About Google SE

ကျွန်တော်ကတော့ အင်တာနက်ထဲမှာ ရှာစရာရှိလာတဲ့ အခါ Google ကိုသုံးပြီးပဲ ရှာလိုက်တာပဲ။

ဒီစကားက အရပ်သုံးစကားတစ်ခုလို သုံးသပ်မယ်ဆိုရင် မှားယွင်းတဲ့ စကားတစ်ခွန်း မဟုတ်ပေမယ့် နည်းပညာ နယ်ပယ်ထဲက ကြည့်မယ် ဆိုရင် ဒီစကားဟာ အနည်းငယ် လွဲမှားနေသလို ရှိနေပါတယ်။ ဘာကြောင့် ဒီစကား ပြောနိုင်လဲ ဆိုပါရင် Google မှာ လုပ်ငန်းတာဝန် ထမ်းဆောင်နေတဲ့ Engineer - Matt Cutts ကနေ ခုလိုရှင်းပြခဲ့ပါတယ်။

ကျွန်တော်တို့ အင်တာနက်ထဲမှာ Google ကို သုံးပြီး ရှာဖွေတဲ့ အခါ ကျွန်တော်တို့ World Wide Web တစ်ခုလုံးထဲကို လှည့်ပတ်မွှေနှောက်ပြီး ရှာဖွေနေတာမျိုး မဟုတ်ပါဘူး။ Google ကို သုံးပြီး အင်တာနက်ထဲမှာ ရှာဖွေနေတယ် ဆိုတာ အင်တာနက် စာမျက်နှာပေါင်း မြောက်များစွာထဲကနေမှ Google ကနေရှာဖွေစုဆောင်း ညွှန်းဆိုထားတဲ့ Google Index ထဲမှာ ရှိနေတဲ့ စာမျက်နှာတွေပေါ်ကနေသာ ရှာဖွေနေခြင်းသာ ဖြစ်ပါတယ်။ ဒါကြောင့် Google Index ထဲမှာ ပါဝင်တဲ့ Website တွေဆိုတာ အမှန်တကယ် အင်တာနက်ပေါ်မှာ တည်ရှိနေတဲ့ Wesite တစ်ခုချင်းစီအရေအတွက်နဲ့ ကိုက်ညီမှု မရှိသလို Websites တိုင်းဟာလည်း Google Index ရဲ့ ရည်ညွှန်းကိန်းထဲမှာ ပါဝင်နေမှာ မဟုတ်ပါဘူး။

ကျွန်တော်တို့ ဒီ Google Index ကို ဘယ်လို ဖန်တီးလုပ်ဆောင်ထားပါသလဲ .. ကျွန်တော်တို့ ဒါကို ဖန်တီးဖို့ အတွက် Spiders လို့ ခေါ်တဲ့ Software တစ်မျိုးကို အသုံးချခဲ့ပါတယ်။

Spiders ရဲ့ လုပ်ဆောင်ပုံကတော့ သူဟာ ပထမဦးဆုံး အနေနဲ့ web pages အနည်းငယ်ကို စတင်စုဆောင်းပါတယ်။ အဲ့ဒီ့ နောက်မှာတော့ သူစုဆောင်းရရှိလာခဲ့တဲ့ web pages တွေပေါ်မှာ ရှိနေတဲ့ လာရောက်ချိတ်ဆက်ထားတဲ့ Links တွေကနေ တစ်ဆင့် ထပ်မံခြေရာခံပြီး တစ်ခြား web pages တွေကို ထပ်မံ စုဆောင်းပါတယ်။ အဲ့နောက်ကနေမှ တဆင့်ထပ်ပြီး နောက်ထပ်ရရှိလာတဲ့ web pages တွေအပေါ်မှာ ပါရှိလာတဲ့ သူ့ကို လာရောက်ချိတ်ဆက်ထားတဲ့ Links တွေကနေ နောက်တဆင့်ထပ်မံ ခြေရာခံပြီး တစ်ခြား web pages တွေကို ထပ်မံ စုဆောင်းပြန်ပါတယ်။ ဘယ်လောက်ထိတောင် စုဆောင်းသလဲ ဆိုရင် User တစ်ယောက်ယောက်ကနေ သက်ဆိုင်ရာ အကြောင်းအရာတစ်ခုခုကို ရှာဖွေလိုက်တဲ့ အခါမှာ အသင့်ခေါ်ယူ ညွှန်းဆိုနိုင်လောက်တဲ့ ပမာဏ ရတဲ့ထိ ဘီလီယံနဲ့ ချီတဲ့ web pages တွေကို သောင်းနဲ့ချီတဲ့ စက်တွေပေါ်မှာ သိမ်းဆည်း သိုလှောင်ထားပါတယ်။

လုံလောက်တဲ့ ပမာဏ ရလာပြီပဲ ဆိုကြပါဆို့။ ကျွန်တော်သိချင်တဲ့ အကြောင်းအရာတစ်ခုခုကို Google ကိုသုံးပြီး ရှာဖွေလိုက်တဲ့ အခါမှာ ဘယ်လောက် အမြန်နှုန်းနဲ့ ရှာဖွေသလဲ ဆိုတာ ကျွန်တော် စမ်းသပ်ကြည့်ချင်ပါတယ်။ အဲတာကြောင့် Search box ထဲမှာ ကျွန်တော်က Cheetah running speed ပြီးတော့ ကျွန်တော် Enter ကို နှိပ်လိုက်ပါတယ်။ အဲလို Enter ကို နှိပ်လိုက်တဲ့ အချိန်မှာ ကျွန်တော်တို့ရဲ့ software က ကျွန်တော်တို့ ရှာဖွေစုဆောင်းထားတဲ့ Index တွေရှိရာဆီ အရောက်သွားပြီး စာမျက်နှာတစ်ခုချင်းစီပေါ်ကနေမှ တဆင့် ကျွန်တော် ခုနက ရှာဖွေခိုင်းလိုက်တဲ့ Cheetah running speed ဆိုတဲ့ စာလုံးတွေ ပါမပါ ပထမဆုံး စတင် ရှာဖွေစစ်ဆေးပါတယ်။

ဒီလိုအခြေအနေမှာ ဖြစ်နိုင်ချေဆိုတာ Web pages ဆိုတာ သောင်းနဲ့ချီအောင် တည်ရှိနေနိုင်ပါတယ်။ ဒါကို ကျွန်တော်တို့ တိကျတဲ့ အဖြေ သို့တည်းမဟုတ် ရှာဖွေသူလိုချင်တဲ့ အနီးစပ်ဆုံး ရလာဒ် အဖြေဖြစ်အောင် စစ်ထုတ်နိုင်ဖို့ လိုလာပါတယ်။ ဒါကို ကျွန်တော်တို့ ဘယ်လိုစီစဉ်ပါမလဲ ?? ရှာဖွေသူလိုချင်တဲ့ အနီးစပ်ဆုံး ရလာဒ် အဖြေဖြစ်နိုင်ဖို့ အတွက် မြောက်များစွာသော web pages တွေရဲ့ ကြားထဲက စစ်ထုတ်ရရှိလာတဲ့ သောင်းနဲ့ချီတဲ့ web pages တွေကို ကျွန်တော်တို့က မေးခွန်းတွေနဲ့ ထပ်မံ စစ်ထုတ်ယူပါတယ်။ ဘယ်လိုမေးခွန်းမျိုးတွေလဲ ဆိုတာ ဥပမာ အနေနဲ့ ပြောရရင်

• ရှာဖွေသူ လိုချင်တဲ့ keywords တွေ စာမျက်နှာပေါ်မှာ အကြိမ်ဘယ်လောက်များများ ပါဝင်နေသလဲ -

• နောက်ထပ် အဲဒီ့ keywords တွေ Web pages ပေါ်က Title တွေထဲမှာ သို့တည်းမဟုတ် .. URL ထဲမှာ .. ဒါမှမဟုတ် အနီးစပ်ဆုံး နေရာတွေမှာများ ပါဝင်နေပါသလား ..
• ဒါ့တင်မက ဒီစကားလုံး keywords တွေနဲ့ စာလုံးချင်းကွဲပြီး သဘောတရားချင်းဆင်တူတဲ့ စာလုံးမျိုးတွေများ အဲ့ဒီ web pages တွေပေါ်မှာများ ပါဝင်နေသေးသလား
• သက်ဆိုင်ရာ keywords တွေ ပါဝင်နေတဲ့ web pages ဟာ လူသိများ ထင်ရှားတဲ့ Quality websites တွေက လာတာလား သို့တည်းမဟုတ် လူသိနည်းပြီး အရည်အချင်း မပြည့်မှီသေးတဲ့ Low quality sites တွေဆီကနေ လာတာလား …

• အဲ့ဒီ Sites တွေရဲ့ PageRank ကရော ဘယ်လောက်လဲ … စသဖြင့် အသေးစိတ် စစ်ဆေးယူပြီး ရှာဖွေသူလိုချင်တဲ့ အနီးစပ်ဆုံး ရလာဒ် အဖြေဖြစ်လာနိုင်ဖို့ စစ်ထုတ်ယူပါတယ်။ ဒီနေရာမှာ PageRank ဆိုတာကို စိမ်းနေသူတွေ အတွက် အတိုချုံးပြီး ရှင်းပြချင်ပါတယ်။ PageRank ဆိုတဲ့ Formula ဟာ Google founders တြွေဖစ်တဲ့ Larry Page နဲ့ Sergey Brin တို့ တွေ့ရှိထားတဲ့ web pages တစ်ခုရဲ့ အရေးပါပုံ ဖြစ်ပြီး သူ့ကို ဘယ်လိုသတ်မှတ်သလဲ ဆိုရင် သက်ဆိုင်ရာ Web pages တစ်ခုဆီကို ပြင်ပကနေ Links ဘယ်နခုလောက် လာရောက်ချိတ်ဆက်ထားလဲ ဆိုတာရယ် အဲဒီ့ Links တွေဟာ အင်တာနက်အပေါ်မှာ ဘယ်လောက်ထိ အရေးပါလဲ ဆိုတာရယ် အပေါ်မှာ မူတည်ပြီး ဆုံးဖြတ်ပါတယ်။ နောက်ဆုံးမှာတော့ ကျွန်တော်တို့ ဒီ အချက်အလက်တွေ အားလုံးကို အသုံးချပြီး ဖြစ်နိုင်ချေရှိတဲ့ ရလာဒ်တွေကို စာတစ်မျက်နှာတည်းမှာ စုပေါင်းလိုက်ပါတယ်။ ရလာတဲ့ ရလာဒ်နဲ့ အတူ ရှာဖွေသူ ဆီကို သူ Enter ကို နှိပ်ပြီး နောက် ခန့်မှန်းခြေ စက္ကန့်ဝက်အကြာလောက်မှာ ပို့လွှတ် လိုက်ပါတယ်။

ဒီလိုနည်းနဲ့ ကျွန်တော်တို့တွေဟာ အင်တာနက်ပေါ်မှာ ရှာဖွေဖို့ ခက်ခဲတာတွေကို Google Index တွေထဲကနေ တဆင့် ရှာဖွေနေကြတာပါ။ ဒါအကြောင်းအရာ အပြည့်အစုံကြီး မဟုတ်သေးပါဘူး။ Google ရဲ့ အခြေခံလုပ်ဆောင်ပုံ လေးပဲ ဖြစ်ပါတယ်။

ဒါကြောင့် နည်းပညာနဲ့ ပတ်သတ်ပြီး စစ်မှန်တဲ့ စကားကိုပြောကြမယ်ဆိုရင် -

• ကျွန်တော်တို့တွေဟာ Google ကိုသုံးပြီး အင်တာနက်ထဲမှာ ရှာဖွေနေတာ မဟုတ်ပါဘူး။
• Google ကိုသုံးပြီး Google index ထဲမှာ ရှိနေတဲ့ web pages တွေထဲကနေမှ ကျွန်တော်တို့ အလိုရှိရာ web pages တွေကို ရှာဖွေနေတာသာ ဖြစ်ပါတယ်။
  

ဒီအကြောင်းအရာနဲ့ ပတ်သတ်ပြီး အသေးစိတ်လေ့လာချင်သေးမယ် ဆိုရင် ဒီစာမျက်နှာမှာ သွားရောက်လေ့လာနိုင်ပါတယ်။

MF မိသားစုဝင်များ အားလုံး ဗဟုသုတ တိုးပွားနိုင်ကြပါစေ။

KznT.