Google Body Browser

Google chrome ရဲ့ အသုံးဝင်ပုံ အကြောင်းကို နိုင်သလောက်လေး ဖြေးဖြေးချင်း ပြောမယ်ဆိုပြီး အစပျိုးထားခဲ့ပေမယ့် အဲ့ဘက်ကို သိပ်မလှည့်ဖြစ်ဘူး - ဖိုရမ်ရဲ့ သဘောက ကိုယ်ရေးချင်တာချည်းပဲရေးပြီး သူများမေးတာတွေကို ဖြေမပေးပဲ နေလို့ ရတာမျိုး မဟုတ်တော့ တစ်ခါ တစ်လေ စာရေးချင်စိတ် ရှိနေပေမယ့် မေးခွန်းတွေနောက် လိုက်ရင်း စာရေးဖို့ ပေးထားတဲ့ အချိန်ကို အမေးတွေ အတွက် ပေးလိုက်ရတာမျိုး ရှိပါတယ် - အဲ့တာကြောင့် ကျွန်တော်လည်း စိတ်ပဲရှိပြီး ထင်သလောက် စာကို မရေးနိုင်သေးဘူး -

ဒီလိုနဲ့ပဲ ဖြေးဖြေးချင်း သွားရမှာပဲ - ကျွန်တော်တို့မှာ အချိန် ရှိပါသေးတယ် - အဲတာကြောင့် ဒီနေ့ နည်းပညာနဲ့ သိပ်မဆိုင်တဲ့ ခန္ဓာဗေဒ အကြောင်းလေး နဲနဲ မိတ်ဆက်ပေးချင်ပါတယ် - ခန္ဓာဗေဒ ဆိုလို့ အထင်တွေ မှားကုန်ဦးမယ် - ကျွန်တော်က ဆေးပညာနဲ့ ပတ်သတ်လာရင် ကျွမ်းကျင်တာဆိုလို့ တစ်ယောက်ယောက် တစ်ခုခု ဖြစ်တယ် ကြားတာနဲ့ အိတ်ထဲဆောင်ထား သမျှ ဆေးတွေ အကုန်ထုတ်ပြီး တိုက်တတ်တဲ့ အမူအကျင့်လေးပဲ ရှိပါတယ် :P

အခု မိတ်ဆက်ပေးချင်တဲ့ ခန္ဓာဗေဒ ဆိုတာက ကျွန်တော်တို့ နေ့တိုင်း အင်တာနက်ထဲ ဟိုသွားဒီသွား သွားဖို့ သုံးနေတဲ့ web browser ကို သုံးပြီး ကိုယ့် ခန္ဓာကိုယ်ထဲက ဘယ်နေရာတွေမှာ ဘာတွေရှိလဲ - သူတို့တွေရဲ့ အခေါ်အဝေါ်တွေက ဘာတွေလဲ ဆိုတာကို လေ့လာလို့ ရမယ့်နည်းလေး တစ်ခုပါ - ဒီလို လေ့လာနိုင်ဖို့ ဘယ်သူတွေ ဖန်တီးထားလဲဆို Google က ဖန်တီးထား ပါတယ် - Google ရဲ့ Project တွေကိုတော့ တော်တော်ချီးကျူးပါတယ် - ကမ္ဘာကြီး တစ်ခုလုံးမှာ ပင်လယ်ရေအောင် ကြမ်းပြင် ကနေ စလို့ - ဟိုးကမ္ဘာ့အမြင့်ဆုံး တောင်ထိပ်တွေထိ တစ်နေရာ မကျန် လေ့လာလို့ ရနိုင်အောင် သူကြိုးစား ပေးထားတယ် -  အခုလည်း ခန္ဓာဗေဒနဲ့ ပတ်သတ်ပြီး ခြေလှမ်းသစ်တစ်ခု စတင်လိုက်ပြန်ပါပြီ - သူကတော့ Google Body Browser ပါ -

Google Body Browser ဆိုတာ ကျွန်တော်တို့နဲ့ အကျွမ်းတဝင် ရှိပြီးသား Google Earth ပုံစံမျိုး လူ့ ခန္ဓာကိုယ် အတွင်းက အရိုး - အကြော - ကလီစာ ကနေ စလို့ အာရုံကြော အဖွဲ့အစည်း - ခန္ဓာကိုယ် သွေးလည်ပတ်မှု အဖွဲ့အစည်းတွေထိ အားလုံးကို 3-D model နဲ့ လေ့လာနိုင်အောင် ဖန်တီးပေးထားတဲ့ Body Browser ပါ -

ဒီအောက်မှာ ကျွန်တော် နမူနာ ပုံလေးတွေ နဲနဲ ဖော်ပြချင်ပါတယ် - ဒါက အမျိုးသမီး တစ်ယောက်ပါ -

လူ့ ခန္ဓာကိုယ်က သိပ်စိတ်ဝင်စားဖို့ ကောင်းတယ် - သူ့ရဲ့ အပေါ်ယံဖွဲ့စည်းမှုက နေ့တိုင်း ကျွန်တော်တို့တွေ တစ်ယောက်နဲ့ တစ်ယောက် တွေ့နေရတာမို့လို့ ထူးထူးခြားခြား စိတ်ဝင်စားစရာ မကောင်းလှပေမယ့် ကျွန်တော်တို့ မမြင်ရတဲ့ ခန္ဓာကိုယ်ရဲ့ အတွင်းပိုင်းထဲမှာ အဖွဲ့အစည်းတွေ အားလုံးက အချိန်နဲ့ အမျှ တစ်စက်ကလေး အနားမရပဲ သူတို့တာဝန်ကို သူတို့ ကျေပွန်အောင် ထမ်းဆောင်ပေးနေကြတယ် -

ဖြေးဖြေးချင်း ပြောင်းလဲ သွားတဲ့ အနေအထားပါ - နောက်တစ်ဆင့်မှာ ပို အသေးစိတ်သွားပြီ -

ကိုယ့် ခန္ဓာကိုယ်ထဲမှာ ဒါတွေ ရှိနေပါလားဆိုတာ တစ်ခါတစ်လေ မေ့တောင်နေမိတယ် - သူတို့တွေက ကိုယ် အသက်ရှင်ရပ်တည် နိုင်ဖို့အတွက် စက္ကန့်နဲ့ အမျှ တာဝန်ကျေကျေ ထမ်းဆောင်ပေးနေကြတယ် - ဒါပေမယ့် ကျွန်တော်တို့ လူသားတွေကတော့ သူတို့အပေါ် တာဝန်မကျေကြဘူး - သူတို့ လက်မခံနိုင်တဲ့ ဆေးလိပ်ဆိုတာတွေ သောက်ကြတယ် - အရက်ဆိုတာတွေ မျှောချကြတယ် - ကိုယ့်အပေါ် တာဝန် မကျေတဲ့ သူတစ်ယောက်အပေါ် သူတို့ တာဝန်ကျေကျေ ထမ်းဆောင်မပေးနိုင်တာ ကျွန်တော်တို့ အပြစ်ပြောစရာ မရှိဘူး -

တစ်ခုချင်းစီရဲ့ အခေါ်အဝေါ်တွေကို ဖော်ပြထားသလို လေ့လာနိုင်သေးတယ် -

လောလောဆယ်မှာ Google Body Browser က Google Labs အဆင့်မှာပဲ ရှိသေးလို့ အများကြီး ပြည့်စုံပြီလို့ မဆိုနိုင်သေးပါဘူး - နောက်ပိုင်းမှာ ဒီ့ထက်ပိုပြီး ပြည့်စုံလာဖို့ မျှော်လင့်ရပါတယ် - Google Body Browser ကို သုံးပြီး ခန္ဓာဗေဒ ကိုလေ့လာဖို့ အတွက် WebGL ကို Support ပေးတဲ့ browser တစ်ခုခု စက်မှာ install လုပ်ထားဖို့ လိုပြီး - ဒီအောက်မှာ ဖော်ပြထားတဲ့ Browser တွေက WebGL ကို Support ပေးပါတယ် -

1. Chrome beta
2. Firefox 4.0b7

တစ်ခြား Builds တွေကို ဒီအောက်မှာ ယူနိုင်ပါတယ် -

• Linux 32-bit: http://build.chromium.org/f/chromium/continuous/linux/LATEST/
• Linux 64-bit: http://build.chromium.org/f/chromium/continuous/linux64/LATEST/
• Mac OS X: http://build.chromium.org/f/chromium/continuous/mac/LATEST/
• Windows: http://tools.google.com/dlpage/chromesxs (the Chrome Canary Build)

ပုံတွေနဲ့ ပြထားတာ အားမရလို့ Google Body Browser ရဲ့ အသုံးချပုံကို အသေးစိတ် လေ့လာချင်သေးသူများ အောက်မှာ ဖော်ပြထားတဲ့ Video clip လေးကို ကြည့်ကြည့်ပါ -

သူ့ကို ကြည့်ပြီးရင် နောက်တစ်ဆင့် အနေနဲ့ ကိုယ်တိုင်လေ့လာဖို့ ဒီနေရာကနေ >> Google Body Browser ကို သွားပါ - လေ့လာကြည့်ပါ - ( အပေါ်မှာ ဖော်ပြပေးထားတဲ့ Browser တွေနဲ့ပဲ ကြည့်လို့ ရပါလိမ့်မယ် )

လေ့လာနိုင်သမျှ မျှဝေနိုင်ကြပါစေ -

KznT.