Send Your Files Quickly and Securely

ဒီအကြောင်းကိုပဲ ရေးမယ် ရေးမယ်နဲ့ တောင်လှည့် မြောက်လှည့် လုပ်နေတာ - သိထားတာတော့ ကြာပြီ - တစ်ချို့လည်း သိပြီးသား ဖြစ်ကောင်း ဖြစ်နိုင်ပါတယ် - ဒါပေမယ့် ကိုယ့်မိသားစုဝင်တွေ အကြောင်း ကိုယ်သိတယ် - မြန်မာလို ဂဃနဏ တစ်လုံးမချန် ရေးပြတာတောင် ကျော်ဖတ်တဲ့သူ တော်တော်များများတယ် - တစ်ခြား ဘာသာစကားကို ဓာတ်ထည့်ပြီး ဖတ်ဖို့ဆို ပိုဆိုး - ပိုလို့တောင် မဖတ်ကြဘူး ( လူတိုင်းကို မဆိုလိုပါ ) - ဒါ ကျွန်တော် ကျွန်တော့် မိသားစုဝင်တွေကို စော်ကားတာ မဟုတ်ဘူး - ကျွန်တော် ဖြစ်စေချင်တာပါ - ခု ကျွန်တော် ရေးနေတယ် ဆိုတာတွေကလည်း ဘာမှ အထင်ကြီးလောက်စရာ မရှိဘူး - ကျွန်တော် ဖတ်ခဲ့ဖူးလို့ သိခဲ့တာတွေကို ပြန်မျှဝေတာလောက်ပဲ ရှိတယ် - ကျွန်တော်ကိုယ်တိုင်လည်း ဘာမှ မသိဘူး -

ကျွန်တော့် မိသားစုဝင်တွေကို စာဖတ်စေချင်တယ် - အင်တာနက် က လက်တစ်ကမ်းမှာ ရှိနေတဲ့ အချိန် ဘာလို့ ဂိမ်းဆော့ရင်း အချိန်ကုန်ခံမလဲ ?? Chat တက်ရင်း အချိန်ပုတ်ခံမလဲ ?? တစ်ချိန်မှာ မြန်မာနိုင်ငံ ပြန်ကြမှာပဲ မဟုတ်ဘူးလား ?? တစ်နေ့နဲ့ တစ်နေ့ သူများမျှဝေတာကို စောင့်ဖတ်နေတော့ သူများပေးသလောက်ပဲ သိမှာပေါ့ - အင်တာနက် ထဲမှာ ဘယ်သူမျှဝေတာကိုမှ စောင့်ဖို့မလိုပဲ အသင့်ခူးစားယုံ ပညာရပ်တွေ မနည်းမနောရှိတယ် - ကျွန်တော် မှန်တာ ပြောရရင် မိသားစုထဲမှာ ဖော်ပြပေးနိုင်တယ် ဆိုတာ ဥပမာ ကျွန်တော် တစ်နေ့ ( ၁၀ ) ပုဒ်လောက် ဖတ်ဖြစ်မှာ ( ၁ ) ပုဒ်လောက်ပဲ ဝေမျှ နိုင်တာမျိုးပါ - ကျွန်တော့်မှာသာ စက်တပ်ထားတဲ့ လက်ရှိရင် ဖတ်သမျှကို ပါးစပ်က ရွတ်ပြတိုင်း လိုက်ရိုက်နိုင်မယ့် စက်တစ်လုံးလောက် လိုချင်မိတယ် - အဲတာမှ ပိုပြီး ကျွန်တော့်မိသားစုတွေ စာများများ ဖတ်ရမှာ - ကဲ ထားတော့ - အဲတော့ ကျွန်တော် အကြံပြုချင်တာ စာများများ ဖတ်ကြပါ -

အရင်တုန်းက ကျွန်တော် ဒီနေရာမှာ Sharing လုပ်ငန်းစဉ်တွေနဲ့ ပတ်သတ်ပြီး Torrent အကြောင်း - Dropbox အကြောင်း - နောက် Opera unite အကြောင်း - ဟိုတစ်လောက နောက်ဆုံးရေးခဲ့တာတော ့Multiple File-Hosting Sites တွေအကြောင်း စသဖြင့် ရေးခဲ့ဖူးပါတယ်။ အခုဖော်ပြမှာလည်း Sharing လုပ်ငန်းစဉ် နဲ့ ပတ်သတ်ပြီး နောက်ထပ် အသုံးပြုဖို့ သင့်တော်တဲ့ Site တစ်ခု အကြောင်းပါ။

တစ်ခါတစ်လေမှာ ကျွန်တော်တို့တွေ ဖိုင်တစ်ခုခုကို ကိုယ့်အသိတစ်ယောက်ယောက်ဆီ အရေးတစ်ကြီး သို့မဟုတ် အလျင်အမြန် သို့တည်းမဟုတ် အရေးပေါ် ပို့ပေးဖို့ လိုအပ်လာတတ်ပါတယ်။ ဒီလို အခြေအနေမျိုး ကြုံတွေ့လာရရင် ပုံမှန်လုပ်ငန်းစဉ်က Email ထဲကနေ attachment နဲ့ ထည့်ချင်ထည့် ဒါမှမဟုတ် file size က အရမ်းကြီးပြန်ရင် ကျတော့လည်း Email ထဲမှာ attachment က တွဲလို့မရ - အဲလိုဆို Hosting services တစ်ခုခုဆီပြေး - အဲ့မှာ Upload တင်တာစောင့် ပြီးသွားရင် Download link ကိုယူ - ကိုယ့်အသိဆီပေး - တစ်ခါတစ်ခါ Upload တင်နေရင်းနဲ့ နက်ပြတ်တာတို့ ကျတာတို့ ဖြစ်ရင် ၁ ကနေ ပြန်စတင်ရတာမျိုးကလည်း ရှိသေးတယ်။ ဒီလို ပြဿနာမျိုးကို လူတိုင်းကြံဖူးကြမှာပါ။

နောက် IM software တြွေဖစ်တဲ့ Skype တို့ Google Talk တို့ Yahoo Messenger တို့ ဆိုတာတွေကလည်း သူတို့ သတ်မှတ်ကန့်သတ်ထားတဲ့ file size limit နဲ့ file type အတွင်းမှာပဲ ကွန်ပြူတာ တစ်ခုနဲ့ တစ်ခု file transfer လုပ်လို့ ရတာမျိုးပါ။ ဒီ IM ကနေ file ပို့တဲ့နည်းက အပေါ်မှာ ပြောထားတဲ့ Hosting services တစ်ခုခုဆီပြေးပြီး files တင်တဲ့ နည်းထက် ပိုပြီး လုပ်ရကိုင်ရ မြန်တာမှန်ပေမယ်လို့ မကောင်းတဲ့ တစ်ချက်က တစ်ယောက်သုံးတဲ့ IM ကို နောက်တစ်ယောက်က လိုက်သုံးမှ လွှဲပြောင်းလို့ ရတာမျိုးပါ - ဆိုကြပါစို့ ကျွန်တော်က MSN သုံးတယ် - ဒီလိုဆို Gtalk သုံးတဲ့သူဆီ ကျွန်တော် ဖိုင်လွှဲဖို့ဆို ကျွန်တော်က Gtalk လိုက်သုံးမှ ဖြစ်မှာပါ။ သူက ကျွန်တော့်ဆီက လိုချင်တာ ဆိုရင်လည်း Gtalk ရှိနေလျက်နဲ့ MSN သူလိုက်သုံး ရမယ် ဒါမျိုး မကောင်းကွက်လေးတွေ ရှိပါတယ်။ 

ဒီပြဿနာကို ပြေလည်စေမယ့် အကောင်းဆုံးနည်းလမ်း တစ်ခု လောလောဆယ် ကျွန်တော်တွေ့ထားပါတယ်။ အဲတာကတော့ IM ကနေ ဖိုင်ပို့သလိုပဲ လုပ်ဆောင်ရ လွယ်ကူပြီး သူများသုံးတဲ့ IM ကို လိုက် သုံးစရာမလိုတဲ့ Browser သုံး iSendr ပါ။

သူ့ရဲ့ လုပ်ဆောင်ချက်ကို အတိုချုံးပြီး မိတ်ဆက်ပေးရရင် ကျွန်တော်က ပေးပို့ချင်တဲ့ သူတစ်ယောက် ဆိုပါစို့ - ဒီလိုဆို ကိုယ်ပို့ချင်တဲ့ ဖိုင်ကို Send a File ကနေ တွဲထည့်လိုက်ပါ။ Password ပေးချင်လည်း ပေးလို့ ရပါသေးတယ်။

အဲလို တွဲထည့်လိုက်တာနဲ့ အောက်ဖော်ပြပါအတိုင်း ကျွန်တော့် ကွန်ပြူတာကနေ Direct Transfer လုပ်ပေးမယ့် Link တစ်ခု သူက ထုတ်ပေးပါလိမ့်မယ်။ 

ကျွန်တော်တို့ နောက်ဆုံး လုပ်ရမှာ အဲ့ဒီ့ link လေးကို Copy ကူးပြီး ကိုယ့် အသိမိတ်ဆွေကို ပေးလိုက်ယုံပါပဲ - ဒီနည်းက တကယ်ကို လွယ်ပါတယ် - ဘာမှ Upload တင်တာ စောင့်ဖို့လည်း မလိုပါဘူး - file size limit တွေ - file အမျိုးအစားတွေ ဘာမှ ဂရုစိုက်နေဖို့ မလိုပါဘူး - ဘယ်လောက်များ ကောင်းလိုက် သလဲဗျာ -

Download ချမယ့် သူကလည်း ကျွန်တော်တို့ ပေးလိုက်တဲ့ link ကို Copy ကူးပြီး Browser မှာ ဖွင့်လိုက်ရင် ဖြစ်ဖြစ် - Gtalk မှာဆို တိုက်ရိုက် click ပေးလိုက်ရင် ဖြစ်ဖြစ် Connecting ဖြစ်ပြီး File transfer လုပ်ငန်းစဉ်က အလိုလျောက် စတင်သွားမှာ ဖြစ်ပါတယ်။ 

တစ်ဖက်လူက Download ချပြီးသွားတာနဲ့ Sharing လုပ်ငန်းစဉ်လဲ တစ်ခါတည်း ပြီးဆုံးသွားပြီး ခုလို မြင်တွေ့ရပါလိမ့်မယ်။

အထက်ဖော်ပြပါ Sharing နည်းစနစ်က P2P ဖြစ်ပြီး အရင် ကျွန်တော်တို့ Sharing လုပ်ဆောင်နေကျ Hosting services ဆိုတဲ့ Third-Party Server တွေလည်း မပါလို့ ကိုယ့် ဖိုင်တွေနဲ့ ပတ်သတ်ပြီး လုံခြုံမှု အပြည့်ရှိတယ်လို့ ပြောလို့ ရပါတယ်။ ဒါ့အပြင် link တစ်ခုဟာ လူတစ်ယောက်ကို Share ဖို့ တစ်ခါပဲ သုံးလို့ ရတာမျိုးမို့လို့ ဒီ link ကို သုံးပြီး တစ်ခြားသူတွေက ကိုယ့် file ကို ကြားကနေ ဖြတ်ယူမယ့် အန္တရာယ်ကနေလည်း ကင်းဝေးစေပါတယ်။ ကိုယ်က ဒီဖိုင်ကိုပဲ နောက်လူတစ်ယောက်ကို ထပ် Share ချင်တယ်ဆိုရင် Send This File Again ကနေပဲ ထပ်ပြီး Share နိုင်ပါတယ်။

စမ်းသပ်ကြည့်ကြပါဦး


KznT.

How to Set BIOS to Boot from CDROM

ဆိုင်တာ မဆိုင်တာကို ခဏ နောက်ထားပြီး ကျွန်တော်တို့ လုပ်စရာရှိတာတွေတော့ လုပ်ကြည့်ပါဦးမယ် - Hardware ကို ထိတာတို့တာမို့လို့ ဒီလုပ်ငန်းစဉ်တွေက ပြဿနာတော့ မရှိပါဘူး - Save ဖြစ်ပါတယ်။ ကိုhellboy ရဲ့ ပြောကြားချက်အရ - ကျွန်တော့်အထင် BIOS ထဲကို ဝင်လို့တော့ ရလိမ့်မယ် ထင်ပါတယ်။ ကို hellboy အနေနဲ့ CDROM ကနေ boot အောင် BIOS ထဲမှာ ဘယ်လိုပြင်ရမယ် ဆိုတာများ အရင်က လေ့လာဖူးပါသလား - ကျွန်တော်ဖိုရမ်မှာ ဒီအကြောင်းရာကိုပဲ တစ်ယောက် ရေးထားတာတွေ့မိတယ် - ခုတော့ လိုက်ရှာရင်း ခေါင်းမူးပြီး မရှာနိုင်တော့ဘူး - ကိုယ့်ဘာသာပဲ ထပ်ရေးလိုက်ပါ တော့မယ်ဆိုပြီး ရေးလိုက်တာပါ။ နောက်ပြီး ဒီကောင်ကို ရေးဖြစ်တဲ့ အကြောင်းကလည်း ကို hellboy က CD ကို မ boot - မ boot ဘူးနဲ့ ဖြစ်ဖြစ်နေတော့ CDROM ကို Boot စေဖို့ BIOS မှာ ပြင်ဆင်ဖို့များ လိုအပ်နေလို့လား ဆိုပြီး ထင်မိပါတယ်။ CD ကို မ boot - မ boot ဘူးဆိုတဲ့ ပြဿနာက များသောအားဖြင့် BIOS ထဲမှာ ဝင်ပြီး Configuration လုပ်မထားရင် ဖြစ်တတ်ပါတယ်။ ဒါကြောင့် ဒီအကြောင်းကို ရေးဖြစ်လိုက်တာပါ။

CDROM မှ Boot စေရန် BIOS တွင် ပြင်ဆင်ခြင်း

ကျွန်တော်တို့ ခုနောက်ပိုင်းထွက် Computer Systems တွေမှာ CD ကနေ boot နိုင်တဲ့ feature ထည့်သွင်းထားပေးပြီးသားပါ - ဒါပေမယ့် ဒီအတိုင်းတော့ တော်ယုံ boot မတက်တာ များပါတယ်။ ကျွန်တော်တို့ဘက်က ပြင်ဆင်မှုလေးတွေ လုပ်ပေးရပါမယ်။

အရင်ဆုံး ကွန်ပြူတာ စအဖွင့်မှာ boot-screen ကိုဝင်ဖို့ setup key ကို အရင်ဆုံး ကျွန်တော်တို့ စပြီး သေသေချာချာ စစ်ဆေးရပါမယ်။ နောက်ပိုင်းထွက် ကွန်ပြူတာ တော်တော်များများကတော့ In most DELETE key ဖြစ်ပါတယ်။

အောက်မှာဖော်ပြထားတဲ့ AmiBios မှာဆိုရင် Setup ထဲကို ဝင်ဖို့ DEL key နှိပ်ရမယ် ဆိုပြီး ဖော်ပြထားပါတယ်။

အခု အောက်မှာ ဖော်ပြထားတဲ့ အတိုင်း ခပ်ဆင်ဆင် ပုံစံတူ screen ကို မြင်ရပြီ ဆိုရင် BOOT option ကို သွားလိုက်ပါ။ အဲ့ကနေမှ တစ်ဆင့် Boot Device Priority ကို ဆက်သွားပြီး first boot device ကို CDROM လို့ ထားပြီး second boot device ကို HARD DRIVE လို့ထားလိုက်ပါ - အဲ့နောက်မှာ F10 နှိပ်ပြီး settings ကို save ပါ။

ပြီးရင် ကျွန်တော်တို့ ခုနက အကြံပေးခဲ့တဲ့ Windows vista installation DVD တို့ Recovery Disc တို့ ဒါမှမဟုတ် ကို ကျောက်ဖြူ ဖော်ပြထားတဲ့ Grub rescue disk ဆိုတာတွေကို CDROM ထဲထည့်ပြီး boot ပြန်တက်ကြည့်ပါ - အဲ့အချိန်မှာ CDROM ကို boot မယ်ဆိုရင် keyboard ကနေ တစ်ခုခုနှိပ်ဆိုတဲ့ စာသား တက်ကောင်းတက်လာပါလိမ့်မယ်။ အဲတာကို Spacebar ဖြစ်ဖြစ် Enter ဖြစ်ဖြစ် နှိပ်ပြီး ကျွန်တော်တို့ အပေါ်မှာ ဖော်ပြခဲ့တဲ့ အဆင့်တွေ အတိုင်း လုပ်ဆောင်လို့ ရပါလိမ့်မယ်။ ဒါက တစ်နည်းပါ။

-----------------------------------------------------------------------------------------

ခုနောက်တစ်နည်း အနေနဲ့ BIOS setup မှာ Screen ပုံစံချင်း မတူတဲ့ နောက်တစ်မျိုးကို ဖော်ပြသွားပါဦးမယ်။

ဒါကတော့ Award Bios ပါ - သူ့မှာလည်း အောက်မှာ ဖော်ပြထားတဲ့ အတိုင်း BIOS setup ထဲဝင်ဖို့ သူဖော်ပြထားတဲ့ key ကိုနှိပ်ပြီး ဝင်ရပါမယ်။

အဲဒီကနေ ကျွန်တော်တို့ Advanced Bios Features ကို ရွေးရပါမယ်။

အဲကနေ အောက်မှာ ဖော်ပြထားတဲ့ အတိုင်း First Boot Device ကို CDROM ထားပြီး Second ဒါမှမဟုတ် third ကို HDD ပေးထားလိုက်ပါ။ နောက် F10 နှိပ်ပြီး settings ကို save ပါ။

ပြီးရင် ကျွန်တော်တို့ ခုနက အကြံပေးခဲ့တဲ့ Windows vista installation DVD တို့ Recovery Disc တို့ ဒါမှမဟုတ် ကို ကျောက်ဖြူ ဖော်ပြထားတဲ့ Grub rescue disk ဆိုတာတွေကို CDROM ထဲထည့်ပြီး boot ပြန်တက်ကြည့်ပါ - အဲ့အချိန်မှာ CDROM ကို boot မယ်ဆိုရင် keyboard ကနေ တစ်ခုခုနှိပ်ဆိုတဲ့ စာသား တက်ကောင်းတက်လာပါလိမ့်မယ်။ အဲတာကို Spacebar ဖြစ်ဖြစ် Enter ဖြစ်ဖြစ် နှိပ်ပြီး ကျွန်တော်တို့ အပေါ်မှာ ဖော်ပြခဲ့တဲ့ အဆင့်တွေ အတိုင်း လုပ်ဆောင်လို့ ရပါလိမ့်မယ်။ ဒါက တစ်နည်းပါ။

------------------------------------------------------------------------------------------------

ဒီအောက်ကနည်းကတော့ BIOS ကို တစ်ချို့ Dell Systems တွေမှာ ဝင်တဲ့ နည်းဖြစ်ပါတယ်။ အပေါ်က နည်းတွေကတော့ BIOS setup ထဲကို ဝင်ဖို့ DEL key နှိပ်ရပါတယ်။ ဒီကောင်ကတော့ F2 နှိပ်ရပါလိမ့်မယ်။ တစ်ခုနဲ့ တစ်ခုက အဲလိုပဲ နဲနဲလေးစီ ကွဲပါတယ်။ ဘာကိုနှိပ်ရမယ် ဆိုတာတော့ သူက အောက်ဖော်ပြပါအတိုင်း ဖော်ပြပြီးသားပါ။

အဲနောက်မှာ Boot Sequence ကိုရွေးပြီး ဖော်ပြပါအတိုင်း ပထမဦးစားပေးကို 1 ကို CD-Rom အဖြစ်ထားပြီး ရွေးပေးပါ။ Enable / Disable ပေးဖို့ဆိုတာ သူဖော်ပြထားတဲ့ အတိုင်း SPACE ကို နှိပ်ပြီး လုပ်ဆောင်လို့ ရပါတယ်။ - + ကတော့ ဒီနေရာမှာ အပေါ်အောက်ရွှေ့တာပါ။ အားလုံး ပြင်ဆင်ပြီးသွားရင် ESC ကိုနှိပ်ပြီး settings ကို save ပါ။

ပြီးရင် ကျွန်တော်တို့ ခုနက အကြံပေးခဲ့တဲ့ Windows vista installation DVD တို့ Recovery Disc တို့ ဒါမှမဟုတ် ကို ကျောက်ဖြူ ဖော်ပြထားတဲ့ Grub rescue disk ဆိုတာတွေကို CDROM ထဲထည့်ပြီး boot ပြန်တက်ကြည့်ပါ - အဲ့အချိန်မှာ CDROM ကို boot မယ်ဆိုရင် keyboard ကနေ တစ်ခုခုနှိပ်ဆိုတဲ့ စာသား တက်ကောင်းတက်လာပါလိမ့်မယ်။ အဲတာကို Spacebar ဖြစ်ဖြစ် Enter ဖြစ်ဖြစ် နှိပ်ပြီး ကျွန်တော်တို့ အပေါ်မှာ ဖော်ပြခဲ့တဲ့ အဆင့်တွေ အတိုင်း လုပ်ဆောင်လို့ ရပါလိမ့်မယ်။ ဒါက တစ်နည်းပါ။

---------------------------------------------------------------------------------------

နောက်တစ်နည်းကတော့ တစ်ချို့ Dell Systems တွေမှာပဲ BIOS ထဲကို ဝင်ဖို့ F2 ကိုနှိပ်ရင် ခုလိုမျိုး မြင်ရတတ်ပါသေးတယ်။

တစ်ချို့ Computer တွေမှာကျပြန်တော့ Cd/Hdd/Floppy/Usb Device ကနေ ခဏတာ boot ခိုင်းဖို့ဆိုရင် F8 button ကိုနှိပ်မှ Boot Menu ကိုရောက်ပြီး အဲ့ကနေ CDRom ကိုရွေးပေးရတတ်ပါတယ်။

ကျွန်တော် အခု အကြံပြုချင်တာ ကို hellboy အနေနဲ့ အထက်ဖော်ပြပါ steps တွေကို လေ့လာပြီး BIOS setup ထဲကို ဝင်လို့ ရမရ စမ်းကြည့်စေချင်ပါတယ်။ တကယ်လို့ ရတယ်ဆိုရင် CDROM ကို ဖော်ပြပါအတိုင်း first boot device အဖြစ်ထားပြီး settings ကို save - နောက် ကျွန်တော်တို့ ပြောခဲ့တဲ့ Windows vista installation DVD တို့ Recovery Disc တို့ ဒါမှမဟုတ် ကို ကျောက်ဖြူ ဖော်ပြထားတဲ့ Grub rescue disk ဆိုတာတွေကို CDROM ထဲထည့်ပြီး boot ပြန်တက်ကြည့်ပါ - အဲ့အချိန်မှာ CDROM ကို boot မယ်ဆိုရင် keyboard ကနေ တစ်ခုခုနှိပ်ဆိုတဲ့ စာသား တက်ကောင်းတက်လာပါလိမ့်မယ်။ အဲတာကို Spacebar ဖြစ်ဖြစ် Enter ဖြစ်ဖြစ် နှိပ်ပြီး ကျွန်တော်တို့ အပေါ်မှာ ဖော်ပြခဲ့တဲ့ အဆင့်တွေ အတိုင်း လုပ်ဆောင်လို့ ရပါလိမ့်မယ်။

စမ်းကြည့်ကြည့်ပါဦး

KznT.

Moderator of MyanmarFamily

ကိုကေဇက်.. ရေ...

မြန်မာမိသားစုကတော့ သိတဲ့အတိုင်း.. ကျွန်တော်တို့ နည်းပညာပိုင်းမှာ ပို့စ် အားအရမ်း အနည်းသွားပါပြီ...။ ဒါကြောင့်.. ကျွန်တော်တို့ ပြန်လည်ပြီး.. အကြံဉာဏ်ကောင်းတွေနဲ့ တည်ဆောက်ကြရမယ်.. ။ အဲ့ဒီအတွက် ကိုကေဇက် ရဲ့ အကူအညီတွေ အများကြီးလိုပါတယ်...။ ကျွန်တော် ကိုကေဇက်ကို ကြီးကြပ်သူ အဖြစ်အပ်နှင်းချင်ပါတယ်..။ ကိုကေဇက်အနေဖြင့် မြန်မာမိသားစုဖိုရမ် တိုးတက်ဖို့အတွက် ဒီထက်ပိုမို ရွက်ဆောင် နိုင်လိမ့်မယ်လို့ ကျွန်တော်ယုံကြည်တယ်...။

ရဲအောင်

မင်္ဂလာရှိသော နေ့တစ်နေ့ - အတိုင်းအဆ မရှိပျော်ရွှင်မိသော နေ့တစ်နေ့ - ရယူလိုမှု ၊ မျှော်လင့်ချက် ဆိုသည်များ တစ်စွန်းတစ်စမျှ မပါဝင်ခဲ့သော ဝေမျှမှု တစ်ခုအတွက် ထိုက်တန်သော ချီးမြှောက်မှု တစ်ခု ရရှိခဲ့လို့ ဘဝတစ်သက်တာ အမှတ်တရ အဖြစ် ကျေနပ်ပျော်ရွှင်မိသည်။ မြန်မာမိသားစုဝင်အားလုံး - မြန်မာနိုင်ငံသား အားလုံး - နိုင်ငံခြားရောက် မြန်မာနိုင်ငံသားများ အားလုံး - မိမိမွေးဖွား ကြီးပြင်းရာ အမိမြန်မာနိုင်ငံအတွက် တစ်ဖက်တစ်လှမ်း တစ်ထောင့်တစ်နေရာ မှ ကိုယ်စီကိုယ်ဌ အကျိုးပြုနိုင်သော - အကျိုးပြုနိုင်ခွင့် ရကြသော သူများ အဖြစ် ရပ်တည်နိုင်ကြပါစေ။

Mg Zin.

Torrent FAQs

Originally Posted by နိုးတူး  connection setup guide ကို manual ပြင်လို့ရတယ် ဆိုတာ တခုပြီးတခု ရွေးပြီး အစိမ်းရောင် အမှန်ပေါ်တဲ့ အထိ လုပ်ရမှာလားအကို...

ပုံမှန်ပြောရမယ် ဆိုရင်တော့ connection setup guide ကို ပြင်ဆင်တဲ့ အချိန်မှာ အားလုံး စိမ်းသွားတဲ့ အထိ ရွေးချယ် ပြင်ဆင်နိုင်တာ အကောင်းဆုံးပါ - ဒါပေမယ့်လည်း မစိမ်းမချင်းလုပ်လို့ ဆိုလိုတာတော့ မဟုတ်ပါဘူး - ဘာကြောင့်လည်းဆို တစ်ချို့ ISPs ( Internet Service Providers ) တွေက အမြဲတမ်းလိုလို P2P activities တွေကို စောင့်ကြည့်ပြီး bandwidth တွေ လျော့ချပစ်တတ်ကြပါတယ်။ အဲလို လုပ်ခံရရင် Torrent Download Speed က တော်တော်လေးလည်း နှေးသွားသလို အပေါ်မှာ ပြောခဲ့တဲ့ connection setup guide က Download နဲ့ Upload Speed Test တွေကလည်း ဘယ်တော့မှ စိမ်းတဲ့ထိ ရောက်လာနိုင်မှာ မဟုတ်ပါဘူး - အဲတာကြောင့် connection setup guide ကို ပြင်ဆင်တဲ့ အချိန်မှာ စိမ်းမစိမ်းဆိုတာ ကိုယ် ပြင်ဆင်ယုံ တစ်ခုတည်းနဲ့လည်း စိမ်းလာနိုင်မယ်လို့ ကျိန်းသေပြောလို့ မရပါဘူး - ကိုယ်က ဘယ် ISPs ကို သုံးလည်း ဆိုတာပေါ်လည်း မူတည်ပါသေးတယ်။

အကိုပြောတဲ့ torrent ဖိုင်ရွေးဖို့ က ကျွန်တော် private bay မှာ ရှာကြည့်တာ ကျွန်တော် ကြည့်ချင်တဲ့ ကားက seed 10 ပဲရိှတယ်အကို..အဲတာအများဆုံးပဲ ... အဲလိုမျိုးဟာကို ဒေါင်းရင် ဘယ်လောက် ကြာလောက် လဲအကို...

အချက် ( ၃ ) ချက်ပေါ် မူတည်ပါတယ် - တစ်ချက်က seed 10 ရှိတယ်လို့ ပြပေမယ့် တကယ် ကိုယ် ဒေါင်းလုပ်ချလိုက်တဲ့ အချိန်မှာ Torrent မှာ P2P ဘယ်လောက်ထိ Seed မိသလဲ ဆိုတာပေါ် မူတည်ပါတယ်။ seed 10 လို့ မြင်ရပေမယ့် ဒါက ပုံသေ မဟုတ်ပါဘူး - တစ်ခါတစ်လေ ကိုယ် Download ချလိုက်တဲ့ အချိန်မှာ seed 10 လို့ ပြထားပေမယ့် ကိုယ်ချိတ်မိတာ 4 - 5 လောက် - တစ်ခါတစ်လေ တစ်ခုမှ မချိတ်မိတာလဲ ရှိတတ်ပါတယ်။ ဒုတိယတစ်ချက်ကတော့ ကိုယ့် Download Speed က ဘယ်လောက်ကောင်းလဲ ?? ဆိုလိုတာ filehippo ကနေပဲ ဖိုင်အသေးစားလေး တစ်ခုလောက် IDM နဲ့ ချကြည့်လိုက်ရင် ကိုယ့် Download Speed ကို ခန့်မှန်းလို့ ရပါတယ်။ သေချာတာ တစ်ခုကတော့ Download Speed က ၁ စက္ကန့်ကို ဆယ်ဂဏန်းလောက်ပဲ ( 10KB/s - 20KB/s ) တက်တဲ့ Speed မျိုးနဲ့တော့ Torrent က သုံးဖို့ မသင့်ပါဘူး - သုံးချင်ရင်သုံးပါ Download ချရတာ အရမ်းကြာပါလိမ့်မယ်။ တတိယတစ်ချက်က ကိုယ့်ကြည့်ချင်တဲ့ ကားက ပမာဏ ဘယ်လောက်လဲ ?? ဥပမာ ဆိုကြပါစို့ 100MB လောက် - ဒီလောက်ဆိုရင်တော့ seed 10 လို့တွေ့တာ မှန်ပေမယ့် - ကိုယ်ဒေါင်းလုပ်ချကြည့်တော့လည်း Seed 9 ခုလောက်နဲ့ ချိတ်မိတယ် - ကိုယ့် Download Speed ကလည်း 1 စက္ကန့်ကို 2 MB - 3MB - ဒီ့ထက်ပို စသဖြင့် ကျတာမျိုး ဆိုရင်တော့ ခဏပါပဲ - မကြာပါဘူး - ( ဒါဟာ မက် ၁၀၀ ပတ်ဝန်းကျင်ကို ကျွန်တော်ပြောတာပါ - အဲ့ထက် မက်များပြီး ဥပမာ ရ၀၀ - ၈၀၀ - ၁ ဂစ် - ၂ ဂစ် ဖြစ်နေရင်တော့ Seed 10 ဆိုတာ တော်တော်နည်းပါတယ် - မရနိုင်လောက်ပါဘူး - တစ်ခြား Torrent Search Engine တွေ သုံးပြီး တစ်ခြား ဆိုဒ်တစ်ခုမှာ ရှိမလား ရှာကြည့်ပါ ) ဒါတင် မက တစ်ချို့ အင်တာနက်တွေက ငြိမ်တယ် - တစ်ချို့ အင်တာနက်တွေက မငြိမ်ဘူး - ဥပမာ ပြောရရင် မြန်မာမှာဆို စကားပြောနေရင်း နက်ကျသွားတာတို့ မီးပျက်သွားတာတို့ စသဖြင့် ခဏခဏ ဖြစ်တတ်ပါတယ်။ ဒီလိုပြဿနာမျိုးတွေနဲ့ ရှုပ်ရှက်ခက်နေမယ် ဆိုရင်တော့ ဘယ်လောက်ဆို ဘယ်လောက်ကြာမယ်ဆိုတာ ကျွန်တော်ပုံသေ ပြောလို့ မရပါဘူး။

utorrent က resume ရလားအကို...

uTorrent မှ မဟုတ်ပါဘူး ဘယ် Torrent မဆို Resume ရပါတယ်။ အလွယ်ပြောရရင် အဓိကက ချလက်စ တို့လို့တန်းလန်း ဖြစ်နေတဲ့ ဖိုင်ကိုသာ ဒေါင်းလုပ်ချနေတဲ့ Directory က မရွှေ့ပါနဲ့ - တကယ်လို့ ဒေါင်းလုပ်ချနေဆဲ မပြီးသေးတဲ့ ဖိုင်ကို Directory change လိုက်ရင် Resume ပြန်လုပ်တဲ့ အခါမှာ သူ့လမ်းကြောင်းကို uTorrent က မတွေ့တော့ပဲ - Resume ပြန်လုပ်မရ ဖြစ်တတ်ပါတယ် - " ချလက်စ တို့လို့တန်းလန်း ဖြစ်နေတဲ့ ဖိုင်ကိုသာ ဒေါင်းလုပ်ချတဲ့ နေရာက မရွှေ့ပါနဲ့" လို့ ပြောခဲ့ပေမယ့် တကယ်တမ်းက ရွှေ့ချင်လည်း ရွှေ့လို့ ရပါသေးတယ် - တကယ်လို့ အကြောင်းတစ်စုံတစ်ရာကြောင့် ဒေါင်းလုပ်ချနေဆဲ တန်းလန်း Hard Drive မှာ နေရာ မဆံ့တော့လို့ တစ်ခြားတစ်နေရာကို ရွှေ့ရတော့မယ် ဆိုရင် အဲ့ဒီ့ File ကို Resume ပြန်လုပ်နိုင်ဖို့ သူ့ Torrent File ကို သိမ်းထားဖို့လိုပါတယ်။ ဖိုင်ပုံစံက ဒီလိုမျိုးပါ .torrent နဲ့ ဆုံးပါတယ်။

သက်ဆိုင်ရာ .torrent ဖိုင်ကို သိမ်းထားပြီးရင် နောက်တစ်ဆင့် အနေနဲ့ အောက်ဖော်ပြပါအတိုင်း Torrent ရဲ့ Options > Preferences မှာလည်း ကိုယ်တိုးလို့ တန်းလန်းနဲ့ ရွှေ့လိုက်တဲ့ Torrent File တည်ရှိရာ Directory အသစ်ကို ပြောင်းပေးထားရပါမယ်။ ဥပမာ ဆိုကြပါစို့ E:\Downloads

ဖော်ပြချက် အားလုံး ပြည့်စုံအောင် လုပ်ဆောင်ပြီးပြီ ဆိုရင်တော့ တိုးလို့ တန်းလန်းနဲ့ ရွှေ့လိုက်တဲ့ Torrent File ကို .torrent ကနေ တစ်ဆင့် Double click ပြန်ပေးပြီး Resume ပြန်လုပ်လို့ ရပါပြီ - အဆုံးအစွန်ဆုံး ပြောရရင် Torrent Download ဆိုတာမျိုးက ချနေရင်း နဲ့ ခဏရပ်ပြီး Windows အသစ်တင်ပြီးမှတောင် Resume ပြန်လုပ်လို့ ရပါတယ်။

ရလို့ သူ့ကို ကွန်နက်ရှင် နှစ်မျိုးနဲ့ ဒေါင်းရင် connection setup guide ကို ထပ်ပြင်ပေးရမလားအကို... (ဆိုလိုတာက အိမ်မှာနဲ့ အလုပ်မှာနဲ့က သုံးတဲ့ ကွန်နက် မတူလို့ပါ..)

ဒီမေးခွန်းကို ကျွန်တော်သိပ်နားမရှင်းဘူး - ဒါပေမယ့် ပုံစံကြည့်ရတာ laptop မှာ Torrent တင်ပြီး ရုံးမှာလည်း ချ - နောက် အိမ်ပြန်ယူလာ - အိမ်မှာလည်း ချ ဒီလိုမျိုးကို ပြောချင်တာနဲ့ တူပါတယ် - ပုံမှန်အားဖြင့်တော့ စာအုပ်ထဲက အတိုင်း ပြောရရင် သုံးတဲ့ Connection အမျိုးအစား မတူတဲ့အခါ Upload Speed - Download Speed က မတူတော့တဲ့ အတွက် connection setup guide က ပြန်လုပ်ရမှာပါ - နဲနဲချဲ့ပြောရရင် ရုံးက အင်တာနက်က ဘယ် ISPs သုံးလဲ - အိမ်က အင်တာနက်က ဘယ် ISPs သုံးလဲ ဒါတွေပေါ်လည်း မူတည်ပါသေးတယ်။ ဒါပေမယ့် ကိုနိုးတူး သုံးနေတဲ့ ရုံးက connection အမျိုးအစားနဲ့ အိမ်က connection အမျိုးအစားက Speed ချင်း သူမသာ ကိုယ်မသာပဲ ဆိုရင်တော့ ထူးပြီး ပြင်နေဖို့ မလိုပါဘူး - နဂို connection setup guide တစ်ခါ လုပ်ပြီးရင် အဲ့အတိုင်း ဆက်သုံးချင် သုံးနိုင်ပါတယ်။

ကျွန်တော် torrent တခုကို ဒေါင်းတာ အော်တို upload လုပ်နေတယ်အကို ...အဲတာ ဘာကြောင့်လဲ ခင်ဗျာ...

Torrent အတွင်းရှိ Downloading နှင့် Seeding လုပ်ငန်းစဉ်အားလေ့လာခြင်း ဆိုတဲ့ ခေါင်းစဉ်ကို နောက်တစ်ခေါက် ပြန်ဖတ်ကြည့်ပါ။

တပြိုင်တည်း download n upload ကိုလုပ်နေတော့ ဒေါင်းတဲ့ အချိန်ပိုကြာသွားလားအကို..

အဲတာက ကိုယ်သုံးနေတဲ့ internet speed ပေါ် မူတည်ပါတယ်။ Internet speed ပုံမှန်လောက် ကောင်းတဲ့ သူတစ်ယောက်အတွက် download n upload က တစ်ချိန်တည်း ဖြစ်နေလည်း ကိုယ်က Seed များများ ရထားတယ် ဆိုရင် upload လုပ်နေရပေမယ့် download speed အပေါ် သိပ်ထိခိုက်မှု သိပ်မရှိပါဘူး။ upload လုပ်တယ် ဆိုတာ ကိုယ့်လိုပဲ ဒီဖိုင်ကို လိုချင်နေတဲ့ တစ်ခြား တစ်ယောက်ကို ကိုယ်က ဝေမျှနေတာပါ - ယူတတ်ရင် ကုသိုလ်ရပါတယ်။

waste ဆိုတာဘာလဲအကို..အဲဒီထဲမှာ ပါတဲ့ ဟာလေးပါ...

Wasted ဆိုတာ အသုံးမလိုတဲ့ Data လက်ခံရရှိမှုတွေ - လက်ခံရရှိပေမယ့် အကြောင်းအမျိုးမျိုးကြောင့် ပျက်ဆီးသွားတဲ့ data တွေကို အားလုံးကို ပေါင်းစုပြီး Wasted လို့ ခေါ်ပါတယ်။ အကျယ်ပြန်ရှင်းရရင် သမီးရည်းစားမဖြစ်ခင် နောက်ပိုးဘဝ အနေအထားကို ဥပမာပြုပြီး ပြန်ရှင်းပြပါ့မယ်။ ကောင်မလေး တစ်ယောက် ချစ်သူ မရှိသေးဘူး - သူလည်း ရည်းစားလိုချင်နေတယ် - ကျွန်တော်ကလည်း အဲ့ဒီ့ ကောင်မလေးကို သဘောကျတယ် / ချစ်တယ် - အဲတော့ စပြီး ပိုးပန်းတဲ့ အနေနဲ့ ပန်းစည်းလေးတွေ ပေးမယ် - ပို့စ်ကဒ်လေးတွေ ပို့မယ် - လက်ဆောင်ပစ္စည်းလေးတွေ ဝယ်ပေးမယ် - အဲတော့ P2P သဘောနဲ့ ကြည့်ရင် ကျွန်တော်တို့က ပန်းစည်း ၊ ပို့စ်ကဒ် ၊ လက်ဆောင်ပစ္စည်း ဆိုတဲ့ ( Data ) ပေးပို့သူ - ကောင်မလေးက ( Data ) လက်ခံရယူသူ - အဲလို ကောင်မလေးက လက်ခံယူတဲ့ အချိန်မှာ ကျွန်တော်တို့ လိုပဲ ကောင်မလေးကို ပိုးပန်းနေတဲ့ တစ်ခြားသူတွေ ဆီကလည်း ကောင်မလေးက လက်ဆောင်ပစ္စည်း ( Data ) တွေ တစ်ဖက်ကနေ ရနေဦးမှာပဲ - အဲတော့ ကောင်မလေးက ဘာလုပ်မလဲ - သူ့ဆီ ရောက်လာတဲ့ လက်ဆောင်တွေ ( Data ) တွေ အားလုံးကို သူလက်မခံတော့ဘူး - ပိုးကြေးပန်းကြေးရတာတွေထဲက သူ့အတွက် အသုံးလိုတာလေးတွေ လောက်ပဲ ယူမယ် လက်ခံတော့မယ် - အသုံးမလိုတာတွေဆို ဝဲပစ်မယ် - P2P မှာလည်း ကျွန်တော်တို့က ဒီဖိုင်လေး လိုပါတယ် ဆိုလို့ Torrent network ထဲက လူတွေက ( ကောင်မလေးကို ပိုးပန်းနေတဲ့ လူတွေ လက်ဆောင်ဝိုင်းပေးကြသလို ) ကျွန်တော့်ဆီကို Data တွေ လှမ်းပို့ပေးကြတယ် - သူတို့ ပေးတာ မှန်ပေမယ့် တစ်ချို့ Data တွေက ကျွန်တော်လိုတယ် - တစ်ချို့က ကျွန်တော်မလိုဘူး - လိုတာတွေဆို ကျွန်တော့် ကွန်ပြူတာက လက်ခံထားလိုက်တယ် - မလိုတာဆို ဝဲပစ်လိုက်တယ် - အဲလို ဝဲပစ်လိုက်တဲ့ Data တွေဆိုတာ ကိုနိုးတူး သိချင်တဲ့ Wasted ကိုကိုယ်စားပြုပါတယ်။

ပြီးတော့ lime wire နဲ့ torrent တွေကို ဒေါင်းလို့ရလားအကို.. သူ က ရုပ်ရှင်နဲ့ သီချင်းတွေ ကိုရှာတဲ့ software လို့ပြောလို့...ရှင်းပြပေးပါအုံးဗျာ...

Limewire နဲ့ torrent တွေကို ဒေါင်းလို့ရပါတယ်။ နည်းလမ်းကို ဒီနေရာ နဲ့ ဒီနေရာမှာ ကြည့်နိုင်ပါတယ်။ ရုပ်ရှင်နဲ့ သီချင်းတွေ ကိုရှာတဲ့ software လို့ ပြောရတဲ့ အကြောင်းက သူက အဲတာတွေကို အလွယ်တကူ ရှာနိုင်အောင် အဓိက ရည်ရွယ်ပြီး ထုတ်ထားတဲ့ Software ဖြစ်နေလို့ပါ - သာမာန် Torrent user တစ်ယောက် အတွက်တော့ Limewire က သုံးသုံး မသုံးသုံး ဖြစ်ပါတယ်။ နောက်ပြီး Limewire က Pro version နဲ့ Free version ဆိုတာလည်း ရှိပါသေးတယ် - ဘာတွေကွာလည်း ဆိုတာ ဒီနေရာမှာ သွားကြည့်နိုင်ပါတယ်။

KznT.

Wireless LAN Architecture and Wireless adapter configuration in Windows Vista

မပန်းနုရေ -

DNS sever က
203.81.162.22 နဲ့သုံးပေမယ့် အင်တာနက်သုံးမရဖြစ်နေတာပါ..

ဆိုရင် OpenDNS ကနေ free ပေးထားတဲ့ အောက်ဖော်ပြပါ DNS servers တွေကို ပြောင်းသုံးကြည်ပေးပါ။

208.67.222.222
208.67.220.220

အဲ့တာနဲ့မှ အဆင်မပြေဘူး ဆိုရင်တော့ ကျွန်တော် ဒီအောက်မှာ ဖော်ပြသွားမယ့် wireless network setup tutorial လေးကို ဖတ်ပြီး တစ်ချက် စမ်းကြည့်ပါ။

အရင်ဆုံး ကျွန်တော် ကြိုပြီး တောင်းပန်ထားချင်တာကတော့ Network ပြဿနာကို အင်တာနက်ပေါ်ကနေ ဖြေရှင်းပေးဖို့ဆိုတာ တော်တော်လေး မလွယ်ပါဘူး - ဘာကြောင့်လဲ ဆိုတော့ Network ဆိုတဲ့ သဘောတရားက တော်တော် ကျယ်ပြန့်လို့ပါ - ကျွန်တော်တို့တွေ ကွန်ပြူတာတစ်လုံး Software တင်လို့ မရတာ - Hardware ကြောင်တာ မျိုးတွေက ကွန်ပြူတာ တစ်လုံးချင်းနဲ့ပဲ သီးသန့်ဆိုင်တာ မို့လို့ ဖြစ်နိုင်ချေရှိတဲ့ ပြဿနာကို မျက်မြင် မဟုတ်လည်း အလွယ်တကူ ဖြေရှင်းပေးနိုင်ပါတယ် - မဖြေရှင်းနိုင်ရင်တောင် ဖြစ်နိုင်ချေ ရှိတဲ့ ပြဿနာကို အနီးစပ်ဆုံး ခန့်မှန်းပေးနိုင်ပါတယ် -

ခု မပန်းနု ဖြစ်တဲ့ ပြဿနာက Network နဲ့ ဆိုင်တဲ့ ပြဿနာ ဖြစ်နေတဲ့ အတွက် ကွန်ပြူတာ တစ်လုံးတည်းပေါ် မူတည်ပြီး ကျွန်တော်က စဉ်းစားပေးလို့ မရပါဘူး - ကျွန်တော့် စဉ်းစား ပေးစရာ တစ်ခြား အကြောင်းအရာတွေ ပိုပါလာပါတယ် - ဥပမာ ပြောရရင် မပန်းနုက Wireless Network သုံးမယ် - ဟုတ်ပြီ Wireless Network မှာမှ မပန်းနုက ဘယ်လို Network အမျိုးအစားကို သုံးသလဲ ဆိုတဲ့ Wireless LAN Architecture ကို သိဖို့လိုလာပါတယ် - ဥပမာ ဆိုရရင် - မပန်းနုက Wireless Access Point တို့ Wireless Router တို့ မသုံးပဲ  ကွန်ပြူတာချင်း တိုက်ရိုက်ဆက်သွယ်လုပ်ဆောင်တဲ့ Ad-Hoc Network ကို သုံးသလား ( သူ့ပုံက ဒီလိုပုံမျိုးပါ )

ဒါမှမဟုတ် အပေါ်မှာ ပြထားသလို ကွန်ပြူတာ အချင်းချင်း တိုက်ရိုက်ဆက်သွယ်တာမျိုး မဟုတ်ပဲ Wireless Router တို့ Wireless Access Pont ( WAP ) တို့ ခံပြီး ကွန်ပြူတာ တစ်ခုနဲ့တစ်ခု အသုံးပြု ဆက်သွယ်တဲ့ Infrastructure Mode ကို သုံးသလား ( သူ့ပုံက ဒီလိုပုံမျိုးပါ )

ဒီ Infrastructure Mode မှာမှ မပန်းနု နေတဲ့ နေရာက wired Ethernet network လည်း ရှိနေတယ် - network router လည်း ရှိနေတယ် ဆိုရင် wireless access point ထပ်တပ်ပြီး အောက်ဖော်ပြပါ အတိုင်း wireless access ရဖို့ လုပ်ဆောင်တဲ့ နည်းနဲ့ သုံးနေသလား။ ဒီအောက်က ဖော်ပြပါ ပုံကလည်း Infrastructure Mode ပါပဲ။ သူကတော့ နဲနဲလေး ပိုရှုပ်ထွေးပါတယ် -

ဒီအကြောင်းတွေက မပန်းနု နားလည်ပြီးသား လည်း ဖြစ်နိုင်ပါတယ် - တစ်ယောက်နဲ့ တစ်ယောက်က နားလည်မှု အဆင့်ချင်း မတူညီကြလို့ ကျွန်တော် ပြည့်စုံအောင် ပြန်ဖော်ပြတာပါ - အဲတော့ အထက်မှာ ဖော်ပြထားတဲ့ ပုံတွေ အရ ကျွန်တော်တို့တွေ Wireless Network တစ်ခု တည်ဆောက်တော့မယ် ဆိုရင် ဘာတွေ လိုလဲ ဆိုတာကို ဆက်ပါ့မယ်။ ဒီအကြောင်းကို ဘာလို့ ပြောရလည်း ဆိုတော့ ကျွန်တော်တို့က တော်ကြာ Configuration မှာ ပြဿနာ တက်တယ်ထင်ပြီး လိုက်ပြင်နေ - တကယ်တမ်း ဖြစ်တာက Configuration မှာ ပြဿနာ တက်တာမျိုး မဟုတ်ပဲ wireless devices လိုတာမျိုးတွေ ဖြစ်နေမှာ စိုးလို့ပါ - ဒါ့ကြောင့် အခြေကနေ ပြန်စလိုက်တာပါ - အဲတော့ ကျွန်တော်တို့ wireless network တစ်ခု တည်ဆောက်တော့မယ် ဆိုရင် အရေးအကြီးဆုံး လိုအပ်တာက Wireless router ဒါမှမဟုတ် wireless access point ဆိုတဲ့ device တွေလိုပါတယ် - သူတို့တွေက ဒီလိုပုံပါ -

တကယ်လို့ မပန်းနုက Wireless Network ကို Desktop Computer နဲ့ သုံးမယ်ဆိုရင် အောက်ဖော်ပြပါ wireless adapter ကို ကိုယ့် Desktop ရဲ့ motherboard မှာ တပ်ဆင် installed လုပ်ဆောင်ထားပြီး သား ဖြစ်နေဖို့လည်း လိုပါတယ်။ သူ့ပုံက ကျွန်တော်တို့ သုံးနေကျ PCI card တွေလိုပါပဲ - ထူးသွားတာ ဆိုလို့ antenna ပါလာတာပဲ ရှိပါတယ်။

အဲလိုမှ မဟုတ်ပဲ မပန်းနုက notebook သုံးတာ ဆိုရင်တော့ နောက်တစ်မျိုး ပြောင်းသွားပါမယ်။ တကယ်လို့ မပန်းနု notebook မှာ Centrino wireless technology ပါပြီးသား ဆိုရင် wireless network သုံးဖို့ အသင့်ပါပဲ - တစ်ခြားဘာမှ ပြင်ဆင်ဖို့ မလိုပါဘူး - အဲလိုမှ မဟုတ်ပဲ မပန်းနု သုံးတဲ့ notebook က non-wireless ready notebook ဖြစ်နေမယ် ဆိုရင်တော့ wireless network သုံးလို့ ရဖို့ wireless PCMCIA card ကို installed လုပ်ဆောင်ထားဖို့ လိုပါတယ်။ wireless PCMCIA card ပုံစံက အောက်ဖော်ပြပါ ပုံစံမျိုးပါ။

အဲလိုမှ မဟုတ်ပဲ မပန်းနုက Desktop ပဲသုံးသုံး notebook ပဲသုံးသုံး wireless adapter ကို တစ်ခြား ကွန်ပြူတာတွေနဲ့ Share လုပ်ပြီး သုံးချင်တယ် ဆိုရင်တော့ USB wireless adapter ကို သုံးလည်း ရပါတယ်။ သူက ပိုပြီးလည်း သုံးရလွယ်ပါတယ်။ Wireless access ရဖို့ USB wireless adapter ကို ကိုယ့် ကွန်ပြူတာမှာ ဖြုတ်/တပ် လုပ်ပြီး သုံးလို့ ရပါတယ်။ အရွယ်အစားကလည်း တော်တော်သေးပြီး ပုံစံက USB thumb drive ပုံစံမျိုးပါ။

ဒါက ကျွန်တော် အကျဉ်းချုံး ပြောပြတာပါ - တစ်ခြား wireless products တွေလည်းဈေးကွက်ထဲမှာ တော်တော်များများ ရှိပါတယ်။ မပန်းနုက ဘယ်လို Wireless Network အမျိုးအစားသုံးမှာလည်း ဆိုတာပေါ် မူတည်ပြီး အပေါ်မှာ ပြထားတဲ့ Devices တွေ မပန်းနု အားလုံး တပ်ဆင် installed လုပ်ဆောင်ထားပြီး သား ဖြစ်နေဖို့လိုပါတယ်။ ဒါတွေ အားလုံး စုံမှ အားလုံးလည်း အလုပ်လုပ်မှ ကျွန်တော်တို့ Configuration ပိုင်းကို ဆက်သွားလို့ ရမှာပါ - လောလောဆယ်တော့ မပန်းနု ဆီမှာ မပန်းနု သုံးမယ့် Wireless Network အမျိုးအစား အတွက် လိုအပ်တဲ့ ပစ္စည်းတွေ အားလုံး စုံပြီလို့ ကျွန်တော် မှတ်ယူလိုက်ပါ့မယ် - ဒီတော့ ကျွန်တော်တို့ စုံတာတော့ ဟုတ်ပြီ - အားလုံး installed လည်း လုပ်ဆောင်ထားပြီးပြီ - အဲလိုဆို တကယ်ရော အလုပ်လုပ်ရဲ့လား ဆိုတာ စစ်သင့်ပါတယ်။ စစ်နည်းကတော့ အောက်ဖော်ပြပါ အတိုင်း Device Manager ကို ခေါ်ပြီး

ကိုယ့် Device က တကယ် အလုပ်,လုပ်မလုပ် စစ်ရပါမယ်။

တကယ်လို့ ဖော်ပြပါ အတိုင်း မတွေ့ရပဲ wireless adapter က အလုပ်မလုပ်ဘူး ဆိုရင် latest wireless adapter driver ကို manufacturer website ကနေ ရယူပြီး install လုပ်ဆောင်ဖို့ လိုပါမယ်။ ခု ကျွန်တော်တို့ အားလုံး အဆင်သင့် ဖြစ်သွားပြီ ဆိုကြပါစို့ - အဲ့နောက်မှာ နောက်ထပ် Options ( 2 ) ခု ထပ်ထွက်လာပါတယ် - အဲတာက ( ၁ ) မပန်းနုသုံးချင်တဲ့ Wireless Network ဆိုတာ ရှိနေပြီးသား wireless network ထဲကိုမှ ကိုယ်က Wireless access ရဖို့ ကိုယ့်ကွန်ပြူတာ ( Desktop or laptop ) ဝင်ချိတ်မှာလား - ဒါမှမဟုတ် ကိုယ့်ဘာသာကိုယ် Wireless Network အသစ်တစ်ခုကို အစကနေ အဆုံး Configuration လုပ်မှာလား ဆိုတာ ဖြစ်ပါတယ်။ Options နံပါတ် ( ၁ ) က လုပ်ဆောင်ရတာ လွယ်ပေမယ့် Options နံပါတ် ( ၂ ) က ကျတော့ wireless router configuration လုပ်ရမှာတွေ - တစ်ခြား Cable ချိတ်ဆက်မှုတွေပါ ပါလာမှာ မို့လို့ ဒီနေရာကနေ အပြည့်အစုံ ပြောပြဖို့ မလွယ်ပါဘူး - ဒါ့ကြောင့် ကျွန်တော် ဒီ Options နှစ်ခုမှာမှ မပန်းနုက Options နံပါတ် ( ၂ ) ဖြစ်တဲ့ ရှိနေပြီးသား Wireless Network တစ်ခုထဲကို ဝင်မယ့် ကွန်ပြူတာ တစ်လုံးကို Configuration လုပ်နေတဲ့ သူ တစ်ယောက် အဖြစ် မှတ်ယူပြီး ဆက်ပြောသွားပါ့မယ်။

အဲတော့ ကျွန်တော်တို့ wireless adapter configuration ကို Windows Vista မှာ Manually ဘယ်လို လုပ်ဆောင်သွားမယ် ဆိုတာ အဆင့်တစ်ဆင့်စီ ကျွန်တော် ဖော်ပြသွားပါ့မယ်။

( ၁ ) အရင်ဦးဆုံး Windows button ကနေပြီး Connect To button ကိုသွားပါ။

( ၂ ) အဲဒီကနေ ဖော်ပြပါအတိုင်း Active ဖြစ်တဲ့ Wireless Connection တစ်ခုခုကို မြင်ရပြီ ခု ဥပမာ ပေးမယ့် ပုံမှာတော့ home-network ဆိုတာကို ကျွန်တော်တို့ မြင်နေရပါတယ်။

ဒါ့ကြောင့် သူ့ကို Right click ထောက်ပြီး Properties  ကို ဆက်သွားပါ။ ကျွန်တော်တို့ အဲဒီကနေ အဲ့ဒီ့ Network အတွက် connection setting ကို အောက်ဖော်ပြပါအတိုင်း configuration ဆက်လုပ်ပေးသွားရပါမယ်။

( ၃ ) တကယ်လို့ အဆင့် ( ၂ ) မှာ ဖော်ပြထားတဲ့ အတိုင်း Active ဖြစ်တဲ့ Wireless Connection တစ်ခုခုကို မမြင်ရဘူး ဆိုရင် ကျွန်တော်တို့တွေ Set up a connection or network လုပ်ရပါမယ်။ အဆင့် ( ၂ ) ရဲ့အောက်မှာ ဖော်ပြထားတဲ့ ပထမဆုံးပုံရဲ့ အောက်နားက Set up a connection or network  ကို click ပေးပြီး အောက်ဖော်ပြပါအတိုင်း  Manually connect to a wireless network option ကို click ပေးပြီး Next ကို ဆက်သွားပါမယ်။

( ၄ ) ဒီနေရာမှာ ကျွန်တော်တို့ ထည့်ပေးရမှာ တွေ ရှိပါတယ်။ အဲတာတွေက ကိုယ် Connect လုပ်ချင်တဲ့ wireless network information တွေ ဖြစ်တဲ့ (network name/SSID, security type, encryption type, security key) တွေ ထည့်သွင်းပေးရပါမယ်။ network name ဆိုတာ တစ်ချို့နေရာတွေမှာ router name ကို ပြောတာပါ။ Supported security type အမျိုးအစားတွေကတော့ No authentication (Open), WEP, WPA2-Personal, WPA-Personal, WPA2-Enterprise, WPA-Enterprise နဲ့ 802.1x ဆိုတာတွေ ဖြစ်ပြီး Supported encryption type တွေကတော့ TKIP နဲ့ AES ပါ - အဲတာတွေ ဖြည့်သွင်းပါ။ နောက်ပြီးရင် Security key ထည့်ပေးပြီး Start this connection automatically option နေရာမှာ Check ပေးထားလိုက်ပါ။ ပြီးသွားရင် Next ကို click ပေးရပါမယ်။ 

( ၅ ) နောက်ဆုံး window မှာတော့ အောက်ဖော်ပြပါအတိုင်း ကိုယ်ဖန်တီးထားတဲ့ Wireless Network ကို  connect to လုပ်မှာလား ဒါမှမဟုတ် တစ်ခြား Connection settings တစ်ခုကို change မှာလားဆိုတဲ့  change connection settings ကိုတွေ့ပါလိမ့်မယ်။ အဲကနေ ကိုယ်လုပ်စရာ ရှိတာ ဆက်လုပ်သွားယုံပါပဲ။

( ၆ ) Connect လုပ်ပြီး သွားပြီ ဆိုရင်တော့ Internet ထဲက website တစ်ခုခုကို access လုပ်ကြည့်ပါ။ Access လုပ်လို့ ရပြီ ဆိုရင် Wireless Connection ရပါပြီ - 

ခု ဖော်ပြခဲ့တဲ့ ဖော်ပြချက်တွေက ကျွန်တော် ကြိုးစား ဖော်ပြလိုက်ပေမယ့် အဆင်ပြေမယ် မပြေဘူး ဆိုတာ ကျွန်တော်လည်း ကျိန်းသေ မပြောနိုင်ပါဘူး - ကျွန်တော်လည်း နိုင်သလောက် အဆင်ပြေနိုင်အောင် ကြိုးစားပေးလိုက်တာပါ - ဟိုး အပေါ်မှာ ဖော်ပြခဲ့ပြီး သလို Network Problem ဆိုတာ အဖြေရှာရင် အရမ်းကျယ်ပြန့်တာက တစ်ကြောင်း ကျွန်တော်က မျက်မြင် ဖြေရှင်းပေးနေရတာ မဟုတ်တဲ့ အတွက်က တစ်ကြောင်းမို့လို့ ကျွန်တော် ကူညီရတာ သူများတကာလို မျက်မြင် အဖြေရှာရတာထက် ( ၂ ) ဆပိုပင်ပန်းပါတယ်။ 

ဒါတောင် တော်တော် အကျဉ်းချုံး ဖော်ပြလိုက်တာပါ - ခု အထက်မှာ ဖော်ပြထားတဲ့ ဖော်ပြချက်က wireless adapter configuration ကို Windows Vista မှာ Manually ဘယ်လို လုပ်ဆောင်သွားမယ် ဆိုတာလေးပဲ ရှိပါသေးတယ်။ အဲ့နည်းနဲ့ အဆင်မပြေရင် နောက်ထပ် ad hoc wireless network ကို Windows Vista မှာ ဘယ်လို Configuration လုပ်ဆောင်မလဲ ဆိုတာ ရှိပါသေးတယ်။ ဒါ့ကြောင့် အရမ်းကျယ်ပြန့်တယ် လို့ ကျွန်တော် ပြောခဲ့တာပါ - ကျွန်တော်က မျက်မြင် လုပ်ဆောင်နေရတာ မဟုတ်တော့ ဒါဖြစ်နိုင်မလား ဒါဖြစ်နိုင်မလား ဆိုပြီး အဘက်ဘက်က ဘက်ပေါင်းစုံ စဉ်းစားနေရတာရယ်  တော်ယုံ ကိုယ့်ရှေ့မှာ စက်ရှိနေရင် အလွယ်တကူ ရှာဖွေလို့ ရတဲ့ သိကိန်း တွေက ကိုယ့်ရှေ့မှာ စက်မရှိတော့ မသိကိန်း ဖြစ်သွားတာရယ်တွေကြောင့် ပိုပြီး လုပ်ဆောင်ရတာ အခက်တွေ့ပါတယ်။ ဒါကို မပန်းနု နားလည်နိုင်မယ် ထင်ပါတယ်။ အတတ်နိုင်ဆုံး အဖြေထုတ်နိုင်ဖို့ ကြိုးစားလိုက်ပေမယ့် တစ်ခုမှ အဆင်မပြေခဲ့ရင်တော့ နားလည်ပေးနိုင်ဖို့ မေတ္တာရပ်ခံလိုပါတယ်။ 

ကျွန်တော် အတတ်နိုင်ဆုံး ကြိုးစားပေးလိုက်ပါတယ်။


KznT.

Top 20 Facebook Apps

Facebook ကို စစသိသိချင်းတုန်းကတော့ ဘာကြီးတုန်း ဆိုပြီး ကောင်းကောင်းလည်း မသုံးတတ် - ဘာလုပ်ရမှန်းလည်း မသိ - အသိသညာလည်း မရှိနဲ့ ယောင်လည်လည် ဖြစ်ပြီး မဝင်ဖြစ်ခဲ့ပါဘူး - ဒါပေမယ့် ဟိုလူက Facebook မှာ လယ်စိုက်တယ် ဒီလူက မာဖီးယား ဘာညာ စသဖြင့် ကြုံလာရတော့ ဘာတွေများ ထူးခြားလဲ ဆိုပြီး Links တွေတောင်း လိုက်ဆော့ကြည့်ခဲ့ရာ ကနေ တော်တော်ကြီးကို အစွဲကြီး စွဲခဲ့လို့ မနည်းဖြတ်ယူ ခဲ့ရပါသေးတယ် - အထူးသဖြင့်တော့ Farmville နဲ့ Mafia က တော်တော်စွဲ တယ်လို့ ထင်ပါတယ် - တစ်ယောက်နဲ့ တစ်ယောက်တော့ မတူဘူးပေါ့လေ - တစ်ချို့ မိန်းကလေးတွေ ကျတော့လည်း မာဖီးယား တာထက် အကောင်လေးတွေ မွေးပြီး ဆော့ရတဲ့ Pet Society တို့ ဘာတို့ ပို သဘောကျကြတာပေါ့- အခု ဒီအကြောင်း ရေးဖြစ်တာကလည်း Facebook ကျွမ်းကျင်ပြီးသား သူတွေ အတွက် မဟုတ်ပါဘူး - Facebook ဝင်ပြီး ဘာလုပ်ရမှန်း မသိတဲ့ သူတွေ - ဂိမ်းတစ်မျိုးတည်းကိုပဲ အားကြိုးမာန်တက် ဆော့နေသူတွေ အတွက် အပြောင်းအလဲလေးလည်း ဖြစ်အောင် Facebook က နာမည်ကြီး ဂိမ်းအမျိုး ( ၂၀ ) လောက်နဲ့ မိတ်ဆက်ပေးချင်လို့ပါ - ဂိမ်းစွဲပြီး Facebook က မထွက်နိုင်ရင်တော့ ကျွန်တော် KznT ကို အပြစ်မတင်ကြပါနဲ့ ခင်ဗျာ - ကျွန်တော်က ဗဟုသုတ အဖြစ် ဝေမျှတာပါ။

Farmville

အားလုံး သိကြတဲ့ အတိုင်း ထိပ်ဆုံးက လာတာတော့ သူ >> FarmVille ပါပဲ။ ဘာလုပ်လို့ ရလဲ ဆိုရင် စစချင်း ဝင်တာနဲ့ မြေကွက် သေးသေးလေး တစ်ကွက်ရမယ် - သူက ပေါင်းလေး ( ၆ ) ပေါင်းလား မသိဘူး အပင်လေးတွေ စိုက်ပြထားတယ် - အဲဒီက လွတ်တဲ့ နေရာလေးတွေမှာ အပင်လေးတွေ စိုက်ရတယ် - တစ်ရက်တန်သည် နှစ်ရက်တန်သည် စောင့် နောက်နေ့ရောက်ရင် ကိုယ်စိုက်ထားတဲ့ နေရာလေးက အသီးလေးတွေ သီးနေတာ တွေ့ရော - တကယ့် အပြင်မှာလိုပဲ ကိုယ့် အပင်လေးတွေ ကိုယ့်ပေါင်းလေးတွေက အသီးလေးတွေ သီးနေရင် အရမ်းပျော်ဖို့ ကောင်းတာပဲ - အဲလိုနဲ့ ရတဲ့ အသီးလေးတွေကိုရောင်း မြေကွက်တွေဝယ် - ထွန်စက်တွေဝယ် - အိမ်တွေဆောက်နဲ့ သူငယ်ချင်းတွေလည်း ရ တော်တော်လေး ပျော်ဖို့ ကောင်းတဲ့ ဂိမ်းပါ - အဓိကက lvl မြင့်လာရင် သူငယ်ချင်းများများ ရထားဖို့နဲ့ အသီးအနှံတွေကို အချိန်ကိုက်ပြီး စိုက်တတ်ဖို့ အရေးကြီးပါတယ်။ ရေးပြရရင် စိတ်ဝင်စားစရာတွေကတော့ အများကြီးပါ။ Real-time farm simulation game     ဆိုတော့ တော်တော်လေးလည်း ပျော်စရာကောင်းပါတယ်။ စမ်းဆော့ကြည့်ပါ။

Mafia Wars

သူကတော့ နဲနဲ စရိုက်ဆန်တယ် - စစဆော့ချင်းတော့ နည်းနည်း နားလည်ဖို့ ခက်တယ် - ဘာလုပ်လို့ လုပ်နေမှန်း မသိဘူး - ဒါပေမယ့် ဆော့ရင်းနဲ့ နားလည်လာပါလိမ့်မယ်။ သူက Mafia Wars ဆိုတဲ့ အတိုင်း စရိုက်ကောင်တွေပါ - လူဆိုးတွေ နဲ့ ပေါင်းရတယ် ကိုယ်ကိုယ်တိုင်လည်း လူဆိုးပဲ - အလုပ်လုပ်ရတယ် - ပိုက်ဆံ ရှာရတယ် - ကိုယ့် အကောင်ကို လက်နက်ကောင်းကောင်းတွေ ဆင်ရတယ် - Defence ကောင်းအောင်လည်း လုပ်ရတယ် - စီးပွားရေးမှာလည်း မညံ့ရဘူး - သူများကိုလည်း သတ်နိုင်ရတယ် - ကိုယ့်ကိုယ်လာသတ်ရင်လည်း ကိုယ်က ပြန်ဆော်နိုင်ရတယ် - ဂိုဏ်းနဲ့ ဆော့ရတာမျိုး ဆိုတော့ Mafia Size ဆိုတာလည်း ရှိသေးတယ် - Mafia Size တစ်ချို့ဆို တော်တော်ကြီးတယ် - Mafia Size ကြီးတော့ ဘာဖြစ်လဲ ဆိုရင် ကိုယ့်ကောင် Power တက်တယ် - တော်ယုံလူရှိန်တယ် - ကိုယ့်ကို လာချလို့ မကျေနပ်ရင် Hit List တင်ပြီး ကိုယ့် ဂိုဏ်းက အပေါင်းအပါတွေကို ပြန်ချခိုင်းလို့ ရတယ် - စသဖြင့် စုံနေတာပါပဲ - စစဆော့ချင်းတော့ ဘာကြီးလဲဟ - တစ်ယောက်ယောက်ကို သတ်လိုက်လို့ ကိုယ်နိုင်တယ်ဆိုရင် Win ကိုယ်ရံှုးရင် Lose ဆိုပြီး စာတွေ တက်လာတာမျိုး ဆိုတော့ သိပ် Feel မလာသလိုပဲ - နောက်တော့ အပေါင်းအသင်းတွေ ရပြီး တစ်နေ့လုံး အဲ့ထဲကကို မထွက်တော့ဘူး - တွေ့သမျှ လူလိုက်သတ်တာ - :D အဲတော့ အနှစ်ချုပ်ချင်တာ မဆော့ဖူးသေးသူများ စမ်းသပ်ကြည့်ပါ။ အထူးသဖြင့် သတ်တာ ဖြတ်တာ ဆိုတော့ ယောကျာင်္းလေးများ သဘောကျနိုင်ပါတယ်။

Bejeweled Blitz

ဒီ ဂိမ်းကတော့ စိန်စီတယ် ပြောရမလား - မှားလို့ ရတနာ စီတာ - နဲနဲလေး ခက်တယ် - ခက်တယ်ဆိုတာ အချိန်ကြီး ပေးထားတော့ သူပေးထားတဲ့ အချိန်အတွင်း ဆုရအောင် လုပ်နိုင်ဖို့ ဆိုတာ တော်တော်မလွယ်ဘူး - တစ်မိနစ် အတွင်းမှာ Score points ဘယ်လောက် ရအောင် လုပ်နိုင်လဲ - ဒါကို ကြည့်ပြီး သူက အမှတ်ပေးတယ် - ကျွန်တော်တော့ လောလောဆယ် ဆော့နေတာ သုံးရက်ပဲ ရှိသေးတယ် - 146650 အများဆုံး ရဖူးတယ် - ဒီ့ထက်ပိုပြီး မကျော်နိုင်သေးဘူး - စစချင်း လက်တုန် ခြေတုန်ဖြစ်မယ် - ဘယ်ကဟာ ဘယ်နားရွှေ့ရမှန်း မသိဘူး - နောက်တော့ အထာနပ်လာမယ် - ဆော့ရင်းနဲ့ ပျော်ဖို့ ကောင်းသွားမယ် - အဲတော့ ဆော့ကြည့်တာ မမှားဘူး :D

Texas HoldEm Poker

သူကတော့ ဖဲ - ဝိုင်းကောင်းတယ် - ဝိုင်းတွေလည်း မနဲဘူး - ရံှုးလည်း ဘာမှ မဖြစ်ဘူး - အသိတွေ ဘာတွေ ရှိရင် ပိုက်ဆံတွေ ဘာတွေလည်း ဆွဲလို့ရတယ် - ထိုင်မိရင်တော့ မထတမ်းပဲ - တကယ့် ပိုက်ဆံ အစစ်နဲ့ ရိုက်ချင်လည်း ရတယ် - ဒါပေမယ့် စိတ်ရှည်ဖို့ လိုတယ် - Game money နဲ့ ရိုက်ရင်သာ လူတွေက All-in မကြာခဏ လုပ်ကြတာ - တကယ့် Real Money နဲ့လည်း ဆိုရော ၁ ကျပ်ကို ၅ မူးချြွေပီး ဆော့ကြတယ် - ကိုယ်လိုလူတောင် သူတို့လောက် စိတ်မရှည်နိုင်ဘူး - စိတ်မရှည်တဲ့ လူကတော့ ပြုတ်တာပဲ :D သတိတော့ထားပါ - ဂိမ်းမန်းနီးနဲ့ပဲ ဆော့ကြပါ။

Birthday Cards

လူတိုင်းမှာ Birthday ရှိကြတော့ - ဆိုင်ရာ ဆိုင်ရာ လူတိုင်းမှာလည်း တစ်ယောက်ယောက်ရဲ့ Birthday ကျရင် လက်ဆောင်လေး ဘာလေး ပေးကြရတာပေါ့ - Facebook မှာတော့ ဒီတာဝန်ကို Birthday Cards က တာဝန်ယူပါတယ် - ပုံမှာ မြင်ရတဲ့ အတိုင်း ကဒ်လှလှလေးတွေ ရှိတယ် - အထဲထဲမှာ စိတ်ကြိုက် ပြင်ဆင်လို့လည်း ရတယ် - အရောင်မျိုးစုံ စိတ်ကြိုက် ပြောင်းလို့ ရတယ်- ပုံလေးတွေ - ကိုယ်ကြိုက်တဲ့ စာလေးတွေ ထည့်ပြီး ကိုယ်နဲ့ ဆိုင်ရာ ဆိုင်ရာ ကောင်လေး/ ကောင်မလေးတွေ ပျော်အောင် ကဒ်လေး တွေ ပို့လို့ ရတယ်။

Happy Aquarium

သူကတော့ ငါးလေးတွေ မွေးတာ - ကျွန်တော် စစချင်း တော်တော်ကြာကြာ ဆော့ဖြစ်သေးတယ် - နောက်တော့ ကျွန်တော့်ငါး တွေ လာလာခိုးတာ ခံရလို့ စိတ်တိုပြီး မဆော့တော့တာ :D သူဂိမ်းကို မဆော့ ဆော့အောင် အဲ့ဒီ့ ငါးခိုးတဲ့ function ကြီး ထည့်ထားတော့ ကျွန်တော့်မှာ တစ်နေ့နဲ့ တစ်နေ့ ဘယ်တော့ ငါးခိုးခံရမလဲ ဆိုပြီး စောင့်ဖမ်းနေရတာက တစ်လုပ် - အဲတာနဲ့ စိတ်ကုန်ပြီး Happy Aquarium ကနေ နောက်ထွက် FishVille ကို ပြောင်းဆော့လိုက်တယ် - သူလည်း မိုက်တယ် - ဒါပေမယ့် ကျွန်တော့် စိတ်ထင် Happy Aquarium က ငါးလေးတွေက FishVille က ငါးတွေထက် ပိုချစ်ဖို့ ကောင်းတယ် ထင်မိတယ်။ FishVille က ငါးတွေကတော့ ရုပ်နည်းနည်း ဆိုးသလို - အကျည်းတန် မှန်ကြိုက်ဆိုတာ ဒါမျိုးနေမှာ :D

FishVille

သူကတော့ ကျွန်တော် အပေါ်မှာ မိတ်ဆက်ခဲ့ပြီးသား FishVille - သူလည်း ဆော့လို့ ကောင်းတယ် - သူငယ်ချင်းတွေ ခေါ် နောက် သူမွေးတဲ့ ကန်သွား - သန့်ရှင်းရေး လုပ်ပေး - သူငယ်ချင်းက ပြန်လာ ကိုယ့်ကန် သန့်ရှင်းရေး လုပ်ပေး - ငါးလေးတွေ ပုံမှန် အစာကျွေး - ကိုယ်က များ အစာချလိုက်ပြီ ဆိုရင် လာလာဟပ်ကြတာ - အသည်းကို ယားရော :D - အကောင်လေးတွေ ကြီးလာရင် ရောင်း ကိုယ့်ကန်လေးကို အလှဆင် - ပစ္စည်းတွေ ဝယ် - ငါးလှလှလေးတွေ ဝယ် စသဖြင့် ပျော်ဖို့ ကောင်းပါတယ်။

Cafe World

မြန်မာလို ပြောရင်တော့ ကော်ဖီကမ္ဘာ ခေါ်မလား - ကျွန်တော်ကတော့ မြန်မာနိုင်ငံမှာ လက်ဖက်ရည်ဆိုင်နဲ့ပဲ အများဆုံး ရင်းနှီးတာမို့လို့ လက်ဖက်ရည်ဆိုင် ဖွင့်တယ်လို့ပဲ မှတ်ထားတယ် - စစချင်း အနုတ်စုတ် ဂုတ်စုတ် ဘဝကနေ စပြီး ဆိုင်ဟဲဗီးကြီး ဖြစ်လာအောင် ဆော့ရတာ - ဆိုင်စစဖွင့်ချင်းဆို ရောင်းလို့ကို လက်မလည်ဘူး - လာစားတဲ့ လူတွေကို ကြည့်လို့ Facebook ထဲက ကိုယ့်သူငယ်ချင်းတွေရဲ့ နာမည်တွေနဲ့ ဆိုတော့ မြင်ရတာ ပျော်ဖို့လည်း ကောင်း - တစ်ခါတစ်လေ ဝန်ဆောင်မှု မကောင်းရင်လို့ ဆိုင်သန့်ရှင်းညံ့ရင်တို့ ဆိုများ ဝင်မစားပဲ လှည့်ထွက်တဲ့ လူတောင် ရှိသေးတယ် - အဲလို လူမျိုးဆို တံခါးပေါက်ဝ ကနေ ဆောင့်ကန်ချင်တာ :D ဒီက မအားလို့ မလုပ်နိုင်တာကို - ကောင်းတာ တစ်ခုက သူက Energy မကုန်မချင်း ဖိုဆရာကိုရော - စားပွဲထိုးကိုရော သူ့ဘာသာ Auto run ခိုင်းထားလို့ ရတယ်။ နဲနဲတော့ အချိန်မှတ်ထားရတာပေါ့လေ - ကျွန်တော်ကတော့ ရေတစ်ခွက်လောက် တိုက်ပြီး နင်းခိုင်းတာ - စားပွဲထိုးဆို ဖလက်ကို ပြရော :D

Pet Society

သူလည်း အကောင်လေး မွေးတာပဲ - ဒါပေမယ့် သူက အိမ်မွေးတိရစ္ဆာန် - ကိုယ်ကြိုက်သလို ပုံစံယူလို့ ရတယ် - စစချင်း အိမ်ခန်းလေး တစ်ခန်းပေးပြီး စရတဲ့ ဘဝ - ပြောရရင် မိဘမဲ့ ကလေး မွေးစားရသလိုပဲ - ကိုယ့်ကိုယ် အရမ်းချစ်တယ် - တစ်ရက်လောက် မဝင်လိုက်ပဲ နောက်ရက်မှ ဝင်လိုက်မိရင်များ သူ့ခမျာ ပျော်လို့ မဆုံးဘူး ထထခုန်ပြီး ကြိုရတာ အမော -  ကိုယ်မဝင်တာ ကြာလို့ ရေမချိုးပေးဖြစ်ရင်လည်း ရင်ကောင်တွေ ဝဲလို့ သူ့ခမျာ သနားစရာ - ကိုယ်နဲ့ တူတူ ကစားလို့ ပျော်နေရင်များ ခစ်ခစ် ခစ်ခစ်နဲ့ မချစ်ချစ်အောင် ရယ်တတ်သေးတယ် - သူ့ကို အဝတ်အစားလေးတွေလည်း ဆင်ရတယ် - အားကစားပြိုင်ပွဲတွေ သွားပြီးလည်း ပြိုင်ခိုင်းရတယ် - ငါးတွေဘာတွေလည်း မျှားခိုင်းလို့ ရတယ်။ အဓိကက သူ ပျော်အောင် လုပ်ပေးရင်းနဲ့ ကိုယ်ပါ ပျော်လာတာ - ဒါ ဒီဂိမ်းလေးရဲ့ ချစ်စရာ အားသာချက်ပဲ။

PetVille

သူကတော့ Pet Society ထက် လောလောဆယ်မှာ နဲနဲ ပိုပြီး လူဆော့များတယ် - တစ်ချို့ကတော့ ဒီ PetVille ကို Pet Society ထက် ပို သဘောကျကြတယ် - ကျွန်တော်ကတော့ Pet Society မှာ ဆော့လာတာလည်း ကြာပြီဆိုတော့ ဒီဘက်ကို သိပ်မလှည့်ဖြစ်ဘူး - ဒါပေမယ့် လူဆော့များတယ် ဆိုကတည်းက တစ်ခုခုတော့ အားသာချက် ရှိမှာ သေချာပါတယ်။

Restaurant City

သူက ကျွန်တော် အပေါ်မှာ ပြောခဲ့ပြီးတဲ့ Cafe World သဘောမျိုးပဲ - ဒါပေမယ့် သူက စားသောက်ဆိုင် ဖွင့်တာ - မရောင်းရမှာ တော့ မပူရဘူး ရောင်းရလွန်းလို့ ရိုက်ထုတ်ချင်စိတ်ပဲ ပေါက်တယ် :D - အဲလိုသာ လာအားပေးမယ်ဆိုလို့ကတော့ KznT တို့ ဒီတစ်သက် စားသောက်ဆိုင်ပဲ ဖွင့်စားတော့မယ် - ရောင်းကောင်းပေမယ့် တစ်ခါတစ်လေ ဂျီဂျောင်ကျတဲ့ Customer နဲ့လည်း တွေ့တတ်သေးတယ် - ဆာနေပြီတို့ - ကြာလိုက်တာလို့ - ညစ်ပတ်လိုက်တာ လွန်ရောတို့ - ဖြစ်နိုင်ရင် အဲလို လူမျိုးဆို အပေါက်ဝကနေ စောင့်ပြီး တုတ်နဲ့ ရိုက်လွှတ်ချင်တယ် - လာမစားလည်းနေ - နင့်ဘာသာနင် စားချင်တဲ့ နေရာသွားစား ဆိုပြီး :D

Happy Island

သူကလည်း တော်တော်ပျော်ဖို့ ကောင်းတယ် - ကျွန်းပေါ်မှာ ကိုယ့်စိတ်ကူး အိပ်မက်လေးတွေ ပုံဖော်တဲ့ နေရာပေါ့ - ချစ်ဖို့ ကောင်းတယ် အရမ်း :)

Farm Town

တစ်ချို့က FarmVille ထက် Farm Town ကို ပိုကြိုက်ကြတယ် - အရင်က Farm Town ဆော့တဲ့ သူ တော်တော်များပေမယ့် ခုတော့ တော်တော်လေး နည်းသွားတာ တွေ့ရတယ် - ကျွန်တော့် အမြင်ပြောရရင် Farm Town က FarmVille ထက် ပိုဆော့လို့ ကောင်းတယ်ဗျ - ဒါပေမယ့် နောက်ပိုင်းကျတော့ FarmVille က ပြင်ဆင်တာ တော်တော်ကောင်းလာတာရယ် - အရုပ်လေးတွေ ကလည်း Farm Town က အရုပ်တွေထက် ပိုပြီး အသက်ဝင်တာရယ်ကြောင့်လား မသိဘူး ကျွန်တော်တောင် Farm Town သိပ်မဆော့ ဖြစ်တော့ဘူး - ကောင်းတာကတော့ Farm Town ရော FarmVille ရော ကောင်းကြပါတယ်။

Zoo World

သူကလည်း ချစ်ဖို့ ကောင်းတဲ့ ဂိမ်းလေး - တိရစ္ဆာန်ရုံလေး ကိုယ့်ဘာသာ ဖန်တီးရတာ - အကောင်လေးတွေ ဝယ် နေရာချ တစ်ခြား ကိုယ့်ဘာသာ စိတ်ကူးပုံဖော်လို့ ရတဲ့ ကိုယ်ပိုင် ကမ္ဘာလေးပေါ့ - ဘယ်သူ့မှ လာမလည်မှာတော့ မပူနဲ့ လူက မပြတ်ဘူး - အားကြီး အားပေးတာ - အလုပ်လုပ်တယ်ကို မရှိဘူး တစ်ချိန်လုံး ဒီ တိရစ္ဆာန်ရုံထဲမှာပဲ ပြန်ခိုင်းလည်း မပြန်ကြဘူး :D

Happy Pets

သူလည်း အကောင်လေးတွေ မွေးတာပဲ ကြောင်လေးတွေ အရမ်းချစ်ဖို့ ကောင်းတယ် - အစားအသောက်လည်း ပုံမှန်ကျွေး ရတယ် - သူတို့ကို သန့်ရှင်းရေး လုပ်ပေးရင်များ အမွှေးလေးတွေ ထောင်ထောင်ထလာတာ တကယ့် အပြင်က ကြောင်လေးတွေ အတိုင်းပဲ - တစ်ခုခု ကျွေးလိုက်လို့ ဗိုက်ဝသွားရင်ပြီး ပျော်ပြီး ဟိုပြေးဒီပြေးနဲ့ - သူတို့ကို တွေ့ရတာ တော်တော်လေး စိတ်အပန်း ပြေတယ် - ချစ်လည်း ချစ်တယ်

Country Life

ပြောရရင် သူလည်း FarmVille တို့ Farm Town တို့လိုပဲ - ဒါပေမယ့် သူက Avatar မရှိတော့ လုပ်ရကိုင်ရတာ ပိုမြန်တယ် - ကျွန်တော်တို့ FarmVille တို့ ဘာတို့မှာကျ လူပါနေတော့ ကိုယ်က click ပေးထားပြီးလည်း သူက ရိတ်တဲ့ နေရာ မရောက်လာ မချင်း တစ်မေ့ တစ်မော စောင့်နေရတာမျိုး ရှိတယ် - တစ်ခြား ဖြတ်လမ်းနည်းနဲ့ လုပ်လို့ ရတာလည်း ရှိပါတယ် - ဒါပေမယ့် အဲတာမျိုးကျတော့ မသမာတဲ့ နည်းတွေ မို့လို့ ဂိမ်းဆော့တာက ဂိမ်းဆော့တာနဲ့ မတူတော့ဘူး - စီးပွားရေး ဆန်သွားတယ် - ဒီ ဂိမ်လေးက အရုပ်လေးတွေလည်း ချစ်ဖို့ ကောင်းတယ် - အပေါ်က နွားလေးတွေ ကြည့်ပါလား နှာခေါင်းကြီးကြီးပဲ :D

Island Paradise

ကိုယ်ပိုင်တဲ့ ကျွန်းလေး တစ်ကျွန်း ရှိမယ် - အဲ့ပေါ်မှာ သီးပင်စားပင်လေးတွေ စိုက်မယ် - အကောင်လေးတွေ မွေးမယ် - နောက် ကိုယ့်စိတ်ကူး အိပ်မက်ထဲက အိမ်ပုံစံလေးတွေနဲ့ အဲ့ဒီ့ ကျွန်းလေးပေါ်မှာ ဆောက်မယ် - လေထဲတိုက်အိမ်ဆောက် ဆိုတာကို အကောင်အထည်ဖော်နိုင်အောင် ဖန်တီးထားတဲ့ ကျွန်းပေါ် တိုက်အိမ်ဆောက် ဆိုတဲ့ ဂိမ်းလေးပေါ့ :)

YoVille

သူကတော့ အကောင်မဟုတ်ဘူး - လူမွေးတာ - ချစ်စရာလေး လူကောင်လေးတွေက ကောင်မလေးရှိတယ် ကောင်လေး ရှိတယ် - ကြိုက်တာ ဆော့လို့ ရတယ် - ကိုယ့် ကလေးကို ကိုယ့်ဘာသာ အဝတ်လေးတွေ ဝယ်ပေး နောက် သူများ အိမ်တွေလျှောက်လည် - အာဝါးပေးလိုက် - သူငယ်ချင်းတွေနဲ့ တွဲကလိုက် - လက်ဆောင်လေး ပေးလိုက် - ဟာသလေးတွေ ပြောလိုက် - အပျင်းကို ပြေလို့ - ဒီလို ဂိမ်းမျိုးက မိန်းကလေး တွေ ပိုသဘောကျကြတယ်

MindJolt Games

သူ့မှာက ဆော့စရာ ဂိမ်းတော်တော်ကို များတာ - ကျွန်တော် တစ်ခုချင်း လိုက်ရှင်းပြနေလို့ကတော့ ကုန်မယ် မထင်ဘူး - အပျင်းပြေ ဆော့ဖို့တော့ တော်တော်ဆော့လို့ ကောင်းတယ် - စမ်းဆော့ကြည့်ပါလား

Hero World

သူက ဘာနဲ့ တူမလဲ ဆိုတော့ ကျွန်တော်တို့ Mafia နဲ့ ဆော့တာချင်း ဆင်တယ် - သူ့မှာ Mission တွေ ရှိတယ် - အဲတာတွေ လုပ်ရတယ် - ချရာ သတ်ရတာတွေ ရှိတယ် - ဒါပေမယ့် သူက နဲနဲ ကလေးဆန်တယ် - Mafia ကတော့ လူကြီးဆန်တယ် - ကျွန်တော့် အမြင်ပေါ့

ခု ကျွန်တော် ဖော်ပြခဲ့တာ Facebook မှာ ရှိတဲ့ ဂိမ်း အကုန် မဟုတ်သေးပါဘူး - တစ်ခြား ဂိမ်းတွေလည်း အများကြီး ကျန်ပါသေး တယ် - ကျွန်တော် ဖော်ပြထားတာ လူကြိုက်များ လူဆော့ အများဆုံး ဂိမ်း အမျိုး ၂၀ ပါ - ပျော်ရွှင်စွာနဲ့ ဆော့ ကစား ကြရင်း Facebook Games တွေနဲ့ ပတ်သတ်ပြီး အခက်အခဲ ရှိရင် ဒီမှာ မေးမြန်းနိုင်ပါတယ်။ နိုင်သလောက်လေး အကြံပေးပေးပါ့မယ်။

KznT.