Pinguy OS - Distro Review

Ubuntu ဟာ ကျွန်တော် အချစ်ဆုံး Linux distros တွေထဲက တစ်ခုပါ - ဒီ Ubuntu ကြောင့်ပဲ Linux ကို စပြီး ခြေချဖြစ်ခဲ့တယ်။ ဒီ Ubuntu ကြောင့်ပဲ Open Source ရဲ့ သဘောသဘာဝနဲ့ ရပ်တည်ပုံကို နားလည်လာခဲ့တယ်။ Ubuntu ကို ကျွန်တော် ဘယ်တော့မှ ဘယ်အကြောင်းနဲ့မှ စွန့်ခွာသွားမှာ မဟုတ်ပါဘူး။ တစ်ချို့တွေက Linux မှာ ဘာ distros သုံးလဲလို့ အချင်းချင်း မေးကြရင် Ubuntu သုံးပါတယ်လို့ ကျွန်တော် ပြောတဲ့အခါ တစ်ဖက်လှဲ့ နှာခေါင်းရှုံ့ချင်ကြတယ်။ Linux မှာ ဘာသုံးလဲမေးရင် တစ်ခြား လူသိပ်မသိတဲ့ / လူအများ သိပ်မသုံးနိုင်သေးတဲ့ Distros တစ်ခုခုသုံးပါတယ်လို့ ပြောမှပဲ ဆရာကျသလိုလို။ တစ်ခြား Distros သုံးလေ့ မရှိပါဘူးလို့ ပြောရင်ပဲ Linux လောကမှာ လူရာမဝင်တော့သလိုလို။

တကယ်တော့ ဘယ်လိုမှ မသက်ဆိုင်ပါဘူး။ ကျွန်တော့်ရဲ့ ယုံကြည်ချက်ကတော့ လွယ်တာကိုသုံးလည်း ဒီ OS ပါပဲ။ ခက်တာကို ပြင်သုံးလည်း ဒီ OS ပါပဲ။ အဓိကက ကိုယ်လုပ်နေတဲ့ အလုပ်နဲ့ ကိုယ့်ဘဝ ရပ်တည်ရာ လမ်းကြောင်းပေါ်က အဆင်အပြေဆုံး ဖြစ်မယ့် OS တစ်ခုကို မှန်မှန်ကန်ကန် ရွေးချယ်အသုံးပြုနိုင်ဖို့ကိုပဲ ကျွန်တော် အမြဲ ဦးတည်ပါတယ်။ လူသိပ်မသိတဲ့ / လူအများ သိပ်မသုံးနိုင်သေးတဲ့ Distros တစ်ခုခုကို သုံးနိုင်မှ လူရာဝင်မယ်ဆိုရင်တော့ ဒီတစ်သက် ကျွန်တော် လူဖြစ်လာနိုင်မှာ မဟုတ်ပါဘူး။

Ubuntu နဲ့ အတူနေလာတာကြာလာတော့ ကျွမ်းကျင်တယ်လို့ မဟုတ်ပေမယ့် လုပ်ထုံးလုပ်နည်း တော်တော်များများကို ကျွန်တော် တီးမိခေါက်မိရှိလာခဲ့ပြီ။ အဲ့မှာ ဘာကို သွားသတိထားမိလဲ ဆိုတော့ ယဉ်ပါးနေတဲ့ User တစ်ယောက်အတွက် Ubuntu တင်ပြီးနောက်ပိုင်း ပြင်ဆင်စရာ ရှိတာတွေကို ပြင်ဆင်ရတာ ဘယ်လောက်မှ ပြဿနာ မရှိပေမယ့် အလေ့အကျင့် မရှိသေးတဲ့ သူတစ်ယောက်အတွက် ဆိုရင်တော့ လမ်းညွှန်ချက်တွေ ဘယ်လောက်ပဲ များနေပါလေ့စေ စိတ်ရှုပ်စရာကောင်းတာ အမှန်ပါ။ နောက်ပြီး လမ်းညွှန်ချက်ဆိုတာတွေကလည်း အမြဲတမ်း Windows လိုမျိုး Next - Next နဲ့ သွားနေတာမျိုး မဟုတ်တော့ တစ်ခါလာ တစ်မျိုးပြောင်းနေတတ်တဲ့ Command line တွေကို End users တွေအနေနဲ့ အမြဲလိုက်မှတ်နေဖို့ဆို အခက်အခဲ ရှိလာပါတယ်။ ဒီနေရာမှာ တစ်ခုပြောစရာရှိတာ Software သွင်းတာများ Command line ကို ဘာလို့သုံးစရာရှိလဲ - Ubuntu Software Center ကြီး တစ်ခုလုံး ရှိနေတာပဲလို့ ပြောစရာရှိပါတယ်။ Apps တွေကို install လုပ်ဖို့ အတွက် Ubuntu Software Center ကိုကြီးပဲ အစဉ်သဖြင့် အားကိုးလို့ မရပါဘူး - တစ်ချို့ ကိုယ်သဘောကျပြီး သုံးလေ့ရှိတဲ့ Apps တွေက Ubuntu Repositories ထဲမှာ မရှိတာတွေ ရှိတယ်။ အဲ့အချိန်ကျရင် Command line ဆိုတာကပါလာပြီ။ ဒါတင်မကသေးဘူး Ubuntu Repositories ထဲမှာ ရှိနေတဲ့ apps တွေဆိုတာ version အသစ်တစ်ခုပြောင်းမှ တစ်ခါပြောင်းတာမျိုးမို့လို့ Ubuntu Software Center ထဲမှာ ရှိနေတဲ့ Apps ကိုပဲ သုံးနေမယ်ဆိုရင် ခြောက်လအတွင်းမှာ ပြောင်းလဲသွားတဲ့ Apps ရဲ့ နောက်ဆုံးထွက် Versions တွေကို ကိုယ်က မသုံးရတော့တဲ့ အခြေအနေမျိုး ဖြစ်သွားတတ်ပါတယ်။ အဲ့အချိန်ကျပြန်ရင်လည်း ကိုယ်သုံးနေတဲ့ Apps ကို latest version ဖြစ်အောင် လုပ်ဖို့က Command line ဆိုတာ ပါလာပြန်ပါပြီ။ ဒါတွေက Linux သမားတိုင်း ကြုံဖူးကြမယ့် အခက်အခဲ တစ်ခုပါ။

ဒီလို ပြဿနာမျိုးတွေဆိုတာ ဝါသနာကြီးသူတွေ - စိတ်ရှည်သူတွေ - ကလိချင်သူတွေအတွက် အကြောင်းမဟုတ်ပေမယ့် လေ့လာခါစ linux ကို အခြေချခါစ သူတစ်ယောက်အတွက် ဆိုရင်တော့ တကယ့် ပြဿနာကြီးဆိုတဲ့ စာရင်းထဲမှာ သူ့ကို ထည့်တွက် ရပါလိမ့်မယ်။ Ubuntu တစ်ခါ တင်တင်ပြီးတိုင်း အသင့်သုံးလို့ ရတယ် ဆိုပေမယ့် ကိုယ့်စိတ်ကြိုက် ဖြစ်အောင် Tweak လုပ်ရတာတွေ များများလာတဲ့ အခါ ကျွန်တော်လည်း တစ်ခါတစ်လေတော့ ကိုယ့်ကိုယ်ကိုယ် သနားမိတယ်။ ဟိုဟာလိုသွင်းရ - ဒီဟာလိုရှာရနဲ့ဆိုတော့ လူပီသစွာနဲ့ ဒီ့ထက် သက်သာမယ့် နည်းလမ်းလေးများ မရှိနိုင်တော့ဘူးလား ဆိုပြီး လိုက်ရှာမိလာတယ်။ ပွင့်ပွင့်လင်းလင်း ပြောရရင်တော့ အများကြီး ပြင်ဆင်စရာမလိုပဲ အသက်သာဆုံးနဲ့ အသင့်သုံးလို့ ရနိုင်မယ့် OS မျိုးများ နောက်ထပ် မရှိတော့ဘူးလားပေါ့ - အသိတော်တော်များများကတော့ ကျွန်တော့်ကို Linux Mint သုံးဖို့ Recommend ပေးပါတယ်။ Linux Mint ကို ကျွန်တော် သုံးဖူးပါတယ်။ သဘောလည်း ကျပါတယ်။ ဒါပေမယ့် မကောင်းတဲ့ တစ်ချက်က ကျွန်တော် Ubuntu fun ဖြစ်နေတာပါ။ Ubuntu fun ဖြစ်နေတော့ နောက် Distros တစ်ခု ပြောင်းသုံးပါလားလို့ ပြောလာရင် ခဏလောက် စမ်းကြည့်ဖြစ်ပေမယ့် နောက် Ubuntu ဆီပဲ ပြန်ပြန်ရောက်လာခဲ့တာပဲ။

အဲ့လိုနဲ့ အနေကြာလာလိုက်တာ ဟိုတစ်လောက WebUpd8 မှာ စာသွားဖတ်ရင်း PinguyOS ဆိုတာနဲ့ ရင်းနှီးခဲ့တယ်။ တွေ့တွေ့ချင်းတော့ ဒီလောက် စိတ်မဝင်စားလှပါဘူး။ ဒါပေမယ့် WebUpd8 က စာရေးသူတွေက စာရေးကောင်းတယ်ဗျ။  စာဖတ်သူ ဘာရှာသလဲ - စာဖတ်သူ ဘာလိုချင်သလဲ ဆိုတာ သူတို့ ကောင်းကောင်းသိတယ်။ သူရေးထားတဲ့ PinguyOS အကြောင်း ပို့စ် လေး ငါးခုလောက် ဖတ်ပြီးသွားတော့ နဲနဲ စိတ်ဝင်စားသလိုလို ဖြစ်လာတာနဲ့ သူ့မူရင်း ဝက်ဘ်ဆိုဒ်ကို လိုက်သွားလိုက်တယ်။ အဲ့မှာ ဘာသွားတွေ့လဲဆိုတော့ PinguyOS နဲ့ ပတ်သတ်ပြီး သူတို့ရဲ့ ဖော်ပြချက်ကို တွေ့ခဲ့ရတယ်။

Quote:

This OS is for people that have never used Linux before or for people that just want an out-of-the-box working OS without doing all the tweaks and enhancements that everyone seems to do when installing a fresh copy of Ubuntu or other Linux based Distro's.

သူ့ဖော်ပြချက်ထဲက -

1. အရင်က Linux မသုံးခဲ့ဖူးသူတွေ
2. များများစားစား tweaks မလုပ်ချင်သူတွေ
3. Ubuntu တင်ပြီးတိုင်း အဆင့်မြှင့် ပြင်ဆင်ချက် မလုပ်ဆောင်ချင်သူတွေ

ဆိုတဲ့ အချက်သုံးချက်ကို တွေ့တော့ တော်တော်လေး ကျေနပ်သွားတယ်။ ကျွန်တော် ရှာနေတာ ဒီလိုကောင်မျိုး သေချာတာပေါ့။

အရေးအကြီးဆုံး တစ်ချက်ကျန်သေးတယ် - အဲ့တာက Pinguy OS ဆိုတာ Ubuntu ပေါ်မှာ အခြေပြုထားပြီး repositories တွေ ထပ်ပေါင်းဖြည့်ထားတယ် ဆိုတဲ့ အချက်။ ဒီအားသာချက်ကြောင့် Ubuntu တင်ပြီးကာမှာ repositories လိုက် add ရတဲ့ရန်ကနေ တော်တော်များများ ငြိမ်းသွားသလို - Ubuntu installed လုပ်အပြီးမှာ Default အနေနဲ့ ပါမလာတဲ့ မဖြစ်မနေ ကျွန်တော်တို့သုံးနေကျ Apps တွေကိုလည်း Pinguy OS ထဲမှာ အသင့်ထည့်ထားပေးပြီးသား ဖြစ်နေတာ ကျွန်တော် တွေ့ခဲ့ရတယ်။ ဥပမာအနေနဲ့ ပြောရရင် Dropbox, Docky, VLC, Elementary-Nautilus, Shutter, စသဖြင့် တကယ်အသုံးဝင်ပြီး လူကြိုက်များတဲ့ Apps တွေတော်တော်များများကို သေသေချာချာ စီစစ်ပြီး ထည့်ထားပေးတာ တွေ့ခဲ့ရတယ်။ အောက်မှာ တွေ့ရတဲ့ ပုံတွေက ကျွန်တော် Pinguy OS ကို LiveCD အနေနဲ့ ဝင်ကြည့်ထားတဲ့ ပုံတွေပါ။

Themes အနေနဲ့ ဆိုရင်လည်း လူကြိုက်အများဆုံး Elementary themes တွေ တစ်ခါတည်း ပါပြီးသား။

System tools အောက်ကို ကြည့်ဦးမလား - သုံးရသိပ်လွယ်တဲ့ Ubuntu Tweak တို့ - Virtual box တို့က အသင့်။

Internet အောက်မှာ ဆိုရင်လည်း Skype, TeamViewer, Deluge, .. အစုံထည့်ထားပေးတယ်။

Accessories အောက်မှာ ဆိုရင်လည်း Conky, Docky, Shutter .... အားလုံးဖြည့်ထားပေးတယ်။

အဲ့တော့ Ubuntu မှာ Apps တစ်ပုံတစ်ခေါင်းတင်ပြီး သုံးသုံးနေကြတဲ့ ကျွန်တော်တို့တွေ ဘာကြောင့် Pinguy OS ကို မစမ်းရဲရမှာလဲ။ ကျွန်တော်တော့ သုံးရလွယ်တာရယ် အားလုံးနီးပါး အသင့်ပြင်ဆင်ပေးထားပြီးသား ဖြစ်နေတာရယ်ကြောင့် ခုနောက်ပိုင်း မဖြစ်မနေ ရွေးချယ်စရာ တစ်ခုခု ရှိလာမယ်ဆိုရင် Ubuntu ပြီးရင် Pinguy OS ကိုပဲ 2nd Choice အနေနဲ့ ရွေးချယ်မိမယ် ထင်တယ်။ မိသားစုဝင်များရော - ဘယ် Distros တွေကိုများ စိတ်တိုင်းကျကြပါသလဲ။ မိသားစုဝင်များရဲ့ အမြင်များကို ကျွန်တော် သိချင်လှပါတယ်။

KznT.