Google Desktop Notifications

Google က ဒီနေ့ပဲ desktop notifications ဆိုတဲ့ Gmail အတွက် feature အသစ်ထပ်ထုတ်လိုက်တယ် - ရည်ရွယ်ချက်က ကိုယ့် Mail box ထဲကို Email ရောက်လာရင် ဒါမှမဟုတ် တစ်ယောက်ယောက်က instant messages ကိုယ့်ဆီ ပို့ထားရင် အရင်ကဆို Gmail notifier တို့ - Mozilla firefox add-ons ထဲက Gmail Notifier add-ons တို့ - Google toolbar တို့ ဆိုတာမျိုး စသဖြင့် မသုံးထားရင် ကိုယ့် Mail ထဲကို စာဝင်နေမှန်း - ကိုယ့်ဆီကို တစ်ယောက်ယောက်က instant messages ပို့ထားမှန်း အချိန်နဲ့ တပြေးညီ မသိနိုင်ဘူး - ခုတော့ Google က Gmail users တွေရဲ့ ဒီလိုအပ်ချက်ကို သိလို့ တစ်ခြား add-ons တွေ ဘာညာသာဓကာ အပိုစာသားတွေ မသုံးရအောင် desktop notifications ဆိုပြီး Gmail ထဲမှာ ထည့်ပေးလိုက်တယ် -

လုပ်ဆောင်ပုံကတော့ အထက်ဖော်ပြပါအတိုင်း Gmail ထဲကို ဝင် - ညာဘက်ခြမ်း အပေါ်ထောင့်မှာ ရှိနေတဲ့ Settings link ကို Click ပေးပြီး - General tab အောက်က Desktop Notifications: မှာ အောက်မှာရှိနေတဲ့ ဖော်ပြပါ နေရာနှစ်ခုကို Select လုပ်ပေးပြီး Save changes လုပ်ယုံပါပဲ -

ဒါကလည်း ကျွန်တော့် အနေနဲ့ Rule အရ ပြောတာပါ - တကယ်တမ်း မိသားစုဝင်တွေအနေနဲ့ ကိုယ့်ဆီရောက်လာတာတွေထဲက chat messages ကိုပဲ Notifications လုပ်စေချင်လဲ ရသလို - Priority Inbox သုံးတဲ့သူဆိုရင်လည်း ကိုယ့်အတွက်အရေးကြီးတဲ့ messages ကိုပဲ Notifications လုပ်ထားလို့ ရပါတယ် - Settings ကို အဲ့ကနေပဲ စိတ်ကြိုက် ပြင်ဆင်ထားလို့ ရပါတယ် - လောလောဆယ် အခြေအနေမှာတော့ ဒီ Desktop Notifications ဟာ HTML5 support ပေးတဲ့ Google Chrome မှာပဲ အလုပ်လုပ်ပါသေးတယ် - ဒါပေမယ့် HTML5 support ပေးတဲ့ တစ်ခြား browsers တွေ ( Firefox 4 - Internet Explorer 9 ) မှာလည်း ဒီ feature အလုပ်လုပ်နိုင်ဖို့ Google က လတ်တလော ပြင်ဆင်နေပါတယ် - Settings ထဲမှာ အားလုံး ပြင်ဆင်ပြီးသွားရင် မြင်ရမယ့် Desktop Notifications ပုံစံက အောက်မှာ ဖော်ပြထားတဲ့ အတိုင်းပါ -

ကျွန်တော့်စိတ်ထင်တော့ Google Chrome ရဲ့ စွမ်းဆောင်ရည်ကို Users တွေ သတိထားမိအောင် Google က တစ်ဖက်လှည့်နဲ့ ပွဲထုတ်တာလားတော့ မပြောတတ်ဘူး - ဘာပဲဖြစ်ဖြစ် Chrome users တွေ အတွက်တော့ အားသာချက် တစ်ခုရလို့ ကျွန်တော်တော့ သဘောကျမိတာ အမှန်ပါပဲ -

KznT.

Best Disposable Email services

ဒီနေ့ ကျွန်တော် မိတ်ဆက်ပေးချင်တာ တစ်ခါသုံး Email Services တွေ အကြောင်းပါ - ဒီအကြောင်းက ကျွန်တော်တို့ မိသားစုဝင်တွေနဲ့ သိပ်အများကြီး မစိမ်း လောက်ဘူးလို့ ထင်မိတယ် – ဘာကြောင့်လဲဆို ဒီ တစ်ခါသုံး Email services တွေ အကြောင်းက ချစ်သမီးသို့ ပေးစာများ မှာရော - တစ်ခြား ကျွန်တော်ရေးခဲ့ဖူးတဲ့ အကြောင်းအရာ တစ်ချို့မှာပါ မကြာခဏဆိုသလို တွဲပြီး ဖော်ပြခဲ့ဖူးပါတယ် – မှတ်မိကြလိမ့်မယ် ထင်ပါတယ် – 10minutemail ဆိုတာ - အခု ဆွေးနွေးချင်တဲ့ တစ်ခါသုံး Email Services တွေ ဆိုတာလည်း 10minutemail လိုမျိုးပဲ – အရင်က ပြောခဲ့ဖူးတယ်ဆိုပေမယ့် တစ်ချို့က ခုမှ စဖတ်မိတာမျိုး ဖြစ်နိုင်တာမို့လို့ သူ့ရဲ့ သဘောတရားကို နည်းနည်းလေး အကျဉ်းချုံးပြီး ပြန်ရှင်းပြချင် ပါသေးတယ် -

 

ဘာကြောင့် တစ်ခါသုံး Email Services တွေ အသုံးပြုသင့်သလဲ ??

အင်တာနက်ကို ခုမှ စတင် အသုံးပြုသူဖြစ်ဖြစ် – အသုံးပြုတာ အကျွမ်းတဝင် ဖြစ်နေသူတွေ ပဲဖြစ်ဖြစ် နေ့စဉ်လည်ပတ်နေကျ အင်တာနက်လမ်းကြောင်းမှာ လူတိုင်းနီးပါး ဖိုရမ်တွေ – Websites တွေ ဆိုတာနဲ့ ပတ်သတ်ဆက်နွယ်နေကြရတယ် – တစ်ခုခု လိုချင်တာရှိရင် ( MP3, Ebooks, Videos, Software စသဖြင့် ) ဘာပဲလိုလို ဒီဖိုရမ်တွေ – Websites တွေကနေပဲ ကျွန်တော်တို့ ရှာယူကြရတာ မလား – ဒါပေမယ့် တစ်ခုရှိတာ ဖိုရမ်တော်တော်များများနဲ့ Websites တော်တော်များများဟာ ဝင်ချင်တိုင်းဝင် ထွက်ချင်တိုင်းထွက် ခွင့်မပြုပါဘူး – တစ်ခုခု ရှာချင်တယ် – Registration လုပ်ရတယ် – တစ်ခုခု Download ချချင်တယ် – ဒါဆို  Registration လုပ်ခိုင်းတယ် – စသဖြင့် ကိုယ့်ဘက်က လိုလားချက် တစ်ခုအတွက် ကိုယ့်ရဲ့ ပိုင်ဆိုင်မှု ( Email address ) တစ်ခုကို ပြန်ပေးကြရတယ် – အဲ့လို Registration လုပ်တဲ့ အချိန်မှာ ကိုယ့်ဘက်က Email address တစ်ခုပေးမှ Registration confirmation link တစ်ခုကို ကိုယ့် Mail Address ထဲ အဲ့ဒီ့ Websites သို့မဟုတ် ဖိုရမ်ကနေ ပြန်ပို့ပေးပြီး ကိုယ့် Mail စစ်မှန်ကြောင်း အတည်ပြုခိုင်းတယ် - အဲလိုနဲ့ ကိုယ်ပိုင်ဆိုင်တဲ့ Personal Email Address တစ်ခုက ကိုယ်မရည်ရွယ်ထားတဲ့ တတိယလူကို ပေးမိလျက်သား ဖြစ်သွားတယ် – ပုံမှန်အားဖြင့် Registration process တစ်ခုက ဒီလောက်နဲ့ ပြီးသွားပေမယ့် တစ်ချို့ ဖိုရမ်တွေ – Websites တွေကတော့ Registration process ရဲ့ နောက်မှာ Marketing process ကိုပါ ဆက်ပြီး လုပ်ဆောင်ကြပါတယ် - ဆိုလိုတာ Users တွေဆီက ရလာတဲ့ Email address တွေကို Websites owner တွေ – ဖိုရမ်ကြီးကြပ် တည်ထောင်သူတွေ ( ကျွန်တော်တို့ ဖိုရမ်မပါ ) ကနေပြီး အရောင်းမြှင့်တင်ရေးအတွက် Email address ဝယ်ယူသူတွေဆီ ပြန်ပြီး ရောင်းစားကြတယ် -အဲ့လိုနဲ့ ကျွန်တော်တို့အယုံလွယ်ခဲ့တဲ့ ဖိုရမ်တွေ - Websites တွေကနေပြီး နောက်ထပ် နောက်ထပ် ကိုယ်နဲ့ မသိသူတွေထိပါ ကိုယ့်ရဲ့ Personal Email Address က ပြန့်သွားတယ် – ရလာဒ်ကတော့ အဲ့လိုမျိုး ရည်ရွယ်ချက် မကောင်းတဲ့ ဖိုရမ်တွေမှာ ကိုယ်က ဘုမသိ ဘမသိနဲ့ Registration လုပ်ပြီးနောက်ပိုင်း ကိုယ့် Email ထဲကို ဘယ်ကမှန်း ဘယ်သူ့ဆီကမှန်း မသိတဲ့ Mails တွေ စဝင်လာမယ် – စစချင်းတစ်စောင်စ နှစ်စောင်စကနေ နောက်ပိုင်း တစ်နေ့တစ်နေ့ ရာနဲ့ချီတဲ့ အထိ ဘယ်ကမှန်း မသိတဲ့ Emails တွေ ဝင်လာတာခံရမယ် – ကိုယ်က ဘာမှန်းညာမှန်း မသိပဲ အဲ့လိုမျိုး စာတွေမှာ ပါလာတတ်တဲ့ Attachments တွေကို ဖွင့်ရင်းကနေ ကိုယ့် ကွန်ပြူတာမှာ Virus ကိုက်ခံရတာ - Spyware ဝင်တာမျိုးတွေပါ နောက်ဆက်တွဲ ဖြစ်လာတတ်ပါတယ်။ အဲလိုတွေ ဖြစ်လာတော့ အရင်က ကိုယ်တန်ဖိုးထားရတဲ့ Account မှာ သုံးရတာ မပျော်တော့ဘူး – အဲ့တာကြောင့် အခြားတစ်ခုကို ပြောင်းသုံးချင်ပေမယ့်လည်း သူငယ်ချင်း ဆွေမျိုးသားချင်းရဲ့ Nick တွေကလည်း အများကြီး ရှိနေတော့ ပြောင်းဖို့ကလည်း ခက်နဲ့ စိတ်ဆင်းရဲရတတ် ပါတယ် -

အခုလို ဖြစ်ရခြင်းရဲ့ အဓိက အကြောင်းအရင်းဟာ ကိုယ့်အတွက် တကယ်အရေးမပါ / အမြဲလည်း ဝင်ဖြစ်မှာ မဟုတ်တဲ့ Websites တွေ ဖိုရမ်တွေမှာ တစ်ခါလောက်လေး ရောက်ဖြစ်ယုံနဲ့ Registration လုပ်မိတဲ့ မိမိအပြစ်ကြောင့်ပါ – ကိုယ့်အတွက် တကယ်လည်း အရေးပါပြီး အမြဲတမ်း ရောက်ဖြစ် ပတ်သတ်နေမယ့် ဖိုရမ်တွေ - Websites တွေမှာ ကိုယ်အမြဲသုံးနေကျ Email address ကို ပေးပြီး Registration လုပ်တာ အကြောင်းမဟုတ်ပေမယ့် အမြဲ မရောက်ဖြစ်မယ့် Sites တွေကို လိုလားချက်တစ်ခုတည်း အတွက်နဲ့ Registration လုပ်တဲ့အချိန်မှာ Personal Email Address ကို မပေးမိဖို့ သိပ်အရေးကြီးပါတယ် – အဲ့လိုဆိုရင် ဒီ Email Address မှ မပေးရရင် ဘယ် Email Address ပေးရမလဲ နောက်တစ်ခု အသစ်ထပ်လုပ်ရမှာလားဆိုတဲ့ အမေးတွေ ရှိလာပါပြီ – အဲ့အတွက် အဖြေရှိပါတယ် -

( 1 ) 10MinuteMail

10MinuteMail ဟာ တစ်ခါသုံး Email Address တွေကို ( ၁၀ ) မိနစ်တစ်ခုကျ ထုတ်ပေးနေတဲ့ Disposable Email Service တစ်ခုပါ - ဖိုရမ်တွေ – Websites တွေမှာ Registration လုပ်ဖို့ Email အရေးပေါ်လိုလာပြီ ဆိုရင် ကိုယ်အမြဲ မဝင်မသုံးဖြစ်မယ့် Sites မျိုးတွေအတွက် 10MinuteMail ကနေ ၁၀ မိနစ်ခံ Email Address တစ်ခု ရယူပြီး Registration လုပ်ဆောင်နိုင်ပါတယ် – ၁၀ မိနစ်ခံ Email ဆိုပေမယ့် သူပေးထားတဲ့ အချိန်တွင်းမှာ Registration confirmation link ရောက်မလာခဲ့သေးဘူးဆိုရင် သူသတ်မှတ်ထားတဲ့ ၁၀ မိနစ်မပြည့်မီ နောက်ထပ် ၁၀ မိနစ် – ၁၀ မိနစ်စီ တိုးတောင်းလို့ ရပါတယ် - တကယ်လို့ တိုးမတောင်းခဲ့ရင်တော့ သတ်မှတ်ထားတဲ့ ၁၀ မိနစ်အတွင်းမှာ ကိုယ့်ကိုထုတ်ပေးထားတဲ့ ၁၀ မိနစ်ခံ Email Address ကို ဖျက်သိမ်းသွားမှာဖြစ်ပါတယ် -

( 2 ) OneWayMail

10MinuteMail ထက်စာရင် OneWayMail က ပိုသုံးလို့ ကောင်းတယ်လို့တောင် ကျွန်တော် ထင်မိတယ် – အကြောင်းက တစ်ခါသုံး Email Address လိုလာတဲ့အချိန်မှာ 10MinuteMail လိုမျိုး သူ့ဆိုဒ်ကို သွားစရာမလိုပဲ Registration လုပ်တဲ့နေရာမှာ XYZ@onewaymail.com ဖြစ်ဖြစ် abc@onewaymail.com ဖြစ်ဖြစ် @onewaymail.com ရဲ့ ရှေ့မှာနှစ်သက်ရာ စာလုံးထည့်ပြီး Registration တန်းလုပ်လိုက်လို့ ရပါတယ် – ပြီးရင် Website ကနေ ပြန်လာမယ့် Registration confirmation link ကိုစောင့်ဖို့ http://onewaymail.com/ ကိုသွား အောက်မှာ မြင်ရတဲ့ အတိုင်း ကိုယ်ပေးလိုက်တဲ့ နာမည်ကို @onewaymail.com ရဲ့ ရှေ့က box မှာ ရိုက်ထည့်ပြီး Go လိုက်တာနဲ့ ကိုယ့်ရဲ့ Virtual Mail Box ထဲကို ရောက်သွားပါလိမ့်မယ် -

အထဲရောက်တာနဲ့ Registration confirmation link က အသင့်စောင့်ကြိုနေပြီး အဲ့ကနေ ကိုယ့် Registration ကို အဆုံးသတ်နိုင်ပါပြီ – ( ၃ ) ရက်ကြာပြီးသွားရင်တော့ Inbox ထဲက စာတွေကို OneWayMail က အလိုလျောက် ဖျက်သွားပါလိမ့်မယ် -

( 3 ) TrashMail

TrashMail ကတော့ ကျွန်တော်သုံးဖူးသမျှ တစ်ခါသုံး Email Services တွေ ထဲမှာ Feature အများဆုံး Email Services လို့ကို ဆိုနိုင်ပါတယ် – သူ့ရဲ့ အကောင်းဆုံး အားသာချက်ကတော့ တစ်ခြား Disposable Email Services တွေလိုမျိုး Email address ပေးပြီးရင် သူ့ Website ကိုသွားပြီး Confirmation links ကို စောင့်စရာမလိုဘူး – သူ့ဆီမှာ ကိုယ့်ပေးချင်တဲ့ နာမည်နဲ့ တစ်ခါသုံး Custom Email Address တစ်ခုလုပ်ပြီး – Real Email Address နေရာမှာ ကိုယ့် Email address အစစ်ကိုထည့်ပေးလိုက်ရင် ရပါပြီ

ပြီးရင် ကြိုက်တဲ့ Websites – ဖိုရမ်မှာ Registration လုပ် – Email Address တောင်းရင် ခုနက လုပ်ထားတဲ့ တစ်ခါသုံး Mail Address ကိုထည့်ပေးလိုက်ရင်ရပါပြီ – အဲလိုဆိုရင် ကိုယ် Registration လုပ် လိုက်တဲ့ ဆိုဒ်ကနေပြီး Registration confirmation link ကို တစ်ခါသုံး Mail Address ဆီ လှမ်းပို့ပေးမယ် – အဲလိုရောက်လာတဲ့ စာကို TrashMail ကနေပြီး ကျွန်တော်တို့ရဲ့ Real Email ဆီ Forward ပြန်လုပ်ပေးမယ် – အဲ့ဒီ့နည်းနဲ့ ကိုယ်အမြဲသုံးမယ့် Real Email Address ကို ကာကွယ်နိုင်ပါတယ် – ကိုယ်ဖန်တီးခဲ့တဲ့ တစ်ခါသုံး Mail Address ကိုတော့ ဘယ်နရက်နေရင် ဖျက်ပစ်စေချင်လဲ ဆိုတာကိုပါ အထက်ဖော်ပြပါအတိုင်း စိတ်ကြိုက် သတ်မှတ်ထားနိုင်ပါသေးတယ် -

ဒီအကြောင်းအရာကို ရေးရခြင်းရဲ့ အဓိကရည်ရွယ်ချက်က ကိုယ့်ရဲ့ တန်ဖိုးရှိတဲ့ အမြဲသုံးနေကျ Email Address ကို တန်ဖိုးထားတတ်စေဖို့နဲ့ မလိုလားအပ်ပဲ Inbox ထဲကို ဝင်လာတတ်တဲ့ Spam messages တွေရဲ့ ရန်ကနေ မိသားစုဝင်များ ကာကွယ်နိုင်အောင် ဖြစ်ပါတယ် -

လေ့လာနိုင်သမျှ မျှဝေနိုင်ကြပါစေ

KznT.

Screen Capturing Tools

ဒီနေ့တော့ တော်တော်များများ သိထားပြီးသား အကြောင်းအရာ သေးသေးလေး တစ်ခုကို အကျယ်ချဲ့ပြီး ဆွေးနွေးကြည့်ချင်ပါတယ် - ဖိုရမ်အတွက် တစ်ခြား အကြောင်းအရာ တစ်ခု ရေးနေရာကနေ ဒီအကြောင်းက မရေးလို့ မဖြစ်လို့ အရင်စရေးလိုက်တာပါ - Screen Capturing Tool ဆိုတာ မှန်ရာပြောရရင် ကျွန်တော် ကွန်ပြူတာ စသုံးခဲ့စဉ်ကာလကနေ အချိန်တော်တော်ကြာတဲ့အထိ ဘာမှန်း မသိခဲ့သေးဘူး - သုံးရကောင်းမှန်း မသိတာလည်းပါတယ် - Screen Capturing Tool ဆိုတာထက် တစ်ခုခုကို Screenshot ဖို့ဆိုရင် keyboard မှာပါတဲ့ Prt Sc ဆိုတဲ့ Print screen ကိုပဲ အမြဲ အားကိုးခဲ့တာ 

Window မှာပါတဲ့ Print screen ဆိုတာ ကျွန်တော်တော့ သုံးလို့ရယုံ အဖြစ်ထည့်ထားတဲ့ သဘောလောက်ပဲလို့ ထင်မိတယ် - ဘာလို့လည်းဆို Print screen key ကို သုံးပြီး Screenshot ဖူးသူတိုင်း သိပါလိမ့်မယ် - သူ့ key ကို နှိပ် နောက် mspaint ကို run ကနေ ခေါ် paste လုပ် - ပြန် save အဆင့်က ( ၄ ) ဆင့်လောက် လုပ်နေရတယ် - ဒီကြားထဲ ကိုယ်လုပ်ထားတဲ့ screenshot မှာ တစ်ခြား စာလေး ဘာလေး effect လေး ထပ်ထည့်ချင်ရင် mspaint က အဆင်မပြေတော့ဘူး - ဒါပေမယ့် Windows 7 မှာပါတဲ့ mspaint ကတော့ အရင်ကထက် စာရင် တော်တော်လေး သုံးရ အဆင်ပြေလာတာ သတိထားမိတယ် -

ဘာကြောင့် Screen Capturing Tool ကို သုံးသင့်သလဲ

အဲ့တော့ ကျွန်တော်တို့တွေ Screen Capturing Tools တွေအကြောင်း အကြမ်းဖျဉ်း မိတ်ဆက်ပြီးတဲ့ နောက်မှာ Screen Capturing Tool ကို ဘာကြောင့်/ဘယ်အချိန်မှာ သုံးသင့်လဲဆိုတဲ့ အကြောင်းအရာ က စဉ်းစားဖို့လိုလာပါပြီ - Screen Capturing Tool တွေကို ဖိုရမ်မှာ ဆွေးနွေးချက်တစ်ခုခု စတင်ရေးသားတဲ့ အခါ ကိုယ်ရေးသားတဲ့ အကြောင်းကို ဖတ်ရှုလေ့လာသူတွေ မြင်သာသိလွယ်အောင် သရုပ်ဖော်ပုံတွေနဲ့ ဝေဝေဆာဆာ တင်ပြချင်တဲ့အခါမှာဖြစ်စေ – ဖိုရမ်မိသားစုဝင် တစ်ယောက်ယောက် ကွန်ပြူတာနဲ့ ပတ်သတ်တဲ့ ပြဿနာတစ်ခုခုဖြစ်လို့ ကိုယ်ကိုယ်တိုင် ဝင်ရောက် ကူညီဖြေရှင်းပေး ချင်တဲ့အခါ လုပ်ဆောင်ချက် အကြောင်းအရာကို သိလွယ်မြင်သာအောင် သရုပ်ပြ လမ်းညွှန်ချင်တဲ့ အခါမှာဖြစ်စေ - မိမိကွန်ပြူတာမှာ အခက်အခဲ တစ်စုံတစ်ရာရှိလာလို့ ဖိုရမ်မှာ အကူအညီတောင်းချင်တဲ့ အချိန်မှာ ကူညီပေးမယ့်သူ မြင်သာအောင် errors တွေကို ဖော်ပြချင်တဲ့ အခါမှာဖြစ်စေ Screen Capturing Tool တွေကို အသုံးပြုပါတယ် -

ဥပမာဆိုကြပါစို့ - တစ်စုံတစ်ယောက်က ကျွန်တော် မြန်မာမိသားစုဖိုရမ်ကို မသွားတတ်လို့ လမ်းညွှန်ပေးပါ ခင်ဗျ ဆိုရင် - ကျွန်တော်တို့ ဘယ်လို လမ်းညွှန်ကြမလဲ ?? Browser ကိုဖွင့်ပါ - Address bar မှာ http://www.myanmarfamily.org ဆိုတဲ့ URL ကိုရိုက်ပြီး Enter ခေါက်ပါ - မြန်မာမိသားစုဖိုရမ်ဆိုတဲ့ Webpage ပေါ်လာရင် ဘယ်ဘက်ခြမ်း ခေါင်းစဉ်အောက်နားမှာ ရှိနေတဲ့ ပင်မအချက်အလက်များအောက်က မြန်မာမိသားစုဖိုရမ် ဆိုတဲ့ link ကနေ ဝင်ပါ ဆိုတာမျိုးထက် - အောက်မှာ ဖော်ပြထားတဲ့အတိုင်း Screen Capturing Tool တစ်ခုခုကိုသုံးပြီး သွားရမယ့် နေရာကို Screenshot ဖော်ပြလိုက်တာက ပိုပြီး ထိရောက်မယ် မဟုတ်ပါလား -

ဒီ သဘောတရားက Screen Capturing Tool တွေကို အသုံးပြုရခြင်းရဲ့ အသက်ပါပဲ - Screen Capturing Tool ကို သုံးခြင်းအားဖြင့် အကြောင်းအရာ အများကြီးကို စီကာပတ်ကုံး ပြောပြနေဖို့ မလိုသလို လိုချင်တဲ့ Target ကို လေ့လာသူတွေ အလွယ်တကူနဲ့ နားလည်နိုင်စေပါတယ် - ဒီ သဘောကို အခြေခံပြီး မိသားစုဝင်များလည်း ဖိုရမ်မှာ ကွန်ပြူတာနဲ့ ပတ်သတ်လို့ အခက်အခဲ တစ်ခုခု ရှိလာတဲ့ အချိန် မေးမြန်းတဲ့ အခါ ကျွန်တော့် ကွန်ပြူတာကြီး ဘာဖြစ်သွားမှန်း မသိလို့တို့ / သုံးနေရင်း ဘာ Errors တွေတက်နေမှန်း မသိတော့ဘူး ကူညီပါအုံး ဆိုတဲ့ မေးခွန်းမျိုးတွေ မမေးကြပဲ - လတ်တလော ဖြစ်ပျက်နေတဲ့ အနေအထားကို ဝိုင်းဝန်းကူညီပေးမယ့်သူတွေ မြင်သာအောင် Screenshot နဲ့ တကွ ဖော်ပြပေးကြဖို့အကြံပြုလိုပါတယ် -

အသုံးပြုသင့်သော Screen Capturing Tools များ

Screen Capturing Tools တွေနဲ့ ပတ်သတ်ပြီး တစ်ချိန်က ကျွန်တော် 2010 2011 Ultimate Software Guide for Windows Users ထဲမှာ သုံးဖို့သင့်မယ့် Screen Capturing Tools နှစ်ခုအကြောင်း ကို မိတ်ဆက်ပေးခဲ့ဖူးပါတယ် - ကျွန်တော်ကိုယ်တိုင်လည်း အချိန်တော်တော်များများမှာ စာရေးဖြစ်တိုင်း အဲ့ဒီ့ Tools နှစ်ခုထဲက တစ်ခုမဟုတ် တစ်ခုကို အမြဲသုံးလေ့ ရှိခဲ့တယ် - Snagit နဲ့ FastStone Capture ပေါ့ - အကြမ်းဖျဉ်း သုံးသပ်ရရင် FastStone Capture က ပေါ့ပြီး သုံးရလွယ်တယ် - Snagit က နဲနဲလေးပြီး features ပိုစုံတယ် - သူ့ အားသာချက်နဲ့ သူတော့ ရှိကြတယ် - ဒါပေမယ့် သူတို့နှစ်ခုလုံးဟာ Freeware မဟုတ်ကြဘူး - သုံးချင်ရင် keys တို့ crack တို့ ရှာသုံးရတယ် - keys တို့ crack တို့ဆိုတာ ရှာရတာ ဘာမှ မခက်လှပါဘူး - ဒီအကြောင်းကို အင်တာနက်အတွင်း Software ရှာဖြွေခင်း ဆိုတဲ့ ခေါင်းစဉ်အောက်မှာ ကျွန်တော် တော်တော်များများကို ရေးခဲ့ပြီးပြီ - အလကားမပေးတာတွေထဲက ကိုယ်ဘယ်လိုမှ မတတ်နိုင်တဲ့ Applications အကြီးစားတွေကို Crack လုပ်ပြီးသုံးတာ သဘာဝကျပေမယ့် ကိုယ်တတ်နိုင်နေတဲ့ Applications အသေးအဖွဲလေးကအစ အလကားရအောင် လုပ်ယူပြီး သုံးတယ်ဆိုတာ လူ့အဖွဲ့အစည်းတစ်ခုရဲ့ ရပ်တည်ရှင်သန်မှုကို ဖျက်ဆီးရာကျပါတယ် - ဒါ့ကြောင့် စွမ်းဆောင်ရည်ချင်း တူမယ်ဆိုရင် Shareware ကို crack လုပ်ပြီး သုံးမယ့် အစား freeware လေးတွေ ပြောင်းသုံးကြည့်နိုင်ကြစေဖို့ Screen Capturing Tools အမျိုးအစားများစွာထဲက အလကားရပြီး စွမ်းဆောင်ရည်ကောင်းတဲ့ freeware တစ်ချို့နဲ့ မိတ်ဆက်ပေးလိုက်ပါတယ် -

( 1 ) Shotty

Shotty ကိုသုံးဖြစ်တာ သိပ်မကြာသေးဘူး - ဒါပေမယ့် freeware ဆိုတဲ့ နာမည်နဲ့ မလိုက်အောင် လိုချင်တာ အားလုံးနီးပါး ပြည့်စုံနေတော့ သဘောကျမိတယ် - Desktop တစ်ခုလုံးကို Screenshot မလား - Screen ပေါ်က rectangular region ကိုပဲ Screenshot မလား - Window တစ်ခုချင်း ကြိုက်ရာကိုပဲ ရွေးပြီး Screenshot မလား စိတ်ကြိုက် ရိုက်ယူလို့ ရတယ် - Screenshot ပြီးရင် သူပေးထားတဲ့ hosting ငါးခုထဲက နှစ်သက်ရာ တစ်ခုခုဆီကို တန်းပြီး upload တင်နိုင်ပါသေးတယ် -

သူ့ရဲ့ အကြီးမားဆုံး အားသာချက်တစ်ခုကတော့ screen captures လုပ်တဲ့ နေရာမှာ Windows Aero Glass effects ရအောင် captures လုပ်ပေးနိုင်တာပါ - အသေးစိတ် အချက်အလက်တွေကို ဒီနေရာမှာ သွားရောက်လေ့လာနိုင်ပါတယ် -

( 2 ) PicPick

PicPick ကလည်း Personal use နဲ့ non-profit educational use အတွက် Free ပေးထားတဲ့ Screen Capturing Tool တစ်ခုပါ - သူ့ရဲ့ အပြင်အဆင်က mspaint နဲ့ ဆင်ပြီး mspaint ထက် သုံးရ ပိုကောင်းပါတယ် - သူ့ရဲ့ အားသာချက်က တစ်ခြား Tools တွေကို Registry နဲ့ System folder ထဲထိ access မလုပ်တဲ့ အတွက် သူ့ဖိုင်ကို USB ထဲထည့်သွားပြီး ရောက်ရာ ကွန်ပြူတာမှာ install လုပ်စရာ မလိုပဲ အသင့်သုံးနိုင်ပါတယ် - တစ်ခြား အသေးစိတ် အချက်အလက်တွေကို ဒီနေရာမှာ လေ့လာနိုင်ပါတယ်။

( 3 ) 7capture

Windows XP ရဲ့ program windows တွေမှာ rounded corners တွေ ရှိသလို တကယ်လို့ Windows 7 - Vista မှာ Aero ကို Enabled ပေးသုံးနေတာဆိုရင်လည်း အောက်ဖော်ပြပါအတိုင်း program windows တွေမှာ rounded corners ရှိတာ မိသားစုဝင်များ သတိပြုမိကြပါလိမ့်မယ် -

အဲ့ဒီ့ rounded corners တွေကို ကျွန်တော်တို့တွေ ပုံမှန် သုံးနေကျ print screen key ကိုသုံးပြီးဖြစ်ဖြစ် - တစ်ခြား အရည်အသွေးနိမ့်တဲ့ Screen capturing tools တစ်ခုခုကို သုံးပြီး capture လုပ်ရင် ဖြစ်ဖြစ် “rounded corners” တွေကို တိတိကျကျ Capture မလုပ်နိုင်ပါဘူး - ဒါ့ကြောင့် ပုံတွေနဲ့ ပတ်သတ်ပြီး တိတိကျကျ အသေးစိတ် Screenshot ချင်တဲ့အခါ အပေါ်မှာ ဖော်ပြပြီးခဲ့တဲ့ Shotty - Snagit နဲ့ 7capture စတဲ့ အရည်အသွေးမြင့် Screen Capturing Tools တွေကို အသုံးပြုသင့်ပါတယ် - Normal Screen Capture နဲ့ Semi-Transparent Screen Capture ရဲ့ ကွာခြားချက်ကို အောက်ဖော်ပြပါ ပုံတွေမှာ အရည်အသွေးချင်း လေ့လာနိုင်ပါတယ် -

Normal Screen Capture

Semi-Transparent Screen Capture

( 4 ) Greenshot

Greenshot ဟာ Windows အတွက် open-source screen capture tool တစ်ခုဖြစ်ပြီး တစ်ခြား Screen Capturing Tools တွေနည်းပါး စွမ်းဆောင်ရည်ရှိတဲ့ freeware တစ်ခု ဖြစ်ပါတယ် - တစ်ခြား Screen Capturing Tools တွေလိုပဲ Screenshot လုပ်ပြီးသွားရင် ဖြတ်ညှပ်ကပ် လုပ်တာ လိုတာပေါင်းဖြည့်တာ စာထည့်တာ စသဖြင့် အားလုံးလုပ်ဆောင်နိုင်ပါတယ် -

( 5 ) Office 2010

တစ်ချို့ သတိမထားမိကြတာလည်း ဖြစ်ကောင်း ဖြစ်ပါလိမ့်မယ် - ကျွန်တော်တို့ သုံးနေတဲ့ Office 2010 မှာလည်း built-in screen clipping utility ပါပါတယ် - နေရာတစ်ခုချင်းစီကို မြင်သာအောင် ဖော်ပြလိုက်ပါတယ် -

Screen clipping in Word 2010

Screen clipping in PowerPoint 2010

Screen clipping in Onenote 2010

အောက်မှာ ဖော်ပြထားတဲ့ Video ကတော့ Onenote2010 မှာပါတဲ့ built-in screen clipping utility ကို အသုံးပြုနည်းပါ -

Screen Capturing Tools တွေ အကြောင်းနဲ့ ပတ်သတ်လို့တော့ ဒီလောက်ပါပဲ - ခု ဖော်ပြခဲ့သလောက်ဆို လေ့လာသူ မိသားစုဝင်များ ဘယ်လို Screen Capturing Tool ကို အသုံးပြုသင့်မယ် - ဘာ့ကြောင့် အသုံးပြုသင့်တယ်ဆိုတာ သုံးသပ်နိုင်ကြလိမ့်မယ်လို့ မျှော်လင့်မိပါတယ် -

လေ့လာနိုင်သမျှ မျှဝေနိုင်ကြပါစေ -

KznT.

How can i contribute to Myanmarfamily ?

ကျွန်တော် မြန်မာမိသားစု ဖိုရမ်ကို ရောက်တာ တစ်နှစ်ကျော်ခဲ့ပြီ - ဖိုရမ်မှာ စာရေးရင်း လိုအပ်နေတာလေးတွေ အချိန်တိုင်း လိုက်ကြည့်ဖြစ်တယ် - လိုအပ်နေတာတွေကတော့ အများကြီးပေါ့လေ - ဒါပေမယ့် ဖိုရမ်တစ်ခု ရပ်တည်ရာမှာ မဖြစ်မနေ လိုအပ်တဲ့ အကြောင်းအရာလေးတစ်ခုကို ဖိုရမ်ဝင် မိသားစုများ သိရှိနိုင်အောင် သတိထားမိနိုင်အောင် အကြောင်းအရာ အများကြီးထဲက အချက်တစ်ချို့ကို ဒီနေရာမှာ ဖော်ပြပေးချင်ပါတယ် - အဲ့တာတွေအားလုံးရဲ့ အနှစ်ချုပ်ကတော့ -

ဖိုရမ်တစ်ခုရဲ့ သဘောသဘာဝကို မိသားစုဝင်တော်တော်များများက အမေးအဖြေ ဆိုဒ်တစ်ခုလို ထင်နေကြတယ် - ဖိုရမ်ဆိုတာ အမေးအဖြေလုပ်ဖို့ တစ်ခုတည်း အတွက် တည်ထောင်ထားတဲ့ နေရာ မဟုတ်ပါဘူး - မသိတာလာမေး ပြီးရင်ပြန်ဆိုတာ အမေးအဖြေ ဆိုဒ်တွေရဲ့ သဘောသဘာဝပါ - ဖိုရမ်က အဲလိုဆိုဒ်တွေနဲ့ ရပ်တည်မှုခြင်း မတူပါဘူး - ဖိုရမ်ဆိုတာ လူအားလုံးရဲ့ အသိပညာ အတွေးအခေါ်နဲ့ အတွေ့အကြုံတွေကို စုပေါင်း မျှဝေတဲ့နေရာ - ကိုယ်သိထား တာတွေကို အခြေခံကျကျ ပြောပြမယ် - လေ့လာနိုင်မယ့် နေရာကောင်းတွေ လက်ဆင့်ကမ်းမယ် - တစ်ယောက်ယောက် အခက်အခဲရှိရင် ကိုယ်နားလည်ထားသလောက် ဝင်ပြောပေးမယ် - ကိုယ်မသိသေးတာတွေကိုလည်း တစ်ခြားသူတွေရဲ့ အတွေ့အကြုံ မျှဝေမှုတွေကနေ ရယူမယ် - ဒါက ဖိုရမ်တစ်ခုရဲ့ အသက်ပါ - ဒါကို မိသားစုဝင်အများစု အခုထိ ရုပ်လုံးမကွဲကြ သေးဘူး -

ကျွန်တော်တို့ ဖိုရမ်အပါအဝင် မြန်မာဖိုရမ်တော်တော်များများကို လိုက်ကြည့်ရင် ဆွေးနွေးချက်နဲ့ အမေးအဖြေဆို တစ်နေ့နဲ့ တစ်နေ့ ဆွေးနွေးချက်ထက် အမေးအဖြေက နေ့တိုင်းလိုလို ပိုတက်ပြီး ဆွေးနွေးချက်က ပျောက်ပျောက်နေတာ တွေ့နေရတယ် - အဲတာတွေက အားမနာတမ်း ပြောရရင် အလားအလာ မကောင်းဘူး - ဘာလို့လည်းဆိုတော့ -

ပြဿနာတစ်ခုကို ပြေလည်စေတာဟာ ပြဿနာ အားလုံးကို ပြေလည်စေမယ့် ဖြေရှင်းချက် မဟုတ်လို့ပါပဲ

ဝလုံးရေးတတ်ချင်တဲ့ ကလေးတစ်ယောက် ဝလုံးရေးတတ်တဲ့ ကျွန်တော်တို့ဆီကို ဝလုံးရေးနည်း လာသင်ပြီ ဆိုကြပါစို့ - ကျွန်တော်တို့ သူ့ကို ဝလုံးရေးတတ်သွားအောင် ဝလုံးရေးနည်း ဘယ်လိုသင်ပေးကြမလဲ ??

- ကျောက်သင်ပုန်း ကျောက်တံယူ - ကလေးကို ဒီမှာကြည့် "ဦး"/"ဒေါ်လေး" ဆွဲတာ - ပြီးရင် "ဦး"/"ဒေါ်လေး" ဆွဲသလို လိုက်ဆွဲဆိုပြီး သင်ပေးမလား ??
- ကျောက်သင်ပုန်း ပေါ်မှာ ကျောက်တံကို သူ့လက်နဲ့ သူ့ဘာသာသူ ကိုင်ခိုင်းပြီး ကိုယ်က ဘေးကနေ ပါးစပ်ပြောနဲ့ ဟိုလိုလုပ် ဒီလိုလုပ်နဲ့ သင်မလား ??
- ကျောက်သင်ပုန်း ကျောက်တံပေါ်မှာ သူ့လက်ကို ကိုယ့်လက်နဲ့ ထပ်ကိုင် စနစ်တကျ နေသားချပေးပြီး - ညာလက်နဲ့ ဝလုံးရေးရင် မှားတတ်တဲ့ အမှား - ဘယ်လက်နဲ့ ဝလုံးရေးရင် မှားတတ်တဲ့ အမှား - ခဲတံ အနေအထားနဲ့ လက်ကိုင်အသုံးပြုပုံ - လက်ကောက်ဝက် အနေအထားနဲ့ စာလုံးဆက်စပ်မှု ဆိုတဲ့ ဝလုံးရေးဆွဲနည်း ဥပဒေသတွေ အားလုံးကို နားလည်လွယ်အောင် ရှင်းပြ သင်ပေးမလား ??

အဲ့တော့ ဘယ်သင်ကြားနည်းကို ကျွန်တော်တို့ ရွေးကြမလဲ ??

Contributors များ၏ အခန်းကဏ္ဍ

ဝလုံးရေးနည်း ဆိုတာ တကယ်တော့ ကျွန်တော်တို့ စာရေးတတ် ဖတ်တတ်လာအောင် သင်ခဲ့ရတဲ့ ပညာရပ်တစ်ခုလုံးရဲ့ အဦးဆုံး အခြေခံ - ဝလုံးရေးနည်းတောင် ကလေးတစ်ယောက် စနစ်တကျ တတ်မြောက်သွားဖို့ ဒီလောက် အချိန်ပေးရရင် ဖိုရမ်ဆိုတဲ့ ပညာရပ်စုံတဲ့ နယ်ပယ်တစ်ခုမှာ မသိနားမလည်သေးတဲ့ လေ့လာသူတွေကို လက်တွဲခေါ်နိုင်ဖို့ ကျွန်တော်တို့ ဒီ့ထက်ပိုပြီး အချိန်ပေးကြရမယ် -

( ၁ ) ကူညီလိုစိတ်မွေးပါ

လူတိုင်း လူတိုင်း မွေးကတည်းက ပါလာတာ ပျင်းတဲ့ရောဂါ - လူတိုင်း ပျင်းတတ်တယ် - ကျွန်တော်လည်း ပျင်းတယ် - တစ်ခုခု သိချင်တယ် ဒါပေမယ့် ရှာရမှာ ပျင်းတယ် - တစ်ခုခု နားလည်ချင်တယ် ဒါပေမယ့် ဖတ်ရမှာ ပျင်းတယ် - ဖိုရမ်ကို ရောက်လာတော့ မေးခွန်းတွေ အများကြီး တွေ့ရတယ် - အဲ့ကျတော့လည်း ဖြေဖို့ ပျင်းပြန်ရော - ပျင်းတယ်ဆိုတာထက် တစ်ချို့ အကြောင်းအရာ တွေက မှန်ရာပြောရရင် ကိုယ်တိုင်လည်း အပေါ်ယံကြောလောက်ပဲ သိတာ - အတွင်းကျကျ မသိဘူး - အဲတာကို ပြန်ရှင်းဖို့ဆိုရင် အတွင်းကျကျ သိနိုင်ဖို့ စာပြန်လိုက်ဖတ်ရတယ် - အဲ့ကျတော့ ပျင်းလို့ မရတော့ဘူး - ဒါကို ကျွန်တော်တို့က ကူညီလိုစိတ် မွေးတယ်လို့ ခေါ်တယ် - ကိုယ့် အခက်အခဲ မဟုတ်ပေမယ့် တစ်ခြားသူတစ်ယောက်ရဲ့ အခက်အခဲကို တတ်နိုင်မယ်ဆိုရင် ကူညီနိုင်ဖို့ ကြိုးစားကြည့်ပါ - ငါက ဘာမှမှ မသိတာဆိုတဲ့ စကားလုံးနဲ့ ကိုယ့်ကိုယ်ကိုယ် အကျဉ်းချ မပစ်လိုက်ပါနဲ့ - ငါက ဘာမှမှ မသိတာဆိုတဲ့ အတွေးမျိုး တွေးတတ်ရင် ငါသူတို့ထက် စာပိုဖတ်ဖြစ်ဖို့လိုတယ်ဆိုတဲ့ အတွေးမျိုး တွေးမိဖို့လည်း သိပ်အရေးကြီးပါတယ် - ဖိုရမ်ကို ရောက်ဖြစ်တုန်းခဏ အင်တာနက် လက်တစ်ကမ်း ရှိတုန်းအချိန်မှာ ကိုယ်သိထားတာတွေထဲက ဘယ်အကြောင်းအရာပဲ ဖြစ်ပါစေ တစ်ခုတစ်လေလောက် မျှဝေနိုင်ဖို့ ကြိုးစားကြည့်ပါ - အဲ့ဒီ့ မျှဝေမှုကနေ လက်ဆုပ်လက်ကိုင် ပြနိုင်စရာ ဆုလာဒ်ကောင်းတစ်ခု ရဖို့ မသေချာပေမယ့် လိုအပ်လေ့လာ သူတွေကနေပေးမယ့် မေတ္တာတရားကိုတော့ အတိုင်းအဆမရှိ ရရှိပါလိမ့်မယ်။

( ၂ ) အလှမ်းကျယ်ပါစေ သို့သော် ...

လူတိုင်း အောင်မြင်ချင်တာပဲ - လူတိုင်း ကြီးကျယ်မြင့်မြတ်ချင်တာပဲ - လူတိုင်း လူထင်ကြီး မခံရရင်တောင် လူထင်သေးမခံချင် ကြတဲ့ သူချည်းပဲ - ဒီစိတ်မျိုး ကျွန်တော့်မှာ ရိှသလို မိသားစုဝင်တိုင်းမှာလည်း ရှိတယ် - ဒါပေမယ့် အဲ့စိတ်ကို ခုခေတ် လူငယ်တွေမှာ ရှိနေတဲ့ စိတ်နဲ့ ချိန်ထိုးကြည့်တော့ အများကြီး လွဲမှားနေတာ သွားတွေ့ရတယ် - မြန်မာလူငယ်တွေ အောင်မြင်ချင်တာ ကြီးကျယ်မြင့်မြတ်ချင်တာတော့ တအားပဲ - ဒါပေမယ့် တော်တော်များများ က ဖြတ်လမ်းနည်းနဲ့ အောင်မြင်ချင်နေကြတယ် - ဥပမာ ပေးရရင် Computer နဲ့ ပတ်သတ်ပြီး ဆိုကြပါစို့ Programmers တို့ Game developers တို့ Web designers တို့ စသဖြင့် အောင်မြင်တဲ့ သူတွေ တွေ့ရင် သူတို့လို ဖြစ်ချင်လိုက်ကြတာ တအား - သူတို့လို ဖြစ်ချင်ရင် သူတို့ဘယ်လို ကြိုးစားခဲ့လဲ သူတို့ ဒီလို ဖြစ်လာဖို့ ဘယ်လောက် ရင်းနှီးပေးဆပ်ခဲ့ရလဲ - အဲတာတွေသိပြီးရင် ငါဘယ်လို ပြင်ဆင်သင့်သလဲ ဆိုတာ အရင်မလေ့လာဘူး - ဖြတ်လမ်းနည်းနဲ့ အခြေခံဘာမှမသိပဲ ကိုယ့်ကိုယ်ဆရာတစ်ဆူလို အထင်ခံ ရအောင် လုပ်ချင်နေကြတယ် - ပြောရရင် အလှမ်းကျယ်ပြီး အလယ်လပ် နေကြတာပေါ့ - ဒီလိုဖြစ်နေတာ လူငယ်တွေရဲ့ အပြစ်မဟုတ်ဘူး - အဲတာ လူကြီးတွေရဲ့ အပြစ် - ဘာလို့လည်းဆို တတ်ပြီးသိပြီးသား လူတွေက မတတ်သေး မသိသေးသူတွေ လေ့လာနိုင်အောင် အခြေခံကို ပြန်ဆင်းပြီး ဘယ်သူမှ တော်ယုံ မရှင်းပြကြတော့ဘူး - ကျွန်တော် ကွန်ပြူတာနဲ့ ပတ်သတ်ခဲ့တဲ့ ကာလတစ်လျှောက်မှာ ဘာမှမဟုတ်တဲ့ အခြေခံလေးတွေကို မြန်မာလို မဖတ်ရပဲ - အင်္ဂလိပ်လို လိုက်ဖတ်နေရတာ အများကြီး - အင်္ဂလိပ်လိုဖတ်ရတာ ဘာမှ မဖြစ်ပါဘူး - မြန်မာလူမျိုး အဲ့လောက် အင်္ဂလိပ်စာ ညံ့တဲ့သူ တစ်ယောက်မှ မရှိဘူး - အားလုံး ဖတ်နိုင်တယ် - ဒါပေမယ့် သိထားဖို့ ကောင်းတာ ကျုပ်တို့ ခု အင်္ဂလိပ်လိုဖတ်နေတဲ့ စာတွေထဲက တစ်ချို့ အကြောင်းအရာတွေ ဟာ သူများနိုင်ငံမှာ အခြေခံ အဆင့်လောက်တည်းက သိခဲ့တာတွေဗျ - ဒါတွေ ဘာလို့ ကျွန်တော်တို့ မသိခဲ့လဲ - ငါ့တုန်းကလည်း ဒီလိုပဲ အင်္ဂလိပ်လို ဖတ်ခဲ့တာပဲ - မင်းသိချင်ရင်လည်း အင်္ဂလိပ်ဖတ်ပေါ့ ဆိုတဲ့ လူကြီးတွေကြောင့် ကျွန်တော်တို့ သိသင့်တဲ့ အရွယ်မှာ ဒီ အခြေခံ အဆင့်တွေကို မသိခဲ့တာ - ဒါတွေကို အခုမှ ဒရောသောပါး လိုက်ဖတ်နေရတော့ သူများနိုင်ငံကသူတွေ ဟော တစ်စင်း ဟောတစ်စင်းနဲ့ အာကာသပေါ် ယာဉ်ပျံတွေ တက်နေတဲ့ အချိန် ဒီကလူတွေက ခုချိန်ထိ Browser ဆိုသည်မှာ - Torrent ဆိုသည်မှာ လုပ်နေရတယ် - ကျွန်တော်တို့တွေ Basic မရှိပဲ Advance ကို ကျော်တက်ချင်လို့ မရဘူး - အဲတာကို မမေ့ကြပါနဲ့ - မြန်မာလူမျိုးထဲမှာ Advance ပိုင်းကို ကောင်းကောင်းရေးနိုင်တဲ့သူတွေ အများကြီး ရှိတယ် - ဒါပေမယ့် Advance ပိုင်းကို ရောက်ပြီးသားသူတွေဆိုတာ တော်တော်များများ ဘယ်သူမှ Basic ပိုင်းကိုပြန်ရေးဖို့ စိတ်မကူးချင်ကြတော့ဘူး - ဒါ သူတို့ အပြစ်မဟုတ်ဘူး - သူတို့က Advance ပိုင်းကို ကောင်းကောင်းရေးနိုင်နေပြီမို့လို့ အလယ်အလတ် သိနေတဲ့ သူတွေကို Advance ပိုင်းကို ဆွဲခေါ်သွားလိမ့်မယ် - ကျွန်တော်တို့က ကိုယ့်လောက်မသိသေးတဲ့ လူငယ်တွေကို အလယ်အလတ် လောက် နားလည်တဲ့ အဆင့်ထိ Basic ကနေဆွဲခေါ်မယ် - အဲ့တာကြောင့် ဘယ်အကြောင်းအရာ ကိုရေးရေး တတ်နိုင်သမျှ အသေးစိတ်ပြီး ရေးပေးကြပါ - ကျွန်တော်တို့ လူမျိုးတွေ အဓိက လိုနေတာ အခြေခံပါ - အခြေခံကို နားလည်သွားတဲ့ လူငယ်တွေဟာ Advance ပိုင်းကို ဘယ်လိုသွားရမယ်ဆိုတာ သူတို့ကိုယ်သူတို့ ပိုင်းဖြတ်သွားနိုင်ပါလိမ့်မယ်။ ဒါ့ကြောင့် အလှမ်းကျယ်ကျယ် လှမ်းဖို့ ကြံတဲ့ အခါတိုင်း အလယ်မလပ်စေဖို့ ကိုပါ ဂရုပြုကြဖို့ အသိပေး လိုက်ပါရစေ။

( ၃ ) တို့ကနန်း ဆိတ်ကနန်း မလုပ်ပါနှင့်

တစ်ချို့က ကူညီချင်တယ်ဆိုတာထက် - ဒါလေးများ ငါတောင်သိတယ်ဆိုတဲ့ မသိစိတ်က ပညာဝင်ပြချင်တာ - ဒါလေးများကွာ ဟိုဟာကို ဟိုလိုလုပ်ပြီး ဒီဟာကို ဒီလိုလုပ်လိုက်ပေါ့ ဆိုတဲ့ နှစ်ကြောင်းလောက် ဝင်ရေးတာဟာ ကိုယ့်အတွက် ဘာမှမပင်ပန်းပေမယ့် လေ့လာသူကို ဇဝေဇဝါဖြစ်စေသလို - သိမ်ငယ်စိတ်ပါ စိုးမိုးစေပါတယ် - အဲလို တို့ကနန်း ဆိတ်ကနန်း ဆွေးနွေးမှုတွေကြောင့် နောက် ဆက်တွဲဖြစ်လာတဲ့ ပြဿနာတွေက Thread တွေ ဖောင်းပွ တယ် - တကယ်တန်ဖိုးရှိတဲ့ Thread တစ်ခုကို တို့ကနန်း ဆိတ်ကနန်း Thread က ဖုံးပြီး နောက်လူတွေကလည်း တို့ကနန်း ဆိတ်ကနန်းကိုပဲ အဟုတ်လိုထင် - သူတို့ဆွေးနွေးတဲ့ အချိန်ကျရင်လည်း တို့ကနန်း ဆိတ်ကနန်းတွေပဲ လုပ်လာကြ - ပြည့်ပြည့်စုံစုံ ဝင်ပြောပေးတ့ဲသူကပဲ ဆရာကြီး ဝင်လုပ်သလိုလို - လူ့စိတ်က ကောင်းတာမြင်ရင်သာ အတုခိုးဖို့ ခက်တာ မကောင်းတာ မြင်ရင်ကျ မကောင်းမှန်း သိနေတာတောင် အလိုလို အတုခိုးမိလျက်သွား ဖြစ်နေကြရော - သိချင်လို့ မေးတဲ့လူခမျာလည်း အေးလေ ငါကလည်း ဒါလေးတောင် မသိဘူး - သူတို့ပြောတော့လည်း လွယ်လွယ်လေးလိုပဲ ဆိုတဲ့ အတွေးနဲ့ ဖိုရမ်ကနေ Reply သာရသွားတယ် သိချင်တာကို ဂဃနဏ မသိရ - ဘာလုပ်ရမှန်းမသိပဲ လေ့လာချင်စိတ်ကုန်ပြီး စိတ်ဓာတ်ပျက်သွားတတ်ကြတယ် - အဲ့တာကြောင့် မိသားစုဝင်များ မေးမြန်းချက် အကြောင်းအရာ တစ်ခုနဲ့ ပတ်သတ်လို့ ဝင်ရောက်ဆွေးနွေးချင်တာဖြစ်ဖြစ် - တစ်ခြားသူ ဆွေးနွေးထားတာ မရှိသေးလို့ ( သို့တည်းမဟုတ် ) ဆွေးနွေးထားတာ မတွေ့မိလို့ ကိုယ်ကစပြီး ဆွေးနွေးချင်ပြီဆိုရင် တတ်နိုင်သလောက် တို့ကနန်း ဆိတ်ကနန်း မလုပ်ကြပါနဲ့ - မရေးကြပါနဲ့ - ကိုယ်တိုင်လည်း မသိ - လေ့လာ ရမှာလည်း ပျင်းတယ်ဆိုရင် တို့ကနန်း ဆိတ်ကနန်း ဝင်ဆွေးနွေးမယ့် အစား လက်ရှောင် နေလိုက်ပါ - ဒီစကားက မသိရင် ဝင်မရေးရဘူးလို့ ဆိုလိုတာ မဟုတ်ပါဘူး - ကိုယ့်စိတ်က တစ်ခုခု ပြောပြလိုက်ချင်တယ် - ကူညီလိုက်ချင်တယ်ဆိုတာ သေချာရင် တစ်ခြားသူအတွက်လည်း တကယ်အကျိုးရှိအောင် ကိုယ်သိထားတာကို စာလေးနည်းနည်းပြန်ဖတ် အကိုးအကားလေးနဲ့ ဆွေးနွေးပေးပါ - နည်းနည်းလောက် သိထားတယ်ဆိုရင် ကိုယ်သိထားသလောက်ကို တိတိကျကျ ချပြပြီး - ပြည့်ပြည့်စုံစုံဆွေးနွေး ချင်တယ်ဆိုရင်တော့ သိထားတာကို နောက်ထပ် အကိုးအကား လေ့လာနိုင် မယ့် နေရာတွေ - Screenshots တွေ Screencasts တွေနဲ့ပါ စုပေါင်းပြီး ဆွေးနွေးပေးကြ စေလိုပါတယ်။

( ၄ ) လူထင်ကြီး မခံရသည်ကို မြတ်နိုးပါ

ခေါင်းစဉ်ကို ဖတ်ရင် နည်းနည်းထူးဆန်းနေလိမ့်မယ် - ကျွန်တော် ကြုံခဲ့ဖူးတဲ့ လူတော်တော်များများဟာ သူတို့ ဘာပဲလုပ်လုပ် လူထင်ကြီးခံရအောင် လုပ်မယ်ဆိုတဲ့ ရည်ရွယ်ချက်နဲ့ အလုပ်တစ်ခုကို လုပ်တယ်ဆိုတာမျိုး မရှိသလောက်ရှားကြတယ် - ဒါပေမယ့် လူ့စိတ်ဆိုတာ ဆန်းတယ် - လူထင်ကြီးခံရအောင် ကျွန်တော်တို့ လုပ်နေကြတာ မဟုတ်ပေမယ့် အခြားဘက်မှာ ကိုယ့်မသိစိတ်က ကိုယ်တစ်ခုခု လုပ်လိုက်ရင် လူထင်သေးခံရမလား ဆိုတဲ့ ကြောက်စိတ် အမြဲရှိနေတယ် - အဲ့စိတ်ကြောင့်ပဲ လူထင်သေးမခံရအောင် လုပ်ရင်းနဲ့ နောက်ပိုင်းမှာ လူထင်ကြီးခံရအောင် မသိစိတ်က လုပ်မိလျက်သား ဖြစ်သွားတတ်ပါတယ် - ဘာလို့လည်းဆိုတော့ လူထင်သေးမခံရအောင် လုပ်ရတာက ခက်ပြီး - လူထင်ကြီးခံရအောင် လုပ်ရတာက သိပ်လွယ်လို့ပါ - ခက်တာဆိုရင် လူ့သဘာဝက ဘယ်သူမှ အပင်ပန်းခံပြီး နေ့စဉ်ရက်ဆက် မကြိုးစားချင်ဘူး - အဲ့ဒီ့ စိတ်ကို ဦးစားပေးမိတာတွေ များလာတဲ့ အခါ နောက်ပိုင်းကိုယ့်ရဲ့ လုပ်ဆောင်ချက်တွေက လူထင်သေးမခံရအောင် ကြိုးစားနေတဲ့ စိတ်မျိုးကနေ ငါဟာ မသိတာ မရှိဘူး - သူတို့ ဘာမေးမေး ငါသိတယ်ဆိုတဲ့ ပုံစံမျိုး လူထင်ကြီးခံရအောင် လုပ်ဆောင်နေတဲ့ လူတစ်ယောက်အဖြစ် ပုံသွင်းခံလိုက်ရတယ် - အဲ့နောက်မှာ ဘာတြွေဖစ်လာမလဲဆိုတော့ ကိုယ် လူထင်သေးမခံရအောင် ကြိုးစားခဲ့စဉ် တစ်ချိန်တုန်းက ကိုယ့်ကို တစ်ခဲနက် အားပေးထောက်ခံခဲ့တဲ့ သူတွေအားလုံး ကိုယ့်ကို စွန့်ခွာသွားတာ ခံရမယ် - လူတွေရဲ့ အထင်ကြီးတာ ခံရပြီး အမြင့်ကို ရောက်တဲ့ အချိန်ကျတော့မှာ ကိုယ့်ကို စွန့်ခွာသွားတာခံရတော့ အမြင့်ကိုရောက်လေ အကျနာလေ ဆိုတဲ့ စကားက ပေါ်လာတယ် - တကယ်တော့ ကျွန်တော်တို့ လူထင်ကြီး ခံရသည် ဖြစ်စေ - မခံရသည်ဖြစ်စေ ကိုယ့်လုပ်ဆောင်ချက် ကိုယ်တတ်နိုင်သလောက် အကောင်းဆုံး ကြိုးစားနေဖို့ပဲ လိုပါတယ် - လူထင်ကြီး မခံရတာ ပြဿနာ မရှိပါဘူး - ဖြစ်နိုင်ရင် လူထင်ကြီးမခံရတာလေးကိုပဲ မြတ်မြတ်နိုးနိုး ဖက်တွယ်ပြီး ကိုယ်လုပ်စရာ ရှိတာတွေကိုပဲ အကောင်းဆုံး လုပ်ဆောင်ဖြစ်အောင် ကျွန်တော်တို့ Contributors တွေ ကြိုးစားနေကြဖို့ပဲ လိုပါတယ်။

( ၅ ) လူမကြောက်ပါနှင့်

ဒီအကြောင်းကိုတော့ ပြောချင်ခဲ့တာ တော်တော်ကိုကြာပါပြီ - ဖိုရမ်မှာ မိသားစုဝင် တစ်ယောက်ယောက် ဆွေးနွေးချက်တစ်ခု စရေးတော့မယ်ဆိုရင် ဆွေးနွေးချက် မစခင်တည်းက -

ကျွန်တော်/ကျွန်မကတော့ ဖိုရမ်မှာ အခုမှ စရေးဖူးတာပါ - အရင်က တစ်ခါမှ မရေးခဲ့ဖူးတာမို့လို့ အမှားပါရင် ခွင့်လွှတ်ပေးစေ ချင်ပါတယ် - ခုပြောမယ့် အကြောင်းကို သိထားပြီးသူလည်း ရှိပါလိမ့်မယ် - ဒါပေမယ့် မသိသေးတဲ့သူတွေ အတွက်ပါ - သိပြီးပြီး သူများအတွက် မရည်ရွယ်ပါဘူး - နားလည်ပြီးသူများ ကျော်သွားနိုင်ပါတယ် - အမှားတွေပါရင်လည်း ခွင့်လွှတ်ပေးပါ

စသဖြင့် ... အကြောင်းအရာတစ်ခု အစမပျိုးခင်တည်းက တောင်းပန်စကားတွေ အရမ်းများနေတာ သတိထားမိပါတယ် - ကျွန်တော် မိသားစုဝင်များကို အသိပေးချင်တာ ဖိုရမ်ဟာ စာစစ်ဌာန မဟုတ်ပါဘူး - တစ်ခြားဖိုရမ်မှာ ဘယ်လို ကြီးကြပ်တယ် ကျွန်တော် မသိပေမယ့် ကျွန်တော်တို့ ဖိုရမ်မှာ သိစေတတ်စေ နားလည်စေလိုတဲ့ စေတနာနဲ့ ကိုယ်တိုင်အချိန်ပေးပြီး အားတတ်သရော ရေးတင်ထားတဲ့ စာကို ဘယ် အုပ်ချုပ် ကြီးကြပ်သူတွေကမှ မျက်လုံးဒေါက်ထောက်ကြည့်ပြီး အမှားမရှာပါဘူး - ရေးပါ လွတ်လွတ်လပ်လပ် ရေးပါ - ပွင့်ပွင့်လင်းလင်း ဆွေးနွေးပါ - မိသားစုစိတ်ဓာတ်နဲ့ ရင်းရင်းနှီးနှီး နွေးနွေးထွေးထွေး အမှားတွေ့ခ့ဲရင်လည်း ထောက်ပြပါ - လူကြောက်ဖို့ မလိုပါဘူး - တကယ်လို့ ကိုယ့်ဘက်က စေတနာအပြည့်နဲ့ တတ်စွမ်း သလောက် အချိန်ပေးပြီး ကိုယ်တိုင် ဆွေးနွေးပေးနေတာကို ကဖျက်ယဖျက်သဘောနဲ့ ပညာဝင်ပြချင်တဲ့သူတွေ့ရင် ကျွန်တော်တို့ အုပ်ချုပ် ကြီးကြပ်သူတွေရော မိသားစုဝင်တွေရော အားလုံး အမဲဖျက်သလို ဖျက်ပေးမယ် - လုံးဝ စိတ်မပူပါနဲ့ - စေတနာ မှန်ဖို့ပဲ လိုပါတယ် -

အနှစ်ချုပ်အနေနဲ့ Contributors များရဲ့ အခန်းကဏ္ဍမှာ Contributors အားလုံးကို ကျွန်တော် နောက်ဆုံး အကြံပြုချင်တာ ကတော့ -

ပြဿနာအားလုံးကို ပြေလည်စေမယ့် နည်းလမ်းဟာ ပြဿနာအားလုံးကို လိုက်လံဖြေရှင်းပေးတဲ့နည်းလမ်း မဟုတ်ပါဘူး - ပြဿနာဖြစ်ပေါ်စေမယ့် လမ်းကြောင်းအားလုံးကို ကြိုတင်တားဆီး ကာကွယ်တဲ့နည်းလမ်းပါ

မိသားစုဝင်များ - Contributors များ ဒါကို မမေ့ကြပါနဲ့ - ဆွေးနွေးချက်ကို များများရေးပါ - ဝိုင်းဝန်းဆွေးနွေးပါ - စုပေါင်း အဖြေရှာပါ - နားမလည်တာတွေကို ထပ်မေးပါ - ကိုယ်ကိုယ်တိုင်လည်း သူများပြောတိုင်း မယုံပါနဲ့ - အဲ့လူပြောတဲ့ အဖြေကို ကိုယ်ကိုယ်တိုင် စာလိုက်ဖတ်ပြီး သေချာမှု ရှိမရှိ ဆန်းစစ်ပါ - ဒါဟာ ပြဿနာအားလုံးနီးပါးကို ဖြေရှင်းပေးဖို့ မလိုတဲ့ ကြိုတင်တားဆီးကာကွယ်မှု နည်းလမ်းပါပဲ -

KznT.

11Dreams with Simplex Enews Template

Template သဘောမကျလို့ ဆိုပြီး ပြင်နေတာ ၁ ပတ်လောက်ကြာသွားတယ် - အရင် Template ကို သဘောမကျလို့တော့ မဟုတ်ဘူး - အရင် Template က Simplexdesign ကနေ ယူပြီးသုံးထားတာ - ကိုယ်လိုချင်တဲ့ ပုံစံမျိုး အဲ့ဒီ Template မှာတော်တော်များများ ပါလို့ အရင်ကဆို Template တစ်ခုကို ၁ ပတ် တစ်ခါလောက် ပြောင်းနေရာကနေ ခု အဲ့ဒီ့ Template လေးနဲ့ တော်တော်ကြာခဲ့တယ် - ဒါပေမယ့် ဒီ လဆန်းပိုင်းက SIMPLEX ENEWS TEMPLATE ကိုပဲ  Simplexdesign မှာ Version အသစ်ထပ် ထုတ်တယ် - အရင်ကနဲ့ ဘာမှ ထူးထူးခြားခြား အမြင်ပြောင်းသွားတာမျိုး မရှိပေမယ့် ဒီ Features အသစ်လေးတွေ ပါလာတော့ လူကမျက်စိကျမိပြန်ရော - 

- Disqus comment systemt ,a recent comment tab from Disqus
- Widgets in the footer
- A page for embeded forum ( sidebar is hidden when you enter this page )
- Lightbox effect
- Reduce loading time
- Number of post in each category is different .

အထူးသဖြင့်တော့ Reduce loading time ကို သဘောကျတာ - အရင်က Blog က တော်တော်ကြီးကို နှေးနေတယ် - ကိုယ်သုံးနေတဲ့ Connection က ဒီလောက် အဆိုးကြီး မဟုတ်တာတောင် ဒီလောက် လေးနေရင် မြန်မာနိုင်ငံက စာလာဖတ်တတ်တဲ့သူတွေ ဘယ်လိုများ သုံးနေရမလဲ ဆိုပြီး စိတ်မကောင်းတာနဲ့ ပြောင်းပေးချင်နေတာ - ဒါပေမယ့် Template တစ်ခု ပြောင်းရတာ အရမ်းကို အလုပ်ရှုပ်တယ် - Features များလေး ခေါင်းရှုပ်လေပဲ - နောက်ပြီး ကိုယ့်ဘာသာ ထပ်ပေါင်းထည့်ချင် ပြင်ချင်တာတွေကလည်း ရှိနေတော့ ပြောင်းချင်တာပဲရှိတယ် လူကလည်း မအားတာနဲ့ စိတ်ထဲတွေ့တဲ့ 2 Column Template လေးတစ်ခု အရင်ကောက်တင်ထားလိုက်ပြီး မနေ့ညကမှ အသစ်ထွက်တဲ့ နောက် SIMPLEX ENEWS TEMPLATE အသစ်ကို ပြောင်းတင်ဖြစ်တယ် - တင်တင်ခြင်း Errors တွေ အရမ်းတက်နေလို့ စာဖတ်သူတွေ စိတ်ရှုပ်မှာ စိုးတာနဲ့ အသိမပေးပဲ ခဏ ပိတ်ထား လိုက်ရတယ် - အားလုံးကို တောင်းပန်ပါတယ် - ဒီကြားထဲ Disqus comment system ထည့်လိုက်တာမှာ အရင် ( ၄ ) နှစ်နီးပါး ရေးခဲ့တုန်းက မှတ်မှတ်ရရ ရခဲ့တဲ့ Comments လေး ( ၆ ) ခုမှာ ( ၄ ) ခု ပျက်သွားတယ် - Comments ပေးခဲ့တဲ့သူတွေ ဒီကနေပဲ တောင်းပန်ပါရစေ  - ကောင်းစေချင်လို့ လုပ်ပေမယ့် မထင်မှတ် ထားတာလေး ပါသွားတော့ စိတ်ထဲ မကောင်းဘူး - 

ဘယ်လိုပဲ ဖြစ်ဖြစ် အရင်ကထက် loading time သိသိသာသာလေး လျော့သွားတာရော - တစ်ခြား ထပ်ပေါင်း ဖြည့်ချင်တာလေး ဖြည့်လိုက်ရတာရော - ဖတ်သူနည်းပေမယ့် ဖတ်ရတဲ့သူ စိတ်ချမ်းသာအောင် တတ်နိုင်သလောက်လေး ပြင်ပေးလိုက်ရလို့ စိတ်တော့ ချမ်းသာပါတယ် - အားလုံး စိတ်၏ ချမ်းသာခြင်း ကိုယ်၏ ကျန်းမာခြင်းနဲ့ ပြည့်စုံကြပါစေ -

KznT.

Ubuntu users and Ubuntu-Homepage

Ubuntu နဲ့ ပတ်သတ်ပြီး နေ့တိုင်းနီးပါး post အသစ်တက်လေ့ရှိတဲ့ ဖတ်ဖြစ်နေကျ site တစ်ခု ကနေ ဒီနေ့ မှတ်ထားသင့်တာလေး တစ်ခုတွေ့လို့ မဖတ်ဖြစ်သေးတဲ့ မိသားစုတွေလည်း သိရအောင် ပြန်လည်ဝေမျှ လိုက်ပါတယ် -

အကြောင်းက ကျွန်တော်တို့ နေ့တိုင်းသုံးနေတဲ့ Browser ရဲ့ homepage မှာ Ubuntu homepage တစ်ခု ထားဖို့ ကိစ္စပါ - ဒီကိစ္စက အပြောသာလွယ်တာ တကယ်တမ်း အလုပ်ခက်တယ် - နေ့တိုင်း အင်တာနက် သုံးနေတဲ့သူတစ်ယောက်က တော်ရုံတန်ယုံ စွမ်းဆောင်ရည်လောက်နဲ့ ကိုယ့်အတွက် တကယ် အသုံးမတည့်ပဲ ဘယ် website ကိုမှ ကိုယ့် browser မှာ homepage မထားချင်ကြဘူး - ကျွန်တော်လည်း ဒီလိုပဲ ခဏခဏ home page ကို ပြောင်းပြောင်းထားတတ်တယ် - အရင် Facebook မှာ ဂိမ်းဆော့ခဲ့စဉ်တုန်းက Facebook ကို homepage ထားတယ် - နောက်ပိုင်း တစ်ခြား အလုပ်တွေ မအားတာနဲ့ ဂိမ်းမဆော့ဖြစ်တော့ Google ပဲ ပြန်ထားဖြစ်တယ် - ခဏခဏ ဟိုပြောင်းလိုက် ဒီပြောင်းလိုက်နဲ့ စိတ်တိုင်းမကျတော့ နောက်ပိုင်း Browsers များနှင့် Start pages ထဲကလို ကိုယ့် browser ရဲ့ Start page ကို ပြင်ထား ဖြစ်ပြန်ရော – နောက်ပိုင်း အဲ့လို Choice တွေ အများကြီးသုံးရတာ မကြိုက်တော့ အခု Google ပြန်ဖြစ်နေပြန်ပြီ -

ခုနောက်ပိုင်း Window ထက် Ubuntu ထဲမှာပဲ အနေများတော့ တစ်နေ့နဲ့ တစ်နေ့ မေးစရာတွေကလည်း တစ်ခုပြီး တစ်ခု ပေါ်နေတယ် – Ubuntu ကို သုံးသာ သုံးနေတာ ခုထက်ထိ မသိသေးတာတွေ တကယ့်ကို အများကြီး – တတ်နိုင်သလောက်တော့ အားတဲ့ အချိန်တိုင်း စာလိုက်ဖတ်တယ် – ဒါပေမယ့် ဒါတစ်ခုသိရင် ဟိုတစ်ခုက မသိ – ဟိုဟာသိပြန်တော့ နောက်ထပ် မသိသေးတာတစ်ခုက ထပ်တွေ့နဲ့ လိပ်ပတ်မလည်နိုင်ဘူး – ဒါကလည်း ဆန်းတော့ မဆန်းဘူး အရင်အမြဲသုံးခဲ့တဲ့ Window မှာတောင် မသိသေးတာတွေ တစ်ပုံကြီး ကျန်သေးတယ် – Ubuntu ကို ကိုယ်တိုင်လည်း သုံးနေသလို Open source နဲ့ ပတ်သတ်ပြီး ကိုယ့် မိသားစုတွေ အတွက်လည်း ကိုယ်သိထားသလောက် အခြေခံကျကျလေး ပြန်ဝေမျှချင်လို့ သိထားသလောက် ဖတ်ဖြစ်သလောက်လေးတွေ နဲနဲချင်းစီ ရေးပေးဖြစ်တယ် – တတ်နိုင်သလောက် သိထား တာလေး ရေးပေးဖြစ်ပေမယ့် ဖိုရမ်မှာ Ubuntu နဲ့ ပတ်သတ်ပြီး တက်သမျှ ပြဿနာ ဒိုင်ခံရှင်းပေးနိုင်တဲ့ အဆင့်တော့ မရောက်သေးဘူး – အဲ့လို ဖြစ်ဖို့တော့ ကြိုးစားဆဲပဲ – ကိုယ်က အခြေခံအဆင့်ကိုး – အဲ့တာကြောင့် Ubuntu ကို လက်တွေ့ သုံးနေပြီး အခြေခံကျကျ လေ့လာချင်သူတွေ အတွက် ဘယ်အကြောင်းအရာ တွေက လက်တစ်ကမ်းမှာ အမြဲ ရှိနေသင့်မလဲဆိုတာ စဉ်းစားဖြစ်တယ် – Window ကနေ Ubuntu စပြီး ပြောင်းသုံးခါစလူတိုင်း မဖြစ်မနေ သိထားသင့်တာ Ubuntu နဲ့ ပတ်သတ်တဲ့ FAQs တွေ ဘယ်နားမှာ ရှိသလဲ ဆိုတာရယ် - ကိုယ်နဲ့ လက်မယဉ်သေးတဲ့ OS တစ်ခုကို အမြဲသုံးနေကျ OS တစ်ခုလို ရက်ပိုင်းအတွင်း ရင်းနှီးလာအောင် စွမ်းဆောင် ပေးနိုင်မယ့် နေရာကောင်းတွေ ဘယ်နားမှာ ရှိမလဲဆိုတာရယ် မဖြစ်မနေ ကျွန်တော်တို့ သိထားဖို့ လိုနေတယ် -

အဲ့အတွက် Ubuntu ပဲ ဖြစ်ဖြစ် တစ်ခြား Linux ဘယ် Distros ဖြစ်ဖြစ် သုံးမယ်လို့ စိတ်ကူးရှိရင် ဘယ် မြန်မာဘလော့ကိုမှ ကျွန်တော်တို့ ရာနှုန်းပြည့် အားကိုးလို့ မရသေးဘူး – အင်တာနက်ထဲမှာ လိုက်ရှာရင် တွေ့နိုင်တာ သေချာပေမယ့် ဖော်ပြချက်တိုင်းက အသေးစိတ် ဖော်ပြချက် ဖြစ်နိုင်ဖို့ဆိုတာလည်း မသေချာပြန်ဘူး – အဲ့တာ ကြောင့် အချိန်ကုန် လူပင်ပန်းခံပြီး Google မှာ သိချင်တာရိုက် – စမ်းတဝါး လိုက်ရှာနေရမယ့် အစား ဒီနေ့ ကျွန်တော် ဖတ်ဖြစ်တဲ့ Ubuntu Homepage လေး သုံးကြည့်ကြဖို့ အကြံပြုချင်ပါတယ် –

ဘာကြောင့်လည်းဆို သူ့ Homepage မှာ Ubuntu သုံးနေတဲ့ Users တိုင်းအတွက် မဖြစ်မနေ အားထားလေ့လာသင့်တဲ့ နေရာတွေကို အောက်မှာ ဖော်ပြထားတဲ့ အတိုင်း ချိတ်ဆက်ပေးထားတယ် – Ubuntu News - Ubuntu community forums - Community Support - Ubuntu Screencasts - Ubuntu Manual Project - AskUbuntu.com - Ubuntu Weekly Newsletter စသဖြင့် လေ့လာသူ တစ်ယောက်အတွက် မဖြစ်မနေသိထားသင့်တဲ့ နေရာတွေကို နေ့တိုင်း ကျွန်တော်တို့ သုံးနေကျ Google search engine နဲ့ ချိတ်ဆက်ပေးထားတယ် –

ပြောရရင် သူက Ubuntu နဲ့ ပတ်သတ်တဲ့ အကြောင်းအရာတွေ ချိတ်ဆက်ပြီး Ubuntu logo တင်ထားလို့သာ Ubuntu Homepage လို့ ပြောနိုင်တာ တကယ်တော့ Google တစ်ပိုင်းပဲ – Google search engine အတိုင်းပဲ Search box ကနေ ကိုယ်သိချင်တဲ့ Web ပေါ်က အကြောင်းအရာကို ရှာယူလို့ ရသလို – Images – Maps ဆိုပြီး ပြောင်းရှာလို့လည်း ရသေးတယ် – Result ကတော့ Google မှာရှာတဲ့ Search results အတိုင်းပဲ တွေ့ရမှာပါ -

ဒါတင်မက Google logo ပေါ် mouse pointer ရွှေ့လိုက်ရင် ကျွန်တော်တို့ နေ့တိုင်း သွားနေကျ Google - Wikipedia – Youtube – Twitter လေးခု ခွဲထွက်သွားပြီး သိချင်တဲ့ အကြောင်းအရာအလိုက် Animated Search box ကနေတစ်ဆင့် ပြောင်းပြီး ရှာနိုင်သေးတယ် -

Philipp Antoni ရဲ့ http://go.infinise.com/ ကို Deviantart က spiceofdesign ရဲ့ Ubuntu Homepage နဲ့ ပေါင်းထားတဲ့ Ryan Kelln ရဲ့ လက်ရာပါ – ဒီ Ubuntu-Homepage ကို အောက်မှာ ဖော်ပြထားတဲ့ link မှာ သွားရောက်ရယူနိုင်ပါတယ် –

>> github.com/RKelln/Ubuntu-Homepage

အသုံးပြုနည်းကတော့ အပေါ်မှာ ပြထားသလို ဒေါင်းလုပ်ချလို့ ရလာတဲ့ ဖိုင်ထဲက .index.html file ကို ဖွင့်ပြီး သုံးယုံပါပဲ – ကျွန်တော်ကတော့ Dropbox ထဲထည့်ပြီး Copy Public Link ကနေ Link ယူပြီး သုံးနေတယ် -

စမ်းကြည့်ချင်သူများ >> http://tiny.cc/kznt ကို သွားကြည့်နိုင်ပါတယ် -

ကိုအယ်သားရဲ့ စိတ်ကူးစိတ်သန်းလေး ကို သဘောကျမိတာနဲ့ ကျွန်တော်လည်း ခုပဲ စာတစ်မျက်နှာ လုံး မြန်မာဘာသာ ဖြစ်အောင် ပြန်ဆိုလိုက်ပါတယ် -

လေ့လာချင်သူများ >> http://tiny.cc/kznt မှာ ခုပဲ သွားရောက်လေ့လာနိုင်ပါပြီ။

ကိုအယ်သားလို ဂူဂဲလ်တို့ တွစ်တာတို့ ဝီကီပိဒီယတို့ ပါ မြန်မာလို ဖြစ်ချင်သူများကတော့ ကိုအယ်သားဆီကပဲ ပြင်ထားတဲ့ ဖိုင်ကို တောင်းပြီး ကျွန်တော့်ဖိုင်နဲ့ ပေါင်းပါ - ကျွန်တော် ပြင်ထားတဲ့ ဖိုင်ကိုတော့ ဒီအောက်က လင့်ကနေ ဒေါင်းလုပ်ယူနိုင်ပါတယ်။ ဇော်ဂျီနဲ့ပဲ ရေးထားပါတယ် - ယူနီကုတ် ပြောင်းချင်သူတွေနဲ့ တစ်ခြား ဒီဇိုင်း - စာသားပြင်ချင်သူတွေ မိမိဘာသာ စိတ်ကြိုက် ပြောင်းယူကြပါ။

Download >> http://dl.dropbox.com/u/6653880/RKel...ge-dddbbc2.rar

ကိုအယ်သားရေ ကျေးဇူးပါခင်ဗျ

KznT.

7th Anniversary

ဇန်နဝါရီလ ၁၅ ရက် ၂၀၁၁ ခုနှစ်

ဒီနေ့ ချစ်သူ သက်တမ်း ( ရ ) နှစ်ပြည့်


- ဖြတ်သန်းပြီးခဲ့တဲ့ နှစ်တွေကို နောက်ပြန်ငဲ့ကြည့်တော့ ဘာမှ သိပ်မကြာခဲ့သေးသလိုပဲ - ဒါပေမယ့် ငါတို့ နှစ်ယောက်လုံး တော်တော် ပင်ပန်းခဲ့ကြတယ် - ကျေးဇူးတင်ပါတယ် ငယ် - ( ရ ) နှစ်တာ ဖြတ်သန်းပြီးခဲ့တဲ့ ကာလမှာ ငါတို့ နှစ်ယောက် တစ်ခါမှ စိတ်မကောက်ခဲ့ကြဖူးဘူး - စိတ်မဆိုးခဲ့ကြဖူးဘူး - ရန်မဖြစ်ခဲ့ကြဖူးဘူး - အဆုံးအစွန်ဆုံး လေသံမာမာတောင် မပြောခဲ့ကြဖူးဘူး - သူတို့တွေကို ပြောပြဖြစ်တိုင်း ကြည်နူးရတယ် - သူတို့ အံ့သြကြတယ် - ငယ် - မင်းက ပြောတယ် - ကိုနဲ့ ချစ်သူဖြစ်ရတာ ကံကောင်းသတဲ့ - ဘယ်ဟုတ်ပါ့မလဲ - တကယ်ကံကောင်းခဲ့တာ ငါပါ -

- နှစ်ယောက်တူတူသွားတိုင်း မင်းကို သက်တောင့် သက်သာနဲ့ ပို့ပေးနိုင်မယ့် ကားမျိုး ငါ့မှာ မရှိသေးဘူး - ဒါပေမယ့် မင်း ငါနဲ့ တူတူ ဘတ်စ်ကားပဲ လိုက်စီးခဲ့တယ်
- ငါ့အိတ်ကပ်ထဲမှာ ကုန်လုနီးနီး ဖြစ်နေတတ်တဲ့ ပိုက်ဆံကို ငါ သတိမရမိအောင် မင်းအတွက် ဘာမှ မလိုအပ်သလို မင်း ဟန်ဆောင်နေတတ်တယ်
- ဘာလိုလဲဆို မလိုဘူး
- ဘာစားချင်လဲဆို ဗိုက်မဆာသေးဘူး
- ဘယ်သွားချင်လဲဆို ကိုသွားချင်တဲ့နေရာ လိုက်မယ်

တကယ်တမ်း ပြန်စဉ်းစားကြည့်တော့ - မင်းလိုအင်ကို ငါဖြည့်ဖြစ်ခဲ့တာထက် ငါ့လိုအပ်ချက်တွေ ငါ့ စိတ်ဆန္ဒတွေကိုပဲ မင်းအမြဲ ဖြည့်ဖို့ ကြိုးစားခဲ့တာပါ - အချစ်အကြောင်းကို ချစ်တယ်လို့ မင်းကို ပြောခဲ့တုန်းက ခပ်ပေါ့ပေါ့ပဲ - လိုချင်တဲ့ အရာတစ်ခုကို ရအောင်ဝယ်ထားလိုက်ချင်တဲ့ ကလေးတစ်ယောက်ရဲ့ တပ်မက်မှုမျိုးပဲ ငါ့မှာ ရှိခဲ့တာ - တဖြေးဖြေး နှစ်တွေ ကြာလာတော့ အချစ် တစ်ခုရဲ့ နက်ရိှုင်းမှုကို သိလာတယ် - ဒါပေမယ့် သိရင် ပြောပြပါလားဆို ငါ မပြောပြတတ်ဘူး - ငါ ပြောလိုက်မယ့် စကားထဲမှာ ပါသွားမယ့် စကားလုံးတွေက မင်းကို သိပ်ချစ်တဲ့ ငါ့သွေးထဲက ခံစားချက်တွေကို လိုက်မမှီမှာ စိုးလို့ပါ -

မင်းကို အဲ့လောက် ချစ်တယ်ငယ် -

ဘဝမှာ အဖြစ်ချင်ဆုံး အရာလို့ မေးရင် လူတိုင်းမှာ အဖြေတစ်ခုစီ ရှိမှာပဲ - ငါ့မှာလည်း ရှိတယ် - အဲ့ အဖြေက အမြဲတမ်း ကိုယ့်ရဲ့လုပ်ဆောင်ချက်တိုင်းကို ယုံကြည်နေတဲ့ မိန်းမတစ်ယောက် မင်းကို ဖြစ်စေချင်တာပဲ

- မင်းဟာ ငါ့အတွက်နဲ့ မပူပင်စေရဘူး
- မင်းဟာ မင်းမိသားစုအတွက် မပူပင်စေရဘူး
- မင်းဟာ မင်းဘဝရှေ့ရေးအတွက် မပူပင်စေရဘူး
- မင်းဟာ မင်းရဲ့ အနာဂတ်တိုင်းကို မင်းကိုယ်တိုင် စိတ်ကြိုက် ပုံဖော်နိုင်ခွင့်ရှိတဲ့ မိန်းမမျိုး ငါ ဖြစ်စေချင်တယ်

ငါက မင်းကို ချစ်တယ် - မင်းက ငါ့ကို ယုံတယ် - ယုံကြည်မှုနဲ့ ပေါင်းစပ်ထားတဲ့ ချစ်ခြင်းတရားဟာ အနာဂတ်ကို ကြိုမြင်နိုင်စွမ်း မရှိပေမယ့် - အနာဂတ်ကို ထိုးဖောက်နိုင်စွမ်းရှိတယ် ငယ် - အဲ့ဒီ့ အားနဲ့ ငါတို့ ရှေ့ဆက်ကြရအောင် - ဘဝနှစ်ခုဆုံးတဲ့ ထိပေါ့ -

KznT.