လာပါသလဲ။ အရင် သူတို့ အသုံးပြုနေကျ Google logo ကနေစလို့ - အသေးစိတ်လွယ်လင့်တကူ ရှာဖွေနိုင်စရာ Left-hand menu bar ထိ ကျွန်တော် တစ်ခုချင်း မိတ်ဆက်ပေးသွားပါ့မယ်။

ပထမဆုံး အနေနဲ့ လူတိုင်းသတိထားမိ ခဲ့ကြတာကတော့ Home Page မှာ ပြောင်းလဲသွားတဲ့ Design အပြင်အဆင်ပါ။ ပြောရရင်တော့ Google logo ပေါ့။

ဘယ်လိုပုံစံမျိုးများလဲ - ဟိုးအရင်ကနဲ့ ခုနဲ့ နိှုင်းယှဉ်ကြည့်ရင် ခုလို Google logo က သေသေသပ်သပ် ဖြစ်သွားတာ သတိထား မိပါတယ်။ တစ်ချို့ကတော့ ချောက်ကပ်ကပ် ဖြစ်သွားပါသတဲ့ -

သူတို့ ( ၂ ) ခုကို အချိန်းအပြောင်းလုပ်လိုက်ပြီးသွားတော့ ခု လိုပုံ ဖြစ်သွားတယ်။ ကျွန်တော့် အထင်တော့ သိပ်မဆိုးလှပါဘူး။ သေသေသပ်သပ်လေးပါ - 

Logo ချိန်းတာ ဘာအရေးပါလို့လဲ ?? ဟုတ်ကဲ့ ဘာမှ အရေးမပါပါဘူး - အရေးပါတာက ခုမှ လာမှာပါ။ အကြောင်းအရာတစ်ခုကို Search box မှာ ရိုက်ရှာလိုက်တော့ ခုလို အမြင်ဆန်းတဲ့ Left-hand menu bar နဲ့ Result page တစ်ခုကို စတွေ့ရပါတယ်။ ကျွန်တော်လည်း ဘာရိုက်ရှာပြရမှန်း မသိတာနဲ့ နားထောင်နေကျ အဆိုတော် နာမည်ပဲ ကောက်ရိုက်လိုက်ဖြစ်တယ်။ Taylor Swift -

Result page ရဲ့ Left-hand menu bar မှာ မြင်နေရတဲ့ - Everything, News, Images, Videos, Blogs, တို့ကနေ ကိုယ်ရှာဖွေတဲ့ Result နဲ့ သက်ဆိုင်ရာ အကြောင်းအရာလိုက်ကို သီးသန့်စီ ရှာဖြွေကည့်ရှုနိုင်ပါတယ်။ Everything, News, Images, Videos, Blogs, ..... ဒီလောက်တင်ပဲလား ?? မဟုတ်သေးပါဘူး။ More ကနေ တစ်ဆင့် နောက်ထပ်ဆက်စပ် နေတာတွေကို ရှာဖွေနိုင်ပါသေးတယ်။

ဒါတင်မက အရင်တစ်ချိန်က ဆိုရင် Google Search က Twitter နဲ့ ပတ်သတ်ပြီး ဆက်စပ်မှု မရှိခဲ့ပါဘူး။ ခုတော့ အောက်မှာ မြင်ရတဲ့ အတိုင်း Twitter က Updates တွေကိုပါ ဖော်ပြနေနိုင်ပါပြီ။

ဒီလောက်နဲ့တင် မကျေနပ်သေးဘူး ဆိုရင်လည်း ပုံအမှတ်စဉ် ( ၃ ) မှာ ဖော်ပြထားတဲ့ More search tools ကနေ ဆက်စပ်နေ တဲ့ သတင်းအချက်အလက်တွေကို ထပ်မံတိုးမြှင့် ရှာဖွေနိုင်ပါသေးတယ်။

ကျွန်တော့် အမြင်မှာတော့ Google search ရဲ့ Next edition ဟာ သတင်းအချက်အလက်တစ်ခုကို ရှာဖွေတဲ့ နေရာမှာ အရင်ကထက် ပိုပြီး လွယ်လွယ်ကူကူနဲ့ ထိထိမိမိ ရှာဖွေနိုင်လာတယ်လို့ သုံးသပ်မိပါတယ်။ ကဲ အခုပဲ စမ်းသပ်ကြည့်ကြရအောင် Google Search ဆီ ချီတက်ကြပါစို့။

GOOGLE

KznT.

MyanmarFamily ( Moderator )

ကျွန်တော် အပြင်ကနေ ပြန်လာတော့ မိုးတွေ အုံ့လို့ - ဒါပေမယ့် ကျွန်တော် မိုးတွေ အုံ့နေရင် ပျော်တယ် - နွေမှာ မိုးအုံ့နေတာ တစ်ခုခု ထူးခြားနေသလိုပဲလို့ ကျွန်တော့် စိတ်ထဲက ဖျတ်ကနဲ ထင်လိုက်မိသေးတယ်။ ဒီလိုနဲ့ ကွန်ပြူတာဖွင့်တော့ ပထမဆုံး မြင်ရတာ မေးလ် ( ၂ ) စောင် ရောက်နေကြောင်း တက်လာတဲ့စာ။ MyanmarFamily ဆိုပြီး ခေါင်းစဉ်နဲ့ တက်လာတာ ဆိုတော့ တစ်ယောက်ယောက် အကူအညီ လိုသလားပေါ့။

ဘာစာတွေများတုန်း ?? ကျွန်တော် စိတ်ဝင်စားသွားတယ်။ ခုထိလည်း မသိသေးဘူး။ ပေးထားတဲ့ Link အတိုင်းလိုက်တော့မှ ကျွန်တော် နာမည်အောက်မှာ ခုလို ဖြစ်နေပါရောလား -

ကျွန်တော် ဖော်မပြတတ်အောင် ဝမ်းသာမိပါတယ်။ အများကြီးလည်း ကျေးဇူးတင်ပါတယ်။ ကျွန်တော် မြန်မာမိသားစုကို ရောက်ဖြစ်တာ သိပ်မကြာသေးပါဘူး။ အရင်တစ်ချိန်က ဖိုရမ်တိုင်းမှာ အကောင့်တွေ လိုက်လုပ်တယ်။ ပြီးတော့ ဘယ်ဖိုရမ်မှ ကောင်းကောင်းမဖတ်သလို ကောင်းကောင်းလည်း မရေးဖြစ်ပါဘူး။ တစ်ပုဒ်စ နှစ်ပုဒ်စ ရေးပြီး လှည့်ထွက်ဖြစ်ခဲ့တာ များပါတယ်။ ဘာကြောင့်လဲ ဆိုတော့ ဖိုရမ်တစ်ခုရဲ့ အရှိန်အဝါကို ကျွန်တော် ဒဏ်မခံနိုင်လို့ပါ။ ကျွန်တော် ရေးလိုက်တဲ့ အကြောင်းအရာ တစ်ခုက ဖိုရမ်ကို လာတဲ့ စာဖတ်သူအတွက် ကလေးကစားစရာ အကြောင်းအရာများ ဖြစ်နေမလား။ ဒီလို အထင်ခံရမှာ ကျွန်တော် သိပ်ကြောက်ပါတယ်။ အဲလိုနဲ့ ကျွန်တော် ဘယ် Forum မှာမှ ခြေမချရဲခဲ့ပါဘူး။

အဲ့ဒီ ကြောက်စိတ်နဲ့ အတူ ကျွန်တော့်ကိုယ်ကိုယ် ကျွန်တော် ပြင်ဆင်ဖို့ ဆုံးဖြတ်ချက် တစ်ခု ချခဲ့ပါတယ်။ ကျွန်တော် ဘာကြောင့် ခြေမချရဲသလဲ - ကျွန်တော့်မှာ ခိုင်မြဲတဲ့ ခြေအစုံ မရှိလို့ ဖြစ်ပါတယ်။ ကျွန်တော် သူများတွေကို ဝေမျှချင်တယ်။ သူများအတွက် အကျိုးမရှိမယ့် Posts မျိုးတွေ မဖြစ်စေချင်ဘူး။ ဒါဆို ကျွန်တော် ဘာလုပ်ရမလဲ။ ကျွန်တော် စာဖတ်မှ ဖြစ်မယ်။ အဲ့အချိန်က စပြီး ကျွန်တော် စာစ ဖတ်ဖြစ်ခဲ့ပါတယ်။ Facebook ဝင်တာကို လျော့တယ် - တစ်ခြား အပန်းဖြေတာတွေ ရှောင်တယ်။ - စာဖတ်ခြင်းကို ကျွန်တော့်အတွက် အပန်းဖြေခြင်း တစ်ခုကို သဘောထားပြီး စာဖတ်ခဲ့ပါတယ်။ ဘာစာတွေ ဖတ်လဲ ?? ကျွန်တော် နည်းပညာနဲ့ ဆိုင်တဲ့ အင်္ဂလိပ်ဆိုဒ်တွေ တော်တော်များများ ဖတ်ပါတယ်။ မြန်မာဘလော့တွေ ရော မဖတ်ဖူးလား။ ဟုတ်ကဲ့ ဖတ်ပါတယ်။ ဒါပေမယ့် မြန်မာဘလော့ထက် အင်္ဂလိပ်ဘလော့တွေ ပိုဖတ်တာများပါတယ်။ ဘာကြောင့်လဲ - မြန်မာဘလော့ဂါ အများစုဟာ စိတ်စေတနာ ထက်သန်ပြီး ဝေမျှချင်တာက လွဲရင် သူတို့က ဒီ ဝေမျှမှုပိုင်းဆိုင်ရာကို ထမင်းကျွေးတဲ့ အလုပ်တစ်ခုလို ဘယ်သူမှ နေ့မအား ညမနား အားမထည့်နိုင်ကြဘူး။ တစ်ချို့ဆို အလုပ်က တစ်ဖက် - တစ်ချို့ဆို ကျောင်းက တစ်ဖက်နဲ့ ကြားထဲမှာ သူတို့ နိုင်သလောက် ဝေမျှ ကြရတာ သိပ်ချီးကျူးဖို့ ကောင်းပါတယ်။ ပိုက်ဆံတစ်ပြားတစ်ချပ် ရတဲ့ အလုပ်မဟုတ်ပါဘူး။ ဝါသနာနဲ့ စေတနာ အရင်းခံပြီး ကြိုးစားနေကြတာပါ။

အခုလို အလုပ်နဲ့ ကျောင်း မအားတဲ့ ကြားထဲမှာ ဝေမျြှကရတာ ဖြစ်လို့ နေ့တိုင်း ပို့စ် တစ်ခု တက်နိုင်ဖို့ များသောအားဖြင့် သူတို့ အားမထုတ်နိုင်ကြဘူး - ကျွန်တော်က နေ့တိုင်း စာဖတ်ချင်တယ် - အဲ့ ( ၂ ) ခုက အချိုးမညီတော့ဘူး ဖြစ်လာပါတယ်။ အဲလိုနဲ့ ကျွန်တော် အင်္ဂလိပ် ဘလော့တွေ ဖတ်ဖြစ်ခဲ့တာပါ။ သူတို့တွေက ဒါကို အသက်မွေးဝမ်းကျောင်း ထမင်းကျွေးတဲ့ အလုပ်တစ်ခု အနေနဲ့ လုပ်ကြတယ်။ ဒီ ဘလော့ရေးတာကနေ သူတို့အတွက် ပိုက်ဆံရတယ်။ အဲ့တော့ ဒါကိုပဲ သူတို့ တစ်စိုက်မတ်မတ် လုပ်တယ်။ နေ့တိုင်း ပို့စ် ( ၁ ) ခု ( ၂ ) ခု တက်တယ်။ ကျွန်တော် အဲလိုနဲ့ စာဖတ်ရင်း ကိုယ့်ကိုယ်ကိုယ် ချိန်ထိုးကြည့်တယ်။ ငါ ပြောပြချင်တဲ့ အကြောင်းအရာတွေ ဝေမျှနိုင်ဖို့ ငါ့မှာ လုံလောက်တဲ့ အသိဉာဏ်ရှိပြီလား။ အကုန်လုံးတော့ မသိသေးဘူး။ ဒါပေမယ့် ဒီအကြောင်းကိုတော့ ငါ တိတိကျကျ သိတယ်။ ဟုတ်ပြီ ဒါဆို ငါ ဒီအကြောင်းရေးမယ်။ ဒီလိုနဲ့ ကျွန်တော် စာစရေးဖြစ်ခဲ့ပါတယ်။ ကျွန်တော် ရေးသမျှ ကျွန်တော် ကိုယ်တိုင် ရေးခဲ့တာ ချည်းပဲလား ?? ပို့စ်တော်တော်များများ ကိုယ်စွမ်းကိုယ်စ နဲ့ စပြီး ရေးခဲ့တယ် ဆိုပေမယ့် အချက်အလက်ပိုင်း ဆိုင်ရာ - ဖော်ပြချက် အပြင်အဆင်တွေကို ကျွန်တော် ဖတ်နေကျ ဘလော့တွေကနေ အသေးစိတ် လေ့လာပြီး ပြင်ဆင်ရေးသားခဲ့တာပါ။ ကိုယ်တိုင် စာဖတ်ရင်းနဲ့ သဘောကျလို့ ဝေမျှချင်စိတ်ပေါ်လာပြီး တိုက်ရိုက် မြန်မာဘာသာပြန် ဖော်ပြခဲ့တဲ့ စာတွေလည်း ရှိပါတယ်။ ဘယ်လိုပဲ ဖြစ်ဖြစ် ကျွန်တော် ဦးတည်ချက် ထားတာ လူတိုင်းမသိနိုင်သေးတဲ့ အသိတစ်ခု ၊ အကြောင်းအရာ တစ်ခု ၊ နည်းပညာတစ်ခုကို မြန်မာလူမျိုး မြန်မာမိသားစု သိသွားစေနိုင်ဖို့ပါ။

အားလုံးအတွက် Ubuntu ( Linux ) ဆိုတဲ့ ပို့စ်မှာ ကျွန်တော် ဖော်ပြခဲ့ပြီးတဲ့ အကြောင်းအရာကို ဒီနေရာမှာ ပြန်ဖော်ပြပါရစေ။

" မြန်မာနိုင်ငံဟာ နည်းပညာပိုင်းမှာ အရမ်းကို ခေတ်နောက်ကျ နေပါပြီ။ ဒီစကားဟာ ကျွန်တော် မကောင်းမြင်နဲ့ ပြောတာ မဟုတ်ပါဘူး။ သိသူတတ်သူ လူနည်းစုကို ကျွန်တော် မဆိုလိုပါ။ မြန်မာနိုင်ငံ လူဦးရေပမာဏ နဲ့ နိှုင်းယှဉ်ပြီး ကျွန်တော် သုံးသပ်ကြည့်ခြင်းသာ ဖြစ်ပါတယ်။ ဒါမှန်သော စကားပါ။ ခုလို နောက်ကျနေတဲ့ နည်းပညာရပ်တွေကို သူများရှေ့ ကျော်မတက်နိုင်ရင်တောင်မှ သူများရဲ့ နောက်ကနေ သိပ်ပြတ်ကျန်မနေခဲ့ပဲ မှီအောင်လိုက်နိုင်ဖို့ ဆိုတာ သူများ စာတစ်အုပ်ဖတ်ရင် ကျွန်တော်တို့ စာအုပ် ( ၂၀ ) ဖတ်နိုင်မှ ဖြစ်ပါလိမ့်မယ်။ ဟုတ်ပြီ။ ကျွန်တော်တို့ ဆုံးဖြတ်ချက် ချလိုက်ပြီ။ ကျွန်တော်တို့ နောက်ကောက်ကျ မကျန်ခဲ့ဖို့ သူများတွေ စာတစ်အုပ်ဖတ်တဲ့ အချိန်မှာ ကျွန်တော်တို့ စာအုပ် ( ၂၀ ) ဖတ်မယ်။ စာအုပ် ( ၂၀ ) ဖတ်မှာတော့ ဟုတ်ပြီ။ ဘယ်လိုစာအုပ်မျိုး အုပ် ( ၂၀ ) ကိုဖတ်မှာလဲ။ ခေါင်းစဉ်လြှပီး အနှစ်သာရ မပါတဲ့ စမ်းတဝါး လမ်းညွှန်ချက်တွေနဲ့ စာတွေကို ကျွန်တော်တို့ ဖတ်မှာလား။ အဲလိုစာအုပ်မျိုး ဖတ်မိရင်တော့ စာအုပ် ( ၂၀ ) မဟုတ်ဘူး - ( ၂၀၀ ) ဖတ်လည်း ကျွန်တော်တို့ ဒုံရင်းက ဒုံရင်းပဲ ဖြစ်နေမှာပါပဲ။ ကျွန်တော်တို့ တိကျတဲ့ ဖော်ပြချက် တစ်ခု မပါဝင်ရင်တောင် တိကျတဲ့ အချက်အလက်တွေ ရှိရာဆီ လမ်းညွှန်ပေးနိုင်မယ့် စာမျိုးတွေ ဖတ်ဖြစ်ဖို့ လိုပါတယ်။ ဒီပြဿနာကို ဖြေရှင်းနိုင်ဖို့ ကျွန်တော်တစ်ယောက်တည်း မစွမ်းဆောင်နိုင်ပေမယ့် ကျွန်တော် နိုင်သလောက် ၊ ကျွန်တော်နားလည်သလောက် ၊ ကျွန်တော်လေ့လာ ဖတ်မှတ်ခဲ့ဖူးသလောက် ကျွန်တော် မျှဝေပေးချင်မိပါတယ်။ အဲ့အတွက် ကျွန်တော်စာရေးပါတယ်။ ကျွန်တော်ရေးခဲ့တဲ့ အကြောင်းအရာတွေဟာ တိကျတဲ့ အချက်အလက် ၊ မှန်ကန်တဲ့ အချက်အလက်တွေ ဟုတ်ချင်မှ ဟုတ်ပါလိမ့်မယ်။ ဒါပေမယ့် ကျွန်တော် စာဖတ်သူကို အုပ် ( ၂၀၀ ) ဖတ်ဖို့ မလိုအောင် ကူညီလိုတဲ့ စေတနာနဲ့ ရေးသားခဲ့ခြင်းသာ ဖြစ်ပါတယ်။ "

ကျွန်တော်ဟာ အထူးအသင်းအဝင် အတွက် ရည်မှန်းပြီး စာရေးခဲ့တာ မဟုတ်ပါဘူး။ ကျွန်တော့်ကို မွေးကင်းစကလေး အနေနဲ့ ထားလည်း ကျွန်တော်စာရေးနေဦးမှာပါ။ ဒါပေမယ့် ခုလို ချီးမြှင့်တာကိုကြုံတွေ့ရတော့ အတိုင်းမသိ ကြည်နူးမိတာလည်း အမှန်ပါပဲ။ ကျွန်တော့်ရည်မှန်းချက်က မြန်မာလူမျိုး နောက်ကောက်ကျ မကျန်ခဲ့ဖို့ပါ။ ကျွန်တော် နိုင်ငံခြားကို ရောက်လာတယ် - ကျန်တဲ့ ပညာရပ်ပိုင်းဆိုင်ရာမှာ သူတို့ လူမျိုးတွေရဲ့နောက် နောက်ကောက်ကျ မကျန်အောင် ကျွန်တော် ရပ်တည်နိုင်ခဲ့ပေမယ့် ကျွန်တော့် ကွန်ပြူတာ Knowledge က သူတို့တွေနဲ့ ယှဉ်လိုက်ရင် ( ၅ ) နှစ်သား ကလေး အသိသာသာပဲ။ မြန်မာနိုင်ငံမှာ ရှိခဲ့စဉ်တုန်းက ကွန်ပြူတာ သင်တန်း တစ်ခု တက်ရင်း Computer Turnoff မလုပ်တတ်လို့ Plug ကြိုး ဆွဲဖြုတ်ပြီး အိမ်ပြန်ခဲ့တာကို ကျွန်တော် ပြန်သတိရနေမိတယ်။ အဲလို အခြေအနေမျိုးမှာ တစ်ချို့က ပါးစပ်က ဖွင့်ပြောပြီး ကဲ့ရဲ့ ကြသလို - တစ်ချို့က မျက်လုံးတွေနဲ့ လှောင်ကြတယ်။ ကိုယ်လုပ်လိုက်တာ တစ်ခုခု အမှားပါသွားရင် လူနာမည်သုံးပြီး ကဲ့ရဲ့တာမျိုး မဟုတ်ဘူး။ အဲလို ကဲ့ရဲ့ရင် ကျွန်တော် ခံနိုင်တယ်။ သူတို့က အဲလိုမဟုတ်ဘူး။ လူမျိုး လိုက်ချီပြီး ကဲ့ရဲ့ကြတယ်။ အဲ့ဒီ့ အတွေ့အကြုံ ခံစားချက် တွေကြောင့် ခုလို မျှဝေနိုင်သူ တစ်ယောက် ဖြစ်လာခဲ့တာပါ။

ခု ကျွန်တော် စာရေးရင်း သတိရမိတာ ကျွန်တော် ကိုယ့်ကိုယ်ကိုယ် မိတ်မဆက်ရသေးတာပါ။ ကျွန်တော့်ကို chitnyimalay ခေါ်သလို ကိုကေဇက်အန်တီရေ လို့တော့ မခေါ်ပါနဲ့လား။ ကေဇက် ကတော့ ဟုတ်ပါတယ်။ ဒါပေမယ့် အန်တီ ကြီးက နဲနဲ တစ်မျိုးကြီး ဖြစ်နေသလားလို့ပါ။ ကေဇက် လို့ပဲ ခေါ်နိုင်ပါတယ်။ ကျွန်တော် မန္တလေး စက်မှု တက္ကသိုလ်က ကျောင်းပြီးပါတယ်။ 2000 ပြည့်နှစ်က ဆယ်တန်းအောင်ပါတယ်။ သက်ဆိုင်ရာ အလိုက်ကြီးသူ ငယ်သူများ ကျွန်တော် ပြောမှားဆိုမှား ခေါ်မှား ရှိခဲ့မယ် ဆိုရင် ခွင့်လွှတ်ပေးကြဖို့ ဒီနေရာကနေပဲ တောင်းပန်လိုက်ပါတယ်။ ( ဥပမာ - မတုတု နဲ့ မတူးတူး ) စသဖြင့်

နောက်ဆုံး အနေနဲ့ ကျွန်တော် ပြောခဲ့ချင်တာ - တတ်နိုင်သလောက် စာဖတ်ပြီး ဖြစ်နိုင်သလောက် များများ မျှဝေပေးကြပါ။ ကျွန်တော်တို့ လူမျိုး တိုးတက်ဖို့ အသိဉာဏ် ပညာမြင့်မားဖို့ ကျွန်တော်တို့ကိုယ်တိုင်မှ အချိန်မပေးရင် ဘယ်သူမှ အချိန်ဝင်ပေးမှာ မဟုတ်ပါဘူး။ မြန်မာမိသားစုအားလုံး မြန်မာမိသားစုဖိုရမ် အဓွန့်ရှည်တည်တံ့နိုင်ဖို့ ကြိုးစားရင်း - မြန်မာလူမျိုး အသိဉာဏ် ပညာ မြင့်မားစေဖို့ - တစ်ပါးနိုင်ငံသားများရဲ့ အနှိမ်မခံရစေဖို့ ကိုယ်စွမ်းဉာဏ်စွမ်းရှိသ၍ မိမိတတ်သိနားလည်သမျှ မျှဝေနိုင်ကြပါစေလို့ ဆုတောင်းရင်း ကျွန်တော့်ရဲ့ ကျေးဇူးတင်စကားကို ဒီမှာပဲ အဆုံးသတ်လိုက်ပါတယ်။

ကျွန်တော့်ရဲ့ နည်းပညာဆိုင်ရာ အကြောင်းအရာ ရှည်လျားလွန်းတဲ့ စာတွေကို ဖတ်ပေးခဲ့ကြသူ ၊ ဖတ်ပေးနေကြသူ ၊ ဖတ်ပေးကြမည့်သူ အားလုံး ၊ အထူးအသင်းဝင် အဖြစ် ချီးမြှင့်ခံရတဲ့ အတွက် Congratulations လုပ်ဆောင်ကြသူများ အားလုံး ၊ နောက် မြန်မာမိသားစု ရပ်တည်နိုင်ရေး ကြိုးပမ်းအားထုတ်ခဲ့ကြသူ အားလုံး၊ မိမိတတ်စွမ်းသရွေ့ နည်းပညာပိုင်းမှစ ကိုယ်ရေးကိုယ်တာအဆုံး မြန်မာမိသားစု ဖိုရမ်မှာ ဝေမျှရေးသားနေကြသူ အားလုံးနဲ့ မြန်မာမိသားစုဝင်အားလုံး ကို အထူးပဲ ကျေးဇူးတင်ရှိပါကြောင်း ထပ်လောင်း ပြောကြားလိုက်ပါရစေ။

Mg Zin.

How to Backup your Gmail Account

ဟိုးမိုးကောင်းကင်ပေါ်က ကျွန်တော်တို့ မထိတွေ့နိုင်တဲ့ တိမ်တိုက်တွေထဲမှာ ကျွန်တော်တို့ရဲ့ mails တွေ ရှိနေကြတယ်။ ဘယ်သူမှ ခိုးယူဖို့ မလွယ်တာ သိပေမယ့် ညတိုင်းညတိုင်း ကျွန်တော်တို့ အိပ်မပျော်နိုင်ကြဘူး။ ဘာကြောင့်လဲ ?? အင်တာနက် နဲ့ နည်းပညာတွေက နေ့စဉ်နဲ့ အမျှ တိုးတက်နေတာ ကို ကျွန်တော်တို့ သိနေတယ်။ ဒီ ရလာဒ်နဲ့ အတူ hackers တို့ ၊ မသမာသူတို့ ဆိုတာလည်း ကျွန်တော်တို့ရဲ့ ဘေးပတ်ဝန်းကျင်က ကိုယ်တွေ မမြင်နိုင်တဲ့ နေရာမှာ နေပြီး အချိန်ပြည့် ကျွန်တော်တို့ရဲ့ လစ်ဟာသွားမယ့် အချိန်ကို စောင့်ကြည့်နေကြတယ်။ Hacker တစ်ယောက်က ကိုယ်လိုသူကို Mails အကောင့်တစ်ခုကို အပင်ပန်းခံ အချိန်ကုန်ခံပြီး ဘယ်သူမှ ့မ Hack ကြဘူး။ သူတို့ ဘာတွေ Hack လုပ်မလဲ - သူတို့ အတွက် အမြတ်ရနိုင်မယ့် ဘဏ်တွေ ၊ စီးပွားရေး လုပ်ငန်း လျှို့ဝှက် သတင်းအချက်အလက်တွေ ၊ နည်းပညာဆိုင်ရာ တစ်ခြားနိုင်ငံ တစ်ခုရဲ့ လျှို့ဝှက် စမ်းသပ်တွေ့ရှိထားချက်တွေ စသဖြင့် ဒါမျိုးတွေကို Hack ကြပါတယ်။ ဒါဆို ကိုယ်တွေသုံးတဲ့ ကိုယ်လို သူလို Accounts တွေကိုကျ ဘယ်သူတွေ Hack ကြသလဲ။ အဲလို အမူအကျင့်မျိုးကိုတော့ Hackers တစ်ယောက်လို မကျွမ်းကျင်တဲ့ သူခိုးကျင့် သူခိုးကြံ သမားများ - သူများအကြောင်း ၊ သူများ မသိစေချင်တဲ့ အကြောင်းအရာကို တိတ်တိတ်ပုန်း အနံ့ခံလိုသူများ လုပ်ဆောင်ကြပါတယ်။ သူတို့တွေကို Hackers လို့ ပြောမယ်ဆိုရင်တော့ Hacker နာမည် ပျက်ပါတယ်။ သူတို့က Hackers ဘွဲ့နဲ့ မတန်ပါဘူး။ သူတို့က အောက်တန်းစား သူခိုးသာ ဖြစ်ပါတယ်။

အခုလို သူခိုးကျင့် သူခိုးကြံ သမားများ ရန်ကနေ ကာကွယ်နိုင်ဖို့ အတွက် နည်းလမ်းပေါင်း မနည်းရှိပေမယ့် အမှောင်ထဲက လူတစ်ယောက်ရဲ့ ပြုမူလာမယ့် ရန်ကို ကျွန်တော်တို့ အလင်းဘက်မှာ ရပ်နေသူတွေက အချိန်ပြည့် အသင့်ရင်ဆိုင်နိုင်ဖို့ ဆိုတာ မလွယ်ပါဘူး။ ဒါကြောင့် သူတို့ပြုမူလာမယ့် အန္တရာယ်ကို မတားဆီးနိုင်ခဲ့ဘူး ဆိုရင်တောင် အန္တရာယ်ကို ရင်ဆိုင်ပြီးချိန် နောက်ပိုင်းမှာ ကိုယ့်ဆီက ဆုံးရှုံးသွားရတဲ့ အရာတွေကို အမြန်ဆုံး Recovery လုပ်နိုင်ဖို့ ကျွန်တော်တို့မှာ B-PLAN ရှိထားဖို့ လိုပါတယ်။

Emails - Emails ဆိုတာ ကျွန်တော်တို့ရဲ့ အသက်ပါပဲ။ လူတစ်ချို့က Personal account, Businees account စသဖြင့် Accounts များစွာခွဲပြီး အလုပ်လုပ်ကြပေမယ့် တစ်ချို့ကတော့ Accounts တစ်ခုတည်းကိုပဲ စီးပွားရေး လုပ်ငန်းကစလို့ ကိုယ်ရေးကိုယ်တာ တိုင်အောင် အသုံးပြုကြတာလည်း ရှိပါတယ်။ အဲ့ထဲမှာ ဆိုရင် ကျွန်တော်တို့ရဲ့ နေ့စဉ်နဲ့ အမျှ လုပ်ဆောင်နေတဲ့ လုပ်ငန်းဆောင်တာတွေ ၊ သတင်းအချက် အလက်တွေ ၊ နောက် ငွေဝင်ငွေထွက် စာရင်းတွေ ၊ မိသားစု အကြောင်းအရာတွေ စသဖြင့် မနည်းမနော ရှိနေပါတယ်။ ဒီလို ကိုယ့်အတွက် အရေးကြီးတဲ့ အကြောင်းအရာတွေကို ကိုယ့်ရဲ့ အောင်မြင်မှုကို မနာလို မရှုစိမ့်တဲ့ တစ်ခြားသူတစ်ယောက် - တစ်နည်းအားဖြင့် မသမာသူ တစ်ယောက်က ခိုးယူနိုင်ဖို့ ကြိုးစားနေမလား - ကြိုးစား မနေဘူးလားဆိုတာ ကျွန်တော်တို့ မသိနိုင်ပါဘူး။ နေ့စဉ်နဲ့ အမျှ ကျွန်တော်ကြားနေရတယ်။ ကျွန်တော့် အကောင့် အဟက်ခံလိုက်ရလို့ - ကျွန်မအကောင့် ဝင်မရတော့လို့ - လုပ်ပါ မရရအောင် ပြန်ယူပေးပါ - အဲ့ထဲမှာ အလုပ်က အရေးကြီးတဲ့ Mails တွေပါသွားလို့ပါ - စသဖြင့် အမြဲ တွေ့နေကြားနေ ရပါတယ်။ သူများဆီ ရောက်သွားပြီ ဖြစ်တဲ့ အကောင့် တစ်ခု ကိုယ့်ဆီ ပြန်ရောက်လာဖို့ ဆိုတာ ပြောသလောက် မလွယ်ပါဘူး။ ပြန်ရတယ်ပဲ ထား - ကိုယ့် အကောင့်ထဲက အကြောင်းအရာတွေကို သူ ဖျက်လို့ ဖျက်ဆီး လုပ်ထားပြီးသား တွေလည်း ဖြစ်ကောင်း ဖြစ်နေနိုင်ပါတယ်။ အဲ့အတွက် ကျွန်တော်တို့ရဲ့ Mails တွေကို ကာကွယ်ထားဖို့ လိုလာပါပြီ။

ဘယ်လို ကာကွယ်မှာလဲ ??

ကာကွယ်နည်းတွေကတော့ မနည်းမနောရှိပါတယ်။ လူတစ်ချို့ကတော့ ကိုယ့်ရဲ့ တန်ဖိုးရှိတဲ့ Emails တွေကို ကာကွယ်နိုင်ဖို့ အတွက် ( ဥပမာ - Gmail ဆိုကြပါစို့ ) ကိုယ့်ရဲ့ Local computer ထဲကို Emails တွေ ရောက်ရှိနိုင်ဖို့ POP3 access ကို Gmail settings ကနေ enable ပေးပြီး desktop mail client အကူအညီနဲ့ local computer ထဲကို download ဆွဲပြီး သိမ်းထားကြပါတယ်။ အဲလို လုပ်ဆောင်ထားလိုက်ခြင်း အားဖြင့် ဟိုးမိုးကောင်းကင်ပေါ်က ကျွန်တော်တို့ မထိတွေ့နိုင်တဲ့ တိမ်တိုက်တွေထဲမှာ ရှိနေတဲ့ စာတွေ - ကျွန်တော်တို့ရဲ့ Local computer ပေါ်က HD ပေါ် ရောက်ရှိလာမှာ ဖြစ်ပါတယ်။ အဲတာကို လုပ်ဆောင်ရတာ ခက်လည်းမခက်ပါဘူး။ Windows Live Mail, Outlook နောက် Thunderbird စတဲ့ Email clients တစ်ခုခုကို သုံးပြီး အလွယ်တကူ Backup လုပ်ဆောင်ထားနိုင်ပါတယ်။

ဘာကြောင့် ကျွန်တော်တို့ရဲ့ Gmails တွေကို Backup လုပ်သင့်တာလဲ ??

တကယ်လို့ ကျွန်တော်တို့တွေက desktop applications တွေ သုံးပြီး Gmail ကို Backup လုပ်ရတာ သဘောမကျဘူး - သုံးရတာလည်း အဆင်မပြေဘူးလို့ ယူဆမယ် ဆိုရင် နောက်ထပ် နည်းလမ်း တစ်ခုကို ပြောင်းသုံးပြီး Gmail ကို Backup လုပ်နိုင်ဖို့ ကျွန်တော်တို့ ရွေးချယ်နိုင်ပါတယ်။ အဲတာကတော့ ပိုက်ဆံ ပေးစရာမလိုတဲ့ နေရာတစ်ခုမှာ ကိုယ့် Gmail တွေ အားလုံးကို  Online Backup လုပ်ထားဖို့ပါ။ အဲဒီတော့ Gmail messages တွေကို Online Backup ဘယ်လိုလုပ်ဆောင်နိုင်မလဲ ?? ကျွန်တော်တို့ မသွားခင်မှာ Gmail messages တွေကို ဘာကြောင့် Online Backup လုပ်ဆောင်ထားသင့်လဲ ဆိုတာ အခြေအနေ ( ၃ ) ခုနဲ့ယှဉ်တွဲဖော်ပြ သွားပါ့မယ်။

အကြောင်းပြချက် ( ၁ ) – တကယ်လို့များ ကျွန်တော်တို့ရဲ့ Gmail account ကို မသမာ သူ လူတစ်စုရဲ့ ခိုးယူခံရခြင်း ( Hack ခံရခြင်း ) ဆိုတဲ့ အခြေအနေမျိုး ဖြစ်ပေါ်တဲ့ အခါမှာ Account ဆုံးရံှုးသွားပေမယ့် ကိုယ့်အတွက် မရှိမဖြစ် လိုအပ်မယ့် Data တွေ ဆုံးရံှုးမှု မရှိပဲ အရေးအကြီး အချက်အလက်အားလုံး မိမိလက်ဝယ် ရရှိနေဦးမှာ ဖြစ်ပါတယ်။

အကြောင်းပြချက် ( ၂ )  – လူဆိုတာ အမှားနဲ့ မကင်းနိုင်ပါဘူး။ အကြောင်းအမျိုးမျိုးကြောင့် မိမိ Mail box ထဲမှာ ရှိနေတဲ့ Mails တွေထဲက အရေးကြီး Mails တစ်ချို့ကို မှားယွင်းပြီး ဖျက်ထုတ်မိလိုက်မယ် ဆိုရင်လည်း Online Backup ကနေ တဆင့် အချိန်မရွေး ပြန်လည် ရရှိနိုင်မှာ ဖြစ်ပါတယ်။

အကြောင်းပြချက် ( ၃ ) – တကယ်လို့များ Gmail service - Down သွားမယ်ဆိုရင် ( တကယ်ပါ -Down နိုင်ပါတယ်။ )  တောင် ကျွန်တော်တို့ အနေနဲ့ ကိုယ့်ရဲ့ Emails တွေကို သက်တောင့်သက်သာ အပူအပင်မရှိ ဖတ်နေနိုင်ဦးမှာ ဖြစ်ပါတယ်။ Gmail service သူ့ဘာသာ ဘာပဲ ဖြစ်ဖြစ် ဂရုစိုက်ဖို့ မလိုပါဘူး။ 

Gmail Messages များအား Online Backup ပြုလုပ်ခြင်း

ဒီလုပ်ငန်းစဉ်ကို လုပ်ဆောင်ဖို့အတွက် ငွေကြေးတစ်ပြားတစ်ချပ် အကုန်အကျခံစရာမလိုပဲ ကျွန်တော်တို့ရဲ့ Gmail နဲ့ Google apps မှာ ရှိနေတဲ့ Emails တွေကို automatically backup ပြုလုပ်ပေးမယ့် Services ( ၃ ) မျိုး ရှိပါတယ်။

ပုံအမှတ် ( ၁ )

နည်းလမ်း ( ၁ ) - ပထမဆုံး အနေနဲ့ အကြောင်းပြချက် ( ၁ ) ကို ဦးတည်ချက်ထားပြီး Gmail account အချင်းချင်း ဘယ်လို Backup လုပ်ဆောင် သွားမယ်ဆိုတာ တင်ပြသွားပါ့မယ်။ ကိုယ့် Gamil ထဲကို ဝင်ပြီး  Settings ကိုသွားပါ။ အဲကနေမှ တဆင့် Settings –> Accounts and Import –> Check mail using POP3 –> Add POP3 email account ကို အဆင့်လိုက် လုပ်ဆောင်သွားပါ။

ပုံအမှတ် ( ၂ )

ပုံမှာ ပြထားတဲ့ အတိုင်း Email address နေရာမှာ ကိုယ့်ရဲ့ Main Gmail Account ( Backup လုပ်ဆောင်ထားချင်သော account ) ကို add ပြီး Next Step ကို သွားပါ့မယ်။ နောက်တစ်ဆင့်မှာ မြင်ရမယ့် ပုံကတော့ ခုလိုပုံပါ။

ပုံအမှတ် ( ၃ )

ဒီအဆင့်မှာတော့ ဖော်ပြပါအတိုင်း ဖြည့်သွင်းပေးပြီး Add Account ကို သွားလိုက်တာနဲ့ Google ကနေပြီး ကိုယ့်ရဲ့ Main account ရှိရာဆီကို မူပိုင်ခွင့်ကို အတည်ပြုဖို့အတွက် Code တစ်ခုကို Mail ကနေ ပို့ပေးပါလိမ့်မယ်။ အောက်ဖော်ပြပါ အတိုင်း ဆင်တူတဲ့ Mail ပါ။

ပုံအမှတ် ( ၄ )

အထက်က ပုံမှာတွေ့နေရတဲ့ code : 37706877 စသဖြင့် ဆင်တူတဲ့ သက်ဆိုင်ရာ Mail နဲ့အတူပါလာမယ့် Code ကို ကိုယ့်ရဲ့ Backup လုပ်ချင်တဲ့ Mail account ရှိရာဆီ ဝင်ကြည့်ပြီး Copy ကူး - နောက် ပုံအမှတ် ( ၃ ) မှာ အဆင့်လိုက် ဆက်သွားရင် နောက်ဆုံးမှာ ရောက်လာမယ့် Verify လုပ်ပေးရမယ့် Box မှာ အဲ့ Code ကို ဖြည့်သွင်းပေးရမှာ ဖြစ်ပါတယ်။ 

Verify လုပ်ပြီး ချိန်ကနေ စလို့ ကိုယ့် Main account မှာ ရှိနေတဲ့ mail တွေကို Backup လုပ်မယ့် အကောင့်ရှိရာဆီ  Mail fetcher program ကနေ ဖြည်းဖြည်းချင်း အလိုလျောက် လွှဲပြောင်းပေးသွားမှာ ဖြစ်ပါတယ်။ စာတွေ အားလုံး လွှဲပြောင်း ပြီးဖို့အတွက် ကြာမြင့်နိုင်မယ့် ကြာမြင့်ချိန်ကတော့ ကိုယ့် Main Account ရဲ့ ထဲမှာ ရှိနေတဲ့  Mails အရေအတွက်ပေါ် မူတည်ပြီး အချိန်အတိုင်းအတာ တစ်ခုထိ ကြာမြင့်နိုင်မှာ ဖြစ်ပါတယ်။ ဒါပေမယ့် ဒီနည်းဟာ ကျွန်တော်စမ်းသပ်ကြည့်ချက် အရ  “read”  လုပ်ပြီး သွားတဲ့ Mails တွေနဲ့ အရင်တစ်ချိန်က တစ်ခြား POP3 client ကို သုံးပြီး ဒီ Mails တွေကို downloaded ချထားခဲ့ဖူးတယ် ဆိုရင် အဲ့ Mails တွေကို လွှဲပြောင်းမပေးတော့ပဲ မူရင်း account မှာပဲ ထားခဲ့တာမျိုး တွေ့ရပါတယ်။ ဒါကြောင့် ဒီနည်းလမ်းက “true backup” လုပ်ဆောင်နည်းပါလို့ ပြောဖို့ ခက်နေပါတယ်။ အဲတော့ ကျွန်တော်တို့ သေချာမယ့် နောက် နည်းလမ်း တစ်ခုဆီ ချဉ်းကပ်ကြည့်ရအောင်ပါ။

နည်းလမ်း ( ၂ ) - ခု ကျွန်တော်တို့ ချဉ်းကပ်ကြည့်မယ့် ဒုတိယနည်းလမ်းကတော့ Gmail Mailbox ကို Windows Live Hotmail ထဲမှာ ပြောင်းရွှေ့သိမ်းဆည်းဖို့ပါ။ အပေါ်မှာ ကျွန်တော်တို့ သုံးခဲ့တဲ့ Gmail ရဲ့ mail fetcher လုပ်ဆောင်ပုံအတိုင်းပဲ Gmail account ကို Hotmail မှာ POP3 သုံးပြီး Add လိုက်ခြင်း အားဖြင့်လည်း ကိုယ့် Gmail account ထဲက Mails တွေကို Hotmail ထဲမှာ အလိုလျောက် Copy ကူးပြီး သိမ်းဆည်းပြီးသား ဖြစ်သွားပါလိမ့်မယ်။ အဲလို Gmail ကနေ Hotmail ဆီ Backup Copy ထားရှိတဲ့ လုပ်ဆောင်မှုကို TrueSwitch လို့ခေါ်ပြီး ဖော်ပြပါ နေရာကနေ သွားရောက်လုပ်ဆောင်နိုင်ပါတယ်။ မြင်ရမယ့် ပုံစံကတော့ ခုလိုမျိုးပါ။

အပေါ်မှာ ဖော်ပြထားခဲ့ပြီးတဲ့ အတိုင်း ကိုယ် Backup လုပ်ဆောင်ချင်တဲ့ Gmail address တစ်ခုနဲ့ သက်ဆိုင်ရာ Account password - နောက် မိမိရဲ့ Hotmail address နဲ့ သက်ဆိုင်ရာ password ကို ဖြည့်သွင်းပေးပြီးတဲ့နောက် မှာ Copy to Windows Live Hotmail ကို ဆက်သွားလိုက်ပါ။ နောက်စာမျက်နှာ တစ်ခုကို ရောက်တဲ့ အချိန်မှာ ခုလိုတွေ့ရမှာဖြစ်ပါတယ်။

TrueSwitch ကိုသုံးပြီး Hotmail Account မှာ ကိုယ့်ရဲ့ Gmail တွေကို Backup လုပ်ရတာ လွယ်လည်း လွယ်ကူသလို တိလည်းတိကျပါတယ်။ ကိုယ့်ရဲ့ Gmail ထဲမှာ ရှိနေသမျှ Mails တွေ အားလုံးနဲ့ ပါဝင်သမျှ Attachments အားလုံးကို Hotmail account ဆီ အချိန်ပမာဏ တစ်ခု ကြာမြင့်ပြီးတဲ့နောက်မှာ အားလုံးအပြီးအစီး ရွှေ့ပြောင်းပေးပါလိမ့်မယ်။ ဘယ်လောက်ထိ ကြာမှာလဲ ?? တကယ်လို့ ကိုယ့် Gmail Inbox ထဲမှာ Mails တွေက မတန်တဆ များပြားနေတယ် ဆိုရင်တော့ ဒီ Backup Process ဟာ ( ၂၄ ) နာရီ နဲ့ အထက် ကြာမြင့်မှာ ဖြစ်ပါတယ်။ အားလုံးရွှေ့ပြောင်းလို့ ပြီးမပြီး ဆိုတာကို ရွှေ့ပြောင်းလို့ ပြီးရင်ပြီးချင်း Email ပို့လွှတ် အကြောင်းကြားပါလိမ့်မယ်။ 

Gmail နဲ့ Hotmail နှစ်ခုလုံးက သူတို့ပေးထားတဲ့ Storage space ကို တိုးချဲ့ချင်ရင် တိုးချဲ့နိုင်အောင်လည်း Offers လုပ်ထားတာ ရှိပါတယ်။ စျေးကတော့ အောက်ဖော်ပြပါ အတိုင်းပါ။

အဲလို ဝယ်ယူပြီး ကိုယ့် Google Inbox ကို တိုးချဲ့ပြီးသွားပြီ ဆိုရင် နောက်ထပ် ဝင်လာမယ့် Mails တွေကို ဆက်တိုက် Backup လုပ်သွားဖို့ အတွက်ကတော့ အောက်ဖော်ပြပါအတိုင်း လုပ်ဆောင်ပါ။

Hotmail ထဲက Sidebar မှာ ရှိနေတဲ့ ( အထက်မှာ ဖော်ပြထားတဲ့ ပုံအတိုင်း ) Add an email account ကို click ပေးပြီး ကိုယ့်ရဲ့ Gmail address ကို Add ထားနိုင်ပါတယ်။ အဲလိုလုပ်ထားလိုက်တာနဲ့ နောင်တစ်ချိန် Gmail ထဲကို ရောက်လာသမျှ စာအားလုံး လည်း Hotmail ထဲမှာ Backup လုပ်ပြီးသား ဖြစ်သွားပါလိမ့်မယ်။

အပေါ်မှာ ဆွေးနွေးပြီးခဲ့တဲ့ Services အားလုံးဟာ အားနည်းချက် တစ်ခုစီတော့ ရှိနေပါတယ်။ အဲတာကတော့ သူတို့ အားလုံးဟာ တစ်ခါ Backup လုပ်ဖို့ ဖန်တီးလိုက်ပြီ ဆိုတာနဲ့ Gmail mailbox ထဲမှာ ရှိသမျှဝင်လာသမျှ Mails အားလုံးကို Backup လုပ်ဆောင်ပေးနေမှာ ဖြစ်ပြီး - ကိုယ်လိုချင်တဲ့ Folders တွေကိုချည်း သီးသန့် Backup လုပ်ဆောင်လို့တော့ရမှာ မဟုတ်ပါဘူး။

အထက်ပါပုံမှာ ဖော်ပြထားသလိုမျိုး ကိုယ်လိုချင်တဲ့ folder တစ်ခုချင်းကိုပဲ သီးသန့် Backup လုပ်ဆောင်ချင်တယ် ဆိုရင်တော့ Backupify ကို စမ်းသုံးကြည့်ပါ။ 

Backupify ဆိုတာ Gamil အပါအဝင် ကိုယ့်ရဲ့ Online မှာ ရှိနေတဲ့ accounts တိုင်းက တန်ဖိုးရှိရာတွေကို ပုံမှာ မြင်ရတဲ့ အတိုင်း တစ်ခုချင်းစီအလိုက် Backup လုပ်ထားနိုင်တဲ့နေရာဖြစ်ပါတယ်။

ခုကျွန်တော် ဖော်ပြခဲ့ပြီးသလောက်ဆို ကိုယ့်ရဲ့ Gmail ထဲမှာရှိနေတဲ့ messages တွေကို Online မှာ ဘယ်လို Backup လုပ်ဆောင်ထားနိုင်မလဲ ဆိုတာ သိရှိကြလောက်ပါပြီ။ မိမိရဲ့ အရေးကြီးတဲ့ အကြောင်းအရာ - အချက်အလက် - စာရွက် စာတမ်းတွေကို ခုလိုမျိုး တစ်ခြားနေရာတစ်ခုမှာ ပြောင်းရွှေ့သိမ်းဆည်းထားခြင်းအားဖြင့် အရေးအပေါ် အခြေအနေမှာ မိမိရဲ့ Data များ ပျက်စီးပျောက်ဆုံး ဆုံးရံှုးခြင်းကနေ ကာကွယ်နိုင်ကြပါစေလို့ ဆုမွန်ကောင်းတောင်းရင်း အဆုံးသတ် လိုက်ပါတယ်။ 

KznT.

Ubuntu 9.10, Karmic Koala >> Ubuntu 10.04 LTS, Lucid Lynx

ဒီနည်းလမ်းက တစ်ချို့သူတွေ လက်ရှိသုံးနေတဲ့ Ubuntu 9.10, Karmic Koala ကနေ >> Ubuntu 10.04 LTS, Lucid Lynx ကို ပြောင်းလဲချင်တဲ့အခါ Upgrade လုပ်ဖို့ နည်းလမ်း မသိရှိသေးသူတွေ အတွက်ပါ။ သိပ်လည်း ခက်ခက်ခဲခဲကြီး မဟုတ်ပါဘူး။ Newbies တွေအတွက် သီးသန့် ရည်ရွယ်ပါတယ်။ ဒီနည်းလမ်းကို နောက်အမည် တစ်မျိုးနဲ့ Network upgrade လို့လည်း ခေါ်ပါတယ်။ ဒီ Upgrade လုပ်ငန်းစဉ်ကို မလုပ်ဆောင်ခင် ကြိုတင်အသိပေးထားချင်တာက ကိုယ့်အတွက် အရေးကြီးတဲ့ ဖိုင်တွေကို Backups လုပ်ဆောင်ထားဖို့အကြံပြုထားချင်ပါတယ်။ ဥပမာ အနေနဲ့ -

- /var/www/ content, - /home/user config files စတာတွေ ဖြစ်ပါတယ်။

Upgrade လုပ်ငန်းစဉ် စတင်ဖို့အတွက် System -> Administration -> Update Manager ကိုသွားပါ။ အဲ့နောက်မှာ Check buttom ကို နှိပ်ပြီး latest updates တွေ ရှိမရှိ စစ်ဆေးလိုက်ပါ။ တကယ်လို့များ updates တစ်ချို့ ရှိနေမယ် ဆိုရင် သူ့တို့ကို အရင် install လုပ်ပြီး နောက်ထပ်တစ်ကြိမ် Check buttom ကိုထပ်နှိပ်ပါ။ ခုတစ်ကြိမ်မှာတော့ ညာဘက်အပေါ်ထောင့်နားမှာ ခုအောက်မှာ ဖော်ပြထားသလိုမျိုး နောက်ထပ် Ubuntu Release ရရှိနေပြီ ဖြစ်ကြောင်း တွေ့ရပါလိမ့်မယ်။ အောက်က ပုံကို ဆက်ကြည့်ကြည့်ပါ။

Upgrade ဆိုတာကို နှိပ်လိုက်တဲ့ အချိန်မှာ ခုလို release notes ကိုတွေ့ရပါလိမ့်မယ်။ 
 

အဲနောက်မှာမှ Upgrade လုပ်ငန်းစဉ် စတင်ဖို့ အပေါ်ပုံမှာ မြင်နေရတဲ့ အတိုင်း Upgrade ဆိုတာကို နှိပ်ရမှာ ဖြစ်ပါတယ်။

ဒီလောက်ပါပဲ။

KznT.

Customize Your Ubuntu Applications

apt:shotwell

Ubuntu မှာပါလာတဲ့ default applications တွေက လူအများစုအတွက်တော့ သုံးလို့ အဆင်ပြေပါတယ်။ ဒါပေမယ့်လည်း ပြင်ဆင်ပြီးမှ သုံးစွဲချင်တယ် ဆိုသူများအတွက်တော့ သုံးလို့လည်း အဆင်ပြေ default applications တွေနဲ့လည်း မခြား စွမ်းဆောင်ရည်ရှိတဲ့ applications မျိုးတွေကို ပြောင်းလဲ အသုံးပြုဖို့ အကြံပေးချင်ပါတယ်။ အောက်မှာ ကျွန်တော် ဖော်ပြသွား မယ့် အကြောင်းအရာတွေက အကောင်းတကာ့ အကောင်းဆုံးပါလို့ မဆိုလိုပေမယ့် လတ်တလောမှာ လူကြိုက် အများဆုံး လူသုံးအများဆုံးတွေကို အခြေခံပြီး ရွေးချယ် တင်ပြထားတဲ့ အစားထိုးဖြည့်စွက်စရာ Ubuntu applications တွေပဲ ဖြစ်ပါတယ်။

Empathy အစား Pidgin

Pidgin နဲ့ Empathy က အသုံးပြုပုံချင်း လုပ်ဆောင်ပုံချင်း တော်တော်လေးကိုဆင်တူပါတယ် - ဥပမာအနေနဲ့ ပြောရရင် သူတို့ ( ၂ ) ခုလုံးက တစ်ခြား IM services တွေနဲ့ communicate လုပ်နိုင်ဖို့အတွက် libpurple ကိုသုံးကြပါတယ်။ ဒါ့အပြင် Empathy က Pidgin လုပ်ဆောင်နိုင်တာတွေ အားလုံးနီးပါး လုပ်ဆောင်နိုင်တယ် ဆိုပေမယ့်လည်း ( တစ်ချို့နေရာ တွေမှာ Pidgin ထက် သာတာတွေလည်း ရှိပါတယ် )  users တော်တော်များများကတော့ ကိုယ့်အတွက်လည်း သုံးနေကြဖြစ်ပြီး - အသားလည်းကျ နေတဲ့ Pidgin ကိုပဲ သုံးဖို့ ဆန္ဒရှိကြပါတယ်။ Empathy ကနေ Pidgin ကို ပြောင်းသုံးတာ ဘာမှ ထူးထြွေပီး ပြဿနာလည်း မရှိပါဘူး။ အသုံးပြုရတဲ့ပုံစံရော နောက်ပြီး Empathy မှာ တုန်းက Account ဖြည့်ရတဲ့ ပုံစံကော အားလုံး လိုလို တော်တော်များများ ဆင်တူပါတယ်။

PiTiVi အစား OpenShot

ကျွန်တော်မနေ့က ဒီနေရာမှာ PiTiVi အကြောင်း မိတ်ဆက်ဖူးပါသေးတယ်။ PiTiVi ကို Ubuntu 10.04 မှာ Default application အဖြစ် ထည့်သွင်းသွားမယ်လို့ တရားဝင်လည်း ကြေငြာလိုက်ရော အသုံးဝင်ပြီး stable လည်း ဖြစ်တဲ့ video editor တစ်ခု Ubuntu မှာ ပါဝင်လာတော့မယ်ဆိုပြီး users တော်တော်များများ ပျော်ခဲ့ရပါတယ်။ ဒါပေမယ့် users တစ်ချို့အတွက်တော့ PiTiVi က သူတို့လိုချင် - လုပ်ချင်တာတွေနဲ့ နှိုင်းယှဉ်လိုက်ရင် အရမ်းကို basic ကျနေတာရယ် - windows မှာ သုံးနေကျ video editing software တွေနဲ့ နိှုင်းယှဉ်လိုက်ရင် features တွေ နည်းနေတာတွေကြောင့် နောက်တစ်ခုကို ပြောင်းသုံးဖို့ ဆန္ဒရှိလာကြပါတယ်။ ဒါဆိုရင်တော့ တစ်ခြား မသုံးပါနဲ့။ OpenShot ကိုသုံးကြည့်ပါ။

ဖန်တီးနိုင်စွမ်း နှင့် လုပ်ဆောင်နိုင်မှု ရိုးရှင်းပါသည်။

OpenShot မှာ users တွေအသုံးချချင်တဲ့ features တော်တော်များများ ပါဝင်ပါတယ်။ video effects တွေ editing tools တွေ – အားလုံးလိုလိုက သုံးရလွယ်ကူအောင် ပြင်ဆင်ပေးထားပါတယ်။

ပါဝင်သော Features များ -

• 
  
  
  
  
  
  Over 30 video effects, 28 transitions and 10 audio effects
• 
  
  
  
  
  
  Green-screen/Chrome Key support
• 
  
  
  
  
  
  Title editor
• 
  
  
  
  
  
  Dynamic Tiling
• 
  
  
  
  
  
  Simple export presets

OpenShot ကို install လုပ်ဆောင်ချင်မယ် ဆိုရင်တော့ Ubuntu ထဲ ဝင်ပြီး အောက်ဖော်ပြပါ button ကို Click တစ်ချက် ပေးလိုက်ယုံပါပဲ -

F-Spot အစား Shotwell

Shotwell ဆိုတာ F-Spot နေရာမှာ အစားထိုးနိုင်လောက်အောင် အရည်အသွေးပြည့်မီှတဲ့ photo editor တစ်ခုပါပဲ။ အရည် အသွေးပြည့်မှီယုံတင်လား မဟုတ်သေးပါဘူး။ သူက photo editor/fixer နဲ့ ပတ်သတ်ရင် ပိုပြီး အသုံးချရလွယ်ကူသလို photo တွေကို စုဖွဲ့တဲ့ နေရာမှာလည်း အောက်ဖော်ပြပါ အတိုင်း အသုံးတည့်လှပါတယ်။

သူ့မှာပါဝင်တဲ့ ထူးခြားတဲ့ Features ကတော့ ပုံတွေကို date အလိုက် စုစည်းယူလို့ ရသလို - ဒါမှမဟုတ် tags အလိုက် - စုစည်းယူ လို့လည်း ရပါတယ်။ ဒါ့အပြင် ကိုယ့်ဆီမှာ ရှိနေတဲ့ ဓာတ်ပုံတွေကို Flickr, Facebook, Picasa တို့ဆီလည်း တိုက်ရိုက် upload တင်လို့ ရပါတယ်။ editing tools တြွေဖစ်တဲ့  rotate, crop, reduce red-eye, saturation, tint နဲ့ temperature တွေလည်း ပါဝင်ပါတယ်။ ShotWell ကို install လုပ်ဆောင်ချင်မယ် ဆိုရင်တော့ အပေါ်မှာ ပြောထားခဲ့တဲ့ အတိုင်း Ubuntu ထဲ ဝင်ပြီး အောက်ဖော်ပြပါ button ကို Click တစ်ချက် ပေးလိုက်ယုံပါပဲ -

Bottom panel အစား dock

Ubuntu မှာပါတဲ့ bottom panel ကို ကြည့်ရတာ စိတ်ထဲမှာ သိပ်မလန်းဘူးလို့ ယူဆရင်တော့ သူ့အစား အလန်းဇယား ဖန်တီးပေးမယ့် Dock ဆိုတာ ရှိပါတယ်။ အောက်ကပုံကို ကြည့်ကြည့်ပါ။

Docky is မှာ ဆိုရင် Gmail, weather, တွေအပါအဝင် တစ်ခြား applications တွေထဲက ကိုယ် အသုံးချချင်တာကိုလည်း သူ့ထဲကို ဆွဲခေါ်ပြီး ထည့်ထားလို့ ရပါတယ်။ Ubuntu တင်တိုင်း ကျွန်တော်ကတော့ သူ့ကို မဖြစ်မနေ ထည့်သုံးပါတယ်။ တော်တော်လေးလည်း ဆွဲဆောင်မှု ရှိပြီး တကယ်လည်း အသုံးဝင်လို့ပါ။ နောက်ပြီး Dock ကို လိုချင်လို့ ထပ်ပေါင်းချင်သေးတယ် ဆိုရင်လည်း screen ရဲ့ လေးဘက်လေးတန်မှာ နောက်ထပ် အပို Dock တွေ ထပ်ထည့်ထားလို့ ရပါသေးတယ်။ အထဲထဲမှာ Panel ထဲမှာရှိနေတဲ့ အသုံးမလိုတဲ့ shortcuts တွေကို ဖျက်ဖို့ကလည်း မခက်ပါဘူး။ panel ရဲ့ အပြင်ဘက်ကို drag and drop ဆွဲထုတ်ပြီး Remove လုပ်လို့ ရပါတယ်။ တကယ်လို့ bottom panel ကို ဖျက်ချင်တာမျိုးလား - ဒါကလည်း မခက်ပါဘူး bottom panel ကို right click ပေးပြီး " delete " လုပ်လို့ ရပါတယ်။

OpenOffice အစား ZohoWebOffice

တကယ်လို့များ Ubuntu မှာ ထည့်သွင်းပေးထားပြီးသား feature လည်း စုံတဲ့ Office suite ကို အသုံးမပြုချင်ဘူး ဆိုရင် သူ့အစား တစ်ခြား GoogleDocs ဒါမှမဟုတ် ZohoWebOffice ကို အသုံးပြုလို့ ရပါတယ်။ သူတို့ ( ၂ )ခုလုံးကို Ubuntu မှာ ရှိတဲ့ ကိုယ်သုံးတဲ့ Browser မှာ standalone windows အဖြစ်နဲ့ ချိတ်ဆက်နိုင်အောင် shortcuts တွေအနေနဲ့ installed လုပ်ဆောင်ထားလို့ရပါတယ်။

Firefox အစား Google Chrome*

Firefox ကတော့ Browsers တွေထဲမှာ king လို့ဆိုရင်လည်း မမှားနိုင်ပါဘူး။ ဒါပေမယ့်လည်း ခုနောက်ပိုင်းမှာတော့ Firefox ကို ခြေတိုင်းလာတဲ့ နောက် Browser တစ်ခု ရှိနေပါပြီ။ သူကတော့ Google Chrome ပါ။ တစ်ခြား Browsers တွေ အများကြီး ရှိနေပေမယ့် ခုချိန်မှာ users တော်တော်များများက Firefox နေရာမှာ အစားထိုးဖို့ ရွေးမယ်ဆိုရင် Chrome ကိုပဲ ရွေးချယ်ကြတာ များလာပါတယ်။ Chrome စစထွက်စဉ်က Firefox နဲ့ ယှဉ်ရင် မြန်တာ သိသာတာလေး တစ်ခုကလွဲရင် Extensions ပိုင်းဆိုင်ရာ တွေကတော့ Firefox ရဲ့ ပြည့်စုံမှုကို မမှီခဲ့ပါဘူး။ ဒါပေမယ့် ခုနောက်ပိုင်းမှာတော့ Firefox ကိုအံတုနိုင်တဲ့ Extensions တွေ Chrome မှာ မနည်းမနော ရှိနေပါပြီ။ ဥပမာပြောရရင် ( adblockers, flashblockers, Gmail alerts, Last.fm radio, စသဖြင့် ဖြစ်ပါတယ်။ )

Google Chrome မှာ နောက်ထပ် ကောင်းတာ တစ်ချက်က သူ့မှာ  Flash ကို pre-installed လုပ်ဆောင်ထားပြီးသား ပါရှိတာပါ။ အဲ့ကြောင့်မို့လို့ Browser တစ်ခါ လုပ်ပြီးတိုင်း flash installer လိုက်ရှာရတဲ့ ဒုက္ခကနေ ကင်းဝေးပါတယ်။ installed လုပ်ဆောင် ပြီးတာနဲ့ Chrome လေးကိုဖွင့် Youtube ကြည့်ကြည့် MySpace သွားသွား အားလုံး အသင့်ပါပဲ။

*နောက်တစ်ခု အနေနဲ့ repositories ထဲမှာ Chromium ဆိုတာလည်း ရှိပါတယ်။ ဒါပေမယ့် သူ့မှာတော့ Flash ကို pre-installed လုပ်ဆောင်ထားတာ မပါဝင်ပါဘူး။

Totem အစား VLC

Totem movie player ကတော့ users တော်တော်များများ မကြိုက်ကြပါဘူး။ ကျွန်တော်လည်း မကြိုက်ပါဘူး။ သူ့အစား ကျွန်တော် VLC ပဲသုံးသလို အတော်များများကလည်း VLC သုံးဖို့ကိုပဲ အားသန်ကြတာတွေ့ရပါတယ်။ သူ့မှာ plug-ins  တွေလည်း မနည်းမနောပါသလို တစ်ခြား functions တွေလည်း မနည်းမနောပါဝင်ပါသေးတယ် - 

Rhythmbox အစား Banshee

Users တော်တော်များများက Banshee ကို အကြောင်းအမျိုးမျိိုးနဲ့ ရွေးချယ်ကြပါတယ်။ Banshee မှာ ဆိုရင် Plug-ins မျိုးစုံ ၊ Online content တွေနဲ့ ချိတ်ဆက်နိုင်ဖို့ ဖန်တီးပေးထားတဲ့ Tools အမျိုးမျိုး ၊ ကိုယ့်ရဲ့ Library ကို ပုံစံအမျိုးမျိုးနဲ့ ရှုမြင်နိုင်မှု  အပြင် mobile phones တော်တော်များများ အတွက်လည်း သူက support ပေးပါတယ်။ ဒါ့အပြင် သူ့မှာ UbuntuOne Music Store လည်းပါဝင်ပါတယ်။

Default picture viewer အစား ViewNior

Ubuntu မှာ Default ပါဝင်ပြီးသား image viewer ကလည်း ကောင်းပါတယ်။ ဒါပေမယ့် သူ့လိုမျိုးပဲ အသုံးပြုရလွယ်ကူပြီး ပေါ့ပါး မြန်ဆန်တဲ့ နောက် viewer တစ်ခု ရှိပါသေးတယ်။ သူကတော့ ViewNior ပါ။

ViewNior က မြန်ဆန်တယ် ၊ တိကျတယ် ၊ image formats တော်တော်များများကိုလည်း supports ပေးတယ်။ နောက်ပြီး simple editing tools တြွေဖစ်တဲ့ crop လုပ်တာ rotate လုပ်တာလောက်လေးအတွက်နဲ့ တစ်ခြား applications တွေဆီ ကိုယ့်ပုံကို ပြောင်းပို့ပြီး လုပ်ဆောင်နေရတာမျိုးတွေလည်း မလိုအပ်ပါဘူး။ 

တစ်ခုရှိတာက သူ့ကို Ubuntu repositories ထဲမှာ မပါဝင်ပါဘူး။ သူ့ကို သုံးချင်တယ် ဆိုရင် Terminal ထဲကနေ install လုပ်ဆောင်ရမှာ ဖြစ်ပါတယ်။ Terminal သုံးရမှာ စိတ်ညစ်တဲ့ သူတွေ အတွက်တော့ သိပ်အဆင်မပြေဘူးပေါ့ - ဒါပေမယ့်လည်း လက်မလျော့ပါနဲ့ ဒီအောက်မှာ ဖော်ပြထားတာတွေကို Terminal မှာ copy / Paste လုပ်ပြီး သုံးကြည့်ပါ - အဆင်ပြေပါလိမ့်မယ်။ 

• sudo add-apt-repository ppa:xsisqox/ppa
• sudo apt-get update && sudo aptitude install viewnior

KznT.

Birthday Presents !!

Happy Birthday Nge !!

ဒါကတော့ ငယ့် အတွက် ကို့ရဲ့ မွေးနေ့လက်ဆောင်ပါ -

တစ်ခြား ပစ္စည်းတွေ အများကြီးထဲက ဒီ လော့ကက်ကို ရွေးပေးဖြစ်တာ - ကို့ စိတ်ထဲမှာ စိတ်ကူး တစ်ခု ရှိလို့ပါ။ - အဲတာ ဘာလဲဆိုတော့ ဒီ လော့ကတ်လေးလိုပဲ ကို ငယ့် ရင်ဘတ်နဲ့ အနီးဆုံးနေရာမှာ ကို အမြဲ နေခွင့်ရချင်တယ်။ နောက်ပြီး ဒီ လော့ကတ်လေးကို ငယ်သေသေချာချာ ကြည့် - သူ့မှာ အနားခြောက်ဖက်ပါတယ်။ ဒါက ကိုတို့ ( ၆ ) နှစ်တာ ဖြတ်သန်းခဲ့ပြီး သွားတဲ့ ချစ်သူ သက်တမ်းရဲ့ မှတ်တိုင် တစ်ခု အဖြစ်လည်း ကိုယ်စားပြုတယ်။ နောက်တစ်ခု အနေနဲ့ တစ်ခြားပစ္စည်းတွေ အများကြီး ထဲက ဒါလေးကို ရွေးပေးဖြစ်တာ - မွေးနေ့မှာ အမှတ်တရ ဖြစ်စေချင်လို့ပါ။ ငယ့်ကို ကို အရမ်းချစ်တယ်။ ခြောက်နှစ်တာ ဖြတ်သန်းခဲ့ပြီးတဲ့ ကာလ အတွင်းမှာ ငယ့်အပေါ် ပြောမှားဆိုမှား ရှိခဲ့တာ - ကို့ဘက်က အနိုင်ယူသလို ဖြစ်ခဲ့တာ - ငယ် စိတ်ကတောက်ကဆ ဖြစ်အောင် ကို လုပ်ခဲ့မိတာတွေ ရှိခဲ့ရင် ငယ့်မွေးနေ့မှာ ကို့ကို ခွင့်လွှတ်ပေးဖို့ တောင်းပန်ချင်ပါတယ်။ ကို ငယ့်ကို ချုပ်ချယ်ခဲ့တာ - ဟိုမသွားနဲ့ ဒီမသွားနဲ့လို့ မပြောပေမယ့် အဲလို အဓိပ္ပါယ်မျိုး သက်ရောက်တဲ့ စကားသံမျိုးတွေ ကို ပြောဖြစ်ခဲ့တာ ကိုယ့်ကိုယ်ကိုယ်လည်း သိပါတယ်။ အဲ့အတွက်လည်း ကို တောင်းပန်ပါတယ်ငယ်။ ကို ငယ့်ကို အရမ်းချစ်လို့ပါ။ ဆုံးရံှုးရမှာ ကြောက်လို့ပါ။ ကို့ကို နားလည်ပေးပါနော်။

ငယ့် မွေးနေ့မှာ ငယ် အကြားချင်ဆုံး ဖြစ်မယ့် စကားတစ်ခွန်းလည်း ထပ်ပြောချင်ပါသေးတယ်။

ငယ့်ကို အရမ်းချစ်တယ် - နောင်တစ်ချိန်မှာ ကို့ရဲ့ ကိုယ်အမူအရာ နှုတ်အမူအရာကြောင့် ငယ် စိတ်မဆင်းရဲ စေရပါဘူးလို့ ငယ့်မွေးနေ့ မှာ ကို ကတိပေးပါတယ်။

နောက်ဆုံး အနေနဲ့ ကျန်တာတော့ ငယ့်မွေးနေ့ အတွက် ကို့ ဆုတောင်းပါ -

၂၀၁၀ ခုနှစ် မေလ ( ၁ ) ရက်နေ့မှာ ကျရောက်တဲ့ ကို့ရဲ့ ချစ်ဇနီး ငယ် - အသက် ( ၂၅ ) နှစ်ပြည့် မွေးနေ့ကနေ စပြီး နောင်နှစ်ပေါင်းများစွာတိုင် - သာယာချမ်းမြေ့တဲ့ မိသားစု ဘဝကို ချစ်ခင်ပွန်း ကိုနဲ့ တူတူ လက်တွဲ ဖြတ်သန်းနိုင်ပြီး - အိမ်ထောင့်တာဝန်ကျေပွန်သော - နှစ်ဖက်မိဘများ အပေါ်သိတတ်နားလည်သော - အမျိုး၊ ဘာသာ၊ သာသနာကို ထိန်းသိမ်း စောင့်ရှောက်နိုင်သော - အမျိုးကောင်းသမီး တစ်ယောက်အဖြစ် သက်ဆုံးထိတိုင် ကိုနဲ့အတူ ဖြတ်သန်း ရပ်တည်နိုင်ပါစေလို့။

ချစ်ခြင်းအားဖြင့်
ကို
မေ ( ၁ ) ၂၀၁၀။