Check Out Your Password Security

ကျွန်တော်တို့ Web form တစ်ခုကို ဖြည့်တဲ့အခါ Internet Explorer မှာပဲ ဖြစ်ဖြစ် Firefox မှာပဲ ဖြစ်ဖြစ် ကျွန်တော်တို့ ဖြည့်သွင်းလိုက်တဲ့ Password ကို မှတ်ထားမှာလား ဆိုပြီး Browser ကနေ မေးတာကို ကြုံဖူးကြမှာပါ။ ခုလိုမျိုးပေါ့။

Mozilla Firefox တွင် မေးမြန်းပုံ။

Internet Explorer တွင် မေးမြန်းပုံ။

တကယ်လို့ ဒီလိုမေးခွန်းမျိုးဟာ ကျွန်တော်တို့ရဲ့ ကိုယ်ပိုင် ကွန်ပြူတာမှာ သုံးစွဲနေတုန်း မေးမြန်းတာမျိုး ဆိုခဲ့ရင်တော့ ကိုယ့်စိတ်နဲ့ ကိုယ့်ကိုယ် Yes လို့ Click ပေးလိုက်ပြီး ကွန်ပြူတာမှာ မှတ်သားထားဖို့ စေခိုင်းနိုင်ပါတယ်။ ဒါပေမယ့် ဒီနေရာမှာ မှတ်ထားသင့်တာက Web browsers တွေမှာပါတဲ့ " Remember Me " option ဆိုတာ အသုံးဝင်တာမှန်ပေမယ့် သတိထားသင့်တဲ့ မိမိ password လုံခြုံရေးအတွက် သတိထားသင့်တဲ့ အရာတွေထဲမှာ တစ်ခု အပါအဝင် ဖြစ်ပါတယ်။ ကွန်ပြူတာကို ဖျော်ဖြေရေး သဘောမျိုးအသုံးပြုတဲ့သူ ဒါမှမဟုတ် ကွန်ပြူတာနဲ့ မရင်းနှီးတဲ့ သူ တော်တော်များများဟာ ကွန်ပြူတာက မေးတဲ့ မေးခွန်းတိုင်းကို စာကြောင်းဆုံးအောင် မဖတ်ကြပဲ စိတ်မရှည်စွာနဲ့ OK ပေးမလားမေးရင် OK ပေးတယ် ၊ Yes ပေးမလား မေးရင် Yes ပေးကြတယ် ၊ Yes or No ဆိုရင်လည်း ဘာမှန်းမသိပဲ Yes ကိုပဲပေးကြတာများပါတယ်။ ဒီ အလေ့အကျင့်တွေက တော်တော် မကောင်းပါဘူး ရှိနေတယ် ဆိုရင်လည်း ပြင်သင့်ပါတယ်။ တစ်ခြား နေရာတွေမှာ ဘယ်လိုပဲ ပေးပေး ခုလို မိမိ Password လုံခြုံရေးအတွက် Confirm တောင်းတဲ့ မေးခွန်းမျိုးမှာတော့ Yes ပေးလိုက်မိရင် ဘာဖြစ်နိုင်တယ် ဆိုတာ ကျွန်တော် အောက်မှာ တဆင့်ချင်း ဖော်ပြပေးသွားပါ့မယ်။ 

Internet Explorer အတွင်း Auto-Complete မှတ်သားထားသော Passwords များအား ပြန်လည်ဖော်ယူခြင်း

တကယ်လို့ ကျွန်တော်တို့ဟာ အထက်မှာ ဖော်ပြခဲ့သလိုမျိုး Internet Explorer မှာ ဒါမှမဟုတ် Mozilla Firefox မှာ မိမိ Password ကို Remember လုပ်ဖို့ မှတ်သားခိုင်းလိုက်ပြီ ဆိုရင် မိမိမှတ်သားခိုင်းလိုက်တဲ့ Password နဲ့ Username ကို Internet Explorer မှာ ဆို 35kb လောက်ပဲ ရှိတဲ့ IE PassView လို့ ခေါ်တဲ့ အပေါ့စား tool လေး တစ်ခုသုံးပြီး Windows Registry ထဲထိ ဝင်ကြည်စရာ မလိုပဲ ဆိုဒ်တစ်ခုအတွက် ကျွန်တော်တို့ ရိုက်သွင်းလိုက်တဲ့ Username နဲ့ Password ကို အခြားလူတစ်ယောက်က အလွယ်တကူရရှိသွားနိုင်ပါတယ်။ ဒီ Tool လေးဟာ IE ထဲမှာ မှတ်သားထားသမျှ Username တွေ Password တွေအကုန်လုံးကို အလွယ်တကူ ဖော်ပြသွားနိုင်ပါတယ်။ ဒီအောက်က ပုံကို ကြည့်ပါ။ 

Mozilla Firefox အတွင်း Auto-Complete မှတ်သားထားသော Passwords များအား ပြန်လည်ဖော်ယူခြင်း

Firefox မှာတော့ User တစ်ယောက် မှတ်သားထားတဲ့ Password ကို ဖော်ယူရတာ Mouse ကို ဘယ်လိုရွှေ့ရတယ် ဆိုတာ သိသူဆိုရင်တောင် အလွယ်တကူ ဖော်ယူနိုင်ပါတယ်။

နည်းလမ်းကတော့ Tools > Options > Security > Saved Passwords > Show Password ဆိုရင် ရပါပြီ။ အဲ့ထဲမှာ ကျွန်တော်တို့ Browsers တွင်းမှာ မှတ်ခိုင်းထားသမျှ Passwords အားလုံးရော Username အားလုံးရော ရှိနေပါတယ်။

ဒီလို အဖြစ်အပျက်မျိုးတွေကြောင့် IE မှာပဲ ဖြစ်ဖြစ် Firefox မှာပဲ ဖြစ်ဖြစ် " Remember me " option ကို သုံးတော့မယ် ဆိုတဲ့ အခါ မိမိသုံးနေကျ အင်တာနက်ဆိုင်မျိုးတင် မကပဲ ကိုယ့်ကွန်ပြူတာမှာ ကိုယ်သုံးမယ် ဆိုရင်တောင် သတိထားသင့်ပါတယ်။ မသမာသူ ဆိုတာ ဘယ်အချိန်မှာ ဘာကို ကြံစည်မယ်မှန်း ကျွန်တော်တို့ မရိပ်မိနိုင်ပါဘူး။ အဲတာကြောင့် Internet Explorer ကို သုံးမယ် ဆိုတဲ့ အခါ မိမိ Password လုံခြုံရေးကို တိုးမြှင့်ချင်မယ် ဆိုရင်တော့ အောက်ဖော်ပြပါ ပုံစံအတိုင်း Internet Explorer ထဲက Tools > Options ထဲမှာ ရှိတဲ့ Check boxes အားလုံးကို ကလစ်ဖြုတ်ထားသင့်ပါတယ်။ ဒီလိုလုပ်ထားခြင်း အားဖြင့် အင်တာနက်နဲ့ ပတ်သတ်ပြီး မိမိရဲ့ လှုပ်ရှားမှု အားလုံးကို လုံခြုံစေနိုင်ပါလိမ့်မယ်။ 

Mozilla Firefox မှာတော့ " Remember me " option ကို အသုံးပြုချင်တယ် ဆိုရင် အကောင်းဆုံးကတော့ Use a master password. ကို အသုံးပြုကြဖို့ အကြံပြုချင်ပါတယ်။ အသုံးပြုဖို့ကတော့ Tools > Options > Security > Use a mater password ကို Click ပေးပြီး မိမိ ဝှက်ထားချင်တဲ့ Password တစ်ခုကို ဖြည့်ပေးရမှာ ဖြစ်ပါတယ်။ 

ဒီလိုလုပ်ဆောင်လိုက်ခြင်း အားဖြင့် ဘာများ ထူးခြားသွားလဲ ဆိုရင် တစ်စုံ တစ်ယောက်က ကိုယ် Remember လုပ်ထားတဲ့ Password တွေကို ကိုယ်မရှိချိန် ခိုးကြည့်ဖို့ ကြိုးစားတဲ့ အခါမှ အရင်ကလို အလွယ်တကူ ကြည့်လို့ မရတော့ပဲ ကိုပေးထားတဲ့  Master password ကို ဖြည့်ပေးဖို့ တောင်းခံပါလိမ့်မယ်။ 

ဒီလိုဆို ကိုယ့် Password ကို သိနိုင်ဖို့ ကြိုးစားတဲ့ သူ အနဲနဲ့ အများ လက်တွန့် သွားလောက်ပါပြီ။

သူတို့လိုမျိုး မိမိ Password လုံခြုံရေးအတွက် Online ကနေ အာမခံ ဝန်ဆောင်မှု ပေးနေတဲ့ Software တွေလည်း ခုချိန်မှာ အတော်များများ ပေါ်ထွက်နေပါပြီ။ ဝါသနာပါမယ် ဆိုရင်တော့ ဒီအောက်ဖော်ပြပါ နေရာတွေကို သွားပြီး စမ်းသပ်နိုင်ပါပြီ။ 

( 1 ) Roboform

( 2 ) LastPass

( 3 ) Sticky Password Manager

( 4 ) HandyPassword

( 5 ) KeePass

( 6 ) iMacros

( 7 ) OpenID

( 8 ) Billeo

သူတို့ရဲ့ စွမ်းဆောင်ရည်ကတော့ နေ့စဉ်နေ့တိုင်း လည်ပတ်သွားလာနေကျ ဆိုဒ်တွေ ၊ ( ဥပမာ - Yahoo, Google, MSN ကနေ စပြီး မိမိ Register လုပ်ထားရာ ဘယ်ဆိုဒ်ကို မဆို ) ရောက်သွားတဲ့ အချိန်မှာ ကိုယ့် Password ကို ၂ ခါထပ် ဖြည့်သွင်းစရာ မလိုပဲ တစ်ခါ ဖြည့်ထားယုံနဲ့ အဲ့ Software တွေက အလုံခြုံဆုံး ဖြစ်အောင် encrpted လုပ်ထားပေးပြီး လိုအပ်ချိန်မှာ အသင့်သုံး အနေအထားဖြစ်အောင် ကလစ်ပေးယုံနဲ့ အားလုံး ပြည့်စုံအောင် စွမ်းဆောင်ပေးတဲ့ Software တွေပါ။ ဒါက အတိုချုံး ပြောတာပါ။ နောက်ထပ် စွမ်းဆောင်ရည်တွေ အများကြီး ကျန်ပါသေးတယ်။ ကျွန်တော်ကတော့ အားလုံးထဲမှာ Roboform ကို သဘောကျပါတယ်။ ဒီအကြောင်းအရာက သိပြီးသား သူတွေလည်း ရှိနိုင်ပါတယ်။ နောက်ထပ် ဆက်စပ်နေတဲ့ Keylogger တွေအကြောင်း ပြောဖို့ ရှိပါသေးတယ်။ ဒါပေမယ့် Keylogger အကြောင်းက အတော်တော်များများ သိပြီးသားဖြစ်လောက်ပြီ မို့လို့ ထူးပြီး မပြောခဲ့တော့ပါဘူး။ မိသားစု အားလုံး အင်တာနက်တွင်းမှာ လုံခြုံချောမွေ့စွာနဲ့ လှည့်လည်သွားလာနိုင်ကြပါစေ။

KznT.

Making Custom Recovery CD

Recovery Software များစုထားပေးတဲ့အတွက်ကျေးဇူးအများကြီးတင်ပါတယ်။ Recovery Software အကြောင်းဆိုတော့ဒီနေရမှာပဲမေးပါရစေ။နေရာမှားရင်ခွင့်လွှတ်ပါ။အခု computer အသစ်တလုံးဝယ်မယ်ဆို အရင်လို window cd မထည့်ပေးတော့ပဲ Recovery cd ပဲပါလာတော့တယ်။အဲ့ဒီ cd ကို Recovery Software သုံးပြီးပြုလုပ်လို့ရလား။window အသစ်တင်ပြီ software အားလုံးသွင်းပြီးတဲ့အခါ Recovery cd လုပ်ချင်လို့ပါ။ဘယ် Recovery Software ကိုသုံးရမလဲ လမ်းညွှန်ပေးပါခင်ဗျာ။ကျေးဇးအများကြီးတင်ပါတယ်။

ဒီအကြောင်းအရာကို ဝင်ဆွေးနွေးထားသူ မတွေ့သေးလို့ ကျွန်တော် စတင်ဆွေးနွေးလိုက်ပါ့မယ်။ ကိုဝင်းထွန်းမေးထားတဲ့ အကြောင်းအရာက တိုတိုလေးပေမယ့် သေသေချာချာရှင်းရမယ် ဆိုရင် တော်တော်များများ ပြောမှ အဆင်ပြေမှာပါ။ နောက်ပိုင်း ကျွန်တော် ဒီကိစ္စနဲ့ ပတ်သတ်ပြီး အရှည်ပြန်ရေးပါဦးမယ်။ လတ်တလောတော့ အတိုချုံးပြီး ပြောပြပေးပါမယ်။ ပထမဆုံး ကိုဝင်းထွန်းပေးထားတာတွေ ထဲက ကျွန်တော် မရှင်းတာလေး နဲနဲလောက် ပြန်မေးကြည့်ချင်ပါတယ်။ ဘာလို့လည်း ဆိုတော့ အဲ့အဖြေပေါ် လိုက်ပြီး ကျွန်တော့်အဖြေကလည်း ပြောင်းလဲသွားနိုင်လို့ပါ။ ဒါပေမယ့် ဖြစ်နိုင်ချေ ရှိတာတွေ အလိုက် အဖြေကိုပါ တစ်ခါတည်း ထုတ်ပေးသွားပ့ါမယ်။  " အခု computer အသစ်တလုံးဝယ်မယ်ဆို အရင်လို window cd မထည့်ပေးတော့ပဲ Recovery cd ပဲပါလာတော့တယ်။ " လို့ ကိုဝင်းထွန်းက ပြောပါတယ်။ Recovery CD ပဲ ထည့်ပေးတော့တယ် ဆိုတဲ့ စကားက အဓိပ္ပါယ် ( ၂ ) ခွထွက်ပါတယ်။ ပထမဆုံး ဖြစ်နိုင်ချေရှိတဲ့ အဓိပ္ပါယ်က  ဥပမာ ပြောရရင် Paragon ကနေ ထုတ်တဲ့ Software တွေမှာလည်း သူတို့ ဆော့ဖ်ဝဲလ်အားလုံးအတွက် ဝင်းဒိုးအတွက် အရေးပေါ်အခြေအနေတွေမှာ Boot တက်ပြီး ပြင်ဆင်လို့ ရအောင် သူတို့ software နဲ့အတူ အဲ့ဒီ့ ဆော့ဖ်ဝဲလ်ကိုပဲ Recovery CD အဖြစ် အသုံးချနိုင်အောင် တစ်လက်စတည်း ထည့်သွင်းပေးလိုက်ပါတယ်။ ကိုဝင်းထွန်း ပြောချင်တာ အဲ့ဒီ့ Recovery CD ကိုပြောချင်တာလား။ အဲဒီလို Recovery CD မျိုး ဆိုရင်တော့ သူ့ဆော့ဖ်ဝဲလ်ထဲကနေ ပဲ တစ်ခါတည်း ရိုက်ထုတ်လိုက်လို့ ရပါတယ်။ နောက်ပြီး Hiren's Boot CD တို့ Acronic တို့ နောက် Recovery Applications  တွေ အများကြီးကို တစ်ခွေတည်းမှာ ပေါင်းထည့်ထားတဲ့ Recovery CD တို့ စသဖြင့် သူတို့တွေကိုလည်း Recovery CD လို့ ခေါ်ကြပါတယ်။

ဒါမှမဟုတ် ကိုဝင်းထွန်း ပြောခဲ့တဲ့ စကားအားလုံးကို ဆက်စပ်ပြီး တွေးကြည့်ရင် ဒုတိယဖြစ်နိုင်ချေရှိတဲ့ အဓိပ္ပါယ်က လက်ရှိသုံးနေတဲ့ Windows တစ်ခုလုံးကို Backup သဘောမျိုး လုပ်ထားပြီးသား၊ ကိုယ့်စက်နဲ့ပတ်သတ်တဲ့ သက်ဆိုင်ရာ Hardware တိုင်းအတွက် Drivers တွေအားလုံးလည်းပါပြီးသား၊ တစ်ခြား ကိုယ်သုံးနေကျ software တွေလည်း ပါဝင်နေပြီးသား၊ ဝင်းဒိုးမှာ ကိုယ်ပြုပြင်ပြောင်းလဲထားတဲ့ configuration တွေလည်း အားလုံးပါဝင်ပြီးသား Recovery CD မျိုးကိုများ ပြောချင်တာလား။ ဒါကတော့ ပိုဖြစ်နိုင်ပါတယ်။ ကျွန်တော်တို့က ဒီ Recovery CD ကို သုံးပြီး ကိုယ့်ကွန်ပြူတာရဲ့ အရေးပေါ် အခြေအနေမှာ ပြန်လည် ပြင်ဆင်မှုတွေ လုပ်ဆောင်လို့ ရမယ်။ နဂို မတည်ငြိမ်တဲ့ အခြေအနေကနေ ဟိုးယခင် အကောင်းအတိုင်း တည်ငြိမ်တဲ့ အခြေအနေကို ပြန်ရမယ်။ ဒီလို Recovery CD  မျိုး လုပ်ချင်တာလို့ ကျွန်တော် ထင်ပါတယ်။ အဲ့ဒီအတွက်က ဆော့ဖ်ဝဲလ်တွေရှိပါတယ်။ ဥပမာ အနေနဲ့ ပြောရရင် Acronic True Image, Norton Ghost, နောက် Mondo Rescue စသဖြင့် တော်တော်များများ ရှိပါတယ်။ Acronic True Image, Norton Ghost ကတော့ လူသုံးများပါတယ်။ သူတို့ကို သုံးပြီး ကျွန်တော် အပေါ်မှာ ပြောခဲ့တဲ့ Recovery CD မျိုး လုပ်ဆောင်လို့ ရပါတယ်။ ဘယ်လို လုပ်ဆောင်ရတယ် ဆိုတာတော့ ကျွန်တော် အသေးစိတ် မပြောတော့ပါဘူး။ " computer အသစ်တလုံးဝယ်မယ်ဆို အရင်လို window cd မထည့်ပေးတော့ပဲ Recovery cd ပဲပါလာတော့တယ်။ "ဆိုတာကတော့ ကွန်ပြူတာ ဆိုင်တွေက လုပ်စားတာပါ။ ဆိုလိုတာက တကယ်လို့ ကွန်ပြူတာ တစ်ခုခု ပျက်လို့ သူတို့ဆီ ရောက်လာရင် အလွယ်ပြင်ဆင်နိုင်ဖို့ အတွက် Recovery CD သုံးပြီး System restore ပြန်ခေါ်ပေးလိုက်တဲ့ သဘောပါပဲ။ ဒီလိုလုပ်လိုက်ခြင်း အားဖြင့် သူတို့အတွက် လုပ်ရကိုင်ရ သက်သာတယ်။ ပိုင်ရှင်ဖြစ်တဲ့ သူကလည်း ဝင်းဒိုးလေး ပြန်မြင်ရရင် ကောင်းသွားပြီ ထင်ပြီး ကျေနပ်သွားတယ်။ တောင်းတဲ့ လက်ခလေး ပေးလိုက် အိုကေလို့။ တကယ်လို့ Recovery CD သုံးပြီး System restore ပြန်ခေါ်ပေးလိုက်လို့မှ အဆင်မပြေတော့ရင်ကျတော့ ဆိုင်တွေက အစ်ကို/ အစ်မ ကွန်ပြူတာကတော့ လစ်သွားပြီ ဝင်းဒိုးက လုံးဝ အလုပ်မလုပ်တော့ဘူး .. ပြန်ကောင်းချင်ရင်တော့ ဝင်းဒိုးအသစ်ကို ပြန်တင်ရတော့မယ် ဘာညာနဲ့ ပြောပြီး ၄၅ မိနစ်လောက်တင်ရင် ပြီးတဲ့ ဝင်းဒိုးတစ်ခုကို တစ်ပတ်လောက် အချိန်ပေးရတော့မယောင်ပြောပြီး လက်ခပိုတောင်းချင်တဲ့ သဘောပါ။ ဒါကိုတော့ Recovery CD သုံးပြီး System restore ပြန်ခေါ်ပေးလို့ မရတဲ့ အခြေအနေမှာ Fresh Windows ပြန်တင်ရတယ်လို့ ပြောလို့ရပါတယ်။ ဆိုင်တွေက User တွေကို မူရင်း Windows CD မပေးလိုက်ခြင်း အားဖြင့် ဒီလို ပြဿနာကြုံတဲ့ အခါ ကိုယ်တိုင် ဝင်းဒိုးတင်လို့ မရတော့ဘူး။ သူတို့ဆီ ပြန်လာရတယ်။ အကူအညီတောင်းရတယ်။ ဒီအတွက် သူတို့ ပိုက်ဆံထပ်ရတယ်။ ဒီသဘောပါပဲ။ ဒါကြောင့် ဝင်းဒိုး CD ကို ထည့်မပေးကြတာပါ။ နိုင်ငံခြားတွေမှာတော့ ကိုယ်ဝယ်တဲ့ ကွန်ပြူတာရဲ့ တန်ဖိုးကို လိုက်ပြီး သက်ဆိုင်ရာ Windows CD တစ်ခု အမြဲ ထည့်ပေးကြပါတယ်။ ဆိုလိုတာက ကိုယ်ဝယ်တဲ့ ဝင်းဒိုးမှာ မူရင်းလာကတည်းက Windows Vista Home Premium တင်ထားပြီးသားပါတယ် ဆိုရင် သူတို့က Windows Vista Home Premium အခွေကို တစ်ခါတည်း ထည့်ပေးကြပါတယ်။ အဲ့ဝင်းဒိုးတွေက OEM informations နဲ့ လာတာမို့လို့ Activation လုပ်ဖို့ မလိုပါဘူး။ OEM ဆိုတာ Original Equipment Manufacture ကို ပြောတာပါ။

အဲတော့ အနှစ်ပြန်ချုပ်ရရင် Windows အသစ်တင်ပြီး Software အားလုံး တင်ပြီးတဲ့ အခါ Recovery CD လုပ်ချင်တယ်ဆိုရင် ကျွန်တော် အပေါ်မှာ ပြောခဲ့တဲ့ Acronic True Image, Norton Ghost, Mondo Rescue စတဲ့ ဆော့ဖ်ဝဲလ်တွေ သုံးပြီး လုပ်ဆောင်ပါ။ Recovery Software တိုင်း Recovery CD လုပ်လို့ မရပါဘူး။ ဒီလောက်ပါပဲ။ အဆင်ပြေကြပါစေဗျာ။

KznT.

Using Windows 7 Libraries Effectively

Windows 7 မှာ ပါဝင်လာတဲ့ Libraries Feature အကြောင်းကို တစ်ချို့ သတိထားမိကြပေမယ့် အတော်များများကတော့ သတိမထားမိကြသေးတဲ့ အတွက် သူ့အကြောင်းကို မျှဝေနိုင်ဖို့ ကျွန်တော် ကြိုးစားကြည့်ပါမယ်။ Windows 7 မှာ ပါဝင်လာတဲ့ Libraries Feature ဟာ ကျွန်တော်တို့ အရင်သုံးနေကျ My computer ကို အသုံးချရတာနဲ့ တော်တော်ကြီး ကွာခြားသွားပါတယ်။ Windows 7 Libraries ကို သုံးခြင်းအားဖြင့် ကျွန်တော်တို့ ကွန်ပြူတာထဲမှာ ရှိနေတဲ့ ဖိုင်တွေ ဖိုဒါတွေကို အရင်တုန်းကထက် ပိုပြီး အဆင်ပြေလွယ်ကူစွာ စီမံခန့်ခွဲနိုင်လာပါတယ်။ Windows 7 Libraries ဘယ်လို အလုပ်လုပ်သလဲ သူ့မှာ ဘယ်လို ထူးခြားချက်တွေ ပါလဲ ဆိုတာ စပြောကြရအောင်ပါ။

Libraries feature ဟာ ကျွန်တော်တို့ ကွန်ပြူတာမှာ ရှိနေတဲ့ နေရာအသီးသီး partitions အသီးသီးက ဖိုင်တွေ ဖိုဒါတွေ အားလုံးကို တစ်နေရာတည်းကနေ ထိန်းချုပ်လို့ ရနိုင်အောင် ကူညီပေးထားပါတယ်။ Partitions အသီးသီးဆီမှာ ရှိနေတဲ့ မိမိအလိုရှိရာ ဖိုင်တစ်ခုကို ဖွင့်နိုင်ဖို့ သူရှိရာနေရာဆီရောက်အောင် အချက်ပေါင်းမြောက်များစွာ ကလစ်ပေးနေရတဲ့ ဒုက္ခကနေ ကင်းလွတ်ပြီး အလျင်မြန်ဆုံးနဲ့ အလွယ်ကူဆုံး မိမိအလိုရှိရာဖိုင်ကို access လုပ်နိုင်အောင် Libraries က စွမ်းဆောင်ပေးထားပါတယ်။

Libraries အား အသက်သွင်းခြင်း

Windows 7 Libraries ကို ကျွန်တော်တို့ ရှေ့မှောက်ဆီ ရောက်အောင် ခေါ်ယူဖို့ အတွက် Start Menu မှာ ရှိနေတဲ့  Search box ကနေတစ်ဆင့် Libraries လို့ ရိုက်ပြီး Enter နှိပ်လိုက်လို့ ရသလို။ Superbar လို့ လူသိများတဲ့ Taskbar မှာ ရှိနေတဲ့ IE Shortcut ရဲ့ ဘေးက Windows Explorer ကနေလည်း ခေါ်ဆောင်လို့ ရပါတယ်။ ဒီအောက်က ပုံကို ကြည့်ပါ။

တကယ်လို့ ကျွန်တော်တို့ဟာ Windows Explorer ထဲမှာ ရောက်နေပြီးသား ဖြစ်နေမယ် ဆိုရင်လည်း Libraries ကို Navigation Pane ကနေ တစ်ဆင့် အချိန်မရွေး ခေါ်ယူလို့ ရနိုင်ပါတယ်။

Libraries အား အသုံးချခြင်း

ကျွန်တော် အခု ဥပမာ အနေနဲ့ Documents Library အသုံးချပုံအကြောင်း အဖွင့်ပြောပြပေးသွားပါမယ်။ ဒါပေမယ့်  ဒီလုပ်ငန်းစဉ်အတိုင်းပဲ တစ်ခြား Music, Pictures, Videos တွေအတွက် Library တွေကို အသုံးချတဲ့ နေရာမှာလည်း ဒီနည်းအတိုင်းပဲ လုပ်ဆောင်သွားရမှာ ဖြစ်ပါတယ်။ ထူးပြီး ပြောင်းလဲသွားတာမျိုး မရှိပါဘူး။ ပုံမှန်အားဖြင့်တော့ ဖိုဒါ ဆိုတာမျိုးဟာ ကျွန်တော်တို့ သူ့အထဲမှာ ဘာတစ်ခုမှ သိမ်းထားတာ ရှိမနေရင် ဘာတစ်ခုမှ ဖော်ပြနိုင်မှာ မဟုတ်ပဲ တစ်စုံတစ်ခုကို သူ့အထဲမှာ ပေါင်းထည့်လိုက်မှသာ သူကလည်း သူ့ထဲမှာ ရှိနေတဲ့ ဖိုင်တွေ ဖိုဒါတွေကို ဖော်ပြနိုင်မှာဖြစ်ပါတယ်။

ဒီလိုဆို Documents Library ကရော။ Documents Library ကတော့ ဒီလိုမဟုတ်ပါဘူး။ ဆိုလိုတာက Documents Library ဆိုတာ သူ့ထဲမှာ ဖိုဒါ ဒါမှမဟုတ် ဖိုင်တစ်ခု လာထည့်ထားရင်လည်း သူ့ထဲမှာ ရှိနေတဲ့ ဖိုဒါတွေ ဖိုင်တွေကို ဖော်ပြနိုင်သလို သူ့ထဲမှာ ဘာမှ ထည့်မထားပဲနဲ့လည်း တစ်ခြား partition သပ်သပ် တစ်ခုစီမှာ ရှိနေတဲ့ ဖိုဒါတွေ ဖိုင်တွေကို သူ့ထဲ ရောက်လာအောင် ဆွဲယူထည့်သွင်းထားနိုင်ပါတယ်။ ဒါက ဘာနဲ့ သဘောတရား တူသလဲ ဆိုရင် ကျွန်တော်တို့ Network တွေပေါ်မှာ Share ပေးထားတဲ့ ဖိုဒါတွေ Drive တွေကို ကိုယ့်စက်ထဲကို  Map Network Device အဖြစ် ယူသုံးတာမျိုးနဲ့ ဆင်ပါတယ်။ အခုလို တစ်ခြား Partition အသီးသီးမှာ ရှိနေတဲ့ ဖိုဒါတွေ ဖိုင်တွေကို  Documents Library အောက်ကို Copy ကူးစရာမလိုပဲ ရောက်လာဖို့ ကျွန်တော်တို့ အောက်ဖော်ပြပါ နည်းလမ်းတွေထဲက စိတ်ကူးတည့်ရာ တစ်မျိုးနဲ့ လုပ်ဆောင်ယူလို့ ရပါတယ်။

မိမိအလိုရှိရာ Partition တစ်ခုဆီသွားပြီး နှစ်သက်ရာ ဖိုင်တစ်ခုပေါ်မှာ Right-Click ထောက် > Include in library ကနေ တဆင့် Documents ကိုရွေးချယ်လိုက်ယုံပါပဲ။ ဒါ ပတမနည်းပါ။

ကျွန်တော်တို့ ဒီလိုလုပ်ဆောင်လိုက်ခြင်း အားဖြင့် ဥပမာ ဆိုကြပါစို့ တစ်ခြား Partition တစ်ခုမှာ ရှိနေတဲ့ Meetings ဆိုတဲ့ ဖိုင်က Windows Partitions အောက်က Documents Library အောက်ကို ကော်ပီ ကူးသွားတာမျိုး မဟုတ်ပါဘူး။ Meetings ဖိုဒါက သူ့ Partition မှာပဲ သူရှိနေပြီး ဒီဖိုဒါကိုပဲ ကျွန်တော်တို့က Windows Partition မှာ ရှိနေတဲ့ Documents Library ကနေတဆင့် Access လုပ်နိုင်မှာ ဖြစ်ပါတယ်။

ဒီနည်းနဲ့ မိမိနှစ်သက်ရာ ဖိုဒါကို Documents Library ထဲ ပေါင်းမထည့်ချင်သေးရင်လည်း နောက်တစ်နည်းနဲ့ ပေါင်းထည့်နည်းရှိပါသေးတယ်။ အဲ့ဒီနည်းကတော့ မိမိ အလိုရှိရာ ဖိုင်ရှိရာဆီ ရောက်သွားတဲ့ အချိန်မျိုးမှာ အပေါ်မှာ ရှိနေတဲ့ Include in library ကို နှိပ်ပြီး အဲ့ကနေမှ တဆင့် Documents ကိုရွေးချယ်ပေးလိုက်ယုံပါပဲ။ ဒီနေရာမှာ သီချင်း တစ်ပုဒ်ဖြစ်နေလို့ Music Library ထဲ ပို့ချင်တယ် ဆိုရင်လည်း Include in library ကနေမှ တဆင့် Music ကို ရွေးချယ်ပေးလိုက်ရမှာ ဖြစ်ပါတယ်။ ဒီလို ရွေးချယ်ပေးလိုက်ခြင်း အားဖြင့် ကျွန်တော်တို့ ရွေးချယ်ပေးလိုက်ရာ ဖိုင် ဒါမှမဟုတ် ဖိုဒါဟာ မူရင်းနေရာကနေ တစ်ပြားသားမှ ရွှေ့ပြောင်းမသွားပဲ ကျွန်တော်တို့ ပြောင်းရွှေ့လိုက်ရာ Library အောက်ကို ရောက်ရှိသွားမှာ ဖြစ်ပါတယ်။ ဒီအောက်က ပုံကို ဆက်ကြည့်ပေးပါ။

အားလုံးလုပ်ဆောင်ပြီးသွားပြီ ဆိုရင်တော့ ကျွန်တော်တို့ ရွှေ့ပြောင်းထားခဲ့ရာ Library ထဲကို တစ်ချက် ပြန်သွားကြည့်ပါမယ်။ သူဘာတွေများ ဖြစ်နေပြီလဲ။ အောက်ဖော်ပြပါ အတိုင်းပါပဲ။ ကျွန်တော်တို့ ရွေ့ပြောင်းလိုက်တဲ့ ဖိုင်တွေ သူ့ မူရင်းနေရာကနေ မရွှေ့လျားပဲ ကျွန်တော်တို့ အလိုရှိရာ Library ထဲရောက်ရှိနေတာ တွေ့ရပါပြီ။

တကယ်လို့ ဖိုဒါ သို့မဟုတ် ဖိုင်တစ်ခုခု မှားရွှေ့မိလိုက်လို့ပဲ ဖြစ်ဖြစ် Library ထဲမှာ မလိုအပ်တော့လို့ စာရင်းထဲကနေ ရှင်းထုတ်ပစ်လိုက်ချင်တယ် ဆိုရင်ပဲ ဖြစ်ဖြစ် ဒီအောက်ပါ နည်းအတိုင်း

လုပ်ဆောင်နိုင်ပါတယ်။ သိထားသင့်တာ တစ်ခုက ယခုလို လုပ်ဆောင်လိုက်ခြင်း အားဖြင့် နဂို Partition နေရာမှာ ရှိနေတဲ့ ဖိုင် သို့တည်းမဟုတ် ဖိုဒါကို ဘာတစ်ခုမှ ထိခိုက် သက်ရောက်မှု ရှိမှာ မဟုတ်ဘူး ဆိုတာပါပဲ။ ကျွန်တော်တို့ ဖျက်ထုတ်လိုက်မှာ Library ထဲမှာ ပါဝင်နေတဲ့ Lists ကိုဖျက်ထုတ်လိုက်တာသာ ဖြစ်ပါတယ်။ Library ထဲမှာ ရှိနေတဲ့ မိမိအလိုမရှိရာ ဖိုင်ကို ရှင်းထုတ်ဖို့ အတွက် အောက်ဖော်ပြပါ အဆင့်အတိုင်း လုပ်ဆောင်ပါ။

သက်ဆိုင်ရာ Library ထဲကို ရောက်ရှိတဲ့ အချိန်မှာ locations ဆိုတဲ့ link ကို နှိပ်ပါ။

Library locations ဝင်းဒိုး တက်လာပါလိမ့်မယ်။ သူနေမှ တစ်ဆင့် မိမိအလိုမရှိရာ ဖိုင်ကို ရွေးချယ် remove လုပ်လို့ ရပါပြီ။

Library အသစ်တစ်ခု ဖန်တီးခြင်း

တကယ်တမ်း Library feature ကို သုံးလာပြီ ဆိုတဲ့ အခါ သူပေးထားတဲ့ Documents, Music, Pictures, Videos ဆိုတဲ့ Librarys လေးတွေလောက်နဲ့ ကျွန်တော်တို့ မလုံလောက်နိုင်တော့ပါဘူး။ ကိုယ့်အတွက် အားသန်ရာ သန်ရာ လိုအပ်ရာ Library အသစ်တစ်ခု ဖန်တီးဖို့ မလွဲမသွေ လိုအပ်လာမှာ ဖြစ်ပါတယ်။ ဒီအတွက် ဒီအောက်ဖော်ပြပါ နည်းများအတိုင်း လုပ်ဆောင်ပါ။ Libraries Explorer ထဲမှာ အပေါ်ဘက် bar မှာ ရှိနေတဲ့ New library ဆိုတာကို နှိပ်ပါ။ ဒါဆိုရင် အောက်ဖော်ပြပါပုံလို Library အသစ်တစ်ခု ထွက်လာပြီး မိမိနှစ်သက်ရာ အမည်ပေးလို့ ရပါပြီ။ ဒီမှာတော့ Work Projects ဆိုပြီး အမည်ပေးလိုက်ပါ့မယ်။ 

ကျွန်တော်တို့ ပထမဆုံး အကြိမ်လုပ်ထားတဲ့ Work Projects ဆိုတဲ့ Library

ဆိုတာကို ဖွင့်လိုက်ရင်ပဲ သူက  Partitions အသီးသီးမှာ ရှိနေတဲ့ မိမိအလိုရှိရာ ဖိုင်တွေ  သူ့ထဲကို ပေါင်းထည့်ဖို့ တောင်းဆိုပါလိမ့်မယ်။

Partitions အသီးသီးက ကျွန်တော်တို့ ထည့်သွင်းချင်ရာ ဖိုင်တွေ ဖိုဒါတွေကို ရှာဖြွေပီး Include folder ကို နှိပ်လိုက်ပါ့မယ်။

အခုဆို ကျွန်တော်တို့ ထည့်သွင်းလိုက်တဲ့ ဖိုဒါတွေ New library ထဲရောက်ရှိသွားတာ ခုလို တွေ့မြင်ရပါမယ်။

အခုလို Library အသစ်တစ်ခု ဖြည့်သွင်းလိုက်တာနဲ့ Include in library အောက်မှာလည်း မိမိဖြည့်သွင်းလိုက်တဲ့ New library ကလည်း အလိုလို ဝင်ရောက်သွားမှာ ဖြစ်ပါတယ်။

Network Locations များအား ပေါင်းထည့်ခြင်း

libraries feature ဟာ သုံးစွဲရ လွယ်ကူတာ မှန်ပေမယ့် လိုအပ်ချက်လေး အနည်းအကျဉ်းတော့ ရှိနေပါသေးတယ်။  Microsoft က သူ့လုပ်ထုုံးလုပ်နည်းတွေရဲ့ လမ်းစဉ်တြွေကားမှာ ဖောက်ထွက်လို့ မရနိုင်သေးတာလားတော့ မသိပါဘူး။ ဖိုဒါမှန်သမျှ library ထဲကို ပေါင်းထည့်ဖို့တော့ မစွမ်းဆောင်နိုင်သေးပါဘူး။ library ထဲကို ကျွန်တော်တို့ Loacl drive ထဲမှာ ရှိနေတဲ့ ကြိုက်တဲ့ Partition ဆီက ဖိုင်တွေ ဖိုဒါတွေ ပေါင်းထည့်လို့ ရတယ်၊ နောက်တဆင့် အနေနဲ့ NTFS နဲ့ FAT32 အဖြစ် Format ချထားတဲ့ External USB Drives တွေဆီကနေလည်း library ထဲကို add လို့ရတယ်ဆိုတာ မှန်ပေမယ့် Network ထဲမှာ ရှိနေတဲ့ ရည်ညွှန်းဖော်ပြလို့ မရတဲ့ နေရာတစ်ခုက ဖိုဒါတွေ ဖိုင်တွေကိုတော့ library ထဲကို add လို့ မရသေးပါဘူး။ တကယ်လို့  Network ထဲမှာ ရှိနေတဲ့ ရည်ညွှန်းဖော်ပြလို့ မရတဲ့ နေရာတစ်ခုက ဖိုဒါတွေ ဖိုင်တွေကိုတော့ library ထဲကို ပေါင်းထည့်တဲ့ အခါ သူက ဒီလို ဖော်ပြပါတယ်။

ဒါကတော့ စိတ်ရှုပ်ဖို့ ကောင်းတယ်ဆိုပေမယ့် သူ့ကို ဖြေရှင်းနိုင်မယ့် နည်းလမ်း ရှိပါတယ်။ ဒီအခက်အခဲကို ဖြေရှင်းဖို့ Windows 7 Library Tool ဆိုတာ ရှိနေပါတယ်။ သူ့ကို အသုံးချဖို့ အတွက် Create a new library ဆိုတာကို click ပေးပြီး Network Location ပေါ်က မိမိနှစ်သက်ရာကို Library ထဲကို ဆွဲခေါ်လို့ ရပါပြီ။ 

သူ့မှာ နောက်ထပ် ကောင်းတာလေး တစ်ခုက library နဲ့ သက်ဆိုင်ရာ သင့်တော်မယ့် icons လေးတွေကို ချိန်းပြောင်းပေးလို့ ရတယ် ဆိုတာပါ။ ဒီအောက်က ပုံကို ကြည့်ကြည့်ပါ။

ဒီနေရာမှာ ဥပမာ အနေနဲ့ Home network ထဲမှာ ရှိနေတဲ့ Music ဖိုင်တစ်ခုကို MP3 library လို့ အမည်ပေးပြီး စက်ထဲ ဆွဲထည့်ထားလိုက်ပါတယ်။ 

အနှစ်ချုပ် အနေနဲ့ ပြောရရင် ဒီ အကြောင်းအရာက ကျွန်တော် Windows 7 မှာ ပါဝင်တဲ့ features တွေထဲက တစ်ခု ဖြစ်တဲ့ library အသုံးချပုံကို ဆွေးနွေးချင်တာပါ။ ဒီအကြောင်းအရာကို ဖတ်ပြီးရင် library ကို ဘယ်လို အသုံးချရမယ် ဆိုတာ အတော်အတန် နားလည် သဘောပေါက်သွားမယ်လို့ မျှော်လင့်မိပါတယ်။ ပျော်ရွှင်နိုင်ပါစေ။

KznT.

Paragon Partition Manager

Hard Drive တစ်ခုကို Partition လုပ်တဲ့နေရာမှာ လွယ်လွယ်ကူကူနဲ့ စွမ်းဆောင်ရည်ပြည့် အသုံးချနိုင်တဲ့ Software ကိုပြပါဆိုရင် Paragon Partition Manager ကိုပဲ လမ်းညွှန်ရမယ် ထင်ပါတယ်။ တစ်ယောက်နဲ့ တစ်ယောက် ကြိုက်တာချင်း မတူလို့ ဒါက ပိုကောင်းပါတယ်ရယ်လို့တော့ မဆိုလိုပါဘူး။ ဒါပေမယ့် သုံးဖြစ်သွားရင်တော့ သဘောကျသွားမှာပါ။ ဖိုရမ်မှာလည်း တောင်းထားတာ တွေ့လို့ ကျွန်တော့်မှာ ရှိနေတဲ့ Paragon Partition Manager Professional 9.5 Build 8622 Portable  နဲ့ Paragon Partition Manager 10.0 Express Portable တင်ပေးလိုက်ပါတယ်။ သုံးရတာ အဆင်ပြေပါတယ်။ တစ်ခုကြို အသိပေးချင်တာက Paragon Partition Manager Professional 9.5 Build 8622 Portable က ပိုကောင်းတယ် ဆိုတာပါ။ Paragon Partition Manager 10.0 Express Portable က ကောင်းပေမယ့် Professional Edition မဟုတ်လို့ Features တွေ မစုံလင်ပါဘူး။ Paragon Partition Manager Professional 9.5 Build 8622 Portable က Paragon Partition Manager 10.0 Express Portable ထက် Version တစ်ဆင့်နိမ့်တယ် ဆိုပေမယ့် စွမ်းဆောင်ရည်က Version 10 နဲ့ အပြင်အဆင်ရော စွမ်းဆောင်နိုင်ရည်ရော ဘာမှ ထူးပြီး မကွာလှတာမို့ ဖြစ်နိုင်ရင် Paragon Partition Manager Professional 9.5 Build 8622 Portable ကိုပဲ ကျွန်တော်ကရွေးချယ်စေချင်ပါတယ်။ Portable မို့လို့ Install လုပ်စရာ မလိုသလို တကယ်လို့ Bootable CD လုပ်ချင်ရင်လည်း iso ဖိုင် တစ်ခါတည်း ပါပြီးသားမို့လို့ အခွေရိုက်လိုက်ယုံပါပဲ။ အခွေရိုက်နည်းကတော့ ( ၂ ) နည်းရှိပါတယ်။

( ၁ ) Built-in ပါတဲ့ Function ကနေပြီး Step by Step အခြွေပုလုပ်ခြင်း  နဲ့
( ၂ ) ISO Burner တစ်ခု အသုံးပြု၍ အခြွေပုလုပ်ခြင်း တို့ပဲ ဖြစ်ပါတယ်။



တစ်ခုချင်းစီကို ဒီနေရာကနေ အသေးစိတ် ပြောပြသွားပါ့မယ်။

( ၁ ) Built-in ပါတဲ့ Function ကနေပြီး Step by Step အခွေရိုက်ခြင်း

အဆင့် ( ၁ ) ဒေါင်းလုပ်ချလို့ ရလာတဲ့ ဖိုင်ကို Rar ကနေ ဖြည်လိုက်ပါ။ WinRaR မရှိရင် အောက်ဆုံးမှာ ပေးထားတဲ့ Link ကနေ Download ချလိုက်ပါ။ ဒီအတိုင်း Windows ကနေ ပါလာတဲ့ Function ကနေလည်း ဖြည်လို့ရပါတယ်။

အဆင့် ( ၂ ) Paragon Partition Manager Professional 9.5 Build 8622 ဆိုတဲ့ ဖိုင်ကိုတွေ့ရင် အဲ့ထဲမှာ ပါလာတဲ့ launcher.exe ဆိုတဲ့ ဖိုင်ကို Double-click ပေးပါ။ ဒါဆိုရင် အောက်ကပုံစံ Box တစ်ခု တက်လာပါလိမ့်မယ်။

အဆင့် ( ၃ ) အဲကနေမှ ဘယ်ဘက်မှာ ရှိတဲ့ Menu ကနေ Backup and Rescue ကို Click ပေးလိုက်ပါ။ ဒီအောက်က ပုံ မြင်ရပါလိမ့်မယ်။ အဲကနေမှ တစ်ဆင့် Burn Rescue kit ကို နှိပ်ပါ။

အဆင့် ( ၄ ) အပေါ်က အဆင့်မှာ Burn Rescue Kit ကို နှိပ်လိုက်မယ် ဆိုရင် အောက်မှာ ဖော်ပြထားတဲ့ ပုံကို တွေ့ရပါလိမ့်မယ်။ Next ကို ဆက်နှိပ်ပါ။

အဆင့် ( ၅ ) အထက်က အဆင့်မှာ Next ကို ဆက်နှိပ်ရင် အောက်ဖော်ပြပါ ပုံကို မြင်ရပါလိမ့်မယ်။ အဲဒီ့ကနေမှ တစ်ဆင့် CD/DVD ဆိုတာကို ရွေးပေးပါ့မယ်။ ဘာလို့လဲဆိုတော့ ကျွန်တော်တို့က BootCD လုပ်မှာ မို့လို့ပါ။ တကယ်လို့ ကိုယ့်စက်မှာ CD/DVD ROM မရှိဘူး ဆိုရင်တော့ အပေါ်က Flash Memory ကို ရွေးချယ်ပြီး Bootable Flash တစ်ခုဖြစ်အောင်ဖန်တီးပြီးတော့ သူကနေ တစ်ဆင့် Boot တက်ခိုင်းရမှာ ဖြစ်ပါတယ်။

အဆင့်  ( ၅ ) ဒီအဆင့်မှာ ပုံမှန် လုပ်ထုံးလုပ်နည်းက Typical ကိုပဲ ရွေးချယ်ရမှာပါ။ တကယ်လို့ Advance ကိုရွေးချယ်မယ် ဆိုရင်တော့ လတ်တလောရိုက်ထုတ်မယ့် BootCD အတွင်းမှာ Recovery Options အတွက် တစ်ခြားလိုအပ်မယ့် ဖိုင်တွေ ဖိုဒါတွေကိုပါ ထပ်ဖြည့်သွင်းပြီး ပေါင်းစည်းသွားလို့ ရမှာ ဖြစ်ပါတယ်။ User specified CD/DVD image ( .iso file ) ဆိုတာကတော့ တကယ်လို့ ကိုယ့်မှာ Paragon Partition Manager BootCD တစ်ခု သီးသန့်ရှိနေပြီး သူ Default ပေးထားတဲ့ နေရာမှာ မဟုတ်ပဲ တစ်ခြားတစ်နေရာမှာ ကိုယ်က ထားထားတာ ဆိုရင် Browse ကနေ တစ်ဆင့် ရွေးချယ်ထည့်သွင်းနိုင်ဖို့ပါ။ Copy from a CD/DVD ဆိုတာကတော့ ကိုယ့်မှာ BootCD ရှိပြီးသား တစ်ခုကို နောက်ထပ် ကော်ပီ BootCD တစ်ခု အဖြစ် ပွားယူချင်တဲ့ အခါမှာ သုံးဖို့ပါ။ လောလောဆယ် ကျွန်တော်တို့က ခုနက ဒေါင်းလုပ်ချလို့ ရထားတဲ့ Paragon Partition Manager Professional 9.5 Build 8622 Portable ကို BootCD ဖြစ်အောင် ဖန်တီးမှာ မို့လို့ Typical ကိုပဲ ရွေးချယ်ပြီး Next ကို သွားပါ့မယ်။

အဆင့် ( ၆ ) ကိုယ့်စက်မှာ ရှိတဲ့ Drive ထဲကို BootCD အဖြစ် ရိုက်ထုတ်ဖို့ CD ခွေ အလွတ်တစ်ခု ထည့်လိုက်ပါ။

အဆင့် ( ရ ) ဒီအောက်က အဆင့်ကတော့ အခွေရိုက်ထုတ်ဖို့ အတွက် Destination Drive ရွေးချယ်ပေးတဲ့ အဆင့်ပါ။ တကယ်လို့ ကိုယ့်မှာ Drive က ၂ ခု သုံးခု ရှိနေတယ် ဆိုရင် ကိုယ် CD ထည့်ထားတဲ့ Drive ကို မှန်ကန်အောင်ရွေးချယ်ပေးပြီး Next ကို သွားပါ။

အဆင့် ( ၈ ) ဒီအောက်က အဆင့်ရောက်ရင်တော့ BootCD ရိုက်ထုတ်ဖို့ Drive ရဲ့ Speed ကိုရွေးချယ်ပေးရပါမယ်။ Default အနေနဲ့ Maximum ပေးထားပေမယ့် ဖြစ်နိုင်မယ် ဆိုရင် Speed ကို Minimum နဲ့ ရိုက်ပါ။ ဘာကြောင့်လဲ ဆိုတော့ Maximum နဲ့ ရိုက်မယ်ဆိုရင် အခွေရိုက်နှုန်း မြန်ပေမယ့် CD ရဲ့ Quality ကျတတ်ပါတယ်။ ဆိုလိုတာက ကြာရှည်အသုံးမခံတာ ၊ သုံးတာ များလာရင် Error တက်တာမျိုးတွေ ဖြစ်တတ်ပါတယ်။ Minimum ထားပြီးရင်တော့ Eject the disc after writing ရဲ့ ဘေးက Check box လေးကို အမှန်ခြစ်လေး ပေးထားပါ့မယ်။ ဒါမှ အခွေရိုက်ပြီးကြောင်း သိသာစေမှာပါ။ ဒါက အရေးတော့ မကြီးပါဘူး။ အမှန်ခြစ် မပေးထားလည်း ရပါတယ်။ သဘောပါ။

အဆင့် ( ၉ ) အားလုံးပြီးရင်တော့ Next ပေးပြီး စတင် အခွေရိုက်နိုင်ပါပြီ။ ဒါဆို ကျွန်တော်တို့ လိုချင်တဲ့ Paragon Partition Manager Professional 9.5 Build 8622 BootableCD ရပါပြီ။

( ၂ ) ISO Burner တစ်ခု အသုံးပြု၍ အခြွေပုလုပ်ခြင်း

ဒီနည်းကတော့ တကယ်တမ်း လိုကို မလိုပါဘူး ဘာလို့လည်း ဆိုတော့ ခုနက ပြောခဲ့တဲ့ နည်းမှာပဲ အဆင့် ( ၅ ) မှာ ကြိုက်သလို လုပ်နိုင်တဲ့ နည်းလမ်းတွေ ပါနေတာမို့လို့ပါ။ ဒါပေမယ့် တစ်ချို့ အသုံးပြုသူတွေက အခွေတစ်ခုခု Burn မယ်ဆို Burner လေးနဲ့မှ Burn ချင်ကြပါတယ်။ ဒီ့ အတွက် ဒီအကြောင်းကို ထည့်လိုက်ရတာပါ။ Burner သုံးပြီး ISO ဖိုင်ကို ရိုက်ဖို့ အတွက် အရင်ဆုံးက ဘယ် Burner ကို သုံးမှာလဲ ဆိုတာ အရင် ရွေးချယ်ရပါမယ်။ လူတော်တော်များများ အသုံးများကြတာကတော့ Nero ပါ။ သူက Functions စုံတယ်။ နောက်ပြီး လူအတော်များများ သုံးနေကြတာဆိုတော့ ဘယ်လို အသုံးပြုရမယ် ဆိုတာ ညွှန်ကြားနိုင်တဲ့ သူလည်း များတယ်။ ဒါကြောင့် Nero ကို လူကြိုက်များကြပါတယ်။ ဒါပေမယ့် ကျွန်တော်ကတော့ Nero ကို သိပ်မသုံးဖြစ်ပါဘူး။ ဘာလို့လည်း ဆိုရင်တော့ Nero က Lite Version တွေ သုံးပြန်ရင်ကျတော့လည်း Function က မစုံ။ အပြည့်သုံးပြန်ရင်ကျတော့လည်း Function စုံပေမယ့် HD မှာ နေရာယူတာကများ။ Custom ရွေးတင်လို့ ရပေမယ့်လည်း တစ်ခြား Burner တွေထက်စာရင် နေရာက ပိုယူနေမြဲမို့ ISO ကို Burn မယ်ဆိုရင် ကျွန်တော်ကတော့ သူ့ အစား တစ်ခြား Burner ကို သုံးပါတယ်။ ကျွန်တော် အကြံပေးချင်တာကတော့ ISO ခွေရိုက်မယ်ဆို Magic ISO ဒါမှမဟုတ် Ultra ISO ၊ Power ISO တွေ ကောင်းပါတယ်။ ပေါ့လည်း ပေါ့တယ်။ သုံးလို့လည်း လွယ်တယ်။ စွမ်းဆောင်ရည်လည်း ကောင်းပါတယ်။ ဖိုင်တွေ ဖိုဒါတွေ Data တွေ ရိုက်မယ် ဆိုရင်တော့ Ashampoo တို့  .. စသဖြင့် အဲတာလေးတွေက Free ပေးပြီး သုံးရတာ အဆင်လည်း ပြေပါတယ်။ လောလောဆယ်တော့ ကျွန်တော် MagicISO ကို ညွှန်းပါတယ်။ အောက်ဆုံးက Link ကနေ Download ချပြီး ယူသွားလို့ ရပါတယ်။ အသုံးပြုနည်းကတော့ ..

အဆင့် ( ၁ ) MagicISO ဖိုင်ကို ဒေါင်းလုပ်ချ ဖြည်ပြီး တင်လိုက်ပါ။ ပါလာတဲ့ notepad ကနေ ကီးကိုဖြည့်ပါ။

အဆင့် ( ၂ ) Paragon Partition Manager Professional 9.5 Build 8622 Portable ကို BootCD ဖြစ်အောင် ဖန်တီးဖို့ ဒေါင်းလုပ်ချလို့ ရလာတဲ့ ဖိုင်ကို ပထမဆုံး Rar ကနေ ဖြည်လိုက်ပါ။

အဆင့် ( ၃ ) ပြီးရင် Launcher.exe ကို Double-click ပေးလိုက်တဲ့ အခါ Data ဆိုတဲ့ ဖိုင်တစ်ခု ထွက်ကျလာပါလိမ့်မယ်။ အဲ့အထဲကနေ ဒီ Directory ကိုရောက်အောင် သွားပါ။ ..... \Data\Virtual\MODIFIED\@PROGRAMFILES@\Paragon Software\Partition Manager 9.5 Professional\iso .. ( ဒီနေရာမှာ တစ်ခုသိထားရမှာက အခုညွှန်ပြပေးလိုက်တဲ့ iso ဖိုင်ဟာ အပေါ်မှာ ပြောပြခဲ့တဲ့ ( ( ၁ ) Built-in ပါတဲ့ Function ကနေပြီး Step by Step အခွေရိုက်ခြင်း ) ဆိုတဲ့အဆင့်တွေထဲကနေ အဆင့် ( ၁ ) က ( ရ ) အထိ လုပ်ဆောင်ပြီးမှ iso ဖိုင်အဖြစ် အခုညွှန်ပြထားတဲ့ နေရာမှာ ပေါ်လာမှာ ဖြစ်ပါတယ်။ အစကတည်းက တစ်ခါတည်း ထည့်ပေးလိုက်ပါလား ရှုပ်တီးရှုပ်ရှက်လို့တော့ပြောစရာ ရှိပါတယ်။ ကျွန်တော်က အင်တာနက် သိပ်မကောင်းတဲ့သူတွေ အတွက် ဒေါင်းလုပ်ချရတာ အဆင်မပြေ ဖြစ်မှာ စိုးလို့ပါ။ )

အဆင့် ( ၃ ) အဲနေရာကိုရောက်ရင် bootcd.iso ကို Double-click ပေးပါ။ MagicISO နဲ့ အသင့်တက်လာပါလိမ့်မယ်။ တကယ်လို့ မတက်လာရင်လည်း MagicISO ကိုဖွင့်ထားပြီး File>Open ကနေ တစ်ဆင့် အပေါ်မှာညွှန်ပြခဲ့တဲ့ Directory ရှိရာကို သွားပြီး iso ဖိုင်ကို ရွေးပြီး ဖွင့်ခိုင်းလိုက်ပါ။

အဆင့် ( ၄ ) BootCD ရောက်လာပြီ ဆိုရင် Tools ကနေ Burn CD/DVD with ISO ကိုရွေးပါ။

အဆင့် ( ၅ ) အထက်ဖော်ပြပါ အတိုင်းလုပ်ဆောင်လိုက်ရင် အောက်ဖော်ပြပါ box တစ်ခု တက်လာပါလိမ့်မယ်။ သူကနေမှ တဆင့် အပေါ်ဘက် အနီရောင် စက်ဝိုင်းရဲ့ နေရာကနေ bootcd ရဲ့ တည်နေရာကို ပြန်ညွှန်ပေးပြီး အောက် အနီရောက် အဝိုင်းကနေမှ တဆင့် ကိုယ်ရိုက်မယ့် Drive Speed ကိုရွေးပေးပါ။ ဖြစ်နိုင်ရင် minimum speed နဲ့ ရိုက်ဖို့ တိုက်တွန်းပါတယ်။ အားလုံးပြီးသွားရင် Burn it ကိုနှိပ်လိုက်ပါ။ ဒါဆို ရပါပြီ။

Download Links Here !!

( 1 ) Paragon Partition Manager Professional 9.5 Build 8622 Portable
( 2 ) Paragon Partition Manager 10.0 Express Portable
( 3 ) Magic ISO Maker with Serial

Choosing the Best Linux OS

ကျွန်တော် ဒီနေ့တော့ ကျွန်တော်တို့ရဲ့ Desktop တွေ Laptop တွေ အတွက် Linux Distributions တွေထဲက အသင့်တော်ဆုံး ဖြစ်နိုင်မယ့် Linux OS တွေ အကြောင်း ဆွေးနွေးသွားပါ့မယ်။

ဒီနေ့ခေတ်မှာ Linux လို့ ဆိုတာနဲ့ Distributions တွေ များလွန်းလို့ ဘယ် Linux က သုံးလို့ သုံးသင့်မှန်း တော်တော် ဆုံးဖြတ်ရခက်တဲ့ အခြေအနေမျိုးကို ရောက်နေပါတယ်။ သုံးနေကျ လူကတော့ အကြောင်း မဟုတ်ဘူးပေါ့လေ။ ဆိုးတာက Linux New User တွေ အတွက်ပါ။ ရည်ရွယ်ချက် အမျိုးမျိုးတွေနဲ့ Distros လုပ်နေကြပေမယ့် တစ်ချို့ Linux Distributions တွေက ပေါ့ပေါ့ပါးပါး ( ဥပမာ - Laptop အဟောင်းလေးတွေ ဘာလေးတွေမှာ ဆို ဝင်းဒိုးတင်ထားလို့တောင် မထင်ရလောက်အောင် ပေါ့တာ ) သုံးလို့ ရအောင် ၊ တစ်ချို့ ကျတော့လည်း အသုံးပြုသူ User တွေကို လတ်တလော သုံးနေတဲ့ အဓိက OS ကနေ မစွန့်ခွာစေဘဲ Linux ရဲ့ ကောင်းကျိုးလေးတွေ အရိပ်အမြွတ် မြည်းစမ်းကြည့်စေဖို့ ရည်ရွယ်ချက်နဲ့ Target ထားပြီး လုပ် ၊ အသုံးတည့်မယ့် Software တွေ တစ်ပြုံတစ်ခေါင်း အလကားထည့်ပေးထား မရေမတွက်နိုင်တဲ့ hardware devices တွေအတွက်လည်း Support ပေး ( ဥပမာ - Ubuntu လိုမျိုး ) စသဖြင့် ရည်ရွယ်ချက်တွေနဲ့ ပုံစံမျိုးစုံသုံးပြီး Linux ကို ပုံဖော်နေကြတယ်။ ဘယ်လိုပဲ ဖြစ်ဖြစ်ပါ အလကား ပေးတယ် ဆိုပေမယ့်လည်း စေတနာ ဗလပွနဲ့ လုပ်ဆောင်ချက်တွေ ၊ အနှစ်သာရတွေ တကယ်ပါတာ မို့လို့ Linux ကို တန်ဖိုး မထားပဲတော့ မနေနိုင်ပါဘူး။ ခက်တာက ဒီလို တန်ဖိုးရှိတဲ့ OS တစ်ခု ထိုးဖောက်နိုင်ဖို့ ရုန်းကန်ရတဲ့ အနေအထားပါ။ Linux Distributions တွေက အရမ်းများတော့ Linux စသုံးတော့မယ် လို့ စဉ်းစားလိုက်မိရင် အရင်ဆုံး ဘာလုပ်မလဲ Linux အကြောင်း များများစားစားသိတဲ့သူ ၊ များများစားစားသိသူ မရှိရင် နဲနဲ ပါးပါးသိတဲ့သူ ၊ အဲလိုမှ မရှိရင်လည်း အနဲအကျဉ်းလောက် သုံးဖူးသူ ဒီလိုလူတွေကို မေးရ မြန်းရတယ်။ အဲမှာ ပြဿနာက စတယ်။ တစ်ယောက်က Red Hat ၊ နောက်တစ်ယောက်က SUSE ၊ နောက်တစ်ယောက်က Ubuntu ၊ နောက်တစ်ယောက်က Fedora .. ကဲ ဒီတော့ ကျွန်တော်တို့ ဘာကို ရွေးကြမလဲ ..

မှန်ကန်သော Linux Distro အား ရွေးချယ်ခြင်း

Ubuntu, Xubuntu, Xandros, Knoppix, Fedora, openSUSE စတာတွေက Linux Distros တွေထဲကမှ နာမည်ကြီးတာလေးတွေ ပါ .. ဒါပေမယ့် ဒါ အကုန် မဟုတ်သေးပါဘူး .. Linux Active Distros ပေါင်း ၆၅၀ ကျော် လက်ရှိအချိန်မှာ ရှိနေတယ် ဆိုရင် မိသားစုဝင်များ ယုံနိုင်ပါ့မလား။ အပိုမပြောပါဘူး Distrowatch ကိုသာ သွားကြည့်လိုက်ပါ။ Distrowatch ဆိုတာ နာမည်ကြီး Linux distributions တွေအားလုံးရဲ့ လှုပ်ရှားမှုတွေကို တစ်ချိန်လုံးစောင့်ကြည့် အကဲခတ်နေတဲ့ ဆိုဒ်တစ်ခု ဆိုလည်း မမှားပါဘူး။

အခုအချိန်မှာ မိသားစုဝင်များရဲ့ ကွန်ပြူတာအတွက် လိုချင်တဲ့ Requirements တွေ ကိုက်ညီပြီး အကောင်းဆုံး ဖြစ်နိုင်မယ့် Linux distributions ကို စဉ်းစားပေးရမယ် ဆိုရင် တော်တော် စဉ်းစားရကျပ်ပါလိမ့်မယ် .. ဘာလို့လည်း ဆိုတော့ လူတိုင်းမှာ လိုအပ်ချက်တွေ ၊ စိတ်ဆန္ဒတွေဆိုတာ မနည်းမနော ရှိနေနိုင်ပါတယ်။ အဲ့ဒါကြောင့် လတ်တလော အခြေအနေမှာ ဘယ် Linux distributions က အကောင်းဆုံး ဆိုပြီး ထောက်ပြတာထက် အသုံးပြုမယ့် သူရဲ့ Linux အပေါ် နားလည် တတ်ကျွမ်းမှု ကို လိုက်ပြီး သုံးသင့်သုံးထိုက်မယ့် Linux distributions တွေကို အမျိုးအစား ခွဲပေးသွားပါ့မယ်။

( ၁ ) Linux ကို စမ်းသပ်သဘောမျိုး အနေဖြင့် အစမ်းသုံးဖူးကြည့်ချင်သူများ အတွက်

စမ်းသုံးကြည့်ချင်သူတွေ အတွက်တော့ အကောင်းဆုံးကတော့ ကွန်ပြူတာမှာကို တင်ကို တင်မနေပါနဲ့ ..Knoppix ဆိုတဲ့ Live CD Distributions ကို စမ်းသုံးကြည့်ပါ။ သုံးရတာကလည်း လွယ်ပါတယ်။ CD ရိုက်ပြီး Boot တက်ခိုင်းလိုက်ယုံပါပဲ။ ဘာမှ install လုပ်နေစရာလည်း မလိုပါဘူး။ ဒီ Live CD ကို သုံးပြီး User က Applications တွေကို Run လို့ ရတယ်။ နောက်ပြီး သိမ်းချင်တဲ့ ဖိုင်တွေ ၊ Documents တွေကိုလည်း Live CD ထဲမှာပဲ Created ထားတဲ့ Live CD Session မှာ သိမ်းထားလို့ ရတယ်။ HD နဲ့ Flash Drive လို သဘောပေါ့။

Linux Live CD ဆိုတာ တကယ်လို့ ကိုယ် ကွန်ပြူတာ ရုတ်တရက် Crash ဖြစ်သွားလို့ ကိုယ် မသိမ်းခဲ့ရသေးတဲ့ ဒေတာတွေဘာတွေကို Windows ကို Reinstall ပြန်မလုပ်ခင် သိမ်းလိုက်ချင်တယ် ဆိုရင် သိမ်းလို့ရအောင် လုပ်ပေးနိုင်တယ်။ ဆိုးတာလေး တစ်ခုက Linux Live CD ကိုသုံးတဲ့ အခါ တကယ် fully installed လုပ်ထားတဲ့ Linux distributions ကို သုံးရတာထက်တော့ နှေးနေတတ်ပါတယ်။

တကယ်လို့ Linux Live CD ကိုသုံးပြီး Linux ကိုစမ်းရတာ သိပ်သဘောမကျဘူး .. အရမ်းနှေးတာပဲလို့ ခံစားရတယ် ဆိုရင် နောက်တစ်ဆင့် နဲနဲ ထပ်မြှင့်ပြီး စမ်းကြည့်လို့ ရပါတယ်။ အဲတာကတော့ Wubi ပါ။ Wubi ဆိုတာ Windows တင်ထားတဲ့ ကွန်ပြူတာမှာပဲ ကိုယ့် ဝင်းဒိုးကို ချစရာမလိုပဲ Linux Distributions  ကို တင်ပေးတာပါ။ Partition အသစ်ခွဲပြီး တင်ချင်လည်း ရတယ်။ မခွဲချင်ဘူး ရှုပ်တယ်။ ရှိပြီးသား Partition အဟောင်းမှာပဲ တင်ချင်တယ်ဆိုလည်း ရတယ်။ Install လုပ်ပြီးသွားရင် Duel-Boot နဲ့ ဘယ်ဝင်းဒိုးကို သုံးမှာလဲ မေးတဲ့အချိန် Linux ဆို Linux .. Windows ဆို Windows ရွေးပေးလိုက်ယုံပါပဲ။ သိပ်လွယ်ပါတယ်။ Uninstall လုပ်ဖို့ဆိုလည်း မခက်ပါဘူး .. ကျွန်တော်တို့ တင်နေကျ Windows Applications တွေလိုပဲ Ctrl Panel ထဲ သွားပြီး ဖြုတ်ချလိုက်ယုံပါပဲ။ တစ်ခုရှိတာက Wubi ဆိုတာ Linux တင်ရာမှာ အခက်အခဲ မရှိစေဖို့ အကူအညီပေးတဲ့ Software သာသာ သဘောမျိုးပါ။ သူက Linux OS မဟုတ်ပါဘူး .. Wubi ကိုသုံးပြီး Linux တင်မယ် ဆိုရင် ကောင်းတာကတော့ အရင်ဆုံး ကိုယ်သဘောကျတဲ့ Linux Distributions ထဲက တစ်ခုခုကို ဒေါင်းလုပ်ကြိုချထားပြီး Wubi နဲ့ တစ်ဖိုင်တည်းမှာ တွဲထည့်ထားပြီးမှ install လုပ်တာ အကောင်းဆုံးပါပဲ။ တကယ်လို့ အဲလိုမှ မလုပ်ရင် Wubi ကို Run လိုက်တာနဲ့ သူက Linux တင်ဖို့ ကိုယ်ရွေးပေးလိုက်တဲ့ ( ဥပမာ - Ubuntu ဆို Ubuntu ၊ Xubuntu ဆို Xubuntu ၊ ... ) Linux Distributions  ကို အင်တာနက်နဲ့ ချိတ်ပြီး ဒေါင်းလုပ် အရင်ချမှာပါ။ ပြီးမှ တင်ပေးမှာ။ အဲ့တော့ အင်တာနက် သိပ်မကောင်းတဲ့ အခြေအနေမျိုးမှာဆိုရင် Linux တင်ဖို့ အရမ်းအချိန်ပေးရမယ့် အနေအထားမျိုးကို ရောက်သွားနိုင်ပါတယ်။ Linux ကို စမ်းသပ်သဘောမျိုး အနေဖြင့် အစမ်းသုံးဖူးကြည့်ချင်သူများ အတွက် Wubi နဲ့ တင်တဲ့ အချိန်မှာ Ubuntu ကို ရွေးချယ်ကြဖို့ အကြံပေးလိုပါတယ်။ Ubuntu ကို တစ်ခြား Linux Distributions နဲ့ နိှုင်းယှဉ်ပြီး ဘာကြောင့် Recommended ပေးရသလဲ ဆိုရင် Ubuntu မှာ အချိန်တိုင်းလိုလို သူထုတ်လိုက်တဲ့ Versions တွေ တိုင်းအတွက် တက်သမျှ ပြဿနာတိုင်းကို အမြန်ဆုံး ဖြေရှင်းပေးပြီး ပြင်ဆင်ပေးနေပါတယ်။ နောက်တစ်ချက်က အချိန်အတိုင်းအတာ တစ်ခုနဲ့လည်း Support ပေးနေပါတယ်။ နောက်တစ်ချက်က New User တစ်ယောက် အတွက် မရှိမဖြစ်လိုအပ်တဲ့ အကူအညီတွေ ဖတ်သင့်ဖတ်ထိုက်တဲ့ Online Documentations တွေဆိုတာလည်း အများကြီးကို ရှိနေပါတယ်။

နောက်ထပ် စိတ်ဝင်စားဖို့ ကောင်းတာလေးတွေလည်း ရှိပါသေးတယ်။ Linux ကို စမ်းသပ်ချင်သူတွေ အတွက် အပေါ်က ၂ နည်းလုံး မသုံးပဲ နောက်တစ်နည်း စမ်းသပ်ကြည့်လို့လည်း ရပါသေးတယ်။ အဲတာကတော့

Virtualization Software နဲ့ပါ။ Virtualization Software ဆိုတာတွေထဲကမှ လူသိများတာတွေ ပြောရရင်

Virtual PC ( Microsoft ) ၊ Virtual Box ( Sun ) ၊ နောက် VMware Workstation ဆိုတာတွေပါ။ Linux iso ကို ဒေါင်းလုပ်ချ ၊ ဒါမှမဟုတ် Linux Installer CD တစ်ခုခုကို သုံးပြီး Virtual Machine မှာ သုံးယုံပါပဲ။

( ၂ ) အသစ်အသစ်များအား လက်ကမ်းကြိုဆိုချင်သူ Linux New User များအတွက် ..

GNU/Linux desktop distributions တွေရဲ့ကြားမှာ အသစ်အသစ်များအား လက်ကမ်းကြိုဆိုချင်သူ Linux New User တွေအတွက် လွယ်လွယ်ကူကူ သက်တောင့်သက်သာ နဲ့ အဆင်အပြေဆုံး သုံးစွဲဖို့ သင့်တော်မှာ Linux Mint လို့ပဲ အကြံပေးချင်ပါတယ်။ Linux Mint က Ubuntu ပေါ်မှာ အခြေခံထားပြီး Ubuntu က သူကိုယ်တိုင်အတွက်ကျတော့ Debian ပေါ်မှာ Based on လုပ်ထားပါတယ်။

ဒါကြောင့် New User တစ်ယောက် အနေနဲ့ Linux Mint ကိုသာ သုံးမယ်ဆိုရင် တစ်ချက်ခုတ် ၂ ချက်ပြတ်ဆိုသလို Linux Mint အတွက် ရည်ရွယ်ပြီး ထုတ်တဲ့ Programs တွေ Packages တွေကိုလည်း သုံးလို့ ရမှာ ဖြစ်သလို .. Ubuntu or Debian အတွက် ထုတ်တဲ့ Programs တွေ Packages တွေ ဟာလည်း Linux Mint မှာ အတော်များများ သုံးစွဲလို့ ရလာမှာ ဖြစ်ပါတယ်။

Linux Mint CD တွေက mint4win ဆိုတဲ့ Utility နဲ့ အတူ ထွက်လာတတ်ပြီး သူက Linux ကို ကိုယ့်ရဲ့ Windows တင်ထားတဲ့ ကွန်ပြူတာပေါ်မှာ ရှိတဲ့ တစ်ခြား Partition တစ်ခုမှာ ကိုယ့် နဂိုရှိပြီးသား ဝင်းဒိုးကို တစ်ချက် မထိခိုက်စေဘဲ Install လုပ်ပေးသွားမှာ ဖြစ်ပါတယ်။ တကယ်လို့ သဘောမကျဘူး ဘာညာ ဆိုလည်း Ctrl Panel ထဲကနေ ရိုးရိုး ဆော့ဖ်ဝဲလ် ဖြုတ်သလို ဖြုတ်ချလိုက်ယုံပါပဲ။

နောက် Linux Beginner တွေအတွက် ရွေးချယ်ဖို့ သင့်တဲ့ ရွေးချယ်စရာ နောက်တစ်ခုရှိတာက Ubuntu ( Desktop edition ) ပါ။ ဟိုးအပေါ်မှာ ပြောခဲ့ပြီးသလို Ubuntu က Hardware devices တွေအတွက် ကျယ်ကျယ်ပြန့်ပြန့် Supports ပေးသလို ၆ လတစ်ကြိမ် သူထုတ်ထားတဲ့ Version ကို  ပြင်ဆင်မှု တွေ ရှိနေတာရယ်ကြောင့် သူလည်း ရွေးချယ်သင့်တဲ့ ထဲမှာ ပါနေပါတယ်။ နောက်တစ်ခုရှိတာက တကယ်လို့ အင်တာနက် ကော်နက်ရှင် အရမ်းဆိုးလို့ download ချလို့ မရနိုင်ဘူးဆိုလည်း Ubuntu DVD ကို ရေကြောင်းလမ်းကနေ သယ်ယူပို့ဆောင်ခ စရိတ်လေးလောက်ပဲ ပေးပြီး မှာယူလို့လည်း ရပါတယ်။

နောက်ရွေးချယ်ဖို့ သင့်တဲ့ Linux Distributions လေးတွေ အကြောင်းဆက်ပါဦးမယ်။ သူတို့ကတော့ OpenSUSE ( Novel ) နဲ့Fedora ( Red Hat ) ပါ။ သူတို့တွေကလည်း Free ပေးပြီး သုံးစွဲရလွယ်ကူလို့ လူကြိုက်များကြပါတယ်။

ပိုက်ဆံလေးဘာလေး တတ်နိုင်မယ် ဆိုရင်တော့ Commercial Distros ထဲက Xandros Home Edition လေးကို လမ်းညွှန်ချင်ပါတယ်။ သူကလည်း Linux စတင်သုံးစွဲမယ့် Newbies တွေအတွက်တော့ အသုံးတည့်မယ့် Desktop OS တစ်ခုပါပဲ။ ကောင်းတာ တစ်ချက်က Xandros မှာ CodeWavers ပါတာမို့လို့ Microsoft Office, Adobe Photoshop နဲ့ တစ်ခြား Windows Applications တွေကိုလည်း Xandros မှာ သုံးလို့ ရတယ်ဆိုတာပါပဲ။ သတိတော့ မမေ့ပါနဲ့။ Xandros က Free တော့ မဟုတ်ပါဘူး။ ပိုက်ပိုက်ပေးဝယ်ရမှာပါ။

( ၃ ) Old Computers များတွင် သုံးစွဲသင့်သော Linux Distributions များ

OS တစ်ခုရဲ့ အရည်အသွေးဆိုတာ အသုံးပြုမယ့်စက်ရဲ့ အရည်အသွေးကောင်းမှ အဲ့ဒီ့ OS ကို သုံးလို့ ရနိုင်မယ်ဆိုရင် သိပ်တော့ အဓိပ္ပါယ်မရှိပါဘူး .. လူတစ်ဦးနဲ့ တစ်ဦး ရပ်တည်မှုဘဝချင်း မတူညီကြလို့ တစ်ချို့မှာ အကောင်းဆုံး အညွန့်ဆုံးဆိုတာတွေ ရှိနိုင်ပေမယ့် တစ်ချို့တွေမှာလည်း တော်ယုံသင့်ယုံ အဖြစ်သုံးနိုင်ယုံ လည်ပတ်နေကြရတဲ့ ဘဝမျိုးတွေလည်း အမြောက်အများ ရှိနေပါတယ်။ ဆိုလိုတာက ကိုယ့်မှာ ကွန်ပြူတာတစ်လုံးရှိတယ် RAM ကလည်း သိပ်များများစားစား မရှိဘူး ၊ မော်ဒယ်ကလည်း တော်တော်ဟောင်းနေပြီ ၊ Graphic ကလည်း သိပ်အကောင်းကြီး မဟုတ်ဘူး .. စတဲ့ Hardware Requirements အရမ်းများနေတဲ့  စက်မျိုးတွေအတွက် သင့်တော်မယ့်  Linux Distributions တစ်ချို့နဲ့ ကျွန်တော်မိတ်ဆက်ပေးချင်ပါတယ်။

Puppy Linux ဆိုတာ Live CD distribution တစ်ခုပါပဲ။ သူ့ရဲ့စွမ်းဆောင်ရည်ကတော့ RAM 64 MB လောက်ပဲ ရှိတဲ့ ကွန်ပြူတာတွေမှာ ဆိုရင်တောင် ဒီ Puppy Linux က ကောင်းကောင်း အလုပ်လုပ်နိုင်ပါတယ်။ Puppy Linux ကို တစ်ခြား Media တွေကနေလည်း ( ဥပမာ - USB Flash Drives, CD .. ) Boot တက်ခိုင်းလို့ ရပါတယ်။ တစ်ခု သတိထားသင့်တာက RAM အရမ်းနဲတဲ့ ကွန်ပြူတာမှာ Puppy Linux ကို သုံးရင် RAM ပမာဏ တစ်ခုလုံးကို Puppy Linux က စားထားမှာ မို့လို့ ကိုယ့်ရဲ့ Personal Files တွေထဲက အရေးကြီးတဲ့ ဒေတာ အချိန်းအပြောင်းတွေကို Disk မှာ ပုံမှန် Save လုပ်ပေးသွားဖို့ အကြံပြုချင်ပါတယ်။ အဲလိုမှ ပုံမှန် မလုပ်ဖြစ်ခဲ့ဘူးဆိုရင်တော့ System Shut Down ကျတဲ့ အချိန်မှာ ကိုယ်ဖန်တီး ဖြည့်သွင်းထားသမျှ အချက်အလက်တွေ အားလုံးဆုံးရံှုးသွားနိုင်ပါတယ်။

Xubuntu ဆိုတာလည်း Ubuntu ရဲ့ မျိုးကွဲ တစ်ခုပါပဲ။ Xubun က ပေါ့ပါးတဲ့ xface desktop environment ကိုသုံးထားတဲ့ အတွက်ကြောင့်မို့လို့ Ubuntu မှာပါတဲ့ GNOME ထက် ပိုပြီး system စားသက်သာပါတယ်။ နောက်ပြီး Xubuntu distribution က တစ်နှစ်မှာ ၂ ကြိမ်ထွက်တာမို့လို့ တကယ်လို့ ဒီတစ်မျိုးကို မကြိုက်ရင် နောက်တစ်မျိုး မှာ ပြန်စမ်းကြည့်လို့လည်း ရပါတယ်။

antiX ဆိုတာလည်း Old Computers တွေအတွက် ရွေးချယ်သင့်တဲ့ OS တစ်ခုပါပဲ။ သူ့ကိုတော့ Windows 98 ထွက်ခဲ့တုန်းက စက်မှာတင်လိုက်ရင် လေးသွားတယ်လို့ ထင်ရတဲ့ ( ဥပမာ - Pentium II Series လိုမျိုး ) ကွန်ပြူတာတွေမှာ တောင် သုံးဖို့သင့်တော်ပါတယ်။

နောက်ထပ်သုံးဖို့ သင့်တော်တာတွေကတော့ Damn Small Linux နဲ့ Zenwalk ပါ။ သူတို့ ကလည်း Hardware Requirements တော်တော်နဲတဲ့ Linux Distributions တွေလို့ ပြောလို့ ရပါတယ်။

ဒီအပေါ်က ပုံကတော့ Damn Small Linux ပုံပါ။

ဒီအောက်က ပုံကတော့ Zenwalk ပါ။

( ၄ ) လုပ်ငန်းခွင်တွင် အသုံးပြုသင့်သော Linux Distributions များအကြောင်း

တစ်ခြား စိတ်ဝင်စားစရာ ခေါင်းစဉ် တစ်ခုဘက် လှည့်ရေးနေလို့ ဒီနေ့ ဒီအကြောင်းကို ဆက်ရေးဖို့ ကျွန်တော် နဲနဲ နောက်ကျသွားတယ် .. ကျွန်တော် အရင်ပြောခဲ့ပြီးသလိုပဲ Linux Distributions ပေါင်းမြောက်များစွာ ထဲက လုပ်ငန်းခွင်မှာ အသုံးပြုသင့်တဲ့ Linux Distributions က ဘာဖြစ်မလဲ .. လတ်တလောမှာ လူကြိုက်လည်း များပြီး တကယ်လည်း စွမ်းဆောင်ရည် ကောင်းတဲ့ Linux Distributions ကတော့ Redhat Enterprise Linx နဲ့ SUSE Linux Enterprise Desktop တွေ ဖြစ်ပြီး သူတို့တွေကို ( Novel Linux Desktop ) လို့လည်း လူသိများပါတယ်။ သူတို့ ( ၂ ) ခုကတော့ စီးပွားရေး လုပ်ငန်းသုံးနယ်ပယ်တွေမှာ ရှေ့ဆုံးက ထားရွေးချယ်ကြတဲ့ Linux Distributions တွေဆိုရင်လည်း ဟုတ်ပါတယ်။ ပုံမှန်အားဖြင့်တော့ Redhat ရဲ့ ဦးတည်ချက်က Desktop ဈေးကွက်ထက် Sever ဈေး ကွက်ကို ဦးတည်ခဲ့တာပါ။ နောက်တစ်ခုက Xandros Desktop ကလည်း ရွေးချယ်ဖို့ သင့်တဲ့ Linux Distributions တစ်ခုပါပဲ။ Xandros Desktop အကြောင်းကိုတော့ အပေါ်မှာ ဖော်ပြခဲ့ပြီးပါပြီ။ ဒါပေမယ့် ကုမ္ပဏီလုပ်ငန်း သေးစား လုပ်ဆောင်သူတွေ နဲ့ စီးပွားရေး လုပ်ငန်းကြီးကြီးကျယ်ကျယ် လုပ်ဆောင်သူတွေကတော့ သူ့ထပ်ပိုပြီး တည်ငြိမ်ခိုင်မာတဲ့ Linux Distributions တစ်ခုကိုပဲ ရွေးချယ်ဖို့ အားသန်တာ တွေ့ရပါတယ်။

Red Hat Enterprise Sever, SUSE Enterprise နဲ့ Ubuntu Server တွေကလည်း Sever စက်တွေမှာ သုံးစွဲဖို့ သင့်တဲ့ Linux Distributions တွေပါ။ ဒါပေမယ့် အဲ့တာတွေထဲကမှ Red Hat ကိုပိုပြီး လူကြိုက်များစေတဲ့ အချက်က ရှည်ကြာတဲ့ Security Updates ထားရှိပေးမှု ( ရ နှစ် ) ၊ နောက်ပြီး သူ့ရဲ့ Distros အတွင်းမှာ များပြားလွန်းလှတဲ့ အသုံးဝင် Packages အသစ်တွေ ၊ နောက်ထပ်ရှိသေးတာက  Linux အကြောင်းကို ကျွမ်းကျွမ်းကျင်ကျင် မသိတဲ့ အဖွဲ့အစည်းတွေ အတွက် အသုံးပြုရလွယ်ကူ စေမယ့် စွမ်းဆောင်ရည် ပြည့်ဝတဲ့ Programs တွေ သူ့ Distros တွင်းမှာ များစွာပါဝင်နေလို့ပါပဲ။

( ၅ ) Netbook ကွန်ပြူတာများအတွက် သင့်တော်မည့် Linux Distributions များ

Netbooks ဆိုတာ ပုံမှန်အားဖြင့်တော့ Notebook လိုပါပဲ ဒါပေမယ့် သူ့ရဲ့ Screen က ခပ်သေးသေးနဲ့ Power သုံးစွဲမှု အားကလည်း နည်းသလို သူ့မှာ သိပ်ကောင်းပြီး စွမ်းအားပြည့်ဝတဲ့ Hardware တွေလည်း မပါဝင်ပါဘူး။ Linux Distributions တွေက အဲ့ဒီ့ လိုအပ်ချက်တွေနဲ့ ပြည့်စုံပြီး Netbooks တွေအတွက် သင့်တော်မယ့် Linux Distributions ကို ထုတ်လုပ်ခဲ့ကြပါတယ်။ အဲတာကတော့ လူသိများတဲ့ Ubuntu Netbook, နောက်ပြီး Moblin နဲ့ Jolicloud တို့ပါပဲ။

Ubuntu Netbook က Intel Atom Processor လိုအပ်ပါတယ်။ တကယ်လို့ ကျွန်တော်တို့မှာ Ubuntu Installer ရှိတယ် ဆိုရင် Ubuntu Desktop Version ကိုပဲ ကျွန်တော်တို့ရဲ့ Netbook မှာ တင်လည်း ရပါတယ်။ Ubuntu Netbook မှာတော့ Netbook ဆိုတဲ့အတိုင်း Internet နဲ့ ပတ်သတ်ပြီး သုံးစွဲဖို့ အားလုံးအဆင်ပြေအောင် သူတို့ တစ်ခါတည်း စီစဉ်ပေးပြီးသား ဆိုပေမယ့် Ubuntu Desktop Version ကို Netbook မှာ တင်မယ်ဆိုရင်လည်း Default Repository ကို Ubuntu Network Editor Repository ကို ပြောင်းလိုက်ပြီး လိုအပ်မယ့် Packages တွေကို Install လုပ်နိုင်မှာ ဖြစ်ပါတယ်။ သိပ်အများကြီး မကွာလှပါဘူး။

Jolicloud ကလည်း စွမ်းဆောင်ရည်နိမ့်ကျတဲ့ ( ဆိုလိုတာ Memory ဒါမှမဟုတ် Storage space ) နည်းတဲ့ Netbooks တွေအတွက် အသုံးပြုဖို့ သင့်တော်တဲ့ Linux Distributions တစ်ခုပါ။ သိပ်လြှပီး စွမ်းဆောင်ရည် ကောင်းတဲ့ Jolicloud ရဲ့ တည်ဆောက်ပုံက တစ်ခြား Linux Distributions နဲ့ မတူပါဘူး။ နောက်ပြီး သူက Ubuntu အပေါ်မှာ အခြေခံထားတာမို့လို့ Ubuntu မှာ သုံးလို့ ရသမျှ applications အားလုံးက Jolicloud မှာလည်း ကောင်းကောင်း သုံးလို့ ရမှာ ဖြစ်ပါတယ်။ Jolicloud ကို ကျွန်တော်တို့ လက်ရှိသုံးနေတဲ့ Windows OS နဲ့လည်း အပြိုင်တွဲသုံးလို့ ရသလို ၊ သူ့ ISO ကို Download ချပြီး သီးခြား Partition တစ်ခုမှာ Install လုပ်သုံးစွဲလို့လည်း ရပါတယ်။

Moblin ဆိုတာလည်း Netbooks တွေအတွက် သင့်တော်တဲ့ နောက်ထပ် Linux Distributions တစ်ခုပါပဲ။ Moblin ဟာ တစ်ချိန်က Intel ရဲ့ ကနဦး Project တစ်ခုလည်း ဖြစ်သလို Linux Foundation ရဲ့ အစိတ်အပိုင်း တစ်ခုဆိုလည်း ဟုတ်ပါတယ်။ Moblin ကို ပေါ့ပေါ့ပါးပါး Live USB image ကနေ အသုံးပြုလို့ ရသလို ၊ Netbook မှာ OS တစ်ခု အနေနဲ့လည်း Install လုပ်ပြီး သုံးလို့လည်း ရပါတယ်။

( ၆ ) Power Users များအတွက် သင့်တော်မည့် Linux Distributions များ

Arch Linux ကိုတော့ Linux ကို သုံးစွဲဖူးပြီး အတွေ့အကြုံရှိပြီးသူ နားလည်တတ်ကျွမ်းပြီးသူများ သုံးစွဲဖို့ အကြံပြုချင်ပါတယ်။ Arch Linux မှာ Power user တွေအတွက် အခြေခံအဆင့်ကနေ စပြီး Linux ကို စိတ်ကြိုက်ပုံဖော် Install လုပ်ဆောင်လို့ ရတဲ့ထိ လုပ်ဆောင်နိုင်ဖို့ ခွင့်ပြုထားပါတယ်။ နောက်ပြီး Arch Linux ကို Install လုပ်ပြီးတဲ့ အချိန်မှာ သာမန် Linux တွေလို User အတော်များများနဲ့ ယဉ်ပါးပြီးသား အပြင်အဆင်တွေ ဖြစ်တဲ့ Login Manager Screen တွေ Account creation လုပ်ဆောင်ဖို့ ဆိုတာတွေ ပါဝင်လာမှာ မဟုတ်ပဲ သူတို့ အစား Network တွေ System configuration တွေကို စိတ်ကြိုက် ပြင်ဆင်လို့ ရမယ့် Screen အပြည့် Configuration ဖိုင်တွေ ပါဝင်လာမှာ ဖြစ်ပါတယ်။ အဲ့ဒီကနေ ကိုယ်အလိုရှိရာ သုံးချင်ရာကို စိတ်ကြိုက်ရွေးချယ် ပြုပြင်သုံးစွဲလို့ ရသွားမှာ ဖြစ်ပါတယ်။ သူရဲ့ ရည်ရွယ်ချက်ကတော့ Linux အသုံးပြုသူ user တွေကို အခြေခံကနေ စပြီး system တစ်ခုလုံးကို မိမိစိတ်ကြိုက် ပြုပြင်ပုံသွင်းလို့ ရတဲ့ထိ လုပ်ဆောင်ပိုင်ခွင့် ပေးအပ်ချင်တာမျိုး ဖြစ်ပြီး တကယ်လို့ မလိုအပ်ဘူး ထင်တာတွေကို ထုတ်နှုတ်ပယ်ဖျက်သွားနိုင်ဖို့ လည်း ဖြစ်ပါတယ်။ ဒါပေမယ့် သိကြတဲ့ အတိုင်း user အများစုက ကိုယ်လိုချင်တာကို ပြင်ယူပြီး သုံးကြရတာထက် ကွန်ပြူတာကို ခလုတ်စဖွင့်လိုက်ကတည်းက ကိုယ့်စိတ်ကြိုက် တွေချည်းပါပြီး အသုံးတည့်မယ့် ဝင်းဒိုးမျိုးကို လိုချင်ကြတာမို့လို့ သာမာန် စမ်းသပ်သုံးစွဲချင်သူ user တစ်ယောက် အတွက်တော့ တော်တော်စိတ်ရှုပ်ဖို့ ကောင်းမယ့် distro တစ်ခု ဖြစ်ကောင်း ဖြစ်နေနိုင်ပါတယ်။ အဲဒါကြောင့် ဒီ distro ကို Power user အောက်မှာ ထည့်သွင်းထားတာပါ။

နောက်တစ်ခုကတော့ ..

Slackware ဆိုတာကလည်း ဒီခေါင်းစဉ်အောက်မှာထည့်သွင်း သင့်မယ့် distro တစ်ခုလို့ ထင်ပါတယ်။ Arch Linux နဲ့ နှိုင်းယှဉ်ရမယ် ဆိုရင် - Slackware Linux က ပိုငြိမ်ပြီး အပြောင်းအလဲနဲတဲ့ packages တွေ ဖြည့်ဆည်းပေးနိုင်တယ်လို့ သုံးသပ်ရပါတယ်။ အဲကြောင့်မို့လည်း တစ်ခုခုဆို ပြောင်းရရွှေ့ရ သိမ်းရဆည်းရ မလုပ်ချင်ပဲ တစ်သတ်မတ်တည်း ငြိမ့်ငြိမ့်အေးအေး သုံးချင်တဲ့ သူတွေကတော့ Slackware ကို ရွေးချယ်ကြတာ များပါတယ်။ ဒါပေမယ့် Arch Linux ကတော့ Users တွေရဲ့ လိုအပ်ချက်ကို လိုက်ပြီး ပိုအသုံးတည့်မယ့် Packages တွေ ထုတ်ပေးနေတယ် ဆိုတာကလည်း မမေ့ထားသင့်ပါဘူး။ အခြားတစ်ဖက်မှာလည်း Slackware အတွက် လိုအပ်တာ အားလုံးပါဝင်ပြီးသား 3rd party packages တွေကိုလည်း သူ့ မူရင်း ဆိုဒ်မှာပဲ တစ်လက်စတည်း Download ချနိုင်အောင် စီစဉ်ပေးထားပါသေးတယ်။ ဒါပေမယ့် သူက Linux distro တွေထဲကမှ အဟောင်းဆုံးသည်သာ အကောင်းဆုံးဆိုတဲ့ စံနမူနာ ထုတ်ထားတာတွေပါ။ ရည်ရွယ်ချက်က User အတွက် သူ့ distro ကို မြန်မြန်ဆန်ဆန် ချောချောမွေ့မွေ့ Error နည်းနည်းနဲ့ သုံးစွဲနိုင်ဖို့ကိုပဲ ဦးတည်ပါတယ်။ အဲတော့ တစ်ခု စဉ်းစားရမှာက ဟောင်းတိုင်းလည်း မကောင်းဘူးပေါ့ဗျာ ဆိုတဲ့ စကားပါ။

ရည်ညွှန်းကိုးကားရာ နေရာများ

• List of Linux  Distributions  - ကျွန်တော်တို့ အတွက် ဒီနေရာကနေ များပြားလွန်းတဲ့ Linux Distro တွေအကြောင်း လေ့လာလို့ ရသလို လူသိများ ကျော်ကြားတဲ့ Linux Distro တွေရဲ့ အသေးစိတ် အချက်အလက်တွေနဲ့ သူတို့ရဲ့ Screenshot images တွေကိုလည်း လေ့လာလို့ ရပါတယ်။

• Netbook Distro - Linux Distro တွေထဲက Netbook အကြောင်း အသေးစိတ်ညွှန်းဆိုပြထားတဲ့ နေရာတစ်ခု ဖြစ်ပါတယ်။

• Linux Distribution Chooser – သူကတော့ အင်တာနက်ကနေမှ တဆင့် Linux အသုံးပြုသူ user တွေအတွက် မှန်ကန်သင့်လျှော်မယ့် Linux Distro တွေကို ရွေးချယ်နိုင်အောင် အစဉ်အမြဲ ကူညီပေးနေတဲ့ နေရာ ဖြစ်ပါတယ်။
• Comparison of Linux distributions – ဒီနေရာကနေပြီး အမျိုးမျိုးကွဲပြားနေတဲ့ Linux Distro တွေရဲ့ နည်းပညာပိုင်းဆိုင်ရာ ကွဲပြားခြားနားချက်တွေ၊ ဘယ် Processor နဲ့ support ဖြစ်သလဲ ၊ ဘယ် distro ပေါ်မှာ အခြေခံထားသလဲ စသဖြင့် ပြည့်ပြည့်စုံစုံ သိနိုင်တဲ့ နေရာ ဖြစ်ပါတယ်။
• Linux Releases – ဒီနေရာကနေပြီး အသစ်အသစ်ပေါ်ထွက်လာတဲ့ Linux Distro တွေအကြောင်း နားစွင့်နိုင်ပါတယ်။
• Linux Gaming – တကယ်လို့ ကျွန်တော်တို့ Linux ကို သုံးပြီး ဂိမ်းကစားမယ်ဆိုရင် ဒီနေရာကနေ တဆင့် နာမည်ရှိလူသိများပြီး Linux မှာ ကစားလို့ ရမယ့် ဂိမ်းတွေ အကြောင်း လေ့လာနိုင်ပါတယ်။